Lan̄ļōn̄ kōn Lo̧mo̧o̧r eo Ad
Iakwe im kajoor eo an Jisōs Kraist remaron̄ lo̧mo̧o̧ren kōj jān bwōd ko, m̧ōjņo̧ ko, im jerawiwi ko ad im jipan̄ kōj n̄an erom̧ juon men eļapļo̧k.
Enan̄in 10 iiō ko remootļo̧k ikar en̄jake im̧we n̄an jin̄aiki juon pijaan Rilo̧mo̧o̧r. Men̄e ikar juon rijin̄n̄a, ikar en̄jake bwe ekar juon jerbal eo eļap. Ekōjkan aō naaj kar jin̄n̄aiki pijaan Jisōs Kraist me ej kalikkar Jetōb eo An? Ia eo ij ijjino ie? Im ia eo inkar lo iien n̄an kōm̧m̧ane?
Men̄e ekar wōr aō kajjitōk, ikar kāālet n̄an wōnm̧aanļok im lōke bwe Irooj enaaj kar jipan̄ eō. Bōtaab ikar aikuj wōnm̧aanļo̧k wōt im lelo̧k aolep maron̄ ko n̄an E. Ikar jar, kejokļo̧ijeņ, kappukot, im kōmālmel jin̄n̄a, im kar jeram̧m̧an n̄an lo jipan̄ im kein jipan̄ ko. Im ta eo im ekar juon pepa emouj ekar jinotak erom̧ juon men eļapļo̧k.
Jerbal eo ekar jab pidodo. Jet iien ekar jab āinwōt aō kar kōtmene. Jet iien ekar wōr iien ko reim̧we ikijjeen jekjek in jin̄n̄a im ļōmņak ko. Im elōn̄ iien ko, ikar aikuj kajjeon̄ im bar kajjeon̄.
Ke ikar ļōmņak jin̄n̄a eo ekar dedeļo̧k im m̧ōrā, ikar jinoe likūt uno varnish eo n̄an kejparok jin̄n̄a eo jān po̧k im būn̄al. Ilo aō kar kōm̧m̧ane, ikar kile bwe ulej eo ilo jin̄n̄a eo ekar jino an oktak, ejjeer im jakoļo̧k. Ikar m̧ōkaj aō kile bwe ekar m̧ōkaj aō likūt uno varnish eo, ilo ijo im jin̄n̄a eo ekar tutu wōt.
Em̧ōj aō itok im irļo̧k m̧ōttan eo eļap ilo jin̄n̄a eo aō kōn uno varnish eo. O, būruwō eaar buruōmōj. Ikar en̄jake āinwōt n̄e ikar ko̧kkure ta eo Anij ekar jipan̄ eō kōm̧m̧ane. Ikar jan̄ im nana aō mour. Ilo ejjeļo̧k kōjatdikdik, ikar kōm̧m̧ane ta eo ekkā an jabdewōt kōm̧m̧ane ilo kain jekjek rōt in: ikar kūrtok jinō. Ekar ba ilo māletlet im mera, “Koban bar kōro̧o̧lwaj ta eo kar m̧okta, ak kōm̧m̧ane ijo em̧m̧antata komaron̄e kōn ta eo eped ippam̧.”
Im Ikar Bōk M̧ōttan, jān Kristin Yee
Kōn menin ikar jar im akweļap kōn jipan̄ im kar jin̄n̄a ilo aolepen bon̄in eo n̄an kōm̧anm̧an joreen ko. Im ikar kemeemej aō kalimjōk pija eo ilo jibbon̄in raan eo—em̧m̧anļo̧k jān kar m̧okta. Ewi wāween bwe en kar tōprak? Ta eo ikar ļōm̧ņak ke kar juon bwōd im ejjeļo̧k wāween n̄an kajim̧we ekar juon iien eo em̧m̧an n̄an kwaļo̧k pein tūriam̧o eo An. E ekar jab m̧ōj ilo jin̄n̄a eo, im E ekar jab m̧ōj ilo n̄a. Ekar juon menin lan̄lōn̄ im aenōm̧m̧an n̄an kobrak būruwō. Ikar nebar Irooj kōn tūriam̧o eo An, kōn kabūlōn̄lōn̄ in im ekar jab kejparok wōt jin̄n̄a eo aō ak ekar barāinwōt katakin eō kōn iakwe eo An im kajoor eo n̄an lo̧mo̧o̧ren kōj jān bōd ko, m̧ōjņo̧ ko, im jerawiwi ko ad im n̄an jipan̄ kōj erom̧ juon men eļapļo̧k.
Ilo an ļapļo̧k tum̧wilaļ in kam̧oolol eo aō n̄an Rilo̧mo̧o̧r ilo an kejparok jin̄n̄a eo “ban maron̄ kejparoke”, barāinwōt iakwe eo aō make im kam̧m̧oolol eo aō n̄an Rilo̧mo̧o̧r ekar kajoorļo̧k, ilo aō kar kappukot n̄an jerbal Ippān ilo m̧ōjņo̧ ko aō im n̄an jeorļo̧k bōd ko aō. Eban jem̧ļo̧k aō kam̧m̧oolol Rilo̧m̧o̧o̧r bwe imaron̄ in oktak im n̄an bōk erreo. Eped būruō Ippān, im ij kōjatdikdik n̄an kōm̧m̧ane jabdewōt men E ekōņaan bwe in kōm̧m̧ani im erom̧.
Ukweļo̧k ej kōm̧m̧an bwe jen maron̄ en̄jake iakwe eo an Anij im n̄an jeļā im iakwe E ilo wāween ko jeban kar maron̄i. Kōn kōrā eo ekar kapiti neen Rilo̧mo̧o̧r, E ekar ba “Jerọwiwi ko an, relōn̄, eṃōj juḷọk; bwe eḷap an yokwe. A n̄an eo e dik an jako, e dik an yokwe.” Ekar ļap an iakwe Jisōs bwe E ear jo̧ļo̧k an bwōd eļap.
Ewōr juon aeņōm̧m̧an im kōjatdikdik ilo ad jeļā bwe jemaron̄ bar kajjeon̄—bwe āinwōt an Elder David A. Bednar kar katakin, jemaron̄ bōk jeorļo̧k bwōd eo ejjab jem̧ļo̧k kōn jerawiwi ko ad kōn kajoor eo ekwojarjar an Jetōb Kwojarjar ilo ad m̧oolin ukweļo̧k.
Kajoor in lo̧mo̧o̧r eo an Jisōs Kraist ej juon iaan kōjeram̧m̧an ko reļļap kar kallim̧ūr ilo bujen ko ad. Kejokļo̧kjeņ kake ilo am̧ bōk koņaam̧ ilo kain̄i ko rekwojarjar. N̄e eban menin, jeban maron̄ jepļaakļo̧k n̄an im̧aan mejen Jemedwōj Ilan̄ im ro jej iakwe er.
Ijeļā bwe ad Irooj im Rilo̧mo̧o̧r, Jisōs Kraist, ekajoor n̄an lo̧mo̧or. Ilo an Eo Nejin Anij, kar pinmuur kōn jerawiwi ko an laļ in im likūt mour eo An im bar jerkakpeje, E ej kabwijer kajoor eo n̄an lo̧mo̧or im jerkakpeje. E em̧ōj an kōm̧m̧an bwe jab wabanban im mour indeeo ren maron̄ bōk jikier n̄an aolep ro rej kāālet E. Ijeļā bwe ilo en̄taan in pinmuur eo An jemaron̄ ukweļo̧k im m̧oolin bōk erreo im lo̧mo̧o̧r. Ej juon kabwilōn̄lōn̄ bwe E ej iakwe eok im n̄a ilo wāween in.
E em̧ōj an kar ba, “Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?” E emaron̄ kōmour jikin ko ejjeḷọk tokjāer” ilo mour eo am̧—jikin ko kar kōm̧m̧an bwe ren m̧ōrā, nana, ajimakeke kōn jerawiwi im būrom̧ōj im “kōm̧m̧an āne jem̧aden [am̧] bwe en āinwōt jikin kallib Iden.”
Āinwōt ad jab maron̄ jeļā jon̄an m̧wilaļ in en̄taan im būrom̧ōj eo an Kraist ilo Gethsemane im ioon debwāāl eo, bwe em̧ool kōj “jejjab maron̄ jon̄e jem̧ļo̧kin ak jon̄an m̧wilaļ in [An] jeorļo̧k bōd” tūriam̧o im iakwe.
Komaron̄ jet iien en̄jake bwe kojjab maron̄ bōk lo̧mo̧o̧r, bwe bōlen kwoj juon oktak eo n̄an iakwe eo an Anij im kajoor in pinmuur eo an Rilo̧mo̧o̧r kōn ta eo kwoj en̄taan kake ak bōlen kōn ta eo kwar kōm̧m̧ane. Ak ij kam̧ool bwe kwojjab ped ettoļo̧k jān maron̄ eo an Maajta eo. Rilo̧mo̧o̧r “eaar wanlaļtak ium̧win aolep men ko otemjeļok” im ej pād ilo juon jikin ekwojarjar n̄an ļōn̄aj eok im bōk eok jān ijoko remaroktata im boktok eok n̄an “ilowaan meram eo An.” Jān en̄taan ko An, E em̧ōj an kōm̧mane juon iaļ n̄an kajjojo iaad n̄an anjo̧ jān m̧ōjņo̧ ko ad make im jerawiwi ko. “E ewōr An aolep kajoor n̄an lo̧mo̧o̧ren jabdewōt armej eo ej tōmak ilo Etan im jebar im kalle leen ko rekkar n̄an ukeļok”
Ejjeļok oktak jān an kar aikuj jerbal im akweļap kōn jipan̄ eo an lan̄ n̄an jipan̄ kejparok jin̄n̄a eo, ebōk jerbal, m̧ool ilo bōro, im ettā n̄an “jebar im kalle leen ko rekkar n̄an ukeļok” Leen kein ekoba kōjerbal tōmak eo ad im lōke ilo Jisōs Kraist im pinmuur in katok eo An, leļo̧k n̄an Anij juon bōro erūp im jetōb ettā, kwaļo̧ki im eļļo̧k jān jerawiwi, bar kōjepļaaktok ta eo ekar jorāān kōn jon̄an eo jemaron̄e, im kajjeon̄ n̄an mour jim̧we.
N̄an likkuun ukweļo̧k im oktak, jej aikuj m̧oktata “kile jerawiwi ko ad.” Juon armej ejjab lo aikuj eo n̄an bōk uno ko m̧ae iien rejeļā bwe renan̄inmej. Bōlen ewōr iien ko jemaron̄ jab kōņaan kalimjōk tulowaad make im lo men eo aikuj kōmour im kejparok.
Ilo jeje ko an C. S. Lewis, Asian ekar kwaļo̧k naan kein kōn juon em̧m̧aan eo ekar lukwoj e make ilo m̧ōņ ko an make: “O, [armej], ekōjkan am̧ m̧āletlet n̄an bōbrae eok make jān aolep men ko remaron̄ kōjeram̧m̧an eok!
Ia eo kwe im n̄a jej bōbrae kōj make jān men ko remaron̄ kōjeram̧m̧an kōj?
Jen jab bōbrae kōj make jān ta eo em̧m̧an im Anij ekōņaan kōjeram̧m̧an kōj kake. Jān iakwe eo im tūriam̧o eo im E ekōnaan bwe jen en̄jake. Jān meram eo im jeļāļo̧kijeņ eo E ej kōņaan lutōkleplep iood. Jān kōmour in E ejeļā bwe jelukkuun pojak n̄an aikuji. Jān bujen jemjerā eo em̧wilaļ E ej karōke n̄an aolep ļaddik im leddik ro Nejin.
Ij jar bwe jen maron̄ lelaļļo̧k jabdewōt “kein tariņae ko” im jej kotaki ilo ad jeļā ak em̧ool ilo ad jaje n̄an bōbrae kōj make jān kōjeram̧m̧an ko jān iakwe eo an Anij. Kein tariņae ko an uteej bōro, ļōmņak kake make, mijak, kejdat, jum̧ae, jab kea, ekajet ebōd, ebanban ko—jabdewōt men ko im renej dābij kōj jān iakwe Anij kōn aolepen būruōd im kejparok aolep bujen ko ad Ippān.
Ilo ad mour kōn bujen ko ad, Irooj emaron̄ letok n̄an kōj jipan̄ im kajoor eo jej aikuji n̄an jim̧ōr kile im anjo̧ jān m̧ōjņo̧ ko ad, ekoba kūj in uteej bōro ko ilo jetōb. Rikanaan eo ad ekar ba:
“Ukweļo̧k ej iaļ eo n̄an erreo, im erreo ej bōktok kajoor.”
“Im o, ewi jon̄an ad naaj aikuji kajoor eo An ilo raan ko rej pād im̧aan.”
Āinwōt jin̄n̄a eo aō, Irooj ejjab bōjrak jān kōj n̄e jej kōm̧m̧ane juon bōd, barāinwōt E ejjab ko n̄e jej likjab. Aikuj eo ad n̄an lo̧mo̧o̧r im jipan̄ ejjab juon eddo n̄an E, bōtaab ej likkuun un eo unin An kar itok. Rilo̧mo̧o̧r eo Make ekar ba:
“Lo, Iaar itok n̄an laļ n̄an bōktok lo̧mo̧o̧r n̄an laļ, n̄an lo̧mo̧o̧ren laļ jān jero̧wiwi.”
“Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok, e Inaaj bōk, im em̧ōņōņō ro rej itok n̄an Eō.”
Kōn menin itok—itok ro rej m̧ōk, en̄taan, im būrom̧ōj; itok im joļo̧k jerbal ko am̧ im kappukot kakkije ilo E eo ej iakwe eok eļaptata. Bōk An ine im likūt i aerami, bwe Ij ineeṃṃan im ettā būruō.
Jemedwōj Ilan̄ im Rilo̧mo̧o̧r rej lo eok. Er rejeļā būruom̧. Rej kea kōn ta eo kwoj kea kake, ekoba ro kwoj iakwe er.
Rilo̧mo̧o̧r emaron̄ lo̧mo̧o̧ren ta eo ekar jako, ekoba jemjerā ko rerūb. E ekar kōm̧m̧ane juon iaļ n̄an aolep ro rej bun̄ bwe ren bōk lo̧m̧o̧o̧r—n̄an likūt mour ilo ta eo jej en̄jake bwe emej im ejjeļo̧k kōjatdikdik ie.
Eļan̄n̄e kwoj en̄taan kōn juon jekjek eo kwoj ļōmņak kwoj aikuj kar anjo̧ jene kiiō, jab ebbweer. Kijenmej ippam̧ make, kejparok bujen ko am̧, ukweļo̧k aolep iien, kappukot jipan̄ jān ritōl ro am̧ n̄e emenin aikuj, im etal n̄an m̧weo im̧ōn Irooj aolep iien n̄e kwomaron̄. Ron̄jake im ļoor im̧we ko E ej jilkinwaj n̄an eok. E eban kejool bujen jemjerā eo An ippam̧.
Ewōr jemjerā ko reppen im pok ilo mour e aō im em̧ōj aō en̄taan kaki im m̧ool ilo kappukot n̄an em̧m̧anļo̧k eo. Jet iien ikar en̄jake āinwōt n̄e ekar ļapļo̧k wōt aō likjab. Ij ļōmņak, “ikar jab ke kajim̧we men ko m̧oktaļo̧k? Ikar jab ke likkuun anjo̧ jān m̧ōjņo̧ ko aō?” Ālkin jet tōre ikar ekkatak bwe ijjab juon eo ewānōk; ijjelo̧kin, ekkā an wōr jerbal ko reļļapļo̧k n̄an kōm̧m̧ani im kōmour ko reļļapļo̧k im remenin aikuj.
Elder D. Todd Christofferson ekar katakin: “Em̧ool Irooj ej mejen ettōn̄dikdik kōn juon eo ej ikdeelel n̄an tok n̄an ekajet ilo erreo, eo ej m̧ool ilo an jerbal raan im raan n̄an joļo̧k m̧ōjņo̧ ko kōn kajoor. Ukweļo̧k em̧ool, oktak em̧ool emaron̄ aikuj emmakijkij an bōk jikin, ak ewōr juon men ej karreo im ekwojajar ilo kain kijejeto rōt in. Jeorļo̧k bōd ekwojarjar im kōmour rej make waļo̧k n̄an kain jetōb rōt in.”
Kajjojo raan ej juon raan ekāāl obrak kōn kōjatdikdik im maron̄ ko kōn Jisōs Kraist. Kajjojo raan kwe im n̄a jemaron̄ itok n̄an jeļā, āinwōt an Jined Iv kwaļo̧k, “lan̄ļōn̄ eo kōn lo̧mo̧o̧r eo ad” lan̄lōn̄ eo kōn ad maron̄ erom̧ weppān, lan̄lōn̄ eo ilo en̄jake iakwe eo ejjab likjab an Anij.
Ij jeļā bwe Jemedwōj Ilan̄ im Rilo̧m̧o̧o̧r rej iakwe eok. Jisōs Kraist ej Rilo̧mo̧o̧r eo im Ripinmuur eo an aolep armej. E ej mour. Kōn katok in Pinmuur eo An, to ko an jerawiwi im mej em̧ōj aer jaļjaļ n̄an indeeo bwe jen maron̄ anemkwoj n̄an kāālet n̄an bōk kōmour, pinmuur, im mour indeeo ippān ro jej iakwe er. Im ij kam̧ool kōn men kein ilo etan, Jisōs Kraist, amen.