Me na Rawa Ni da Laki Tiko Vata Kece kina e Lomalagi

Kathleen H. Hughes

iMatai ni Daunivakasala ena Mataveiliutaki Raraba ni iSoqosoqo ni Veivukei

Ni da yaco me da digitaki ni Kalou, ena vakayagataki keda o Koya me baleta na Nona cakacaka.

Kemuni na veitacini, eda mai soqoni vata tiko vakalewe ni iSoqosoqo ni Veivukei ena bogi edaidai. E totoka dina na kemuni irairai. Ena noda mai veisotari, au sega ni tarova rawa noqu vakasamataka na imatai ni soqoni ni Soqosoqo ni Veivukei. Au raitayaloyalotaka ena rai ni noqu vakasama ni vosa tiko o Parofita Josefa vei ira na marama veitacini ka vakarautaki ira tiko me baleta na nodra itavi ena taraicake ni matanitu ni Kalou. Au rogoca na masu ni yalodra na marama. “Au sa yalataka meu vakayacora na nomuni cakacaka, ia mo ni vukei au ena gauna oqo, Turaga, meu yaco meu nomuni digitaki.” Na nodra masu sa yaco me noda.

Na bula vakayago sa ikoya na noda gauna vakayadua me da yaco kina me da iyaya ni cakacaka oqori.

Au taleitaka na italanoa kei Sisita Lucy Mack Smith, ka sa malumalumu ka qase sara, ka a tucake me vosa vei ira na tacina ena dua na soqoni ni iSoqosoqo ni Veivukei taumada e Nauvoo. Au gadreva mo ni nanuma, ni oqo e dua na marama yaloqaqa dina—e dua na iliuliu cecere. E tautauvata sara ga kei na so na marama au raica ena iSoqosoqo ni Veivukei nikua. Ia ena siga o ya e a kaya o koya, “E dodonu me da dau veimarautaki, veirairaici, veivakacegui ka rawata na ivakasala me na rawa ni da laki tiko vata kece kina e lomalagi.”¹

Na veivosa oqori era tukuna tu na nodra na yaco na marama me ra “digitaki ni Kalou.”² O cei vei keda e sega ni vinakataka me marautaki, vakaraici, vakacegui ka vakasalataki ena veika ni Kalou? Ena rawa vakacava? Na lomavinaka, na ivakaraitaki ni loloma, na ivakarau ni veinanumi, kei na liga dauveivukei ni gadrevi. Ia, na noqu vosa e sega ni baleti ira era gadreva na loloma cecere vakaoqo ia kivei keda kece ka dodonu me da dau vakayacora na ivakarau vakalou vakaoqo ena veisiga. Me da vakataki Jisu Karisito, ena nona vakavulica na Parofita o Josefa Simici ni a kaya, “sa dodonu me da vakarabailevutaka na yaloda ena vukudra na tani.”³

Eda diva taucoko me da taukena na loloma savasava nei Karisito, ka vakatokai me loloma cecere, ia na noda ivakarau vakatamata—na “yalewa vakatamata” e lomada—e dau vakataotaki keda. Eda dau cudru, eda dau vakacudrui, eda dau beci keda vata kei ira tale eso—ena gauna vakaoqo, eda sega kina ni rawa ni idewadewa ni loloma eda vinakata, me rawa kina ni da digitaki ena liga i Tamada Vakalomalagi. E na gadrevi ena rawati ni loloma ni Kalou kei na vakayacora ni nona cakacaka na noda rawa ni veivosoti keda vakaikeda kei ira na tani.

E na noqu tekivu vakarautaka tiko na noqu vosa oqo, au a vakayacora na veika au kila ni dodonu meu vakayacora: au gole yani ki na valetabu, au lolo, au wilika na ivolanikalou ka masumasu. Kau qai vola e dua na vosa. Ia, ena gauna eda digitaka kina me da volavola me baleta na loloma cecere, e dodonu me da vakila na bula ni dauloloma. E a sega ni yaco vei au. O koya gona, ni oti na tuturu ni wai ni mata kei na masu, au sa qai vakasamataka rawa e dua na ka, meu kere veivosoti vei ira ka, ra sega tu ni kila, ni ra vuni noqu vakasama sega ni loloma. E a dua na ka dredre. Ia, e a veivuke. Ka sa qai lesu tale mai na Yalo ni Turaga.

Na segati ni tamata dauloloma e taura na bula taucoko, ia e dau veisautaki keda na loloma yadua kei ira era solia. Meu talanoataka mada e dua na marama gone sara au a qai sotava walega tikoga oqo. O Alicia, me vaka ga e levu na goneyalewa sa yaco me dri tani mai na Lotu, ia ni oti o ya sa vakauqeti tiko me lesu mai. E dau vakavuqa na nona sikovi tukana ena vale ni malumalumu ena Sigatabu. Ena dua vei ira na siga oqori e a lomana me lako ki na dua na soqoni ni Yalododonu ekea. E na nona dolava yani na katuba e donumaka sara ga yani e dua na soqoni ni iSoqosoqo ni Veivukei, ia e a sega kina na idabedabe lala. Ni vakarau tiko me suka lesu, e a dusimaki koya e dua na marama ka vakusakusa yani me wasea na nona idabedabe. E a kaya o Alicia, “Au veinanuyaka na nona vakasama na marama o ya me baleti au ni vakasautaki tu e vuqa sara na tiki ni yagoqu kau boi kuvukuvu. Ia e vaka me sega ni kauwaitaka; e a vakagalalataka ga vakadinamati e dua na vanua e yasana.”

E a lesuva tale o Alicia, na qaravi itavi ni oti na nona vakayaloqaqataki koya na marama oqo. E sa qarava oti na nona kaulotu ka sa wasea tale tikoga na loloma vata vaka o ya vei ira tale eso na marama. O koya na marama e a wasea na nona idabedabe e a kila deivaki ni tiko na vanua me baleta na marama yadua ena iSoqosoqo ni Veivukei. Eda vakasoqoni vata me da vakaukauwataki, ia eda kauta vata tu mai kei keda na noda veimalumalumu kei na bula druka.

E a tukuna vei au o Alicia e dua na ka kau na sega vakadua ni guilecava. E a kaya, “Au dau vakayacora e dua bulu na ka vei au niu lako ki lotu sa ikoya na noqu vakayagataka na sakaramede me baleti au. Na vo ni gauna au dau wanonovi ira matua na gadrevi au kau dau tovolea meu veivuke ka veisusu.”

Kemuni na taciqu, ni da yaco me da digitaki ni Kalou, ena vakayagataki keda o Koya me baleta na Nona cakacaka. Me vakataki Alicia, e gadrevi me da vuki vei ira era wavoliti keda ka yadrava na veisala ka rawa ni da veiqaravi ka vukei ira kina. E dodonu me da dau nanumi ira na tu mai katuba, ka rai tiko mai ki loma, ka dreti ira mai vei keda—me na rawa ni da laki tiko vata kece kina mai lomalagi. E sega ni o keda kece eda dau nanuma ni tiko e dua na tikina me baleta e dua tale na tamata ena noda idabedabe, ia ena dau kune tu ga na idabedabe ke tiko na tikina e yaloda.

Ena 1856, oi rau na veitacini o Julia kei Emily Hill, erau a lewena na Lotu ni rau se goneyalewa voli mai Peritania ka rau sa sega ni kauwaitaki mai na nodrau matavuvale, erau sa qai mai rawata na nodrau ilakolako ki Amerika ka sa voleka sara me rau yacova na Saioni ka rau dau gaganotaka tu. Ena nodrau takosova tiko na bucabuca kei Amerika kei ira na ilawalawa ni qiqibili nei Willie (Willie handcart) erau a tao vata kei ira na lewe vuqa tale ena sala ni dua na cagilaba ena ivakatekivu ni vula ko Okotova. E dua na makubui Julia Hill vakarua, o Sisita Deborah Christensen, e a sotava na tadra veitarai oqo me baleti ira. E a kaya:

“… Au a raici rau o Julia kei Emily ni rau tao tu ena uca cevata ena tokaitua ni Rocky Ridge kei ira na vo ni ilawalawa ni qiqibili nei Willie. E a sega na nodra isulu vavaku me vakatakatai ira. E a dabe toka ena sautaninini ena dela ni uca cevata o Julia. Sa sega ni rawa vua me tomana tale. E a kila o Emily, ka sa liliwa tale tu ga ni kevaka me na sega ni vukei koya me tucake sa na mate vakaidina o Julia. Ena gauna e roqoti tacina kina o Emily me vukei koya me tu cake, sa tekivu me tagi o Julia—ia e a sega na wainimata, e rogo ga na vakasolokakana malumu. Vakamalua erau taubale yani ki na nodrau qiqi. Era lewe tinikatolu era mate ena bogi vakadomobula o ya. Erau a bula o Julia kei Emily.”⁴

Kemuni na veitacini, ke rau a sega ni tu vata, ke rau a sega beka ni bula na marama e rua oqo. Me kena ikuri erau a veivuke talega ena nodra vakabulai eso tale mai na tiki vakadomobula ni ilakolako oqo, oka kina e dua na tina gone kei ira na luvena. Sai Emily Hill Woodmansee ka a qai vola na qaqa ni sere totoka “Veitacini e Saioni.” Na qaqana, “Me roqoti na oca ka tuberi na malumu”⁵ ni da vakananuma na veika e a sotava ena veibuca vavaku ena uca cevata o ya.

Me vakataki rau na veitacini marama na Hills, e vuqa vei keda era na sega ni rawata na veibolebole ni bula vakavuravura ke sega na nodra veivuke eso tale. Ka sa dina sara kina: ni da vukei ira na tani, eda sa vakabula tale tiko na yaloda.

E a vakila o Lucy Mack Smith kei ira na veitacini ena iSoqosoqo ni Veivukei e liu na loloma savasava i Karisito, na loloma cecere ka sega na kena iyalayala. E nodra na dina ni kosipeli ka liutaka tiko na nodra bula; e dua tiko na nodra parofita bula; e tiko na Tamadra mai Lomalagi ka dau rogoca ka sauma na nodra masu. Sa vakakina koi keda. Eda a taura na yaca i Karisito ena papitaiso. Eda kauta vata voli kei keda na yacana ena veisiga ka vakauqeti keda na Yalotabu me da bulataka voli na nona ivakavuvuli na iVakabula. Ni da vakayacora vakakina, eda na yaco me da digitaki ni Kalou ka na laveti keda na Yalotabu ki na veivakatagedegede cecere ni vinaka.

Na ivakaraitaki uasivi duadua ni loloma cecere sa ikoya na Veisorovaki soli vakailoloma vei keda nei Jisu Karisito. Na noda vakasaqara matua na loloma oqo e kena ibalebale ni da sega walega ni namaka me noda, ia me da wasea talega vakakina. Ni da wasea kei ira na tani na loloma oqo, eda na lamata cake me vaka e dua na “digitaki ni Kalou, ena kena vakayacori na cakacaka vakaitamera oqo”⁶ Eda na vakarautaki kina ena noda laki tiko vata kece kei ira na tacida mai lomalagi—vata kece.

Au vakadinadinataka, ni bula tiko ka lomani keda na iVakabula. E kila na veika e rawa ni da yacova—veitalia ga na noda dau bula druka. Ena yaca i Jisu Karisito, emeni.