Veigauna Talei
Kevaka eda vakasaqara tiko na Turaga kei na nona veituberi, kevaka eda dusimaki me da lesu tale vei Tamada mai Lomalagi, ena yaco mai na veigauna talei.
Eda sa vakavinavinakataka vakalevu na noda parofita bula, o Peresitedi Gordon B. Hinckley, ka vakakina na nona vosa, “Me vakalougatataka na Kalou na iSoqosoqo ni Veivukei ni Lotu i Jisu Karisito ni Yalododonu Edaidai.”1 Na marama kece sara ena lotu era lewe ni iSoqosoqo ni Veivukei. E rawa ni da vakila o keda yadua na loloma ka sinai vutuvutu tu ena isoqosoqo vakalou oqo.
E gole na yaloqu vei kemuni na marama ka tarai kemuni vakabibi na veileqa sega ni namaki eso. Au reki ena itukutuku me baleti kemuni na marama buladodonu dauveiqaravi ka qaravi talega. Ena veiqaravi ena nodrau ruarua na loloma ni Turaga o koya na dauveiqaravi kei koya e veiqaravi. Ena gauna ni veivakatovolei oqo, au masuta mo ni na vakila na Nona loloma kei na noqu loloma kei na nodra iloloma talega e vuqa na marama ena iSoqosoqo ni Veivukei.
E dusimaka na Parofita o Josefa Simici na sala ni iSoqosoqo ni Veivukei ena nona kaya vei ira na marama ena 1842: “Sa nodra itovo na marama me ra dau yalololoma o koya gona ko ni sa umanaki tu oqo ena dua na veiqaravi mo ni matanataka kina na yalololoma sa vakatikora na Kalou e lomamuni. Kevaka mo ni na tudei ena ivakavuvuli oqo sa qai talei ka lagilagi!”2
Era a yavalati na marama ena veigauna taumada o ya mai vua na Parofita ko Josefa. Edaidai, sa tu talega vei keda na galala me da veiqaravi ni sa “talai kedatou na Kalou me vakayacori kina na cakacaka levu oqo.”3
Na cava na kena ibalebale ena kena vosa ni veisiga na, me da italai? Au vakabauta ni kena ibalebale me da qaravi ira na tani. E vakatoka oqori o Josefa Simici me da cakacaka “me vaka na loloma oqori” e yaloda. Au sa sotava oti e vuqa sara na veigauna vivinaka au vakila kina na nona vakayagataki au na Turaga meu italai. Au vakabauta ni o sa dau vukei talega ka dusimaki ena nomu veituberi, veivakacegui, ka veivakayaloqaqataki.
Ia, me vaka ni da marama eda sa rui dau beci keda! Ni vakabauti au ena noqu kaya, ni o keda yadua eda vinaka cake sara mai na veika eda dau nanuma. E gadrevi me da kila ka marautaka na veika eda sa cakava donu tiko. E vuqa na veika eda vakayacora, ena rairai lailai beka ka sega ni yaga—e tiki tu ga ni bula ni veisiga. Ia ni da sa “kacivi me da soli itukutuku vei Jiova,”4 me vaka e veivakasalataki kina na Parofita ko Josefa, au kila ni na levu sara na ka me da wasea.
Me’u tukuna mada vei kemuni e dua na kena ivakaraitaki. Au a tarogi Elder William W. Parmley ena dua na gauna lekaleka se qai oti ga oqo me baleta eso na vakanananu kei tinana, o LaVern Parmley, ka a veiqaravi tu ena loma ni 23 na yabaki vaka-peresitedi raraba ni Lalai. E a sega ni nanuma o koya na nona dau vosa ena koniferedi eso, se na veiparokaramu eso e a cicivaka. E a talanoataka e dua na gauna talei duadua ka a yaco ni se qai yabaki 17, ni vakavakarau tiko me lako ki na vuli torocake. E nanuma na nona a dabe vata kei tinana ka vakavulici koya ena cula bulukau. Vei ira na gone ena veitabayabaki kece sara ena dau vakaimawe tu ki na nodra bula na veivalavala lalai ka rawarawa.
E sega ni o keda kece e tu na luveda me da vakavulici ira ena culacula. O ira talega na marama ena gauna taumada era duidui sara me vakataki keda. Eso era vakawati, ka so e sega, eso era sa dawai, ia era duavata ena nodra inaki. Me vaka niu sa dau tiko vata kei kemuni ena vuqa na vanua, au sa dau vakila na nomuni loloma. Kemuni na marama au lomani kemuni kau kila ni lomani kemuni talega na Kalou.
E vuqa vei kemuni era sega tu ni vakawati. O ni se vuli beka; o ni cakacaka; o ni se vou ki na iSoqosoqo ni Veivukei. Eso vei kemuni o ni sa lewena sara tu mai vakabalavu. Ni yalovinaka ka vakabauti au ena noqu tukuna: e dui tu na kemuni yaga ka ko ni gadrevi. O ni dui kauta yadua mai na loloma, na igu, na raiyawa, kei na ivakadinadina ki na cakacaka oqo. Na nomuni dui sasaga mo ni bula volekata na Yalotabu sa vakalougatataki keda kece baleta ni o ni sa vulica mo ni dau vakararavi ki na Yalotabu me baleta na veivakaukauwataki kei na veidusimaki.
Ena dua na yakavibogi e a vakauqeti kina ko Cynthia, e dua na marama sega ni vakawati, me laki raica e dua na marama e dau sikova tiko. E a sega tiko e vale na marama o ya. Ni lesu tiko ki vale ko Cynthia, e a raica e dua na nasi ni tu ena tautuba ni dua na valenibula vata kei na rua na gone, ka rau kama—ruarua sara tu vakaca. Ni rogoca ko Cynthia ni kaciva na yaca ni goneyalewa lailai ko nasi, e basika vakasauri na nona vaka me nanumi rau mai: e a kilai rau na gone oqo ena nona a kaulotu voli mai Bolivia ena va na yabaki sa oti. Ni oti na nodratou veivakilaitaki ena lomanibai ni valenibula, e laurai votu ni rau sa bula cake mai na gone oqo, ia ni sega na veikauwaitaki ni matavuvale, e laurai ni rarawa tiko na yalodrau. Sa tekivu me dau sikovi rau na gone oqo ko Cynthia ka susugi rau cake. Ena nona muria ko Cynthia na veivakauqeti ni Yalotabu, sa yaco kina me italai ni Kalou ena nona vakalougatataki e rua na gonelalai.
E a rawa beka o ya baleta ni sega ni vakawati? E sega. Na vuna ni a vakarorogo ki na Yalotabu ka solia na yalona vua na Kalou. Kevaka e tiko vata kei keda na Yalotabu, kevaka eda vakasaqara tiko na Turaga kei na Nona veituberi, kevaka eda dusimaki me da lesu tale vei Tamada mai Lomalagi, ena yaco mai na veigauna talei. Eda na dau vakamareqeta ni da sa yaco me da italai ni Kalou.
Ena so na gauna e dau yaco mai eso na ka sega ni namaki ka da veisautaka kina na noda ituvatuva mai na “inakinaki oqo ki na inakinaki o ya.” E a vola kina vakaoqo e dua na marama: “Au sega ni vakabauta niu a vakila na marau dina ena noqu bula vakauabula me yacova na gauna au sa qai vakadeitaka kina ni kequ yaga vakatamata ka vakakina niu luvena yalewa na Tamaqu Vakalomalagi e sega ni dua na kena isema ki na ituvaki ni noqu bula vakawati. Mai na gauna o ya, au sa vakanamata ki na noqu tubu vakayalo kau sega ni leqataka se keu na qai vakawati.”5
Raica mada na levu ni ka eda na vulica kei na noda tubu ni da veiwaseitaka vakataki keda na noda ivakadinadina ni bula tiko na Turaga ka lomani keda. Me vaka au sa tukuna oti kevaka a rawa meu lewa e dua na ka me yaco vei kemuni yadua, sai koya mo ni vakila ena nomui bula ena veisiga na loloma ni Turaga.
Ena so na gauna e dau yaco mai na loloma o ya ena veisala e sega ni namaki. Sa mai vakacavara tiko o Kristen e dua na nona koroi ka se qai sucu wale toka ga na ikarua ni luvena. E vakila o koya ni sa levu cake sara na veika era sa rawata na vo ni gonevuli ka sa via lomalomaruataka na lako ki na vakayakavi ni tauri ivola. E a vakalevutaka na nona rere, ena gauna ni vakayakavi sa qai kerei mai vei ira na gonevuli me ra vola yani na veika era sa rawata ena buturara ni vuli. E nanuma lesu ko Kristen: “E vakasauri na noqu sa madua ka rere. E sega ni dua na ka me cavuti vei au, e sega ni dua na itutu, e sega ni dua na yaca ni itutu vakacakacaka.” E qai ca sara vakalevu ni a wilika mai na parofesa na veika sa volai tu ni solia tiko e dua na dipiloma vei ira yadua na gone. Na marama e liu vei Kristen sa levu sara na ka e rawata: sa rawata oti e dua na PhD, sa taura tale na ikarua ni nona koroi ni masita ka sa turaganikoro oti! Sa dua na ka na levu ni vakasausau vua.
Sa yaco mai na gauna nei Kristen. E a solia yani vua na parofesa na nona draunipepa lala, ka tarova sara tu vakaukauwa na wainimatana. E sega ni bera tale na nona sa kaya, “O Kristen e taura tu na itavi bibi duadua vei keda na tamata.” A galu vakalailai ka qai kacivaka ena domo kaukauwa, “O koya e tinadra na luvena.” Era a sega ni vakasausau walega na tamata, ia era a tucake. E dua walega na vakasausau tucake a vakayacori ena bogi ko ya; sa ikoya me baleta na tina ena loma ni vale o ya.
Kemuni na tina, sai kemuni na italai ni Kalou, ka tiko na nomuni itavi vakalou mo ni vakavulici ira ka susugi ira kina na luvemuni. Era gadreva vakalevu sara tu na gonelalai na ligamuni ni yalovinaka ka dauloloma. Ni o vakaliuci ira, ena dusimaki iko o koya ena sala vinaka duadua mo qaravi ira kina.
O kemuni era sa qase cake na luvemuni o ni gadrevi talega e vale. Io, e levu na rarawa, ia e levu cake sara na reki. Vakasaqarai ira! Ena noqu susugi iratou cake e va na gonetagane gugumatua, au vulica kina e vica na ka me baleta na italai: Marautaka na kaukauwa ni veiyabaki oqo! Vakarautaka na nomu vale me vanua ni veitaqomaki, marau, vakacegu ka ra dau kidavaki kina na itokani. Mo dau vakarorogo, dau loloma, ka wasea na nomu italanoa me baleta na nomu gauna ni gone kei na nomu veiyabaki ni goneyalewa vei ira na luvemu.
Dau namaka na ka mai vei ira na luvemu. Keirau a vakotora e dua na gauna me ra dau tiko kece kina e vale na neirau gonetagane ka tukuna vei iratou ni sa dau moce na Yalo Tabu ena tinikarua na kaloko ena bogilevu tutu. Ni ra sega ni lako mai ena gauna oqori, ena so na gauna e tukuna vei au Yalo Tabu meu laki vaqarai ira. Era kidacala kina eso na nodratou itau! Keitou dau veidredrevakitaka ena gauna oqo—ia au na tukuna vakadodonu, sa rawarawa cake ni dredrevaki ni ra sa qase cake mai.
Dau tu e yasadra na luvemu. Dabe ena idavodavo ka vakarorogo ki na veitalanoa ena bogilevu—tovolea mo dau yadra tiko! Masuta na Turaga me vakauqeti iko. Dau vosota vakalevu. Digitaka na nomu ivalu. Dau vakadinadinataka vakawasoma na veika e baleti Jisu Karisito kei na nona vinaka kei na Vakalesui mai. Ia, e bibi duadua me ra kila ni o dau vakararavi vua na Turaga.
Kevaka era sa tubu cake na gone ka lako yani; kevaka o sega ni vakawati, sa veisere, se dawai; kakua ni laiva na veika o sotava tiko me tarova na nomu rawa ni wasea na veika o sotava ena nomu bula. E gadrevi na domomu.
Ena dua na lesoni ni Sigatabu ni iSoqosoqo ni Veivukei ena noqu tabanalevu, keimami a veivosakitaka tiko se cava soti ena rawati kina e dua na bula vakawati vinaka. E qai kaya e dua na marama, o Lisa, “E sega beka ni dodonu meu tukuna e dua na ka baleta niu sa veisere tu. Ia, sa dau tosoi au tikoga na noqu veiyalayalati e valetabu.” Ni oti na lesoni au a tarogi ira eso na goneyalewa era se qai curu vou mai ki na iSoqosoqo ni Veivukei “na cava beka e tarai ira ena lesoni oqo?” Era kaya, “e tarai keimami vakalevu sara na veika e tukuna o Lisa.”
Kemuni na taciqu qase cake, au raica na Kalou ena nomuni vakaturaga. Na kena sa tara e vuqa sara na bula na nomuni yalomatua, dau vosota, kei na veika o ni sa sotava! Na vugoqu yalewa, ko Meri, ni sa yabaki 90 e dau kaya voli, “Era dau nanuma na tamata baleta niu sa qase au sa sega ni kila e dua na ka.” Meu tukuna mada vei kemuni na veika e kila kei na veika e vakayacora. Ni vakaitikotiko voli ena dua na vale ni malumalumu, a kerea o Meri vua na manidia kevaka e rawa ni ra vakayagataka e dua na rumu me caka kina na lotu. E qai kaya vua ni “sega” ni rawa baleta ni vale o ya e sega ni baleta e dua na matalotu. E a sega ni via ciqoma na nona isau ni taro. Ena nodra veivuke eso tale na marama a cike toka ga o Meri me yacova ni sa qai solia e dua na rumu na kabani. Sega ni dede, sa tauyavutaki sara e dua na tabana ka ra sa dau soqoni tiko na lewenilotu ena vei-Sigatabu ka vakaivotavota ena sakaramede me ra vakavouya na nodra veiyalayalati. E sega ni rawa ni vakalatilati na yabaki ena noda talai mai vua na Kalou.
E sega ni wili rawa na sala e rawa ni da italai kina ni Kalou. Me vaka beka oqo, mo dauveisiko ena kena ivakarau o dau vinakata voli; taroga e dua na goneyalewa ena veika e vinakata me cakava, kakua ni taroga se cava e sega tu kina ni vakawati; dau veiwasei ka kakua ni kumukumuni; dau digia vakamatau na nomu isulu, nomu ivosavosa, kei na veivakamarautaki; matadredredre vua na watimu se na luvemu ka sa kila tu ni sa vakavuna na yalorarawa kei na mosi ni yalo; mokota e dua na goneyalewa; veivakavulici ena kalasi ni isususu ena yalo mamarau; vakaraitaka ena nomu ivakarau ni bula ni da marautaka tiko na ilakolako. E kaya vakaoqo na Parofita o Josefa me baleta na mataqali sasaga vakaoqo, “Kevaka mo ni na tudei ena nomuni dodonu, era na sega ni tarovi rawa na agilosi me ra mai nomuni itokani.”6
Au vakadinadinataka ni da sa vakaitavi tiko ena cakacaka ni Kalou. Vinaka vakalevu na nomuni dina tiko ki na nomuni dui matavuvale, ki na iSoqosoqo ni Veivukei, kei na Lotu. Vinaka vakalevu na nomuni italai tiko ni Kalou ena kena qaravi na cakacaka cecere oqo. Mo ni vakila na loloma ni Kalou ena nomuni bula ka mo ni wasea na loloma oqori vei ira na tani, sa noqu masu ena yaca i Jisu Karisito, emeni.