Veivakalougatataki mai na Kena Wiliki na iVola i Momani
Sa na vakatau sara ga oqo vei keda na noda wilika na iVola i Momani, vulica na kena ivakavuvuli ka bulataka.
Au dau vakanamata ena veivula ena kena dau yaco mai na mekesini talei na Ensign. E vakadeitaki au na veitukutuku mai na Mataveiliutaki Taumada, ka dau tiko ena veilavelave yadua. Na Ensign kei na Liaona ni vula ko Okosita e kauta mai na bolebole mai vei Peresitedi Hinckley me wiliki se wiliki tale na iVola i Momani ni bera ni cava na yabaki.
Na cava e vakabauta kina o Peresitedi Hinckley ni na yaga vakalevu vei keda yadua na kena wiliki na iVola i Momani? E a kaya:
“Na kena talei e sega ni vakaiyalayala me vakataka na dina, ka rabailevu me vaka na kawatamata. Sa ivola duadua ga ka tiko ena dua na tabana na yalayala ni rawa ni na kila na kena dina o koya e wilika, ena kaukauwa vakalou.
“Na kena itekitekivu e vaka na cakamana; ni talanoataki na kena itekitekivu vua e dua e sega ni matau vua, ena via sega sara ga ni vakabauta. Ia na ivola oya e sa tu oqo meda tara ka taura e ligada ka wilika. Ena sega ni dua me na veibataka na kena sa tu oqo… .
“E sega tale ni dua na itukutuku e volai me na vakamatatataka na dina ni gauna era dau talairawarawa kina vua na Kalou na tagane [kei na yalewa] ka vutuniyau ka tubucake, ia ni ra sa dau beci Koya kei na Nona vosa, sa na yaco sara ga mai na leqa, kevaka me sega ni tarovi ena bula dodonu, sa na muria mai na malumalumu kei na mate” (“Ai Vakadinadina Katakata ka Dina,” Liaona, Oko. 2005, 4–5).
Na cava e bibi kina vei keda nikua na wiliki ni iVola i Momani? Sa baleta ga ni o ira na daunivolavola ena iVola i Momani era a kila vinaka tu ni veika era vola e baleti ira na veitabatamata ena gauna oqo ka sega ni itabatama- ta ena nodra gauna. E vola mai vakaoqo o Moronai ki na itabatamata oqo, “Au sa vosa sara tikoga oqo vei kemudou me vaka ko dou sa tiko eke” (Momani 8:35) E kaya vakaoqo o Nifai na parofita:
“A sa yalataka vei au na Turaga na Kalou ni na maroroi ka taqomaki na veika kece au sa vola oqo, ka soli yani vei ira na noqu kawa ki na veitabatamata kecega me vakayacori kina na veiyalayalati ka cakava vei Josefa, ni na sega ni vakarusai sara na nona kawa mai vuravura” (2 Nifai 25:21).
Na iVola i Momani e domo ni ivakaro ki na itabatamata oqo. Raica na kena matata ni vakamacalataka na ituvaki kei vuravura nikua:
“Sa sega kina ni yaga me dua e kaya ni na sega ni yaco; raica ena yaco vakaidina, ni sa tukuna na Turaga; ia ena kauta mai na Turaga mai na loma ni qele, ka sega e dua me na tarova; ia ena yaco na ka oqo ena gauna sa kainaki kina ni sa oti na gauna ni caka mana; io ena rogo mai ena domo lailai mai na kuvu ni soso.
“Ia ena yaco ena gauna sa tagi kina na nodra dra na yalododonu vua na Turaga, ena vuku ni cakacaka butobuto kei na veika ca kecega.
“Io, ena yaco ena gauna sa na cakitaki kina na kaukauwa ni Kalou, ka ra na ca na lotu kecega ni sa vakalevulevui ira na viavialevu ni lomadra ko ira na iliuliu ni lotu kei ira na ivakavuvuli, ka ra qati ira na nodra lewe ni lotu.
“Io, ena yaco na gauna sa rorogo kina ena bukawaqa kei na cava kei na o kubou ena veivanua tani.
“Ia ena rorogo talega na ivalu kei na irogorogo ni ivalu kei na tavuki ni vanua ena veiyasana e vuqa.
“Ia, ena yaco na gauna sa dukadukali sara kina na delai vuravura; sa yaco na veilabalabati kei na butako, na lasu kei na veivakaisini, na dauyalewa kei na itovo vakasisila kecega; lewe vuqa era na kaya: kitaka na ka oqo kei na ka ko ya, ena sega na kena ca, io ena vakadonui iko ga na Turaga ena siga mai muri. Ia ena ca vei ira oqo ni ra sa tu ga ena ka gaga sara ka ra sa vesuki ena ivalavala ca” (Momani 8:26–31).
E a vakadeitaka o Peresitedi Ezra Taft Benson na dina ni iVola i Momani e sa ka bibi sara ena noda gauna ni a kaya:
“E a volai na iVola i Momani me baleti keda nikua. E vola na ivola na Kalou. E dua na itukutuku ni kawatamata sa vaqeavutaki ka ra biuta vata na tamata era vakauqeti me da vakalougatataki kina nikua. Era sega sara ga ni sotava na ivola oqo na tamata ena gauna o ya—e a caka me baleti keda. O Momani, na tamata ka vakatokayacataki vua na ivola oqo e a vakalekalekataka na ivolatukutuku ni vica vata na senitiuri. Na Kalou ka kila na kena itinitini mai na ivakatekivu, e tukuna vua na ka me vola ena nona vakalekalekataka me na ganiti keda ena gauna oqo” (“The Book of Mormon Is the Word of God”, Ensign, May 1975, 63).
Sa vakavuqa na noda wilika na itukutuku me vaka beka e itukutuku ni kawatamata sa qeavu, ka da sa guilecava, ni a kumuni vata mai vei ira na tamata vakauqeti me baleta na noda vukei me da lako vei Karisito. O ira e levu na nodra volavola ena iVola i Momani era sega ni cakava me wili vaka ivolatukutuku. Na kena dina ni o Jekope e tukuna ni o Nifai na tacina e vakaroti koya me “kakua ni vola kina na kedra itukutuku ni mataqali i Nifai, ia kevaka meu mani vola ia me vakalailai ga” (Jekope 1:2).
Ena veigauna eda wilika na ivola sa dodonu me da dau tarogi keda, “Na cava na vuna era digitaka kina na daunivolavola na italanoa oqo se na ka e yaco oqo me tabaki vata na itukutuku? Na cava na kedra yaga vei keda nikua?”
Ena kedra maliwa na veilesoni eda vulica mai na iVola i Momani sa ikoya na vuni kena yaco kei na revurevu ni dua na ivalu kei na sala e qai wali kina. E tukuni kina na veika ca kei na veika vakarerevaki ni isoqosoqo eso, ka ra tubu cake me ra rawata na kaukauwa mai vei ira na tamata. E tukuna ni tiko dina o Setani ka vakaraitaka talega e so na iwalewale ni veika e dau vakayagataka. E vakasalataki keda ena kena vakayagataki vakavuku ni noda iyau. E vakamatatataka sara ga na rawarawa kei na dina vakamareqeti ni kosipeli, kei na dina ni vakalou nei Jisu Karisito kei na Nona Veisorovaki me baleta na kawatamata. E vakaraitaka talega na nodra na vakasoqoni vata na Isireli ena iotioti ni gauna. E tukuna vei keda na inaki kei na ivakavuvuli ni veivakalotutaki. E vakasalataki keda me da qarauna na yalo dokadoka, sega ni veikauwaitaki, yalowele, na rerevaki ni ivakavuvuli vakailasu, veiqati, kei na bula dukadukali.
Oqo sa vakatau sara ga vei keda na noda wilika na iVola i Momani ka vulica na kena ivakavuvuli ka bulataka.
E tekivu na iVola i Momani ena dua na italanoa totoka me baleta na matavuvale dau vakayagataka na nodratou ivolanikalou. O Liai, e dua na parofita ka tama, e sa vakasalataki ni ra sa tiko o ira era via vakamatei koya me baleta na nona kacivaka voli na nodra sa rui tamata ivalavala ca. E vakasalataki me kauti iratou na nona matavuvale ka dro yani.
“A sa lako yani ki na lekutu ko koya. A sa biuta tu mai na nona vale, kei na vanua e taukena, na nona koula kei na nona siliva, kei na nona iyau vakamareqeti ka sega ni kauta e dua na ka vakavo sara ga na nona matavuvale kei na kedratrou kakana, valelaca, ka dro yani ki na lekutu” (1 Nifai 2:4).
Oti vakalailai na gauna ni nodratou sa lako yani, sa qai tadra o Liai e dua na tadra me se tei kakua mada ni ratou lako sara vakayawa, ka ni gadrevi me ratou lesu tale mada ki Jerusalemi ka laki kauta mai na ivolatukutuku ni nodratou qase ka sa volai tu ena peleti parasa. Na peleti oqori e tu talega kina na nodra vosa na parofita kei na ivakaro ni Kalou. E a soli na itavi oqori vei iratou na luvei Liai e lewe va me ratou lesu tale ka laki kauta mai na ivolatukutuku.
Ni ratou yaco yani, eratou sa vakawirimadigi sara se o cei me na laki kauta mai na peleti parasa mai na vale nei Lepani. Donumaki Leimani na madigi. Sa qai lako yani o koya vei Lepani, “A sa cudru ko Lepani ka biliraki koya tani; a sa sega ni solia vua na ivolatukutuku. A sa kaya vua: Tamata butabutako; au na vakamatei iko” (1 Nifai 3:13). E drovaki bula o Leimani ka sega ni rawata na peleti.
Dua na ka e tarai au baleta na imatai ni sasaga oqo, o ya ni sega ni dua na nodratou yavu vinaka. Oqo e vakavulica vei keda e dua na lesoni vinaka ni rawa me da vakamuria ena dau wili ivolanikalou. Me da sa vakaraitaka na noda dinata na wiliki ni iVola i Momani ena kena navuci vakavuku e dua na ituvatuva ni vuli ivolanikalou.
Ena nona ivola ena Ensign kei na Liaona, e solia kina e dua na bolebole o Peresitedi Hinckley, ni “bolei ira na lewe ni Lotu ena veiyasai vuravura kei ira na itokani ena veivanua cava ga era tu kina me ra wilika ka wilika tale na iVola i Momani.” Sa qai solia e dua na ituvatuva me rawa ni qaravi kina na bolebole o ya: “Kevaka mo ni wilika e dua ki na dua veimama na iwase ni ivola ena dua na siga sa na rawa ni ko ni vakaotia na ivola ni bera ni cava na yabaki” (Liaona, Oko. 2005, 6). Sa oti oqo na Okosita kei na Sepiteba. Ena ituvatuva nei Peresitedi Hinckley sa dodonu me da sa wiliwili tiko oqo ena iVola i Alama—maliwa ni wase 4 kei na 12. Ko ni sa tiko e liu se ko ni muri tiko?
Ni sa mai daro na kena rawati na peleti ena imatai ni sasaga, eratou sa nanuma na taci i Nifai me ratou sa lesu tale ki na nodratou matavuvale ena loma ni lekutu. Ia, o Nifai e vakauqeti iratou me ratou tovolea tale ena dua na sala me ratou na rawata kina na ivolatukutuku: “Ia me datou yalodina ka kitaka na ka sa vakarota na Turaga raica me datou lako ki na vanua i tamadatou ni sa biuta tu mai kina o koya na koula, na siliva kei na iyau talei. A sa kitaka oqo ena ivakaro ni Turaga… .
“Keitou sa kaya vei Lepani me solia vei keitou na peleti parasa ka ceuti tu kina na itukutuku, keitou sa qai solia vua na neitou koula, na siliva, kei na neitou iyau talei kecega” (1 Nifai 3:16, 24).
Na ivakaraitaki nei Nifai e vakavulici keda ni veivakalougatataki ni ivolanikalou e bibi cake sara mai na iyau kei na veika talei tale eso. Na kena lasavi na veika vakavuravura ena lekaleka walega na kena taleitaki, ia ena sega ni kauta mai na vakacegu kei na marau tawa vakaiyalayala. Ni da vakasaqara na veika vakayalo, ena tawamudu na kena veivakalougatataki ka na kauta mai vei keda ena bula oqo na vakacegu eda dau vakasaqara.
Sa veivakauqeti tiko oqo o Peresitedi Hinckley me da wilika na iVola i Momani me laveti keda cake mai na veika vakavuravura ka marautaka na veika e nona na Turaga. E kaya, “Sega tale niu qai lomalomarua, au sa yalataka oqo vei kemuni ni kevaka o kemuni yadua mo ni vakamuria na ituvatuva oqo, sega ni dua na ka kevaka mo ni sa wilika oti na iVola i Momani, ena lako mai ki lomamuni kei na nomuni matavuvale e dua na ikuri ni Yalo ni Turaga ka dau vakavuna na talairawarawa ki na Nona ivunau kei na ivakadinadina e kaukauwa cake sara baleta na dina ni bula tiko na Luvena na Kalou” (Liaona, Okos. 2005, 6). Era bibi cake sara na veivakalougatataki mai na veika vakavuravura.
Na gauna eratou vinakata kina o Nifai kei iratou na tacina me ratou sa veisautaka na nodratou iyau kei na peleti parasa, sa qai butakoca ka cemuri iratou o Lepani ka saga me vakamatei iratou. Ni sa mai vakarua na kena sega ni rawati na peleti parasa, erau sa datuvu sara ga o Leimani kei Lemueli ka rau sa vinakata me ratou sa lako ga ka ni sa dredre sara na itavi e vakacolati mai vei iratou. E sega ni bau yavalati o Nifai ena nona sa dei me na talairawarawa tikoga ki na ivakaro ni Turaga. E vakaoqo na nona vosa vei iratou na tacina: “Me datou lako cake tale ki Jerusalemi, ka me datou yalodina ka kitaka na ka sa vakarota na Turaga raica sa kaukauwa ko Koya ka malumalumu na kai vuravura kecega, ia ni sa kaukauwa vakaoqo, me qai sega vakacava ni kaukauwa vei Lepani kei ira na nona lewe limasagavulu se na nona lewe udolu vakatini?” (1 Nifai 4:1).
Na vakanamata ena qaravi itavi kei na vakabauta na Turaga ena kauta mai na veika e dau gadrevi. Ni sa lako yani o Nifai me laki kauta mai na ivolatukutuku, ena veiliutaki ni Yalotabu, e soli sara ga mai ki ligana na bula nei Lepani. Ena nona vakabauta kei na talairawarawa, e rawata kina o Nifai me vakalougatataki o koya kei na nona matavuvale ena vuku ni ivolanikalou. Ni sa qai tiko vei iratou kei na tacina na peleti sa qai rawa ni ratou lesu vei tamadratou ki na lekutu.
Kevaka me da ciqoma na bolebole mai vei Peresitedi Hinckley ena vakabauta, e sa na tiko vei keda na veivakadeitaki ni parofita ni da ciqoma na veivakalougatataki ena noda wilika ka vulica na iVola i Momani. Eda na kunea, me vakataki Nifai kei na nona matavuvale ni ivolanikalou, “ena kune kina na vinaka ka na yaga vakalevu sara vei keimami” (1 Nifai 5:21). E rawa ni da ciqoma na veivakalougatataki e yalataka o Moronai ena nona sa mai tinia na nona volavola ena iVola i Momani:
“Io, dou lako vei Karisito ka biuta tani na ivalavala sa sega ni vakalotu, mo dou vinaka kina; ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko kei na nomudou igu taucoko, sa na qai rauti kemudou na nona loloma; ia na nona loloma dou sa vinaka kina ena vuku i Karisito ia kevaka dou sa vinaka ena loloma ni Kalou ena vuku i Karisito; sa sega ni rawa mo dou cakitaka na kaukauwa ni Kalou” (Moronai 10:32).
Oqo na yabaki eda marautaka kina na ika 200 ni yabaki ni ivakananumi ni sucu ni Parofita o Josefa Simici. Na iVola i Momani sa ivakadinadina ni nona veivakalotutaki o Josefa Simici kei na Vakalesui mai ni Lotu i Jisu Karisito. E tukuna o Peresitedi Hinckley me baleta na iVola i Momani ena Koniferedi Raraba ena Epereli, “E ka rawarawa sara ka rawa ni tarai, rawa ni wiliki, rawa ni vakatovolei… . Au vakasamataka tiko ni vakacava kevaka me ra ciqoma ka kidavaka ka maroroya na lotu va-Karisito e vuravura raraba na ivola oqo me vaka e dua na ivakadinadina katakata. E matataka tiko e dua tale na isolisoli levu ka a yaco mai me vaka na ivakatakila vua na Parofita o [Josefa]” (“Na Veika Cecere sa Vakatakila na Kalou,” Liaona, Me 2005, 82).
Au masulaka ni da na wilika na iVola i Momani o keda kece ni bera ni cava na yabaki me sotava na bolebole mai vua na noda parofita nikua, Peresitedi Gordon B. Hinckley, me da vakacaucautaka kina na parofita ni Vakalesui mai o Josefa Simici. Me na dua na noda ituvatuva ka vakamuria ena vakabauta me da na sotava ka vakasinaiti ena veika sega ni vakaiyalayala ka tawamudu, io na vosa ni Kalou ka tiko ena iVola i Momani. Oqo na noqu masu malumalumu ena yaca i Jisu Karisito, emeni.