Pukōt Uwaak ko n̄an Kajjitōk ko an Jetōb
Kajjitōk ko ad raorōk kōn gospel in ad emaron̄ leļo̧k n̄an Jemedwōj Ilan̄ im Jisōs Kraist iien ko rem̧m̧an n̄an jipan̄ kōj eddōkļo̧k.
Ijeļā menin emaron̄ itok ilo an kailbōkbōk, ak ebwe aō ritto n̄an keemejmej ke rekar katakin kōm ilo jikuuļ ke ewōr ratimjuon planet ko ilo solar system ne ad. Juon iaan planet kein, Pluto, juon ajri 11-iiō-dettan etan Venetia Burney jān Oxford, England ekar kōm̧m̧ane et in, ālkin an kar loe ilo 1930. Im lōn̄ļo̧k m̧ae 1992, kar watōke Pluto bwe ej laļ eo ettoļo̧k tata ilo solar system ne ad. Ilo tōre kane, ekkā aer ellolo ļamļam ko ajri rej kōm̧m̧ani jān pepa n̄an kōm̧m̧an annan̄in planet ko ilo kūlaaj ruum ko, science fair ko, kajjojo iaer rej kwaļo̧k ijo Pluto epād ie me rejeļā kake. Elōn̄ scientist ro raar tōmak ke itulik in jabōn, ijeņ ejem̧ļo̧k mejed ie ilo solar system in ad, ejej jabdewōt ie.
Ijoke, juon kajjitōk eto an scientist ro ekkatak kake kōn jinoin an waļo̧k juon jekjek in comet eo ekkā an astronomer (ak scientist) ro waate im etale. Im kajjitōk in ekabde pād ium̧win elōn̄ iiō ko m̧okta jān aer kar loe bar juon laļ ettoļo̧k ilo solar system ne ad. Kōn wōt an kar jabwe jeļā ippāer, scientist rein raar kōjerbal kōtaan ko raitok n̄an ejaake kein jerbal ko rem̧m̧anļo̧k n̄an kōdepakpadļo̧k aer ekkatak im etali jerbal kein aer. Aer kar ekkatak raar loe bwe em̧ōj an oktak jikin planet ko, kōn menin, eoktak jikin Pluto im kiiō ewōr ralitōk wōt planet ilo solar system in ad.
Juon scientist etijemļo̧k ikkijeen planet ko im rietale ekkatak ko kōn jikin kein rekāāl ilo mejatoto im ekkatak kōn Pluto ekar ba kōn oktak in: “Kōm kar ļōmņak kōm kar meļeļe kōn peļaakin solar system in ad. Kōm kar jab. Kōm kar ļōmņak kōm kar meļeļe oran planet ko ilo solar system in ad. Ak kōm kar jab.”
Men eo ekabwilōn̄lōn̄ ippa ikkijeen ekkatak in kōn men ko ilo mejatoto rej kōn oktak ko im men ko rej āinwōt juon ikkijeen peļaakin mejatoto im iaļ in me kōj, āinwōt ajri ro nejin Anij, jej errā n̄an pukōt uwaak ko n̄an kajjitōk ko an jetōb. Jejjet eo in, ewi wāween ad jelm̧ae jon̄an meļeļe ko ad ilo jetōb im kōpooj kōj make n̄an eddōkļo̧k eo ad make tokālik—im ijo jemaron̄ oktakļo̧k n̄ane n̄an kappukōt jipan̄.
Ļain im bar Ļain
Kajjitōk kajjitōk ko im pukōt meļeļe ko rej men ko rem̧m̧an im ekkā kōm̧m̧ane me ej m̧ōttanļo̧k ad ekkatak ilo mour in. Jet iien, an jab likio uwaak ko jej pukōti emaron̄ bōk kōj n̄an jem̧ļo̧kin meļeļe ko ad, im an wōr jon̄an ko jemaron̄ tōpari emaron̄ letok en̄jake in ebweer im tarpok. Men eo em̧m̧an in, karōk eo ekam̧ōņōņō an Jemedwōj Ilan̄ n̄an kōj aolep kar ļōme n̄an jipan̄ kōj eddōkļo̧k jekdoon jon̄an jeļā ko ad im tōprak ko jejjab maron̄ kōttōpraki ippād make, men̄e ejjab likio jeļā ko ad kōn men otemjej. Karōk eo an Anij etūriam̧o n̄an jon̄an eo jepād ie āinwōt jet armej; letok n̄an kōj Rilo̧mo̧o̧r, Jisōs Kraist, bwe en ad Rilale Sip eo Em̧m̧an; im ej im̧we kōj n̄an kōjerbal anemkwoj in kālet ko ad n̄an kālet E.
Elder Dieter F. Uchtdorf ekar katakin kōj bwe, “kajjitōk kajjitōk ko ejjab juon kōkaļļein m̧ōjņo̧,” ijjeļo̧kin “ej juon ijjino n̄an eddōkļo̧k.” Kōnono kōn kijejeto ko ad make āinwōt rikappukōt m̧ool, rikanaan eo ad, Būreejtōn Russell M. Nelson. ekar katakin kōj bwe ej aikuj wōr “juon ikdeleel em̧ūlaļ” im “kajjitōk kōn juon bōro em̧ool [im] lukkuun kōttōpar, im tōmak ilo [Jisōs] Kraist.” Ekar bar kōmeļeļeik ļo̧k wōt kōj bwe “lukkuun kōttōpar’ meļeļein bwe juon eo ej lukkkun kōttōpar n̄an ļoor iaļ eo ekwojarjar me em̧ōj letok.”
Kijejeto ko ad make n̄an eddōkļo̧k ilo tōmak emaron̄ tōl kōj n̄an etale kajjitōk ko ad, aepokpok ak āinjuon, ekkar n̄an un eo im tōprakin, kappukōt im kakeememej jon̄ak ko im kiiō ejaake bwebwenato ko n̄an ļōme ekkar n̄an ad meļeļe im ekkatak jeļā ko jej kile ke rejako. N̄e jej likūt jibadbad ko ad ilo jeļā ekwojarjar, mekarta, kōļmenļo̧kjeņ kein remaron̄ lukkuun jipan̄ ilo jet iien ak ilo iien ko aer make remaron̄ jab likio ilo ad lale n̄an kakeememej men ko rej tōlļo̧k n̄an Jemedwōj Ilan̄ im ad Rilo̧mo̧o̧r, Jisōs Kraist, gospel eo Aer, Kabun̄ eo Aer, im karōk eo Aer n̄an kōjwōj.
Wāween an Anij Jemed im Nejin letok Aer loļātāt n̄an kōj ej m̧oktata karuwaineneik tok kajoor eo an Jetōb Kwojarjar bwe en ad rikaki ilo ad likūt Jisōs Kraist ioļaptata ilo mour ko ad im ilo ad tiljek kappukot Aer uwaak im meļeļe ko Aer. Raar jiron̄ kōj n̄an pukōt m̧ool ilo iien ko jej kōjerbali n̄an ekkatak jān jeje ko rekwojarjar im n̄an kappukōt m̧ool ko em̧ōj litok ilo raan kein āliktata kōn raan kein im tōre kein, me kar litok jān rikanaan im rijilōk ro rainin. Rej akwelap e kōj n̄an joļo̧k iien n̄an kabun̄jar ilo m̧weo im̧ōn Irooj im n̄an bukwelōlō im jar “n̄an būki meļeļe ko jān lan̄.” Kallim̧ur eo an Jisōs n̄an ro raar pād n̄an ron̄jake An kwaļo̧k ioon Toļ em̧ool ejjeļo̧k oktak n̄an kōj ilo raan kein āinwōt An kar kwaļo̧k naan ilo tōre ko: “Kajjitōk, im naaj lewōj n̄an kom̧; kappukot im kom̧ naaj lo; kaļļaļlaļ, im naaj kapeļļo̧k n̄an kom̧.” Ad Riļo̧moor ejelā ke Jemān Ilan̄ ej lewaj men ko rem̧m̧an n̄an ro rej kajjitōk Ippān.
Wāween an Irooj katakin ej “lain ioon lain, kain̄i ioon kain̄i.” Jemaron̄ in loe ke jej aikuj “kōttar wōt Anij” kōn jon̄an jeļā eo ad kiiō im jeļā eo ej itok wōt n̄an ad bōke. Ijin kar kōkwōjarjar e emaron̄ juon jikin eo ikedeelel in jetōb ko ad remaron̄ waļok—ijo im jemaron̄ kijenmej ie ad pukōt ellowetak im kōkeel ad kajoor n̄an wōnm̧aanļo̧k ilo kōjparok kallim̧ur ko ad rekwojarjar ko jekar kōm̧m̧ani ippān Anij ilo bujen.
Bujen ko ad ippen Jemādwōj Ilan̄ im Jisōs Kraist ej kōkkale ko in ad rianjo n̄an mour indeeo ilo aelōn̄ eo an Anij. Im jukjuk in bed ko ad rej aikuj bwe ren jokkin wōt juōn ilo mour kein ad n̄an pedped in katak ko rekwojarjar im ad kijejeto n̄an eddōkļo̧k ilo jetōb.
Pokake
Juon pedped in katakin aorōk eped ilo Bok in Mormon ej n̄e ajiri ro nejin Anij rej kelet n̄an pokake im depij bujen ko aer, rej wōnm̧anļo̧k wōt im bōk tōl an jetōb. Irooj ekar ba n̄an kōj bwe ilo ad pokake im kōjbaro̧k, jemaron̄ pōk elapļo̧k jelāļo̧kjen im meletlet. Kien ko an Anij im kalim̧ur ko kar ļōmi ejjab bwe ren jet likatiptip ilo mour ko ad mour ko ad ak juōn ial eo ekajoor n̄an revelesōn an kajjojo armej im jeļāļo̧kjeņ an jetōb. Būrejtōn Nelson ear katakin kin aorōk eo em̧ool ke revelation jen Anij ej aolep iien jokkin wōt juōn ippen kien ko An indeeo im im̧aaninļo̧k menin eban kariab m̧ool in naan ko An em̧ōj jei. Maron̄ in pokake eo am n̄an kien ko an Anij, ijeļļo̧kin am̧ jab bōk jelāļo̧kjen eo elikio kōn un eo An, likūt kwe bwe kwon ekkeijel ippān rikanaan ro An. Moses 5 ej katakin kōj kin ippān doon iien otemjej eo ikōtaan Adam im juon enjel an Anij.
Ālkin an Anij leļo̧k n̄an Adam im Iv kien ko, bwe ren kabun̄-jar n̄an Irooj aer Anij, im bwe ren ajeļo̧k m̧aanje ko in mennin mour ko aer, n̄an juon katok n̄an Irooj,” jeje ko rej ba bwe “Adam eaar pokake kien ko an Irooj.” Jej etal wōt n̄an riit bwe “ālikin elōn̄ raan ko juon enjeļ an Irooj eaar waļo̧kļo̧k n̄an Adam, im ba: Etke kwōj ajiļo̧k katok ko n̄an Irooj? Im Adam eaar ba n̄an e: Ij jab jeļā, ijello̧kun ke Irooj eaar jiron̄ eō.”
Pokake eo an Adam kar m̧okta melele eo an leo kar kōpooje leo n̄an bōk jeļāļo̧kjeņ ekokwōjarjar bwe leo ear bōk koņaan ilo juōn kōkaļļe ekwojarjar kin Pinmuur eo an Jisōs Kraist. Ad po̧kake ettā enaaj, barāinwōt, kōmetal iaļ eo n̄an jeļā kālet ikōtaan jim̧we im bōd kōn wāween ko an Anij im jibadbad eo An ekwojarjar n̄an kōj kajjojo. Kōtōbar n̄an kōļapļo̧k ad pokake ej kepaakļo̧k kōj n̄an ad Riļo̧mo̧o̧r, , Jisōs Kraist, kinke pokake kien ko An im kakien ko ej kijejeto in tōpar E.
Kobaiktok, ad m̧ool n̄an meletlet im loļātāt ewōr ipped emōj kar jolete kōj ilo ad m̧ool n̄an pedped in katak ko an gospel in im bujen ko rekwojarjar ej kōppopo eo eļap an aorōk n̄an ad bōk im ribōk eddoin meļeļe ko jān Jetōb Kwojarjar.
Jemādwōj Ilan̄ im Jisōs Kraist rej unin m̧ool otemjej im kajeeded Aer loļātāt ilo ejjeļo̧k kalijōkļo̧k. Barāinwōt, melele ke jej jab anemkoj e jabdewōt jeļā ko an Anij emaron̄ jiban̄ kōj jeļā wōn n̄an oktakļo̧k n̄ane im ia n̄an likūt lōke eo ad im̧aantata.
Lōke eo Em̧wilal
Kalimur M̧okta kōn bwebwenato in Naaman, ritōl tariņae eo kar kemouri jen lepa jen rikanaan Elija, ejonolok im em̧m̧an tata ippa. Bwebwenato in ej kōmleleiki wāween an kajoor tōmak eo an “little maid” kar ukōt mour eo juon em̧m̧aan, n̄an aolep ritōmak ro, jouj an Anij ear waļo̧k n̄an ro rar likūt aer tōmak ilo E im rikanaan eo An. Kin ejjelok āt, leddik jidikdik in ear jipan̄ iuunmanļo̧k melele ko ad. Im tōmak eo an Naaman ilo an kwaļo̧k em̧m̧an eo an Irooj ekar kabwūlōn̄ leo n̄an bōk kajjitōk eo an leo n̄an bōk kemour jān rijilōk eo an Anij ear kelete.
Uwaak eo an Naaman n̄an kōmeļeļe ko an Elija n̄an tuļok ilo reba Jorban ekar menin an korrat im kwaļo̧k an illu. Ak juōn kūr n̄an leo bwe en pokake n̄an ko̧o̧njeļ eo an rikanaan eo bwe ne bōk kōmour eo an im an leo maron̄ lukkuun jeļā ke Anij em̧ool.
Jemaron̄ loe juōn iaļ in jet iaan kajjitōk ko ad ilo jetōb ewōr meleleier n̄an maron̄ uwaak kajitōk ko im maron̄ jab kōm̧m̧an men ko rejjab em̧m̧an n̄an kōj. Ak, einwōt Naaman, jemaron̄ loe ke aikuj ko jet elapļo̧k aer eppen im maron̄ kwaļo̧k men ko reppen im jelet en̄jake ko ilo kōj. Ak, āinļo̧k wōt kōmeļeļe eo kōn jemļo̧kin in ekkatak ko an scientist astronomer kōn solar system ne ad, ilo ad kappukot m̧ool ko an jetōb, jemaron̄ tōpar melele ko rejabwe elan̄n̄e jej atartar ioon jon̄an melele ko rejabwe rebed ipped, juōn buromōj elap im men ko rejab naaj kar bōk jikier in ta eo emaron̄ tōļ kōj etto̧ļo̧k jān iaļan bujen in. Im ijeļo̧kin, jet kajitōk remaron̄ jutak pin m̧ae Anij, eo “ebed aolep maron̄” im “aolep ļoļātāt, im aolep melele,” eo “ebed aolep jeļā kin men otemjej” ilo An jojomar, ej letok meram ilo tōmak ko ad ilo āt eo Etan.
Juōn naan in kakkōl jān naan eo an Naaman ej bwe kōjetokjān pokake n̄an kakien ko an Anij im kien ko emōj jei remaron̄ depij ak karum̧ijļo̧k ad eddōkļo̧k. Kōj jejeram̧m̧an bwe ewōr ad Rikōmour Eutiejtata Jisōs Kraist. Ad pokake n̄an kakien ko an Anij im kien ko maron̄ kepelļo̧k iaļ eo n̄an Rilo̧mo̧o̧r eo n̄an kakke melele im kemour kōj me E ejelā ke jej aikuji, ekkar n̄an karōk eo emelij im ekar ļōme n̄an kōj.
Elder Richard G. Scott ekar katakin ke “mour in ej juōn mour in ekkatak kōn lōke—lōke Jisōs Kraist, lōke ilo katakin ko An, lōke ilo jon̄an maron̄ ko ad me ej tōl kin Jetōb Kwojarjar n̄an ļoor katak ko n̄an m̧ōņōņō kiiō im n̄an juōn un elap unin, lemōņōņō eo em̧wilal ejjeļo̧k jem̧ļo̧kin. N̄an lōke melelein n̄an maron̄ pokake ilo ejjeļo̧k jeļā jem̧ļo̧kin jen jinoun (lale Prov. 3:5–7). N̄an jebar leen, lōke eo am ilo Anij ej aikuj bwe kajoor en lapļo̧k im kijejeto en ļapļo̧k ilo en̄jake ko im jeļā ko am make.”
Elder Scott ekar waanmaanļo̧k wot, “N̄an kōjerbal tōmak ej n̄an lōke Anij bwe ejeļā ta eo ej kōm̧m̧ane ippam im bwe E emaron̄ kōtōprake n̄an em̧m̧an eo am̧ indeeo men̄e kojjab maron̄ meļeļe wāween An maron̄ kōm̧m̧ane.”
Naan in Kam̧ool n̄an Kili
Iakwe ro jera, Ij kam̧ool ke aorōk in kajitōk ko kin gospel in ad emaron̄ leļo̧k n̄an Jemedwōj Ilan̄ im Jesōs Kraist iien ko rem̧m̧an n̄an jipan̄ kōj eddōkļo̧k. Aō kijejeto make n̄an pukōt uwaak ko jen Anij n̄an aō kajitōk ko aō make ilo jetōb—inne im ilju—ear kōtļo̧k eō n̄an kōjerbal kōta eo ikōtaan jelā eo aō im eo an Anij n̄an kajjieon̄ pokake E im m̧ool n̄an jelā eo ekwojarjar eped ippa.
N̄aij kam̧ool ke likūt lōke eo am̧ ilo Jemedwōj Ilan̄ im ippān rikaanan ro An, eo Ekar jilkintok, enaaj jipan̄ eok n̄an kōļapļo̧k jetōb im kōm̧akūt eok m̧aanļo̧k n̄an laļ eo an Anij ejjeļo̧k jemļo̧kin. Pikto̧kūm̧ enaaj oktak kinke kwonej bar oktak. Anij ejelā ke ilo am̧ eddōkļo̧k, enaaj ealikkar am̧ loe men̄e ettoļo̧k. Ad Riļo̧m̧o̧o̧r ej karuwaineneik eok n̄an eddōkļo̧k ilo jetōb. Ilo etan Jisōs Kraist, amen.