Juon wōt Ippān Jisōs Kraist: Erom̧ Jo̧o̧l in Laļ
Ilo ad pād wōt im juon wōt ippān Irooj, mour ko ad renaaj make kwaļo̧k meram eo An, im jenaaj erom̧ jo̧o̧ļ in laļ.
Rilo̧mo̧o̧r ekar katakin bwe n̄e jej“ bōk kūr n̄an gospel eo [An] ejjeļo̧k jem̧ļo̧kin, im kōm̧man bujen kōn juon bujen ejjeļo̧k jem̧ļo̧kin, [jej] āinwōt jo̧o̧ļ in laļ.” Jo̧o̧ļ ej kōm̧m̧an jān ruo men ko rej juon wōt ippān doon. Jejjab maron̄ erom̧ jo̧o̧ļ n̄an kōj make; eļan̄n̄e jej maron̄ erom̧ jo̧o̧ļ in laļ, jej aikuj juon wōt ippān Irooj, im men eo in ij loe ilo aō iaio̧ ippān membōr ro ilo Kabun̄ in ipeļaakin laļin—ij lo membōr ro retiljek an Kabun̄ in rej juon wōt ippān Irooj, dim ilo kijejeto ko aer n̄an jerbal n̄an ro jet im erom̧ jo̧o̧ļ in laļ.
Kijejeto eo am̧ ej juon waanjon̄ak in romaak. Jerbal in jipan̄ eo am̧ jej kam̧m̧oole im nebar e.
Jodikdik ro ad raar kwaļo̧k peran eļap n̄an wujlepļo̧k. Rekar m̧ōņōņō ilo aer kaorōk jerbal in menmenbwij an baam̧le, im loļo̧k ko aer remakijkij n̄an m̧weeo im̧ōn Irooj ej juon kam̧ool kōn kijejeto ko aer. Ikdeelel eo aer n̄an joļo̧k iien im maron̄ ko aer n̄an jerbale mijen ko aer ipeļaakin laļin ej kalikkar juon tōmak em̧wilaļ im dim. Rejjab wōt bōk koņaer ak rej tōl iaļ eo n̄an erom̧ rikaļoor ro rej juon wōt ippān Jisōs Kraist. Jerbal in karejar eo aer ej romaake meram im kōjatdikdik, ilo an un̄ur elōn̄ mour ko. N̄an kom̧, jodikdik ro ilo Kabun̄ in, kōmij kwaļo̧k am būruōn kam̧oolol kom̧ kōn jerbal ko ami. Kom̧ij jab wōt ilju eo an Kabun̄ in ak barāinwōt rainin. Im kom̧ij ilo m̧ool jo̧o̧ļ in laļ!
Ij iakwe Irooj Jisōs Kraist im en̄jake aō jeraam̧m̧an kōn iien eo letok n̄an jerbal ippāmi ilo Kabun̄ in an Irooj. Juon wōt ilo kajoor eo ad, depdep wōt ilo tōmak eo ad, ej kalikkar n̄an kōj bwe jejjab make iaad ilo iaļ in. Ippān doon, jemaron̄ wōnm̧aanļo̧k wōt n̄an kalōk aelōn̄ in Anij, eo ej ekkal ilo jerbal in jipan̄, iakwe, im tōmak edim.
Ke Jisōs Kraist ekar katakin ilo Lom̧aļo in Galilee, ekkā An kōjerbal men ko armej ewōr aer jeļā kaki n̄an ro rej ron̄jake n̄an kwaļo̧k m̧ool ko reļļap an jetōb. Juon iaan men ko kar jo̧o̧l. Jisōs ekar kwaļo̧k, “[kom̧ij] jo̧o̧ļ in laļ,” juon enaan eo eļap meļeļein im aorōkin, eļaptata n̄an armej ro ilo tōre eo An im remeļeļe jon̄an aorōk in jo̧o̧ļ.
Wāween aer kōm̧m̧an jo̧o̧ļ etto ilo Algarve, tuiiōn̄ in wōt ijo jikū ilo Protugal, ej bōnbōn likļo̧k taujin iiō ko ilo tōre ko an Roman Empire. Ilo an kabwilōn̄lōn̄, wāween jerbal ko kar kōjerbali jān rikōm̧m̧an jo̧o̧ļ ro, ņae etan marnotos, em̧ōj an oktak jidik jān iien ko. Rijerbal rein retiljek rej kōjerbal iminene in jerbal ko etto, ilo aer kōm̧m̧ani jerbal ko kōn pā wōt, ilo aer dābij jon̄ak in jerbal eo im eto an pād jān epepen n̄an epepen.
Wāween jerbal in etto in ej aiin ta eo rej ņae etan “jo̧o̧ļ ko rewaidik.” N̄an lukkuun kile aorōkin wāween aer jerbale im bōk jo̧o̧ļ ko rewaidik, earōk n̄an meļeļe kōn mejatoto im ijo rej waļo̧k ie. Pat in jo̧o̧ļ ko itūrin lo̧jet ilo Algarve rem̧m̧an im jejjōt n̄an kwaļok jo̧o̧ļ. Dānin lo̧jet ej to̧o̧rļo̧k n̄an pat ko repijpij, ņae etāer ļā in jo̧o̧ļ, ijo ej pād ie im m̧ōrāļo̧k ium̧win aļ. Ilo an dān ko m̧ōrāļo̧k, jo̧o̧ļ ko rej kōm̧m̧an widin jo̧o̧ļ jidik ko rerabōlbōl ioon ļā in jo̧o̧ļ ko. Jo̧o̧ļ jidik rabōlbōl kein relikuun erreo im jenolo̧k, im rej kan̄urn̄ur. Ri marnotos ro rej kōkm̧anm̧ān aer bōk jo̧o̧ļ jidik erabōlbōl ko jān ioon dān eo kōn kein jerbal ko, juon kain jerbal aikuji eļap kapeel im etiljek. Ilo Portugal, jo̧o̧ļ in ejenolo̧ktata jeļā kake āinwōt “jo̧o̧ļ cream” kōnke epidodo bōke āinwōt cream ko jān ioon milik. Jo̧o̧ļ in epidodo eļap kaorōke kōn an erreo im kōn nemen, eo ej kōm̧m̧an bwe en juon kein iiōk ko eļap wōņāān.
Āinwōt ri marnotos ro rej likūt eļap kijejeto n̄an kōm̧m̧ani jo̧o̧ļ ko eļap aer em̧m̧antata, jej aikuij barāinwōt, āinwōt armej in bujen ro an Irooj, aolep iien kōm̧m̧ane ijo koņaad em̧m̧antata bwe iakwe eo ad im waanjon̄ak eo ad ren, jon̄an wōt eo eļap emaron̄, juon waanjon̄ak kōn Rilo̧mo̧o̧r, Jisōs Kraist.
Ilo raan ko etto, jo̧o̧ļ ekar ļapļo̧k wōt jān juon kein iiōk—ekar juon kein kejparok aurōk im juon kōkaļļe in erreo im bujen. Armej rekar jeļā bwe jo̧o̧ļ ekar aurōk n̄an kejparok m̧ōn̄ā ko im kōm̧m̧an nemeer. Rekar barāinwōt meļeļe bwe jekjek ko kōm̧m̧an bwe en jako nemen jo̧o̧ļ, ak lemen, eo ej ilo an jorāān ak tutu.
Āinwōt an jo̧o̧ļ maron̄ jako nemen, kōj jemaron̄ bar jako mour in jetōb eo ad eļan̄n̄e tōmak eo ad ilo Jisōs Kraist ej kajejtokjen. Jemaron̄ āinwōt juon ilo tulik, ak n̄e ejjeļo̧k tōmak ekajoor tulowa, emaron̄ jako maron̄ eo ad n̄an kōm̧m̧an oktak ilo laļ in im boktok em̧man eo ilo ro ipeļaakid.
Kōn menin ekōjkan ad maron̄ kōjebwebweik maron̄ im kijejeto ko ad n̄an kōm̧m̧an oktak im erom̧ oktak eo laļin ej aikuji rainin? Ewi wāween ad maron̄ dāpij mour in rikaļoor eo ad im wōnm̧aanļo̧k n̄an erom̧ juon waanjon̄ak eo em̧m̧an?
Naan ko an rikanaan eo ad ejitōnbōro ej epan̄ijn̄in wōt ilo ļōmņak e aō: Irooj ekōņaan bwe jen jerbal ippān doon im jipan̄ doon. En̄in ej unin An kar jilkintok kōj n̄an laļin ilo baam̧le ko im kar ejaake kōj ilo ward ko im stake ko. En̄in ej unin An kajjitōk ippād n̄an jerbal im jerbal in karejar n̄an doon. En̄in ej etke Ej kajjitōk ippād n̄an mour ilo laļ in bōtaab jab jān laļ in.”
N̄e mour ko ad rej obrak kōn kōttōpar im jerbal in jipan̄, jej kattoļo̧k kalijōkļo̧k ilo jetōb; ilo bar juon wāween, n̄e mour ko ad rej jenolo̧k jān un eo ekwojarjar, jerbal in jipan̄ eo eaorōk n̄an ro jet, im iien ko rekwojarjar n̄an ļōmņaki im kōļmenļo̧kjeņ kaki, jej jōbwebwā jidik kōn jidik kōn kōm̧m̧an ko ad im kōņaan ko ad make, ko rej kauwōtata n̄an joļo̧k aorōk eo ad. Uno eo n̄an menin ej n̄an wōnm̧aanļo̧k wōt n̄an bōk koņaam̧ ilo jerbal in jipan̄—boub ilo jerbal ko rem̧m̧an im em̧m̧anļo̧k eo ilo kōj make im jukjukin pād eo jej jokwe ie.
Ro jeiū im jatū rejitōnbōro, ej juon kōjeraam̧m̧an epād ippād rainin n̄an pād ilo Kabun̄ eo an Jisōs Kraist im bōk iien ko rem̧m̧an n̄an jerbal ilo Kabun̄ in An. Jekjek in mour ko ad remaron̄ oktak, ak jemaron̄ aolep kom̧mane juon oktak.
Keememej ri marnotos, ro rikōm̧m̧an jo̧o̧ļ; rej kōjerbal kein jerbal ko reddik n̄an kwaļo̧k jo̧o̧ļ jidik ko rerabōlbōl, jo̧o̧ļ ko rem̧m̧antata! Kōj jemaron̄ bar kōm̧m̧ane men ko repidodo, kōn kijejeto ko ilo m̧akūtkūt ko reddik im ļap meļeļeier, emaron̄ kam̧wilaļļo̧k mour in kaļoor eo ad im kallim̧ūr eo ad n̄an Jisōs Kraist. Erkein emānjekjek ko repidodo ak reļļap jemaron̄ kate kōj n̄an erom̧ jo̧o̧ļ in laļ:
-
Dāpij m̧weo im̧ōn Irooj ilo ioļapļap in ad wūjlepļo̧k. Kiiō bwe tampeļ ko rej epaakļo̧k jān kar m̧okta, kaorōk kabun̄jar kajjojo iien ko ilo m̧weo im̧ōn Irooj enaaj jipan̄ kōj pedped ilo ta eo ej aurōktata im dāpij wōt mour ko ad ilo Kraist. Ilo tampeļ eo, jej lo unjen tōmak eo ad ilo Jisōs Kraist im jitibōn ad wūjlepļo̧k n̄an E.
-
Em̧m̧anļo̧k ilo kijejeto ko ad n̄an kōkajoorļo̧k ro jet ilo ad mour kōn gospel in ippān doon. Jemaron̄ kōkajoorļo̧k baam̧le ko ad ilo emakijkij in kijejeto im m̧ool n̄an boktok pedped in katak ko an gospel in n̄an mour ko ad im n̄an oko im̧ōd.
-
Kōņaan bōk juon kūr im jerbal ilo Kabun̄ in. Jerbal in jipan̄ ilo m̧ōnjar ko ilo jikin ko jej jokwe ie ej kōm̧m̧an ad rie doon n̄an eddōkļo̧k ippān doon. Men̄e jerbal in karejar ejjab aolep iien jejjōt, aolep iien ekam̧ōņōņō.
-
Im āliktata, kōjerbal kein ekōnono ko ilo digital kōn kōttōpar. Rainin, kein ekōnono ko ilo digital rej kōtļo̧k ad tōpar doon eļapļo̧k jān m̧okta. Āinwōt elōn̄ iaami, ij kōjerbal kein jerbal kein n̄an tōpar ro jeiū im jatū ilo kabun̄ in im ippān baam̧le im ro m̧ōtta. Ilo aō ekkeijel ippāer, ij en̄jake aō epakeļo̧ke er, jemaron̄ jerbal in karejar n̄an doon ilo iien ko jej aikuji n̄e jeban maron̄ jade. Kein jipan̄ kein rej jet kein jipan̄, aaet ejja kain kein jerbal eo wōt emaron̄ bōk kōj jān men ko ewōr tokjeer im kōm̧m̧an ad pād ilo imminene ko ad ilo m̧akūtkūt ko ejjeļo̧k tokjeer. Kate kōj n̄an erom̧ jo̧o̧ļ in laļ ekūtbuuj eļapļo̧k jān wōt alooj bajjōk ilo juon screen edik.
Ilo ad likūt m̧weo im̧ōn Irooj ioļaptata in mour ko ad, ilo ad kōņaan kōkajoor ro jet ilo ad mour kake gospel in, bōk kūr ko n̄an jerbal, im kōjerbal kein jerbal digital ko kōn kōttōpar, jemaron̄ dāpij mour in jetōb ko ad. Āinwōt jo̧o̧ļ ilo an erreo ewōr an kajoor n̄an kōļapļo̧k im kōjparok, ejjeļo̧k oktak jān tōmak eo ad ilo Jisōs Kraist n̄e naaj naajdiki im kōjparoke ilo ad kijejeto im āinwōt Kraist.
Ilo ad pād wōt im juon wōt ippān Irooj, mour ko ad renaaj make kwaļo̧k meram eo An, im jenaaj erom̧ jo̧o̧ļ in laļ. Ilo kijejeto in, jejjab wōt kōkm̧anm̧anļo̧k mour ko ad make ak jej barāinwōt kōkajoorļo̧k baam̧le ko ad im jukjukin pād eo ad. Kōm̧m̧an bwe jen kajjieon̄ juon wōt ippān Irooj, jab luuji em̧m̧an eo ad, kōn men eo edik, jidik jo̧o̧ļ eo me Irooj ekōņaan bwe jen erom̧. Ilo etan Jisōs Kraist, amen.