Ium̧win Jab Elōn̄ Iiō Ko
Eļan̄n̄e jejjab tiljek im pokake, jemaron̄ ukōte kōjeraam̧m̧an in m̧weie eo Anij ekar letok n̄an juon lia in uteij bōro me ej jāniji im kōm̧ad kōj.
Ro jeiū im jatū rejitōnbōro, jijjot ilo ije maan rainin, ikar lale an jikin Kweilo̧k in obrak jilu kōttan, ej kab bar jinoin jen ke ekar COVID. Kom ej rikaļoor ro an Jisōs Kraist retiljek ro rekōnaan ekkatak. Ij nebar kom kōn tiljek eo ami. Im ij iakwe eok.
Ezra Taft Benson ekar jerbal āinwōt Būreejtōn an Kabun̄ eo an Jisōs Kraist im Armej ro Rekwojarjar ilo Raan Ko Āliktata jān Nobōm̧ba 1985 m̧ae Māe 1994. Ekar 33 aō iiō ke Būreejtōn Benson ekar erom̧ Būreejtōn an Kabun̄ in im 42 aō iiō ke ekar mej. Im katak ko im naan in kam̧ool eo an rekar im̧we eō ilo wāween ko rekōbbōkakkak im kajoor.
Juon iaan men ko ekar lukkuun alikkar an jenolọk ilo iien kwaļo̧k eo an Būreejtōn Benson ekar an mijōk wōt jibadbad im aorōk eo an Bok in Mormon eo. Ekar āliji an kwaļo̧k bwe “Bok in Mormon eo ej dekā in jabōn em̧ n̄an tōmak in ad—dekā in jabōn em̧ an naan in kam̧ool eo ad, dekā in jabōn em̧ an katak eo ad, im dekā in jabōn em̧ ilo kam̧ool eo an ad Irooj im Rilo̧mo̧o̧r.” Ekar barāinwōt emakijkij an kwaļo̧k katak ko im kakkōl ko kōn jerawiwi an uteej bōro ilo Bok in Mormon eo.
Juon baj katak jān Būreejtōn Benson ekar ļap an im̧we eō im ej wōnm̧aanļo̧k im kareel aō katak kōn Bok in Mormon eo. Eaar ba:
“Bok in Mormon Eo … kar je n̄an tōre in ad. RiNipai ro rejjan̄in kar bōk bok eo; barāinwōt RiLaman ro ilo tōre ko etto. Ekar n̄an kōj. Mormon eaar jeiki jem̧ļo̧kin ļo̧k mour an RiNipai. Ium̧win im̧we eo an Anij, eo ej lo men otemjej jān jinoin, [Mormon] eaar kōkaduik ļo̧o̧k ko an epepen ko, kālet bwebwenato ko, kōnono ko, im m̧akūtkūt ko me renaaj kar ļap aer jipan̄ kōj.”
Būreejtōn Benson ekar waanmaanļo̧k wot: “Kajjojo rijeje ro reļļap an Bok in Mormon raar kam̧ool bwe raar jeje n̄an epepen ko ilju im jekļaj. … Eļan̄n̄e raar lo tōre in ad, im kar kālet men ko me renaaj kar ļap tata tokjāer n̄an kōj, ejjab en̄in ej wāween eo jaikuj ekkatak kake Bok in Mormon ke? Jej aikuj kajjitōk ippād make aolep iien, ‘Etke Irooj eaar im̧we Mormon … n̄an kobaik [menin] ilo ļo̧o̧k in an? Ta katak eo imaron̄ katak jān e [kakkōl in] me ejipan̄ eō mour ilo rainin im tōre in?’”
Ennaan ko an Būreejtōn Benson rej jipan̄ kōj n̄an meļeļe bwe Bok in Mormon eo ej jab baj lukkuun juon ļo̧o̧k in bwebwenato me rej kōn tōre ko etto. Ijjelo̧kin, bok in jeje in ekwojarjar rej kōn ilju im jekļaj im rej kitbuuj pedped ko raorōk, kakkōl ko, im katak ko rekkar n̄an jekjek ko im apan̄ ko an raan ko ad. Kōn un in, Bok in Mormon eo ej juon bok kōn ilju im jekļaj eo ad im iien ko me jej mour ie kiiō im naaj mour ie.
Ij jar kōn jipan̄ eo an Jetōb Kwojarjar eo ilo ad kiiō ļōmņak kōn katak ko rekkar n̄an kōj rainin jān bok in Hilamōn ilo Bok in Mormon eo.
RiNipai ro im RiLeman ro
Ļo̧o̧k eo an Hilamōn im ļōm̧aro nejin ej kōmeļeļeiki juon jarlepju in armej ro rekar bōk koņaer ilo ļotak eo an Jisōs Kraist. Jimettan in epepen eo ekar kwaļo̧k juon men ilo jeje ko rekwojarjar eo ej kalikkar oktak im wāppen eo an RiLeman ro im nana eo, bun̄ jān tōmak eo, im mennin kajjōjō ko an RiNipai ro.
Juon lelkan keidi oktak ko ikōtaan RiNipai ro im RiLeman ro jān ļo̧o̧k in etto in rej lukkuun kōmeļeļe ko reļļap n̄an kōj rainin.
“RiLeman ro raar erom, eļapļo̧k m̧ōttanier, juon armej ejim̧we, jon̄an ke jim̧we eo aer eaar leļo̧k jān eo an riNipai ro, kōnke pen im dim ilo tōmak eo.
“[Bwe] lo, ekar lōn̄ iaan riNipai ro raar kijn̄en̄eļo̧k im jab ukeļo̧k im kanooj nana, jon̄an raar jab bōk naan eo an Anij im aolep kwaļo̧k naan im kanaan eo eaar itok ilubwiljier.”
“Im āindein jej lo bwe riNipai ro raar jino idakunkunļo̧k ilo jab tōmak, im eddekļo̧k ilo jero̧wiwi im mennin jōjō ko, ke riLeman ro raar eddekļo̧k ilo jeļā otem jeļā kōn aer Anij; aaet, raar jino kōjparok naan in jiron̄ ko im kien ko An, im n̄an etetal ilo m̧ool im jejjet im̧aan mejān.
“Im en̄in jej lo bwe Jetōb in Irooj eaar jino jenlikļo̧k jān riNipai ro, kōnke jero̧wiwi eo aer im pen eo an burueer.
“Im āindein jej lo bwe Irooj eaar jino lutōkleplep jetōb eo an ioon riLeman ro, kōnke pidodo im m̧ōņōņō eo aer n̄an tōmak ilo naan ko An.”
Bōlen jekjek eo elukkuun ļap im m̧ool kōn wōtlo̧k in n̄an bun̄ jān tōmak an RiNipai ro ej kwaļo̧k bwe “nana kein raar itok n̄an er ilo tōrean eo ej jab lōn̄ iiō ko.”
RiNipai ro Rekar Oktakļo̧k jān Anij
Ekōjkan an kar juon-jarlepju in armej rewāppen erom̧ pen im nana ilo baj juon iien eo ekadu? Ekōjkan an armej maron̄ mōkaj in meļo̧kļo̧k Anij eo ekar kōjeraam̧m̧an er kōn eļap m̧weie?
Ilo juon wāween ekajoor im jejjet, waanjon̄ak eo enana an RiNipai ro ej kein katakin eo n̄an kōj rainin.
“Juwa … eaar jino deļo̧n̄ … ilo būruōn armej ro raar make kwaļo̧k ke rej pād ilo kabun̄ eo an Anij … eaar kōnke m̧weie ko im jeban ko aer relļap otem ļap ilo aneo.”
“[Er] rekar likūt [būruweer] ioon m̧weie ko im men ko rewaan an laļ in,” kōnke juwa eo me [er] … rekar kōtļo̧k bwe en deļo̧n̄ [ibūruweer], eo eaar … kotak [er] ilōn̄ in men eo em̧m̧an kōnke m̧weie otem m̧weie eo [aer]!”
Ainikien armej ro etto jān bwidej rej akweļap ippād rainin n̄an ekkatak katak in ejjeļo̧k jem̧ļo̧kin: m̧weie, lōn̄ m̧weien, jab inepata ej kobaiki juon jekjek eo eļap me emaron̄ tōlļo̧k aaet ro rewāppen n̄an uteijj bōro im jorāān im jako ilo jetōb.
Kōtļo̧k an uteij bōro deļo̧n̄ ilo bōro ko ad emaron̄ kōm̧m̧an bwe jen kajjirere kōn men eo ko rekwōjarjar; jab tōmak ilo jetōb in kanaan im ilo revelesōn; jab pokake im kaorōk kien ko an Anij; kariab naan eo an Anij; kadiwōjļo̧k, kajjirere, im kajjirere kake rikanaan ro; im meļo̧kļo̧k Irooj aer Anij im “jab kōm̧m̧an bwe Irooj [ad] Anij, eo eaar kōm̧anm̧an [kōj], en irooj im pepe [iood].”
Kōn menin, eļan̄n̄e jejjab tiljek im pokake, jemaron̄ ukōte kōjeraam̧m̧an in m̧weie eo Anij ekar letok n̄an juon lia in uteij bōro me jāniji im kōm̧ad kōj jān m̧ool ko an indeeo im kālet ko raorōktata ilo jetōb. Aolep iien jej aikuj in ekōl ņae juon uteij bōro me ej kipel im kōļapļo̧k en̄jake in aorōk in juon make, juon etale eo ebōd an tōl wājabdik eo ad make, im kappukot e make ijjelo̧kin jerbal n̄an ro jet.
Ilo ad uteij bōro ilo ad ļōmņak wōt kōn kōj make, jej barāinwōt liaajlọḷ kōn jab maron̄ lale im jab kile eļap men ko an jetōb, eļaptata, ak bōlen aolep men eo ej waļo̧k ilo kōj im ipeļaakid. Jejjab maron̄ mijōk wōt Jisōs Kraist āinwōt “kakōļļe” eo eļan̄n̄e jej lo wōt kōj make.
Pilo rōt in ilo jetōb ej barāinwōt maron̄ kōm̧m̧an bwe kōj jen diwōjļo̧k jān iaļ in wānōk eo, wōtlo̧k ilowaan iaļ ko remo, im erom̧ jebwābwe. Ilo ad pilo “oktak n̄an [iaļ ko] ko ad make” im ļoore iaļ in kakkure ko, jej m̧ōņōņō in atartar ioon jeļāļo̧kjeņ eo ad make, kōmmejāje ilo kajoor eo ad make, im pedped ioon māletlet eo ad make.
Samuel RiLeman eo ekar kōmeļeļeiki ilo tukadu in an RiNipai ro oktakļo̧k jān Anij: “Kom̧ ar kappukot aolep raan ko in mour ko ami kōn men eo kom̧ij jab maron̄ bōk e; im kom̧ ar kappukot m̧ōņōņō ilo kōm̧m̧an nana, men eo āinjuon jān jekjek in weeppān eo ej ilo Jeban Indeeo eo eļap ad.”
Rikanaan Mormon ekar etale, “Eļapļo̧k m̧ōttan armej ro [rekar pād wōt] ilo aer juwa im nana, im edikļo̧k m̧ōttan eo [ekar etetal] jim̧we im̧aan Anij.”
RiLeman ro Rekar Oktak Ļo̧k n̄an Anij
Ilo Bok eo an Hilamōn, ļapļo̧k in wāppen eo an RiLeman ro ekar letok juon oktak eļap n̄an m̧ōjņo̧ in jetōb em̧ōkaj an RiNipai ro.
RiLeman ro rekar oktakļo̧k n̄an Anij im rekar bōktok n̄an juon jeļāļo̧kjeņ an m̧ool eo kōn tōmak e katak ko ilo jeje ko rekwojarjar im kōn rikanaan ro, kōjerbale tōmak ilo Irooj Jisōs Kraist, ukweļo̧k jān jerawiwi ko, im en̄jake juon oktak in bōro ekajoor.
“Kōn menin, jon̄an wōt eo eaar itok n̄an men in, kom̧ jeļā jān kom̧ make rej pen im dim ilo tōmak eo, im ilo men eo jān ekar kaanemkwōj er.”
“Kom̧in lo bwe eļapļo̧k m̧ōttan eo [riLeman ro] rej ilo iaļ in ijo kuņaer, im rej etetal jim̧we im̧aan Anij, im rej lale n̄an kōjparok kien ko An im kakien ko An im ekajet ko An. …
“… Rej kijejeto kōn tiljek ejjab kijeļo̧k bwe remaron̄ bōktok bwe in ro jeir im jatier n̄an jeļā kōn m̧ool eo.”
Āinwōt juon tōprak, “jim̧we eo [an RiLeman ro] eaar leļo̧k jān eo an riNipai ro, kōnke pen im dim ilo tōmak eo.”
Juon Kakkōl im juon Kallim̧ur
Moronai ekar ba: “Lo, Irooj eaar kwaļo̧k n̄an eō men ko reļļap im kabwilōn̄lōn̄ kōn men eo ejjab to enaaj itok, ilo raan eo n̄e men kein renaaj waļo̧k tok ilubwiljimi.
“Lo, ij kōnono n̄an kom̧ āinwōt n̄e kom̧ ar pād, im mekarta kom̧ij jab. A lo, Jisōs Kraist eaar kwaļo̧k kom̧ n̄an eō, im ijeļā kōm̧m̧an ko ami.”
Jouj keememej bwe Bok in Mormon eo ej kalimjōk kōn ilju im jekļaj im rej kitbuuj pedped ko raorōk, kakkōļ ko, im katak ko rekkar n̄an jekjek ko im apan̄ ko an raan ko ad raan kein.
Bun̄ Jān Tōmak emaron̄ waļo̧k ilo ruo ļābōļ ko repidodo—kabun̄ ak kajjojo armej. Ilo ļabōļ eo an kabun̄, Kabun̄ eo an Jisōs Kraist im Armej ro Rekwojarjar ilo Raan Ko Āliktata ej jāmin jako kōn bun̄ jān tōmak ak bōke jān laļ in.
Rikanaan Josep Smith ekar kwaļo̧k: “Jon̄ak an m̧ool eo em̧ōj an ejaak; ejjeļo̧k pā ejjab wānōk emaron̄ kabōjrak jerbal eo jān an eddōkļo̧k … ; m̧ool eo an Anij enaaj etal wōt kōn kajoor, im jutak ļo̧k iaan, m̧ae ekobrak aolepen laļin, loļo̧k aolep jikin, aolep laļ, im lo̧jiļn̄i otemjeļo̧k renaaj ron̄, m̧ae jibadbad eo an Anij enaaj dedeļo̧k, im bwe Jeova Eļap enaaj ba jerbal in ededeļo̧k.”
Ilo ļābōļ eo an kajjojo armej, kōj kajjojo rej aikuj “ekkōļ kōn juwa, n̄e [jab] erom āinwōt riNipai ro etto.”
Imaron̄ ke kwaļo̧k bwe eļan̄n̄e kwe ak n̄a jej tōmak bwe jelukkuun kajoor im pen n̄an kattoļo̧k kabbil eo an uteij bōro, innām bōlen em̧ōj ad kadede en̄taan jān nan̄inmej in jetōb ekauwōtata. Baj ba, eļan̄n̄e kwe ak n̄a ejjab tōmak bwe jemaron̄ erom̧ libijinjin kōn im jān uteij bōro, innām kōj jōm̧ōjņo̧ im jej pād ilo kauwōtata an jetōb. Ilo um̧win jab elōn̄ raan ko, wiik ko, allōn̄ ko, ak iiō ko, jemaron̄ in kajekdo̧o̧n m̧aanje eo ad ilo jetōb kōn eļapļo̧k jān juon pileej in m̧ōn̄ā.
Eļan̄n̄e, ijoke, kwe ak n̄a kōjro ej tōmak jemaron̄ en̄taan kōn im jān uteij bōro, innām jenaaj aolep iien naaj kōm̧m̧ani men ko reddik im reļam̧ waan me enaaj kōjparok im jipan̄ kōj erom̧ “āinwōt juon ajri, ettā, ineem̧m̧an, ettā bōro, kem̧m̧aanwa, obrak kōn iakwe, m̧ōņōņō in ajeļo̧k e n̄an aolep men ko Irooj ej lo ekkar n̄an kaddoik ņa ioon, [kōj].” “Em̧ōņōņō ro rej kōttāik er make ijjab kar kipel er n̄an kōttāik er.”
Ilo ad ļoore naan in kapilōk eo an Būreejtōn Benson im kajjitōk ippād make etke Irooj ekar im̧we Mormon n̄an kobaiki ilo jeje ko an bok in Hilamōn bwebwenato ko, rōjan̄ ko, im kakkōļ ko me ekar kōm̧m̧ani, ij kallim̧ur bwe jenaaj meļeļe ewi wāween būki im mour kōn katak kein n̄an kajjojo jekjek in mour ko ad kajjojo im baam̧le ko rainin. Ilo ad katak im kejōkļo̧kjeņ kōn ļo̧o̧k in eim̧we, jenaaj jeraam̧m̧an kōn māj ko n̄an loe, lo̧jiln̄ii ko n̄an ron̄jake, ļōmņak ko n̄an loore, im bōro ko n̄an meļeļe katak ko jej aikuj ekkatak n̄an ekkōl kōn juwa, n̄e kwo ab deļo̧n̄ ilo kapo.”
Ij lan̄lōn̄ ilo kam̧ool bwe Anij Jemān Indeeo ej Jemād. Jisōs Kraist ej Nejin Wōt Eaar Keotak im Jitōnbōro Nejin Anij. E ej ad Rilo̧mo̧o̧r. Im ij kam̧ool bwe ilo ad etetal ilo ilo ettā in jetōb eo An Irooj, jenaaj kōjekdo̧o̧n im anjo̧ jān juwa im bōk aenōm̧m̧an ilo E. Ij kam̧ool menin ilo āt eo ekwojarjar etan Irooj Jisōs Kraist, amen.