Dua na iDusidusi Raraba
Na kosipeli vakalesui mai nei Jisu Karisito sa idusidusi raraba vei keda… . Sa ikoya na itukutuku vinaka—na ivakavuvuli sega ni yalani ka kaukauwa veilumuti ni Turaga o Jisu Karisito.
E se qai oti ga oqo, na nona vaqaqa e dua e dauveitalanoa ena walesi na irairai ni Lotu e vuravura, ni vakatauvatani na kena a tekivu mai Niu iYoka, kena itikotiko liu mai Utah, kei na italanoa ni iVola i Momani me baleta e dua na kawatamata makawa sara kei Amerika. Niu vakananumi ira na noqu itokani mai Esia, Aferika, Iurope kei na veiyasai vuravura tale eso, sa matata sara ni o koya e veitalanoa tiko oqo e sega sara ga ni kila na kena rui rabailevu na ibalebale ni kosipeli vakalesui mai, se na bulataki raraba ni kena cakacaka tabu, veiyalayalati, kei na veivakalougatataki. Na kena tarai vuravura raraba na iMatai ni Raivotu i Josefa Simici kei na iVola i Momani e sega ni vakarautaki ena vanua e tiko kina, ia ena kena itukutuku ga me baleta na veimaliwai ni tamata kei na Kalou, kei na veika vakalou ena rawata na tamata yadua.
Na kaci ni veisureti vaka-parofita ena veitabayabaki e sa “dou lako vei Karisito, mo dou vinaka kina” (Moronai 10:32, raica talega Maciu 5:48; Joni 10:10; 14:6) ni veivakabulai ena rawa ga ena vukuna na Luvena na Tamada e Le Duabauga (raica Joni 1:14, 18; V&V 29:42). Na kaci e sa baleti vuravura kece sara ga ka sa baleti ira kece na luvena, sega soti ni dua na ka se o kai Aferika, Esia, Iurope, se dua tale na vanua. Me vaka ga e a tukuna o Paula vei ira mai Aceni, ni o keda kece eda “luvena na Kalou” (Cakacaka 17:29).
Na ituvatuva ni noda bula ni Tamada ka vakanamata ki na Veisorovaki i Karisito e a vakarautaki ni se bera ni buli na vuravura (raica Eparaama 3:22–28; Alama 13:3). E a soli vei Atama kei Ivi ka tukuni vei rau me rau dau vakavulici ira na luvedrau (raica Mosese 5:6–12). Yaco na gauna, me ra besetaka kina na kawa i Atama na kosipeli, ia e qai vakavoui ena gauna i Noa, sa vakatalega kina, ena gauna i Eparaama (raica Lako Yani 6:2–4; Kalatia 3:6–9). E a soli na kosipeli vei ira na Isireli ena gauna i Mosese. Ia, e a gadrevi e dua na mataqali veiliutaki kaukauwa me kauta yani ki na gauna i Karisito ni sivia yani na senijiuri ni vukitani (raica Lako Yani 19:5–6; V&V 84:19–24). Na taucoko ni kosipeli e sa qai vakalesui mai vei ira na Isireli mai vua na iVakabula ena iotioti ni gauna.
E dua na italanoa vakaciriloloma ena ivolanikalou me baleta na ilakolako ni vukitani vakaoqo e tiko ena vosa vakatautauvata i Jisu me baleta na itaukei ni were ni vaini ca (raica Marika 12:1–10). Ena vosa vakatautauvata oqo e vakaraitaka kina o Jisu vei ira na tamata na iwiliwili levu ni parofita era sa talai oti mai vei ira me ra mai vueta cake e dua na matanitu savasava. Sa qai tukuna na nodra sa dau vakasevi tani tu ga ena veigauna era basika kina. Eso era moku ka cemuri laivi. Eso tale era vakamatei. Oti sa qai parofisaitaka na nona na veivakalotutaki, tukuna o Jisu vei ira era vakarorogo tiko Vua ni Tamana sa qai lewa me sa lako mai “e dua na luvena, sa dau lomana vakalevu,” (Vakadewa i Josefa Simici, Marika 12:7) ni kaya voli, “Era na vakarokorokotaka na luvequ” (Maciu 21:37).
Ia, ko Jisu ni kila tu na ka ena yacovi Koya, e a qai kaya,
“Ia, ko ira na ivakatawa ni were era na qai kaya … o koya oqo na ivakatawa e muri, tou mai vakamatea, ena qai noda ga na were ni vaini.
“A ra sa qai taura, ka vakamatea ka biuta ena taudaku ni were ni vaini” (Marika 12:7–8).
Tarava yani na nona mate na iVakabula kei ira na Nona iApositolo na veisautaki ni ivakavuvuli kei na cakacaka tabu ka sa muria sara mai na vukitani. Ena gauna oqo e rauta ni va na drau na yabaki na gauna ni butobuto vakayalo ni bera ni cilava tale mai na vuravura na rarama. E kila vinaka tu na iApositolo o Pita na Vukitani oqo ka parofisaitaka ni tarava yani na nona Kaucake na iVakabula ka na sega ni lesu tale mai na Turaga ena gauna “me caka tale me vinaka na ka kecega” ni bera na iKarua ni Nona Lako mai (raica Cakacaka 3:19–21). E parofisaitaka talega o Paula na iApositolo e dua na gauna ka na dredre kina vei ira na lewenilotu, “me ra vosota kina na ivakavuvuli dodonu” (2 Timoci 4:3–4) kei na “vukitani mai na dina” (2 Cesalonaika 2:2–3) me na liu ka tarava na iKarua ni Lako mai i Karisito. O Koya talega, e tukuna na “caka tale me vinaka na ka kecega” ka tukuna ni iVakabula, ena gauna “ni sa oti kecega na gauna sa lokuci … me soqona vata na ka kecega vei Karisito” (Efeso 1:10).
E a liutaka na Turaga na kena Vakalesui mai na kosipeli vei Josefa Simici. Na “caka tale me vinaka na ka kecega” e a tekivu ena Veikau Tabu ena nodrau rairai mai na Tamana kei na Luvena. E vulica o Josefa ena raivotu na ituvaki ni bula vakalou, ni rau duidui na Tamana kei na Luvena, ni rau vakalewe ka vakasui.
Ena itekivu ni veitabagauna e dau soli na ivola vua na parofita kacivi vou. E a ciqoma o Mosese na vatuceuti (raica Lako Yani 31:18). E a soli vei Liai e dua na ivola me dau wilika me baleta na vakarusai nei Jerusalemi (raica 1 Nifai 1:11–14). E a soli vei Isikeli na ‘ivola vivigi” (Isikeli 2:9–10) ka tiko kina na itukutuku ni Turaga vei ira na mataqali i Juta ena nona gauna. E a vakaraitaki vei Joni na Dauvakatakila e dua na ivola ka tiko kina e vitu na drega ena yanuyanu mai Patimo (raica iVakatakila 5; V&V 77:6). E matalia li me vakarautaka na Turaga e dua na ivola ka tiko kina na taucoko ni kosipeli me tiki ni “caka tale me vinaka na ka kecega”? E tiko ena ivola na kaukauwa me vakavolekataka na yalewa kei na tagane vua na Karisito. Na nona dau tukunikataka na Veisorovaki ni iVakabula e sa bau matata dina ni salavata kei na kena inaki kei na kena kaukauwa.
Sa vakasolokakanataka na Yalo Tabu ki na vuni yaloqu ni a raica o Josefa Simici na Tamana kei na Luvena ena Veikau Tabu kei na iVola i Momani ni dina. Au vakavinavinakataka na ikuri ni ka au mai kila me baleta na Veisorovaki ni iVakabula ka volai tu ena iVola i Momani. E dua na itutu e soli vua na iVakabula na “Luvena e Duabauga na Tamana” Kena ivakaraitaki o Joni na iApositolo e tukuna ena nona Kosipeli ni a raica na vakaturaga kei na lagilagi ni Turaga ena Ulunivanua ni Matalia ni Nona lagilagi e vakatauvatani kei na “Luvena e Duabauga na Tamana” (Joni 1:14; raica talega v. 18). Na iVola i Momani e vakayagataka talega vakakina vakawasoma na veiulutaga vaka o ya.
O Jisu e sucu mai na dua na tina vakayago, ia e Tama tawa mate rawa, ka duidui mai na tamata ni a taukena na mate mai na yasa ruarua. Na mate e taukena mai vei Meri e kena ibalebale ni na rawa ni mate, ia na ka e taukena mai vei Tamana e solia Vua na bula sega ni vakaiyalayala, ka kena ibalebale ni mate e volonitiataki. E kaya vakaoqo o Jisu vei ira na Jiu, “Me vaka sa bula vakaikoya ga ko Tamana, sa solia talega vua na Luvena me bula vakaikoya ga” (Joni 5:26).
Ena dua tale na gauna e tukuna o Koya:
“A ka oqo sa lomani au kina ko Tamaqu niu sa solia na noqu bula meu kauta tale.
“Sa sega e dua sa kovea oqo vei au ia, kau sa solia vakaiau ga. Au sa rawata meu solia, ia, kau sa rawata meu kauta tale. Ai vunau oqo sa solia mai vei au ko Tamaqu” (Joni 10:17–18).
Na veika vakalou ka rawata vakatabakidua mai vei Tamana e solia vei Jisu na kaukauwa me vakayacora na Veisorovaki, me vakararawataki me baleta na ivalavala ca kecega ni tamata. E vakavuvulitaka o Alama na parofita ena iVola i Momani, ni sega walega ni colata duadua o Jisu na noda ivalavala ca, ia e vakatalega kina na noda mosi, rarawa, kei na temaki. E vakamacalataka talega o Alama ni o Jisu e colata talega na noda tauvimate, mate kei na noda malumalumu. (Raica Alama 7:11–13.) O Koya e vakayacora na ka oqo me rawa kina ni “kila na nodra malumalumu na nona tamata ka vakabulai ira ena nona yalololoma” (Alama 7:12).
O Apinatai na Parofita e vakamacalataka, “ni sa cabora oti na yalona me isoro ena vuku ni ivalavala ca, ena qai kunea na nona kawa” (Mosaia 15:10). Sa 1aki vakatakila o Apinatai na kawa ni iVakabula ni o ira na parofita kei ira era muri koya. Sa vica vata na yabaki na noqu dau vakananuma voli ni veika e sotava na iVakabula ena Were vakakina na kauveilatai ni vanua e bikai Koya kina e levu sara na ivalavala ca. Mai na vosa nei Alama, Apinatai, Aisea, kei ira na vo ni parofita, sa veisau na noqu vakasama. Mai na dua ga na ibinibini ivalavala ca levu, e a vakila o Jisu “na noda malumalumu” (Iperiu 4:15), “[ vosota] na noda mosi, … colata na noda rarawa … [kei] ka vakanakuitataki me baleta na noda ivalavala ca” (Aisea 53:4–5).
E yaco duadua ga ka vakatabakidua na Veisorovaki me kila kina o Jisu na nodra malumalumu na nona tamata ka vakabulai ira ena nona yalololoma.
Ena Mataniciva Talei e vakaraitaki vei Mosese na veika kece e tu ena delai vuravura ka “sa lewevuqa sara me vaka na nuku mai matasawa” (Mosese 1:28). Kevaka me sa raica rawa o Mosese na veika bula kece sara, sa na rairai rauta vinaka me tiko na kaukauwa vei koya na Dauveibuli me rawa ni kilai keda kina vakavinaka. E a vulica na nodaru malumalumu, o iko kei au. E a sotava na nomu mosi kei na vakararawataki. Au vakadinadinataka ni kilai keda. E kila na ivakarau ni noda dau walia na veitemaki. E kila na nodaru malumalumu. E sega walega ni kilai keda, e kila talega se me vukei keda vakacava kevaka walega me da lako vua ena vakabauta. O ya na vuna e vakila kina vakasauri e dua na marama ni Palagi (Hispanic) ni o koya e dua toka na itoqa levu ena vuravura ni yavalati koya na Yalo Tabu ka vakadinadinataka vua na Vakalesui mai. E vakila na loloma ni Kalou ni o koya e luvena ka vakila talega ni kilai koya vinaka. E tukuna talega na vuna e matata kina vua na noqu itokani kai Japani na yavu ni veivakabulai ni rau vakavulici koya tiko na daukaulotu ka ni sa vakadeitaka vua na Yalo Tabu na inaki ni nona mai tiko e vuravura kei na veika e rawa ni cakava.
Au vakadinadinataka ni kosipeli vakalesui mai nei Jisu Karisito sa idusidusi raraba vei keda. Na vanua e yaco kina e dua na ka e sega soti ni bibi; sa itukutuku vinaka ga—na ivakavuvuli tawamudu kei na kaukauwa veilumuti i Jisu Karisito. Au vakadinadintaka ni bula tiko o Koya, ni o Koya na Karisito. Au vakadinadinataka ni kosipeli vakalesui mai vei Parofita Josefa Simici, sa ikoya na ka e a kaya o Pita “me caka tale me vinaka na ka kecega.” Au vakadinadinataka ni o Peresitedi Gordon B. Hinckley e parofita ni Turaga ena gauna oqo. Ena yaca i Jisu Karisito, emeni.