Dou Vakarau … Dou Gugumatua

Bisopi Keith B. McMullin

iKarua ni Daunivakasala ena Matabisopi Vakatulewa

Era sega ni dau qaqa na veileqa vakacalaka kevaka eda bula savasava yadudua tiko.

O sa bau sotava e dua na veivosaki ka vakasauri na kena gadrevi mo galu mada me baleta ni sega ni matata ka vakalewai na nomu vakasama? E a yaco vei au e dua na ka vakaoqori voleka ni 25 na yabaki sa oti, ka se tu voli ga oqo na votivoti ni veivosaki sega ni vakacavari me yacova mai na siga edaidai.

Me vaka e dua na peresitedi ni daukaulotu, au a sureti, vata kei ira tale eso mai na Lotu, me keimami sota vata kei na turaganikoro levu ni dua vei ira na koroturaga ena neimami vanua ni veiqaravi. E dau veitokani ka kidavaki keimami ki na loma ni nona valenivolavola. Na neimami veivosaki e baleta tiko na veileqa ena gauna o ya—na veibolebole era sota kaya tiko na nona koroturaga, na voravora ena vuravura, na vakanadakui ni keda yaga vakatamata, kei na veika vaka o ya. Na ka e yaco, e a qai taroga se cava na vuna e cakava tiko kina na Lotu na cakacaka ni kaulotu ena nona koroturaga.

Na ka oqo e sa namaki tu. E a lako mai vei au e dua na vakanananu ena vica na macawa ni se bera o ya ni na taroga na taro oqo kei na cava e dodonu meu sauma kina. Au kaya: “Na kosipeli i Jisu Karisito e vakarautaka na isau ni taro kei na kena iwali ni veileqa taucoko sara e vuravura, okati kina o ira era vakatarogi ira tiko na tamata vinaka ena nomu koroturaga. Sa ikoya oqo na vuna keimami tiko kina eke.”

Au namaka ni na vinakata na turaganikoro me kila eso tale na ka. Ia, sa veisau na ivakarau ni yalona. Sa laurai votu e matana na vakatitiqa kei na qaciqacia. E kailavaka na lialia ni noqu via toro volekata yani na veiboleole ni vuravura ka vakavuna na kena tini botoilevu tu na neitou veisiko. E a sega ni vakatarai me tosoi tale na kena ivakamacala.

Ena mataka nikua, au gadreva meu vakaotia na veivosaki o ya. Au nuitaka ni vakarorogo tiko na turaganikoro vinaka oqo, baleta ni veika oqo era ka bibi ena dua na vuravura ni leqa.

Eda sa vakamalumalumutaki mai na veika rerevaki ka vakadomobula ena vica walega na yabaki sa oti yani. Era yaco ena veitubutuburi ni kedra iwiliwili kei na kedra vakadomobula cake tikoga mai. Na tavuki ni vanua ena kedra kaukauwa kei na kedra iwiliwili levu. Na veivakasaurarataki vakatamata e vakavuna me yaco kina na veivakacudrui, na veivala vakatamata e dua na ravuravu ka sega kina na loloma, kei na gagano sega ni tarovi rawa ka ra veivakayarayarataki ki na veiyacovi tawasavasava, cala vakalawa, kei na vakarusai ni matavuvale ka sa yaco me toso tikoga na kena levu. Na sunami mai na ceva kei Esia kei na veicagilaba e Amerika, kei na iwiliwili ni tamata era mate kei na vakacaca e yacovi ira, sa ikoya na veivakaleqai era qai yaco wale sara ga oqo ka ra vesuka tu na noda vakasama. O ira na tamata mai na veiyasai vuravura era tosoya na nodra yalololoma ka vukei ira e tarai ira vakalevu sara na veivakaleqai oqo. Ena dua na gauna lekaleka, e sa veisau ki na yalololoma kei na loloma na yalo ni veiqati.

Eda dinau tu kivei ira era, vakararawataki ena veivakaleqai, kauta lesu mai vei keda na nona vakararavi na tamata vua na Kalou. E dua na marama dawai ena loma ni dua na keba ni ivakaruru, ena nona tagicaka tiko na luvena tagane ka a vakamatei vakaukauwa, e tagi ena nona tukuna na vosa, “E dodonu me kakua ni yali na noqu vakabauta.” E dua na iliuliu ni koroturaga, vakasinaiti ena cudru nei Katarina, e vakadewataka yani na kerekere, “Ni masulaki keimami mai.”¹

Na vu ni veivakaleqai vakaoqo era sa ulutaga me vaka na veiba sega ni oti rawa. O ira na daukacikacivaki, dau ni politiki, dauvakadidike, kei na vuqa tale e tu vei ira na vakanananu ki na veika e vakavuna.

E kaya na Turaga o Jisu Karisito, me baleta na Vakalesui mai ni Nona kosipeli:

“Raica koi au na Turaga, au sa kila tu na veika rarawa ena yaco vei ira na kai vuravura; a ka oqo au sa kacivi Josefa Simici kina na noqu tamata ka vosa vua mai lomalagi, ka solia vua na vunau; …

“Dou vulica matua na vunau kece sa tu ena ivola oqo, ni sa dina ka dodonu; raica ena vakayacori vakaidina na parofisai kei na vosa ni yalayala kece sa tu kina.”²

Ni tomani tiko na veiba ni veika e vakavuna, me da vagolea na noda kidava na vuna se inaki ni veivakaleqai vakaoqo. Na kena vinaka, ni sega ni gadrevi eke na veiba baleta ni tu vei keda na taucoko ni kosipeli i Karisito ka rawa me da vakararavi kina. Vakasaqara na nodra vosa na veiparofita ena iVola i Momani kei na iVolatabu; wilika na ivakavuvuli i Jisu Karisito ena wase 24 ni Maciu;³ vulica na ivakatakila ni Turaga ena gauna oqo ena Vunau kei na Veiyalayalati.⁴ Ena veivolanikalou oqo eda vulica kina na inaki ni Kalou me baleta na veika oqo.

Na veivakaleqai era bucina na veisaqasaqa, kei na veisaqasaqa sa ikoya e dua na tiki bibi ni inaki nei Tamada Vakalomalagi me baleta na nodra mamarau na Luvena.

Kevaka e dodonu tu na lomada ena mata ni Kalou, na veisaqasaqa ena vakavulici keda, vukei keda me da valuta na noda itovo vakayago, ka bucina na ka vakalou e lomada. Kevaka me a sega vei keda na veisaqasaqa, ke da a sega ni kila me da “digitaka na ivotavota vinaka.”⁵ Na veisaqasaqa e vukei keda me da raica na veika cava ga eda gadreva me da veivutuni kina, me rawa ni levu cake na noda itovo vakavuravura se vakayago me iulutaga ki na vu ni yaloda, ka ciqoma na bula savasava kei na marau ka “vakacegu na yalodra.”⁶

Na levu ga ni noda kabita na bula savasava, na levu cake ga ni noda marautaka na veitaqomaki ena lolo-ma ni noda iVakabula. Sa ikoya na Dauveibuli ka Turaga ena vuravura. Ena vakamaravutaka na cagi kei na wasawasa.⁷ Na nona ivakavuvuli kei na Veisorovaki ena vakabula na yalo sa veivutuni. Sa ikoya na Mesaia se Dauveisereki, ena Vukuna, sa rawa vei keda vakayadua me da dui liutaka ga na noda vuravura vakataki keda, veitalia mada ga ke yacovi keda tu na leqa. Rogoca na veidina oqo:

“Ia ena yaco vakaidina na gauna ena lako mai kina na Mesaia me vakabulai ira na luve ni tamata mai na nodra lutu tani. Ia ni ra sa vakabulai mai na nodra lutu tani, era sa sereki kina ka tawamudu ka kila na ka vinaka mai na ka ca; era na lewa na ka me ra kitaka ka sega ni vakasaurarataki vei ira; ia era na lewai ga ena vunau ena siga mai muri me vaka na nona ivakaro na Kalou.

“A ra sa sereki na tamata kece ga ena bula vakayago, ka sa soli vei ira na ka kecega sa yaga vua na tamata. Era sa sereki me ra digitaka na galala kei na bula tawamudu ena vuku ikoya na Dauveisorovaki ni tamata kecega, se me ra digitaka na tiko vakabobula kei na mate me vaka na nona veivakabobulataki kei na nona inaki [na tevoro]; raica sa segata ko koya me ra rarawa na tamata kecega me vakataki koya.”⁸

Eda na vinaka ke da nanuma ni tevoro sa ikoya na dauveivakarusai.

E sa ka dina sara ni bula oqo eda vagalalataki walega me vaka na noda ituvaki ni bula vakayago. Ena rairai sega beka ni rawa me da tarova na ivalu ena veivanua vakayawa, se na ligada malumalumu me da tarova kina na cagilaba kaukauwa, se cici vakaveitalia ena gauna e vesuki tu kina na yagoda ena tauvimate. Ia e sa dina sara ni veika vakaoqori e sega ni lewa vakatabakidua na noda dui vuravura. Oi keda ga eda rawata!

E vakaraitaka na Parofita o Josefa Simici: “Na mamarau sa ikoya na ivakaraitaki ka iyaloyalo ni noda bula; ena tiko na kena itinitini, kevaka me da tovolea na gaunisala e liutaki keda kina; kei na gaunisala oqo sa ikoya na bula dodonu, tu vakadodonu, yalodina, yalomalua, ka maroroya na ivakaro kece ni Kalou.”⁹

E sa vakakina, na turaganikoro cecere ka dokai, na kosipeli i Jisu Karisito e vakarautaka na isau ni taro ki na veileqa kecega vakavuravura, e macala vinaka baleta ni vakarautaka na iwali ni tauvimate ki na veitamata bula vakayadua.

Ena veigauna e yaco mai kina na leqa, e dau salavata mai kei na dua na itavi vakamareqeti ka lutuki keda yadua ka me yaco me vakavinakataki keda. E dodonu me da tarogi keda vakaikeda, “Na tiki ni noqu bula cava e gadrevi me veisautaki me sega ni yaga kina vei keda me da rarawa ena veivakanakuitataki?”

E vakamatatataka na Turaga ena ivolanikalou na veika e gadreva vei keda o Koya me vaka na lako sobu ni veilewai. E kaya: “Ia mo dou vakarau ka vakadreta na ivau ni tolomudou. Raica sa soli vei kemudou na matanitu; ia ena sega ni rawai kemudou na meca.”¹⁰

Na Lotu kei ira na lewena era sa vakaroti me ra rawati ira vakaiira ka tu vakataki koya.¹¹ Na vakavakarau e okati kece kina na ituvaki ni bula. E tekivutaki mai na vakabauta, ka rawa kina vei keda me da vosota na veivakatitiqa ena nodra yaco mai. Eda kila vinaka na bula vakavuravura me vaka e dua na vakavakarautaki ni dua na ilakolako. Vakabauta na Turaga kei na Nona kosipeli e vakarusa na rere ka solia na veika vakayalo.

Na veika vakayalo e tubu cake ena noda “daumasu, ka … caka dodonu e mata ni Turaga.”¹² “Na veika vakayalo sa ikoya na kilai ni qaqa mai na tamata e loma kei na sokalou kei koya sa Tawamudu.”¹³

Na vakabauta, veika vakayalo, kei na talairawarawa e solia e dua na tamata vakarautaki koya ka rawati koya vakaikoya. Ni da talairawarawa ki na veiyalayalati ni ikatini, eda sa viribaiti mai na leqa ena veika e gadrevi ena bula kei na kaukauwa ni dauveivakarusai. Ni da talairawarawa ki na lolo ka soli ka vakayauyau ena noda kauwaitaki ira na tani, ena rogoci na noda masu ka vakalevutaki na yalodina vakamatavuvale. Na veivakalougatataki vata ga era na yaco mai ena noda talairawarawa ki na nodra ivakasala na parofita ka da bula me veiraurau ga kei na levu ni veika eda rawata, levea na dinau sega na betena, ka maroroya toka vakatikitiki eso na ka yaga ena bula me tokoni keda kei ira na noda matavuvale me rauta mada ga e dua na yabaki. Na ka oqo e dau sega soti ni ka rawarawa, ia me da cakava na noda “vinaka e uasivi duadua”¹⁴ ka na sega ni leqa na noda lololo—ia ena “rauta na ka me vakayagataki ka vo tu yani.”¹⁵

E kaya tale na Turaga; “Dou gugumatua; dou kakua ni rere; raica sa nomudou na matanitu.”¹⁶

Na kaukauwa kei na noda vorata rawa na veika sega ni namaki e yaco mai ena bula savasava. E sega ni bula savasava e dua ka yalododonu ena Sigatabu, qai dau vakawelewele ena vo ni macawa. Na gagadre sega ni dikevi era veivakarusai ka vakavuna kina vei ira na tagane me ra “kakua … ni vakawaletaka na veika tabu.”¹⁷ E vakatavulica o Peresitedi Brigham Young, “Na ivalavala ca ka na kabita taucoko na kawa nei Atama kei Ivi sa ikoya, ni ra sega ni vakayacora vakavinaka na veika era kila vinaka tu na kena icakacaka.”¹⁸

Na kosipeli i Jisu Karisito sa ikoya na gaunisala ki na bula savasava. Na veileqa vakacalaka era sega ni dau qaqa kevaka e tiko na bula savasava vakatamata. O koya gona, me da vakarorogo ena ivakasala nei Paula na iApositolo:

“Sa vakarau oti na bogi, a sa voleka na siga: o koya me da qai luvata tani na ivalavala ni butobuto, ka me da vakaiyaragi tu ena rarama.

“Me da lako voli me vaka e kilikili, me vaka ena siga; me kakua na isoqosoqo lialia, se na mateni, me kakua na daudara se na ivalavala velavela, me kakua na veileti se na vuvu.

“Ia dou vakaisulu ena Turaga ko Jisu Karisito, ka kakua ni ia me vakarau kina gagadre ca ni yago.”¹⁹

Na noda itavi me vaka ni da Yalododonu Edaidai sa ikoya me da vakarautaki keda, ena vuravura oqo, kei ira na lewena me baleta na iKarua ni Lesu tale mai ni Turaga o Jisu Karisito. Na noda vakavakarau kei na noda vakaukauwataki me vaka na ivakavuvuli ni kosipeli e vakadeitaka eke kei na veigauna sa bera mai na mamarau ka caka kina me rawa na “itavi cecere ena gauna ni mileniumi” oqo.

Na noda daulomani o Peresitedi Hinckley e vakadreta: “Oqo, kemuni na taciqu kei na ganequ, sa yaco mai na gauna me da vakaitavitaki keda vakalevu cake, me levu cake sara na noda raivotu ka vakalevutaka na noda taro kei na kila na itavi cecere ena gauna ni mileniumi oqo ni Lotu i Jisu Karisito ni Yalododonu Edaidai. Oqo na gauna ni vakaukauwa. Sa ikoya na gauna me da toso yani ki liu me kakua na lomalomarua, kila vinaka na kena ibalebale, na kena levu, kei na kena bibi ni noda itavi. Sa ikoya e dua na gauna me da cakava kina na ka dodonu veitalia ga se cava na kena isau ena mani salamuria mai. Sa ikoya e dua na gauna me da laurai ni da maroroya tiko na veivakaro. Sa ikoya na kena gauna me da veivukei yani ena yalovinaka kei na loloma kivei ira era vakaleqai tu kei ira era se lako voli ga ena butobuto kei na mosi. Sa ikoya na gauna me da vakasama ka caka vinaka, yalo vinakaka ka da veivakarokorokotaki ena noda veitokani kece sara. Ena dua tale na kena ivosavosataki, me yaco me da tautauvata kei Karisito.”²⁰

Na veivunauci oqo mai vua na parofita ni Turaga e dusimaka na noda gaunisala ena gauna ni voravora vakaoqo. Kivei kemuni kece na vakararawataki tu, keimami lomani kemuni. Au kerea na Tamada Vakalomalagi, ena nona loloma tawa yalani, me vakamamadataka na nomuni icolacola ka vakasinaita na nomuni bula e na vakacegu ka sa “uasivia na ka kecega.”²¹ O sega ni tiko duadua. Na neimami loloma kei na vakabauta kei na masu e sa cokoti vata kei na nomu. Toso ki liu ena bula savasava ena qai totoka vakaoti na veika kecega.

Ena yaca i Jisu Karisito, emeni.