“Kevaka Me Nei Karisito na Noqu Veigauna Donu …”
E vakatavulici keda na noda iVakabula o Jisu Karisito ena bibi ni noda vakasaqara e dua ka yali.
Ena vuqa na yabaki sa oti, ni ra se qai yabaki 6, 4 kei na 2 na luvei keirau era qase, o au vata kei na marama watiqu keirau a vakurabuitaki ira ena dua na kilakila mada. Keitou dau wilika vata vakamatauvale e veisiga na iVola i Momani.
“O cei na tamata,” a taroga na marama watiqu, “ka lako ki na loma ni veikau me laki vakasasa, ia, e a qai yaco, me masumasu ena siga taucoko me yacova ni sa laki bogi?”
Ni oti e dua na gauna lekaleka ni vakanomodi, e a qai solia e dua na ivakaraitaki… . ”E tekivu na yacana ena matanivola na I … i … i … i … i.”
Mai na dua na tutu e a kacivaka mai na neirau yabaki rua, “Nosi!”
Sa ikoya na gone oqo e a qito tikoga ena tutu ni vale—o koya keirau a nanuma ga ni sa rui gone sara ka na sega ni kila. Inosi! Sa ikoya o Inosi ka a lako ki na loma ni veikau me laki vakasasa, ia e a viakana vakayalo. E dina ga ni sega ni tukuni ena kena itukutuku ni a yali ena loma ni veikau o ya, e vakavulici keda na italanoa kei Inosi ni gauna e a lesu mai kina ena loma ni veikau, e a yaco me kune tale—ka qai mai vakila e dua na gagadre me baleta na nodra welefea na tacina, ni oti o ya.
Ena Veiyalayalati Vou, e vakavulici keda ena bibi ni noda vakasaqara e dua ka yali o Jisu Karisito, na noda iVakabula.
“Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa ena veico, ka laki vakasaqarai koya sa yali, me kunea mada?
“Ia ni sa kunea, sa viribale ki domona, ka reki” (Luke 15:4–5).
Me vakatekivu mai na lutu nei Atama, na tamata taucoko era tu ena dua na ituvaki ni yali kei na lutu. Me tautauvata ga kei na lewe vuqa vei kemuni, na noqu a “kune” e a tekivutaki mai vei rau e lewe rua na daukaulotu yalodina. Ena yabaki 1913, mai Copenhagen, Denmark, erau a vakavulici rau na tukaqu kei na buqu ena kosipeli i Jisu Karisito ka papitaisotaki rau, oi rau o Elder C. Earl Anhder kei Elder Robert H. Sorenson. Erau vakavulici au na noqu itubutubu ena bibi ni cakacaka vakaukauwa, yalodina kei na dina. Ia, ena gauna lekaleka ni dua na itabatamata keimami sa yali mai na veitavi qaravi ena Lotu kei na kila ka vakosipeli. Niu raica lesu, au vakasamataka, na nodra dau sureti au ki na Lalai niu a se gonelailai sara o ira na noqu ilawalawa vakaqito. Na imatai ni ka au sotava ena lotu e a taraicake mai ena veitokani e a yaco ena Lalai.
Me vaka ga e dua na gonetagane lailai kau madualaka tiko ni se vo e vica na vula meu qai yacova na i ka 12 ni noqu siganisucu, au a sauma kina e dua na tukituki ena mata ni katuba, ena dua na yakavi ni Vakarauwai. Era lewe vica na noqu itokani—dikoni, vakasote vulavula ka vakaneketai, eratou kerei au me keitou lako vata ki na imatai sara ga ni gauna meu lako kina ena soqoni ni matabete. E taubale toka e yasaqu na neitou iliuliu, ena neitou sa sirova sobu tiko yani na delana ki na Valecavu ena Lomanibai ni Valetabu. Sa ikoya o ya na soqoni ni matabete ena koniferedi raraba ni Epereli.
E a noqu Qasenivuli ni Sikauti o Lloyd Bennet. E sa vakavuqa na nona dau vakavodoki au ena so na yakavi ni Vakarauwai ka kauti au ki na Valenivolavola ni Sikauti me dau laki voli na beji kei na so tale na veika e gadrevi. Ni keirau sa toso tiko, keirau dau veitalanaoa. Sa yaco me dua o koya na itokani kau dauvakabauta. O Lloyd Bennett, me vakataki ira e so, era taura na gauna me ra vakasaqara kina na sipi sa yali.
O ira na itokani kei ira na iliuliu vakasakiti oqo era kila vinaka tu na ivakasala nei Elder M. Russel Ballard ena dua na gauna lekaleka wale tikoga oqo me “vakasaqarai … e dua tale” (“One More,” Liaona, Me 2005, 71), ka ra sa kila tu na cava e na gadrevi kina. Ena so na gauna, o koya sara ga ka toka ena tutu, e sega ni da dau kauwaitaka.
Na veika au a sotava me vakataki Inosi e a yaco mai ena noqu yabaki 18 kau a tekiduru kina ena noqu bareki ni mataivalu e Fort Ord, California. Ena gauna sa boko kina na cina kau tekiduru toka ena dua na buturara kaukauwa, me vakataki Inosi au raica rawa na noqu gaunisala. Meu sa dua na daukaulotu tudei. E vakasinaiti na yaloqu ena vakavinavinaka me baleti ira na lewe vuqa era a vakaitavi ena nodra vukei au me yaco kina meu kila se o cei o au kei na noqu kila na Karisito kei na Nona Kosipeli. E a yaco meu kila ni noqu gaunisala ki vale e rawati ena vukuna na noda iVakabula, o Jisu Karisito.
“Ia e na lako mai ki vuravura me vakabulai ira na nona tamata; raica ena colata ko Koya na nodra i valavala ca ko ira sa vakabauta na yacana; ia sai ira ga oqo era rawata na bula tawamudu.” (Alama 11:40)
O Aisea na parofita ni Veiyalayalati Makawa, ena nona raica tiko na noda veisiga ena gauna me na vakalesui taucoko mai kina na kosipeli, e a kaya:
“Sa kaya vakaoqo na Turaga ko Jiova, Raica, kau na dodoka na ligaqu vei ira na veimatanitu, ka vakaduria na noqu kuila ki na veimataqali; ka ra na keveti ira na luvemu tagane ka kauta mai, kei ira na luvemu yalewa era na kauta mai ena domodra” (Aisea 49:22).
Ena noda kauwaitaka e dua ga, na tacida kei na ganeda, eda raica na vakavatukanataki ni parofisai o ya. E rawa ni o raica na nomu a keveti e ligadra ka kau mai e domodra … me taqomaki?
Na cava beka ena vakayacora na noda iVakabula me baleta na veigauna donu e tu vei keda me rawa ni kauwaitaki kina e dua? Ni da vakayagataka na ivakavuvuli Kevaka me nei Karisito na noqu veigauna donu, na cava ena cakava o Koya? na noda vakatulewa ni bula ena vakatabakidua vei Karisito.
Au kila vakataki au ni dau vakamuria na noda daulomani o Elder Neal A. Maxwell ena veigauna taucoko me kunei, koya na dua. Me vakataki Nifai, e a cakacakataka, “vagumatua me vola na veika oqo, me da vakauqeti ira kina na noda kawa, … me ra vakabauti Karisito, ka veivinakati tale kei na Kalou” (2 Nifai 25:23). Au kila ni o Elder Maxwell e a dau kaci vakavuqa kivei ira, o koya mada ga, e a yali, e a tovolea tiko me kauti koya mai vei Karisito.
Kevaka eda dua na qasenivuli ni Lalai, iliuliu ni Cauravou se Goneyalewa, Qasenivuli ni Sikauti, dauveituberi vakavuvale, dauveisiko, se itokani, ena vakayagataki keda na Turaga, kevaka eda na vakarorogo, me da vakasaqara ka kunea na dua.
Sa dua na ka na noqu vakavinavinaka ena noqu vakatulewataka meu daukaulotu tudei ka yaco kina e dua na veisau cecere ena noqu bula. Kemuni na cauravou, e tu vei kemuni na galala mo ni veiqaravi, ka cakacaka vagumatua mada ga. Bula kilikili tikoga, vakavakarau mo ni vunautaka na kosipeli; kakua na vakaiulubale—mo ni lako ka laki veiqaravi! Kemuni na goneyalewa, e rawa mo ni cakava e levu na ka me taraicake kina na matanitu. Kemuni na sa matua, keimami gadrevi kemuni!
E a soli ki na neitou matavuvale na galala ni laki veiqaravi e Kenada vata kei ira na italatala qase veivakurabuitaki ka gugumatua, sisita, kei ira na daukaulotu matua. Ena veitaratara ni uto ki na uto, yalo ki na yalo, kei na kaukauwa ni Turaga, era vakasaqara e dua ga ka kunei koya, me vaka era dau vakayacora na daukaulotu gugumatua e vuravura raraba.
“A sa yaco me ratou iyaya ni cakacaka ena liga ni Kalou, me ratou tuberi ira na lewe vuqa me ra kila na ivakavuvuli dina, ia, me ra kila na nodra iVakabula (Mosaia 27:36).
E rawa sara ga vei keda vakayadua me da cakava e dua na duidui ena nona bula e dua tale, na nona bula tawamudu sara mada ga, ia e dodonu me da cakacakataka; e dodonu me da cakava; e dodonu me da cakacaka vagumatua. E rairai o ni sa ciqoma e dua na ivakaraitaki mo ni sureta e dua me lesu tale mai ki na lotu, se me qai mai rogoca vakadua na itukutuku ni kosipeli vakalesui mai. Lako yani ki liu, vakamurimuria na ivakaraitaki o ya. Na cava na vuna e sega kina ni rawa vei keda taucoko me da sureta e dua me lako mai ni mataka ka mai rogoca na domo ni dua na parofita? E rawa vei iko mo cakava o ya? E rawa mo cakava na veisureti o ya nikua? Ena vakabauta kei na dua na loma talairawarawa (na gagadre mada ga), e dodonu me da vakabauta ni Yalo Tabu ena solia vei keda, “ena gauna ko ya, io ena tiki ni siga ko ya, na ka [me da] vosataka” (V&V 100:6). Au kila ni vaka dina kina.
Au sa vakavinavinaka dina vakalevu ena noqu kacivi meu veiqaravi, vakadua tale, ena gauna oqo ki Ositerelia. Au vakaraitaka na noqu loloma tawamudu kei na vakavinavinaka kivua na marama watiqu kei na lewe ciwa na luvei keirau ena nodratou dau nanuma na kaulotu ena nodratou loloma kei na veitokoni. Au wasea na ivakadinadina bibi ni taucoko ni kosipeli e sa vakalesui mai e vuravura, ni o Josefa Simici sa ikoya e dua na parofita ni Kalou kei na iVola i Momani sa ikoya na vosa ni Kalou. E liutaki keda tiko edaidai e dua na parofita bula, o Gordon B. Hinckley. Au kila ni bula tiko na Kalou kau kila ni o Jisu na Karisito, na noda iVakabula ka Dauveivueti. Ena ligana dauloloma na iVakatawa ni sipi kei na vatuvatu ni tabana ena kauti keda yani kina ki vale. Me vakataki Inosi, meu kaya ena yalomalua, “Meu vunau … vei ira na tamata oqo ka tukuna vei ira na ivakavuvuli dina kei Karisito. Ka sa ikoya na ka … au sa rekitaka vakalevu duadua e dela ivuravura” (Inosi 1:26). Ena veidina kece oqo, au wasea kina na noqu ivakadinadina, ena yaca i Jisu Karisito, emeni.