Najidiki Okar ko, im Ra ko Renaaj Eddōk

Jān Elder Dieter F. Uchtdorf

Jān Doulul eo an Jon̄oulruo Rijilōk ro

Ra ko an naan in kam̧ool eo am̧ naaj akjoketok kajoor jān tōmak eo am̧ em̧wilaļ ilo Jemādwōj Ilan̄ im Nejin Jitōnbōro.

Juon M̧ōn Jar Em̧or ilo Zwickau

2024 ej juon iiō in eddōkļo̧k aorōk n̄an n̄a. Ej kakōļļeik 75 iiō jān ke ikar peptaij im kapen juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata ilo Zwickau, Germany.

Aō membōr in Kabun̄ eo an Jisōs Kraist ej aorōk n̄an n̄a. N̄an bōnbōn ibwilijin armej in bujen ro an Anij, ippāmi, ro jeiū im jatū, ej juon iaan utiej ko reļļap tata ilo mour eo aō.

N̄e ij ļōmņak kōn iaļ in rikaļoor eo aō make, aolep iien ļōmņak eo aō ej lelikļo̧k eō n̄an iien ko ilo juon em̧ ilo Zwickau, ijo ikar dāpij ememļo̧kjeņ ko kōn pād ilo kweilo̧k in kwojkwoj ko an Kabun̄ eo an Jisōs Kraist āinwōt juon ajri. En̄in ej ijo me naan in kam̧ool eo aō ekar jino eddōk ekar bōk naajdik eo an im̧aan tata.

M̧ōn jar in ekar wōr juon ie o̧kwōn en juon en bam̧e bwe en wōr ainikien. Aolep Jabōt juon likao kar kappeik n̄an iuum lōn̄ļo̧k im laļļo̧k baiib eo an o̧kwōn eo bwe en pen im en maron̄ jerbal. Jet iien ekar wōr aō iien n̄an jipan̄ ilo jerbal in aorōk.

Ke jarlepju eo ekar al al in jar ko rem̧m̧an ippām, ikar bam̧e kōn aolepān aō kajoor bwe o̧kwōn en jab ejjeļo̧k kitwōn. Jān jikin jijiet eo an rijerbal eo, ijo ij pād ie em̧m̧an laleļo̧k kūlaaj wintōn ko raiboojoj, juon ej kwaļo̧k kōn Rilo̧mo̧o̧r Jisōs Kraist im bar juon ej pijaik Josep Smith ilo Bukwin Wōjke ko Rekwojarjar.

Ij maron̄ keememej wōt en̄jake ko rekwojarjar ikar būki ilo aō kalimjōk wintōn ej waļo̧k koon aļ ie ilo aō ron̄jake naan in kam̧ool ko an Rkwojarjar ro im al al in jar ko an Zaion.

Ilo jikin in ekwojarjar, Jetōb eo an Anij ekar kwaļo̧k kam̧ool n̄an kōļmenļo̧kjeņ eo aō būruō bwe ekar m̧ool—Jisōs Kraist ej Rilo̧mo̧o̧r eo an laļ. En̄in ej Kabun̄ eo An. Rikanaan Josep Smith ekar lo Anij Jemān im Jisōs Kraist im kar ron̄ ainikieer.

Ilo jinoin iiō in, ke kar pād ilo juon ijjitōn̄ ilo Europe, ekar wōr aō iien em̧m̧an n̄an bar ro̧o̧lļo̧k n̄an Zwickau. Būrom̧ōj eo in, m̧ōn jar jab in em̧or ikar iakwe ekar jako ijo. Raar rube elōn̄ iiō ko ļo̧k n̄an kōm̧m̧ane juon im̧ōn jokwe kileplep.

Ta eo Ej Indeeo, im Ta eo Ejjab?

Ij kwaļo̧k m̧ool bwe ekar kabūrom̧ōjm̧ōj n̄an jeļā bwe im̧win ikar iakwe jān iien ajri ko aō ej kiiō juon mennin emmeļo̧k wōt. Ekar juon em̧ ekwojarjar n̄an n̄a. Ak ekar baj juon em̧ bajjōk.

Ilo keidi, kam̧ool in jetōb eo ikar bōke jān Jetōb Kwojarjar eo elōn̄ iiō kko remootļo̧k ejjan̄in jako. Ilo m̧ool, ej kab kajoorļo̧kk wōt. Men ko iaar katak ke ikar jodikdik kōn pedped in katak ko an gospel aorōk an Jisōs Kraist rekar pedped eo epen aō ilo aolepān mour eo aō. Bujen ekkejel eo ikar kōm̧m̧ane ippān Jema Ilan̄ im Nejin Jitōnbōro ekar pād ippa—jān elōn̄ iiō ko ālkin an im̧ōn jar eo ilo Zwickau kar rupe im kūlaaj wintō ko kar jako.

“Lan̄ im laļ renaaj jako,” Jisōs ar ba, “a naan ko Aō rej jāmin jako.”

“Bwe toļ ko re maron̄ in jako, im kōm̧m̧akūt toļ ko re dik; a Aō jouj eļap e jāmin ilo̧k jān kwe, im Aō bujen e aenōm̧m̧an e jāmin jako, Jeova ej ba.”

Juon iaan men ko raorōk tata jemaron̄ katak ilo mour in ej oktak eo ikōtaan ta eo ej indeeo im ta eo ejjab. N̄e jej meļeļe mej jab in, aolep men rej oktak—kadkad ko ad, kāālet ko jej kōm̧m̧ani, wāween ad kōm̧m̧an n̄an armej.

Jeļā ta eo ej indeeo im ta eo ejjab ej men eo aorōk n̄an kaddōk juon naan in kam̧ool kōn Jisōs Kraist im Kabun̄ eo An.

Jab Pok Kōn Ra ko im Okar ko

Gospel eo kar kōjepļaaktok an Jisōs Kraist, āinwōt an Rikanaan Josep Smith kar katakin, “[ej] atbakwoj aolep, im aolep laajrak an m̧ool.” Bōtaab ejjab meļeļe in bwe aolep m̧ool rej aorōkier wōt juon. Jet m̧ool re dilep eo, kanooj aorōk, rej pedped eo an tōmak eo ad. Ko jet rej kakkobaba ko ak ra ko—aorōk, bōtaab n̄e wōr rej ekkejelļo̧k n̄an pedped ko.

Āinwōt an kar Rikanaan Josep bar ba, “Pedped in kata ko dilepān kabun̄ in ad rej naan in kam̧ool eo an Rijjilōk ro im Rikanaan ro, rejelet Jisōs Kraist, bwe E ekar mej, kar kalbwini, im bar jerkak ilo raan eo kein kajilu, im kar weak lōn̄ļo̧k n̄an lan̄; im aolep men ko jet me rej iookļo̧k kabun̄ in ad rej kakkobaba wōt n̄an e.”

Ilo bar juon wāween, Jisōs Kraist im katok in pinmuur eo an rej okar in naan in kam̧ool eo ad. Aolep men ko jet rej ra ko.

Mennin ejjab ba bwe ra ko rejjab aorōk. Juon wōjke ej aikuji ra ko. Ak āinwōt an Rilo̧mo̧o̧r eo jirōn̄ļo̧k rikaļoor ro An, “Ra e ban make jeba leen, eļan̄n̄e e jab pād ilo vain.” N̄e jejjab ekkejel ippān Rilo̧mo̧o̧r eo, n̄an naajdik eo loe ilo okar ko, juon ra enaaj būlo̧k im mej.

N̄e ej itok n̄an tion̄eļo̧k naan in kam̧ool ko ad kōn Jisōs Kraist, Ij ļōmņak eļan̄n̄e jej jet iien jej tarpok kōn ra ko n̄an okar ko. Menin ekar bōd eo Jisōs ekar loe ilo Parisi ro ilo tōre eo An. Eļap wōt er kar leļo̧k aer n̄an men dikdik ko an kien eo me raar ilo jemļo̧kin kowane ta eo Rilo̧mo̧o̧r eo ekar ņa etan “men ko reļap”—pedped in katak ko an dilepān āinwōt “ekajet im tūriam̧o.”

Eļan̄n̄e kwoj kōņaan kemour juon wōjke, kwojjab wutdikdiki ioon ra ko kōn dān. Koj wutdikdiki okar ko. Ainļo̧k wōt, eļan̄n̄e kwoj kōņaan bwe ra ko an naan in kam̧ool eo am̧ ren eddōkļo̧k im kalle leen, naajdik okar ko. Eļan̄n̄e kwojjab jeļā kōn juon baj katak ak iminene ak m̧ōttan an bwebwenato an Kabun̄ in, pukot alikkar kōn tōmak ilo Jisōs Kraist. Pukot n̄an meļeļe en̄taan eo An n̄an kwe, An iakwe n̄an kwe, Ankilan n̄an kwe. Ḷoor E ilo ettā. Ra ko an naan in kam̧ool eo am̧ naaj akjoketok kajoor jān tōmak eo am̧ em̧wilaļ ilo Jemādwōj Ilan̄ im Nejin Jitōnbōro.

N̄an waanjon̄ok, eļan̄n̄e kwoj kōņaan juon naan in kam̧ool ekajoorļo̧k kōn Bok in Momron, kalimjōk wōt kam̧ool eo an kōn Jisōs Kraist. Kile ekōjkan an Bok in Mormon kam̧ool kōn E, ta eo ej katakin kōn E, im ekōjkan an kūr im im̧we eok n̄an itok n̄an E.

Eļan̄n̄e kwoj pukot juon en̄jake eļapļo̧k meļeļe in ilo kweilo̧k ko an Kabun̄ in ak ilo tampeļ, kajjieon̄ reilo̧k n̄an Rilo̧mo̧o̧r eo ilo kain̄i ko rekwojarjar jej būki ijōn. Pukot Irooj ilo m̧we Im̧ōn ekwojarjar.

Eļan̄n̄e kwoj en̄jake ban ak tōrjān jon̄an kōn kūr eo am̧ ilo Kabun̄ in, kajjieon̄ bar kalimjōk jerbal in jipan̄ eo am̧ ioon Jisōs Kraist. Kōm̧m̧an bwe en juon kakōļļe in am̧ iakwe n̄an E.

Naajdik okar ko, im ra ko renaaj eddōk. Im ilo jemļo̧kin, renaaj kalle leen.

Likūt Okram̧ im Kalōk ilo E

Tōmak kajoor ilo Jisōs Kraist ejjab baj waļo̧k. Jaab, ilo mour wabanban in, ej kālōklōk k im mar nana ko an pere me rej eddōk tak wōt. Wōjke ājmour, ekalle an tōmak ej aikuji kijejeto ko ļōmaki. Im m̧ōtan eo aorōk an kijejto jab in ej kōm̧m̧an bwe jen tiok lilbok ilo Kraist.

N̄an waanjon̄ok: Ilo jinoin, jemaron̄ kōņaan gospel eo an Rilo̧mo̧o̧r im Kabun̄ eo kōnke jej im̧we kōn jouj eo an membōr ro ak kōn bisop eo ejouj ak erreo eo an m̧ōn jar eo. Jekjek kein rej ilo m̧ool aorōk n̄an eddōkļo̧k eo an Kabun̄ in.

Ijo ke, eļan̄n̄e okar ko an naan in kam̧ool eo ad ejjab eddōk m̧wilaļļo̧k jān in, ta eo enaaj waļo̧k n̄e jej etal n̄an juon ward eo me ej kweilo̧k ilo juon em̧ edik an em̧m̧an, ippān membōr ro me rejjab kanooj jouj, im bisop eo ej ba juon men ekōmetak kōj?

Bar juon waanjon̄ok: Ej ke em̧m̧an n̄an kōjatdikdik bwe eļan̄n̄e jej kōjparok kien ko im kar liāp ilo tampeļ, jenaaj jeraam̧m̧an kōn juon baam̧le ekilep em̧ōņōņō, kōn ajri ro rōjeļāļo̧kjeņ pokake, ro me rej aolep ninkin ilo Kabun̄ in, jerbali mijen ko, la ilo ward kuwaer eo, im baļintieer n̄an jipan̄ kanneoik m̧ōn jar eo aolep jibbon̄ in Jādede?

Ijeļā bwe kōjatdikdik eo jenaaj aolep loe ilo mour ko ad. Bōtaab ta eo eļan̄n̄e ejjab? Jenaaj ke jutak pen ippān Rilo̧mo̧o̧r eo jekdoon ta jekjek ko—lōke E im iien eo An?

Jej aikuj kajjitikin kōj make: Naan in kam̧ool eo aō ej ke pedped ioon ta eo ij kōjatdikdik enaaj waļo̧k ilo mour eo aō? Ej ke pedped ioon jerbal ko im m̧wil ko an ro jet? Ak ej ke pād im dim ioon Jisōs Kraist, “likūt okram̧ im kalōk ilo E,” jekdo̧o̧n ta jekjek ko rej ukōt mour?

M̧anit ko, Imminene ko, im Tōmak

Bok in Mormon eo ej ba kōn armej ro “raar kanooj jejjet ilo kōjparok kain̄i ko an Anij.” Innām juon rikōraat kar etan Korior ekar itok, kajirere kōn gospel eo an Rilo̧mo̧o̧r, ņa etan “ebwebwe” im “imminene ko rekōjak an ro jemāer.” Korior ekar tōlļo̧k “būruōn elōn̄, im kōm̧m̧an bwe ren kotak bōraer ilo aer nana.” Bōtaab ro jet ekar jab maron̄ kapoik, kōnke n̄an aer, gospel eo an Jisōs Kraist ekar ļapļo̧k jān juon imminene.

Tōmak ej kajoor n̄e ej tōt okōran ilo en̄jake an juon make, kallim̧ur an juon make n̄an Jisōs Kraist, makeļo̧k jān ta eo imminene ko ad rej ak ta eo ro jet rej ba ak kōm̧m̧ane.

Naan in kam̧ool eo ad renaaj idajon̄jon̄ im kajjieon̄e. Tōmak ejjab tōmak eļan̄n̄e eban idajon̄jon̄e. Tōmak ejjab kajoor eļan̄n̄e eban jum̧ae. Kōn menin jab ebbweer eļan̄n̄e ewōr am̧ mālijjon̄ ilo am̧ tōmak ak kajjitōk ko rejjab uwaak.

Jejjb aikuj kōtmene n̄an meļeļe aolep men m̧okta jān ad jerbal. Ejjab tōmak menin. Āinwōt an Alma kar katakin, “Tōmak ej jab n̄an bōk juon jeļāļo̧kjeņ eweeppān kōn jabdewōt men.” Eļan̄n̄e jej kōttar n̄an jerbal m̧ae iien aolep ad kajjitōk rej uwaak, jej lukkuun kōm̧m̧an jon̄an em̧m̧an eo jemaron̄ kōtōprake, im jej kōm̧m̧an jon̄an kajooe in tōmak eo ad.

Tōmak ej aiboojoj kōnke ej dim jekdo̧o̧n n̄e kōjeraam̧m̧an ko rejjab itok āinwōt kar kōjatdikdik kake. Jeban maron̄ lo jōkļaj, jejjab jeļā aolep uwaak ko, bōtaab jeamron̄ lōke Jisōs Kraist ilo ad bun̄ m̧aanļo̧k wōt im lōn̄ļo̧k kōnke E ej ad Rilo̧mo̧o̧r im Ripimuur.

Tōmak ej dibuk mālijjon̄ ko im jab jeļā kaki ko an mour kōnke ej ej liok titbok ilo Kraist im katak eo An. Jisōs Kraist, im Jemedwōj Ilan̄ eo eaar jilkintok E, rej jimor juon wōt, lōke eo ad eweeppān.

Juon naan in kam̧ool ejjab juon men eo me kwoj kalōke juon wōt alen, im ej jutak n̄an indeeo. Ej ainļo̧k wōt juon wōjke eo me ejjab jokod am̧ naajdiki. Katōk naan eo an Anij ilo būruōm̧ ej bun̄tōn eo wōt im̧aan. N̄e naan in kam̧ool eo am̧ ej eddōk, innām jerbal eo em̧ool ej ijjino! Ej n̄e kwoj “ņa kōņin kōn eļap kōjparok, bwe en maron̄ le okran, bwe en mraon̄ eddek, im le leen n̄an kōj.” Ej bōk “niknik eļap” im “kijejeto kōn naan eo.” Ak kallim̧ur ko an Irooj rej m̧ool: “Kom̧ naaj m̧adm̧ōd jinōkjej ko an tōmak eo ami, im ami niknik, im ami kejejeto, im ami lōjokmen, im kōttar n̄an wōjke eo n̄an le leen n̄an kom̧.”

Ro jeiū im jatū rejitōnbōro, ewōr juon m̧ōttan n̄a me ej on̄ kōn m̧ōn jar eo em̧or ilo Zwickau im kūlaaj wintō ko an. Bōtaab ilo iiō ko 75 remootļo̧k, Jisōs Kraist ekar tōl eō ioon juon iaļ ilo aolepān mour me eļapļo̧k an kalimomo jān aō maron̄ kar kōtmene. Ekar kaenōm̧m̧ane eō ilo kaen̄taanan ko aō, kar jipan̄ eō n̄an kile m̧ōjņo̧ ko aō, kar kemour kijen in jetōb ko aō, im kar naajdik eō ilo tōmak eo aō ej eddōkļo̧k.

Ej jar eo aō em̧ool im kōjeraam̧man eo bwe eban jokod ad naajdik okra ko an tōmak eo ad ilo Rilo̧mo̧o̧r eo, ilo katak eo An, ilo Kabun̄ eo An. Jān menin ij kam̧ool ilo etan ad Rilo̧mo̧o̧r, ad Ripinmuur, Ad M̧aajta—ilo etan Jisōs Kraist, amen.

Kakeememej ko

1. The year 2024 also marks 30 years since my call as a General Authority and 25 years since our family had to move from Germany to the United States as a result of that calling. Enan̄in 20 iiō remootļo̧k—ilo Oktoba 2, 2004—iaar rejetak āinwōt juon membōr in Doulul eo an Rijilōk ro Jon̄oulruo im juon rikam̧ool eo ejenoļo̧k “of the name of Christ in all the world” (Katak im Bujen Ko 107:23).

2. In some ways, my feelings about that building are like what Alma’s people felt about the Waters of Mormon—it was a beautiful place to them, because “there [they] came to the knowledge of their Redeemer” (Mosaia 18:30).

3. Matu 24:35; bar lale Josep Smith—Matu 1:35.

4. Aiseia 54:10; bar lale 3 Nipa 22:10.

5. Būreejtōn Thomas S. Monson ekar kwaļo̧k ejja naan kein rem̧ool: “I believe that among the greatest lessons we are to learn in this short sojourn upon the earth are lessons that help us distinguish between what is important and what is not. I plead with you not to let those most important things pass you by” (“Finding Joy in the Journey,” Liahona, Nov. 2008, 85). Ejja āinwōt, ke Būreejtōn Russell M. Nelson ekar rōjan̄ kōj n̄an “ļōmņak kōn selestial,” ekar ba, “Mortality is a master class in learning to choose the things of greatest eternal import” (“Think Celestial!,” Liahona, Nov. 2023, 118).

6. Teachings of Presidents of the Church: Joseph Smith (2007), 264; bar lale Teachings of Presidents of the Church: Brigham Young (1997), 16–18.

7. Teachings: Joseph Smith, 49.

8. Jon 15:4.

9. Matu 23:23, New Revised Standard Version.

10. Is it interesting to note archaeological similarities between ancient American cultures and Book of Mormon peoples? It can be. Is it helpful to learn from the accounts of scribes and others about the details of how Joseph Smith translated the Book of Mormon? It is for some. But none of this constitutes a lasting testimony that the Book of Mormon is the word of God. For that, you need to find the Savior in the Book of Mormon, to hear His voice speaking to you. Once this happens, it won’t matter to you where the ancient city of Zarahemla was actually located or what the Urim and Thummim looked like. Those are branches that can be pruned off your tree if needed, but the tree will remain.

11. Lale Katak im Bujen Ko 84:19–20.

12. Lale Joy D. Jones, “For Him,” Liahona, Nov. 2018, 50–52.

13. Lale Jenesis 3:18.

14. Būreejtōn Nelson eaar kūr kōj aolep n̄an “to take charge of [our] own testimony of Jesus Christ and His gospel. Work for it. Nurture it so that it will grow” (“Overcome the World and Find Rest,” Liahona, Nov. 2022, 97).

15. Kolosse 2:7.

16. Alma 30:3.

17. Lale Alma 30:12–16, 31.

18. Alma 30:18.

19. Men eo ekabwilōn̄lōn̄, akweel eo an Korihor ilubwiljin armej ro an riLeman ro rej kab oktaktok, armej ro an Ammōn (lale Alma 30:19–20), eo eaar ļoor Kraist ejjab kōnke m̧anit ko an ro jemeer.

    N̄an keidi, Bok in Mormon ej jiron̄ kōj kōn juonn epepen in armej ro raar kōjenoļo̧k er make jān kabun̄ eo an Irooj kōnke “raar jab tōmak imminene ko an ro jemāer” (lale Mosaia 26:1–4). Em̧m̧an n̄e baam̧le ko renaaj kōm̧m̧ani m̧anit ko rem̧m̧an. But it’s just as important for families to clearly understand the why behind those traditions. Etke jejjab jar? Etke jejjab riit jej ko rekwojarjar an baam̧le? Etke jejjab kōm̧m̧an nokon in jota kajjojo wiik, limo ko an baam̧le ak jerbal in jipan̄, im ko jet? N̄e ajri ro nejid remeļeļe wāween an imminenen kein kepaakļo̧k kōj n̄an Jemedwōj Ilan̄ im Jisōs Kraist, renaaj wōnm̧aanļo̧k kaki—n̄an kōkm̧anm̧aniļo̧k—ilo baam̧le ko aer make.

20. Alma 32:21. Faith is powerful not because of what it knows but because of what it does

21. Lale Hibru 10:23.

22. Alma 32:37, 41–43.