O Jodikdik in M̧aanje Ejenolo̧k
Anij ej lōke eok, ajri ro in bujen eo, n̄an jipan̄ kōn jerbal eo An n̄an bōktok aolep ajri ro Nejin n̄an kapijuknen eo Ippān.
Elder Stevenson, menin emaron̄ in juon epepen eo jāmin meļo̧kļo̧ke.
Baam̧le eo am ekōn aolep iien lem̧ōņōņō kōn juon bok edik kar ņa etan Children’s Letters to God. Erkein rej jejjo iaer:
“Iakwe Anij, ijello̧kin kōtļo̧k an armej mej im kōļotak ro rekāāl, etke kwojjab baj dāpij wōt ro me ewōr ippam̧ kiiō?”
“Ekōjkan an wōr wōt am̧ jon̄oul kien ko, ak jikuuļ eo am̧ ewōr milieņ?”
“Etke kwar likūt tonsil ko ilowa eļan̄n̄e kwonaaj kar bar būki?”
Rainin ejjeļo̧k iien n̄an uwaake aolepān kajjitōk kein, bōtaab ewōr bar juon kajjitōk emakijkij aō ron̄ jān jodikdik ro me ikōņaan kōnono kake. Jān Ulaanbaatar, Mongolia, n̄an Thomas, Idaho, kajjitōk in ejjab oktak: “Etke? Etke Armej ro Rekwojarjar ilo Raan Ko Aliktata eaikuj oktak aer mour jān ro jet?”
Ijeļā epen n̄an oktak—eļap tata n̄e kwoj jodikdik wōt im kanooj lukkuun kōņaan bwe armej ro jet ren kōņaan kwe. Aolep rej kōņaan uwaan kumi, im ikdeelel jab in ej ļapļo̧k ilo jekjek ko rejjab ājmour ilo laļ in rainin eobrak kōn social media ilo digital im kōjerbal intōrnet n̄an kakkure.
Kōn menin, kōn aolepān kilep jab kein, etke Armej ro Rekwojarjar ilo Raan Ko Āliktata ekanooj oktak aer mour? Elōn̄ uwaak ko rem̧m̧an: Kōnke kwoj juon ajri nejin Anij. Kōnke kar kōjparok eok n̄an raan ko āliktata. Kōnke kwoj juon rikaļoor an Jisōs Kraist.
Ak uwaak ko rejjab aolep iien kōjenolo̧k eok. Aolep kajjojo ej juon nejin Anij. Aolep kajjojo ioon laļ in kiiō kar jilkintok n̄an ijin ilo raan ko āliktata. Im aaet ejjab aolep rej mour kōn Naan in Māletlet ak kien erreo ilo wāween eo kwoj kajjieon̄ n̄an. Elōn̄ rikaļoor ro an Kraist reperan me rejjab membōr in Kabun̄ in. Bōtaab rejjab jerbali mijen ko im kōm̧m̧ani kain̄i ko ilo im̧ōko im̧ōn Irooj ilo etan ro jibūm̧ im jim̧m̧am̧ āinwōt kwe. Ej aikuj wōr men eļapļo̧k n̄an kōm̧m̧ane—im ewōr.
Rainin ikōņaan pedped ioon bar juon un me ekar ļap meļeļe in ilo mour eo aō. Ilo 1988 eo juon Rijiļōk edik kar etan Russell M. Nelson ekar kwaļo̧k juon ennaan ilo Brigham Young University kar ņa etan “Kam̧m̧oolol kōn Bujen eo.” Ilo e, Elder Nelson ekar kōmeļeļeik bwe n̄e jej kōjerbal anemkwoj eo ad n̄an kōm̧m̧an im kōjparok bujen ko ad ippān Anij, jemaron̄ erom rijolet ro an bujen eo indeeo Anij ekar kōm̧m̧ane ippān rūtto ro ad ilo aolep epepen. Ilo bar juon wāween ba, jej erom̧ “ajri in bujen eo.” Menin ej kōjenolo̧k kōj jān ro jet. Menin ej letok n̄an kōj maron̄ n̄an bōk ejja kōjeraam̧m̧an ko wōt ro jim̧m̧ad im jibūd raar būki, ekoba juon m̧aanje.
M̧aanje Kwomaron̄ kar ron̄ naan jab in. Em̧ool jej al kake: “O jodikdik in m̧aanje ejenolo̧k, wōnm̧aanļo̧k, wōnm̧aanļo̧k, wōnm̧aanļo̧k!” Ej juon naan in kipel. Ak ta meļeļe in?
Ilo tōre ko an Kallim̧ur M̧okta eļan̄n̄e juon jemān ej mej, m̧aanje ļaddik eo nejin ekar eddo n̄an kōjparok jinen im leddik ro jatin. Ļaddik ro jatin rej bōk jolet eo aer im ilo̧k n̄an mour ippāer make, bōtaab m̧aanje eo ejjab etal n̄an jabdewōt jikin. Emaron̄ m̧are im wōr an baam̧le make, bōtaab ej pād wōt m̧ae jem̧ļo̧k in raan ko an n̄an peek men ko m̧weien jemān. Kōnke kōn eddo in kar kobaikļo̧k, kar leļo̧k n̄an e elōn̄ļo̧k jolet n̄an e. Ekar ke juon jerbal eļap kajjitōk kake n̄an tōl im lale ro jet? Ejjab n̄e kwoj ļōmņak kōn elōn̄ļo̧k jolet kar leļo̧k n̄an e.
Rainin jab kajjitōk ippād kōn laajrak in ļotak eo ad ilo baam̧le ko ad laļ in ak jerbal ko an nemem eo aer ilo Kallim̧ur M̧okta. Jej kōnono kōn jolet eo kwoj bōke āinwōt juon rijolet ippān Kraist kōnke kōn bujen jemjera eo kwoj kāālete n̄an delo̧n̄ Ippān im Jemam̧ ilo Lan̄. Ekanooj ke ļap n̄an Anij n̄an kōtmene kwe n̄an mour oktak jān ajri ro jet Nejin bwe en em̧m̧anļo̧k am̧ tōl im jerbal n̄an er? Ejjab n̄e kwoj ļōmņak kōn kōjeraam̧m̧an ko—jim̧or ilo kanniōk im jetōb—me kar liwaj n̄an kwe.
Am̧ m̧aanje ej ke meļeļe in kwom̧m̧anļok jān ro jet? Jaab, bōtaab ej meļeļe in kōtmene eok n̄an jipan̄ ro jet em̧m̧anļo̧k. M̧aanje eo am̧ ej ke meļeļe in kar kāālet eok? Aaet, bōtaab kar jab kāālet n̄an irooj ioon ro jet; kar kāālet eok n̄an jerbal n̄an er. M̧aanje eo am̧ ej ke kein kam̧ool kōn iakwe eo an Anij? Aaet, bōtaab eo aorōkļo̧k, ej kein kam̧ool kōn lōke eo An.
E juon men n̄an iakwe im men eo bar juon ej n̄an lukkuun lōke. Ilo N̄an Kōkajoorļo̧k Jodikdik ro unin tōl eo, jej riit: “Jem̧ōm ilo Lan̄ ej lōke eok. Em̧ōj an lewaj n̄an eok eļap kōjeram̧m̧an, ekoba tarlep in gospel eo im kain̄i im bujen ko rekwojarjar eo ej kapen kwe n̄an E im boktok kajoor eo An n̄an mour eo am̧. Kōn kōjeram̧m̧an kani ej koba tok eddo ko. E ejeļā ke kwomaron̄ kōm̧m̧ane juon oktak ilo laļ in, menin aikuj, ilo elōn̄ wāween ko, oktak jān laļ in.”
Imminene eo ad ilo mour in emaron̄ keidi n̄an juon tim̧a in jam̧bo eo me Anij ekar jilinļo̧k aolep ajri ro Nejin ilo aer ilo̧k jān juon marijet n̄an bar juon. Tūrep eo eobark kōn iien ko rem̧m̧an n̄an katak, eddōk, m̧ōņōņō, im wōnm̧aanļo̧k, bōtaab ebar āinwōt obrak kōn kauwōtata ko. Anij ej iakwe aolep ajri ro Nejin im ej inepata kōn ineem̧m̧an eo aer. E ejjab kōņan luuji jabdewōt iaer, kōn menin E ej karuwaineneik ro me rej m̧ōņōņō in erom ro uwaan kumi eo An—ej kwe. Kōnke kōn kāālet eo am̧ n̄an kōm̧m̧an im kōjparok bujen ko, E ej lewaj n̄an kwe lōke eo An. E ej lōke eok n̄an oktak, ainjuon, im jenolo̧k kōnke kōn jerbal eo aorōk Ej lōke eok n̄an kōm̧m̧ane.
Ļōmņak kake menin! Anij ej lōke kwe—iaan aolep armej ro ioon laļ in, ajri ro in bujen eo, ro uwaan kumi eo An—n̄an jipan̄ kōn jerbal eo An n̄an bōktok aolep ajri ro Nejin n̄an kapijuknen eo Ippān. Ebaj porā an kar Būreejtōn Brigham Young kar ba, “Aolep enjeļ ro ilo lan̄ rej kalimjōk armej rein.”
N̄e kwoj lale ipeļakūm̧ ioon tim̧a in jam̧bo eo ņa etan laļ in, kwomaron̄ lo armej ro jet rej jijet ilo jea ko ilo lounge eo rej kadōk, kaām̧bōl ilo casino ko, kōņak nuknuk ko me rekanooj toojlo̧k, etale talboon ko aer ejjeļo̧k jem̧ļo̧kin, im joļo̧k eļap iien ikkure kōn electronic game ko. Bōtaab ijello̧kin bwilōn̄, “Etke ijjab maron̄ kōm̧m̧ane?,” kwomaron̄ keememej bwe kwojjab juon bajinjea bajjōk. Kwoj juon membōr in kumi eo. Ewōr am̧ eddo ko me bajinjea ro ejjeļo̧k aer. Āinwōt an Sister Ardeth Kapp kar ba juon iien, “Kwojjab maron̄ rikōjparok[mour] eļan̄n̄e kwoj āinwōt riaaō ro jet ilo jikin tutu ko.”
Im m̧okta jān am̧ ebbweer kōn aolep eddo ko jet, jouj im keememej bwe ro uwaan kumi eo rej bōk juon men eo me bajinjea ro jet rejjab: ņa wōņāān. Elder Neil L. Andersen ekar ba, “Ewōr juon kajoor in ņa wōņāān ilo jetōb n̄an jim̧we,” ekoba “kam̧ool eo eļapļo̧k, kapene eo eļapļo̧k, im lōke eo eļapļo̧k.” Āinwōt Ebream eo etto, kwoj bōk eļapļo̧k m̧ōņōņō im aenōm̧m̧an, eļapļo̧k jim̧we, im eļapļo̧k jeļā. Wōņāān eo am̧ ejjab baj jidik in juon jidik ilo lan̄ im iaļ ko kar piji kōn kooļ. Enaaj kar pidodoļo̧k n̄an Jemedwōj Ilan̄ n̄an baj lewaj n̄an eok aolep men ko ewōr Ippān. An ikdeelel ej n̄an jipan̄ eok n̄an erom lukkuun wōt E. Kōn menin, kallim̧ur ko am̧ rej kōtmene eļapļo̧k jān kwe kōnke en̄in ekōjkan an Anij kōm̧m̧an bwe kwon bōk eļapļo̧k.
Ej “juon men eļap n̄an kajjitōk jān jabdewōt, bōtaab kwojjab baj jabdewōt”! Kwoj jodikdk in m̧aanje ejenolo̧k. Bujen jemjerā eo am̧ ippān Anij im Jisōs Kraist ej juon jemjerā in iakwe im lōke ilo eo kwoj maron̄ bōk juon ļamļam eļapļo̧k an jouj eo Aer—jipan̄ eo Aer ekwojarjar, menin letok kwojarjar an kajoor, im kajoor in kōmaron̄ eo. Kajoor jab in ejjab baj juon kōņaan elmakote naaj waļo̧k, juon kein kōjōban, ak kanaan an juon make. Ej m̧ool in.
Ilo am̧ kakūrm̧ool eddo ko an m̧aanje eo am̧, kwoj jamin make iaam̧. Irooj in jikin kallib eo ej jerbal ippam̧. Kwoj jerbal aeran doon ippān Jisōs Kraist. Ilo an bujen kāāl ko kōm̧m̧an—im ilo an jemjerā eo am̧ Ippān m̧wilaļļo̧k—edimļo̧k im dimļo̧k ami jibwe doon m̧ae iien edim ami jibwe doon. Ilo kakōļļe kwojarjar eo kōn jouj eo An, kwonaaj lo jim̧or ikdeelel eo im kajoor eo n̄an lukkuun mour ilo jekjek eo Rilo̧mo̧o̧r eo kar mour—oktak jān laļ in. Kwar bōk menin kōnke Jisōs Kraist ej rejtake eok!
Ilo 2 Nipai 2:6 jej riit, “Kōn menin, lo̧mo̧o̧r ej itok ilo im kōn Messaia Ekwōjarjar; bwe E eobrak kōn jouj im m̧ool.” Kōnke E ej obrak kōn m̧ool, E ej lo eok āinwōt am̧ lukkuun—irļo̧k ko, m̧ōjņo ko, ajļo̧k ko, im aolep men. Kōnke E eobrak kōn jouj, E ej lo eok āinwōt am̧ maron̄ lukkuun. E ej ioon eok ijo kwoj pād ie im ej jipan̄ eok ukweļo̧k n̄an em̧m̧anļo̧k, anjo̧ im erom.
“O jodikdik in m̧aanje ejenolo̧k, wōnm̧aanļo̧k, wōnm̧aanļo̧k, wōnm̧aanļo̧k!” Ij kam̧ool bwe rej iakwe eok—im rej lōke eok—rainin, ilo 20 iiō ko, im n̄an indeeo. Kwon jab wia kake m̧aanje eo am̧ n̄an m̧ōn̄ā. Kwon jab aji men ko raorōk n̄an men ko ejjeļo̧k tokjāer. Kwon jab kōtļo̧k an laļ in ukōt eok ke kwar ļotak n̄an ukōt laļ in. Ilo etan Jisōs Kraist, amen.