Pein Epojak n̄an Jipan̄ Kōj
Ilo ad pukot Jisōs Kraist ilo tōmak, E enaaj aolep iien pād ijeņ.
Ke ikar juon ajri, āinwōt juon baam̧le kōm ekar etal in kakkije ilo juon beach itōrerein lo̧jet ilo ijo jikkū, Chile. Iaar lukkuun m̧ōņōņō in joļo̧k jet raan ippān baam̧le eo aō ilo summer eo. Iaar bar lukkuun m̧ōņōņō bwe iaar ļōmņak in kobaļo̧k ippāer im kōm̧m̧ane ta eo būratōr ro aō ruo rōrūtto kijon̄ ikkure kake ilo lo̧jet.
Juon raan ļaddik ro jeiū rekar etal in ikkure ijjo ņo ko rej rub ie, im iaar en̄jake bwe irūtto im ijeļā kiiō n̄an ļoor er. Ilo aō etal ijo ļo̧k, iaar loe bwe ņo ko rekar lukkuun kilep jān aō kar lale jen āne. Ejjab etto, juon ņo eaar m̧ōkaj an tōpar tok eō, ilo an itok ilo jidimkij. Ikar en̄jake āinwōt n̄e kajoor in lo̧jet ear anjo ioō, im kar bōk eō n̄an ibwiļōn dān. Ikar jab maron̄ loe im en̄jake jabdewōt n̄an depdep ilo aer kar joto jotak eō. Ilo kar iien eo im iaar ļōm̧ņak bwe m̧akūtkūt ko ao̧ ilo laļ in rekar epaak aer jem̧ļo̧k, iar en̄jake an juon pā kanōk eō n̄an aejet. Āliktata, ikar lo aļ im bōk kitwō.
Ļaddik eo jeiū Claudio eaar loe aō kar kajjieon̄ āinwōt juon eo erūtto im ekar itok im lo̧mo̧o̧ren eō. Ikar jab ettoļo̧k jān āne. Mekarta ear pijpij ijo, iaar jaje in ta im iaar jab jeļā ke imaron̄ kar jipan̄ eō make. Claudio eaar jiron̄ tok n̄a bwe iakuij kar lukkuun kōjparok im, eļan̄n̄e ikōņaan, emaron̄ katakin eō. Mekarta jon̄an dren eo ikar ilimi, bōklōkōt im ikdreelel eo aō n̄an erom̧ juon ļaddrik rūtto rekar kajoor, im iaar ba, “Em̧m̧an.”
Claudio ekar ba n̄an eō ke ij aikuj ire ippān ņo ko. Iaar ba n̄an eō make bwe inaaj lukkuun luuji pata eo ņae ta eo im āinwōt juon wall kileplep in dān.
Ilo an juon ņo kileplep kar epaaktok, Claudio ekar m̧ōkaj im ba: “Erreitok n̄an n̄a; en̄iin ej wāwein am̧ kōm̧m̧ane.” Claudio ekar ettōr m̧aanļo̧k n̄an ņo eo ej itok im tulo̧k ium̧win m̧okta jān an rub. Iaar lukkuun itok limo ilo n̄an tulo̧k jon̄an iaar jab mijōke ņo eo juon ej itok. Innām, bar juon alen, kar bar bun̄uti eō laļ ļo̧k n̄an bwiļōn lo̧jet im joto jotak eō kōn kajoor in ņo eo. Jidik iien tokālik, juon pā eaar dāpij eō, im iaar maron̄ in bar walōn̄tak n̄an iāejet. Kajoor eo an bōklōket eo aō ear bar makuņļo̧k.
Kiio iien in, ļeo jeiū eaar kūr ļo̧k n̄a n̄an tulo̧k ippān. Ilo aō eo̧ron̄ kūr eo, ikar ļoorļo̧k, im kom̧ro kar jim̧or tulo̧k. Iaar en̄jake āinwōt n̄e ikar kōm̧m̧ane juon teej eo elukkuun pen. Aaet, ekar jab pidodo, ak iaar kōm̧m̧ane, kam̧m̧oolol kōn jipan̄ im waanjon̄o̧k eo an ļaddik eo jeiū. Pein eaar lo̧o̧mo̧ren eō ruo alen; waanjon̄o̧k eo eaar kwaļok n̄an n̄a wāween jelm̧ae apan̄ eo aō im maron̄ anjo̧ raan eo.
Būreejtōn Russel M. Nelson eaar karuwaineneik kōj n̄an ļōmņak kōn selestial, im ikōņaan ļoor kapilōk eo an im kōjerbale ilo bwebwenato in summer eo aō.
Kajoor eo an Rilo̧mo̧o̧r ioon Rikōjdat eo
Eļan̄n̄e jej ļōmņak kōn selestial, jenaaj meļeļe bwe ilo mour ko ad renaaj jelm̧ae apan̄ ko im remaron̄ ļapļo̧k jen maron̄ ko ad n̄an anjo̧ ioer. Ilo mour wabanban in ad, jej tello̧kid n̄an dipuk ko̧kkure ko an rikapo eo. Āinwōt ņo ko ekar wōr aer kajoor ioō ilo jam̧ōr eo, jemaron̄ en̄jake m̧ōjņo̧ im kōņaan ebbweer. Ņo in “ko̧kkure ko” remaron̄ aete kōj jen rejet n̄an rejet. Ak jab meļo̧kļo̧k wōn ewōr an kajoor ioon ņo ko, im ilo m̧ool, ioon aolep men otemjeļo̧k. Ej eo ad Rilo̧mo̧o̧r, Jisōs Kraist. Ewōr an kajoor n̄an jipan̄ kōj ilo aolep jekjek ko rej kaen̄tanaan ak kauwōtata. Mekarta n̄e jej en̄jaake ad jab epaak E, E ej maron̄ wōt tōpar kōj ilo ad pād ijo jej pād ie.
Ilo ad pukot E ilo tōmak, E enaaj aolep iien pād ijeņ, im ilo iien eo An, E enaaj pojak im maron̄ dāpij peid im kanōkļo̧k kōj n̄an juon jikin ejokne.
Rilo̧mo̧o̧r eo im Waanjon̄o̧k in An Jerbal in Karejar
N̄e jej ļōmņak kōn selestial, jenaaj kile Jisōs Kraist āinwōt juon waanjon̄o̧k eweppān kōn jerbal karejar. Ewōr juon jon̄o̧k n̄an kōj ilo jeje ko rekwojarjar ilo iien eo E ak rijilōk ro An rej kōttōpar juon eo ej aikuj jipan̄, lomo̧o̧r, ak juon kōjeram̧m̧an ilo aer eļļo̧ke peier. Ilo bwebwenato in aō, iaar jeļā ļaddik eo jeiu eaar pād ijo, ak n̄an baj pād wōt ijo ejjab bwe. Claudio ekar jeļā ikar pād ilo jorrāān, im ekar itok im kotak eō jān dān ko.
Jet iien, jej ļōmņak bwe jej aikuj wōt bwe jen pād ilo iien an juon aikuj, im elōn̄ iien ko, elōn̄ļo̧k men eo jemaron̄ kōm̧m̧ane. Ilo an wōr kōļmenļo̧kijeņ eo n̄an indeeo ejipan̄ kōj bōk revelesōn ko n̄an leļo̧k jipan̄ ko ilo iien ko rejejōt n̄an ro rej aikuj. Jemaron̄ pedped ioon tōl im im̧we eo an Jetōb Kwojarjar n̄an kwaļok kain jipan̄ ko remenin aikuj, men̄e ikkijeen jipan̄ ko ilo ānbwinin āinwōt kainem̧m̧an an kōļmenļo̧kijen, m̧ōn̄ā, ak jipan̄ kōn jerbal ko an kajojo raan, ak tōl an jetōb n̄an jipan̄ ro jet ilo iaļ eo aer n̄an kepopo, kōm̧m̧an, im kautiej bujen ko rekwojarjar.
Rilo̧mo̧o̧r eo Ej Pojak n̄an Lo̧mo̧o̧ren Kōj
Ke Pita, Rijilōk eo eutiej, “ej etal ioon lọjet, bwe en ilọk ñan Jisōs … e mijak; im ej jino an tulọk,” innām “e laṃōj im ba, Irooj, Kwōn lọmọọren eō.” Jisōs eaar jeļā tōmak eo an Pita ekar kōjerbale n̄an itok n̄an Ippān ioon dān. E ekar barāinwōt jeļā kōn an Pita mijak. Ekkar n̄an ta eo eaar bōk jikin, Jisōs “e ṃōkaj … An erḷọke pein, im dāpij e,” im ba naan kein: “O kwe edik aṃ tōmak, etke kwaar pere?” An in naan rekar jab n̄an luki Pita ak n̄an kakememeje bwe E, Messaia eo, ekar pād ippen im rijilōk ro.
Eļan̄n̄e jenaaj ļōmņak kōn selestial, jenaaj bōk alikkar eo ilo buruōd bwe Jisōs Kraist ej ilo m̧ool ad Rilomo̧o̧r, ad Rijojomar ippen Jemān, im ad Ripinmuur. Ilo ad kōjerbal tōmak eo ad ilo E, E enaaj jipan̄ kōj jān ad jōbwābwe, ilo aolep ad appan̄, m̧ōjņo̧, im aikuj ko ilo mour in kanniōk im letok n̄an kōj menin letok eo em̧m̧antata, eo ej mour indeeo.
Rilo̧mo̧o̧r eo Ejjab Ebweer Jān Kōj
Ļaddik eo jeiū eaar jab ebbweer jān eō raan eo ak eaar wōnm̧aanļo̧k wōt bwe in maron̄ ekkatak wāween n̄an make kōm̧m̧ane. Ekar wōnm̧aanļo̧k wōt, mekarta n̄e aikuj in kar lomo̧o̧ren eō ruo alen. Ekar wōnm̧aanļo̧k wōt, mekarta n̄e ekar jab jim̧we aō kōm̧m̧ane jinoin. Ekar wōnm̧aanļo̧k wōt bwe in maron̄ anjo̧ jān apan̄ n̄an tōprak Eļan̄n̄e jenaaj ļōmņak kōn selestial, kile bwe Rilo̧mo̧o̧r eo enaaj pād ilo elōn̄ iien ko im ekkar n̄an letok jipan̄ eļan̄n̄e jej kōņaan ekkatak, oktak, anjo̧, kobaļo̧k, ak tōbrak ilo jabdewōt men eo enaaj boktok m̧ool im m̧ōņōņō ejjeļo̧k jem̧ļo̧kin ilo mour ko ad.
Pā ko Pein Rilomo̧o̧r
Jeje ko rekwojarjar rej dāpij kōkaļle ko im aorōkin pā ko Pein Rilo̧mo̧o̧r. Kōn en̄taan in pinmuur eo An, pā ko Pein rekar lōlō kōn dila n̄an dāpiji ioon dābwāāl eo. Ālkin Jerkakpeje eo An, Eaar waļok n̄an rijilōk ro An ilo juon ānbwin ewāppen, bōtaab kōkkaļļe ko ilo pā ko Pein rekar pād āinwōt kōkkaļļein en̄taan in pinmuur eo An ekwojarjar. Pein enaaj aolep iien pād n̄an kōj, mekarta n̄e jejjab maron̄ loe ak en̄jake ilo jinoin, kōnke E eaar kāālet jān Jemedwōj Ilan̄ n̄an erom̧ ad Rilōmo̧o̧r, Ripinmuur eo an aolep armej.
Ad Rijojomar, jān Jay Bryant Ward
The Hand of God, jān Yongsung Kim
N̄e inaaj ļōmņak kōn seletial, ijeļā bwe jejjab make ilo mour in. Ilo ad jelm̧ae apan̄ im mālijjion̄ ko, Jemedwōj Ilan̄ ejeļā maron̄ ko ad im ejeļā jemaron̄ en̄taan ak anjo̧ ioon men ko reppen. Jej aikuj kōm̧m̧ane ijo koņaad im oktakļo̧k n̄an E ilo tōmak. Nejin eo Ejitōnbōro, Jisōs Kraist, ej ad rilo̧mo̧o̧r im naaj aolep iien pād ijeņ. Ilo Etan, āt eo ekwojarjar etan Jisōs Kraist, amen.