Yaco mo Daukaulotu

Elder David A. Bednar

Ena Kuoramu ni iApositolo Le Tinikarua

O iko vata kei au, edaidai kei na veigauna taucoko me daru vakadinadinataki Jisu Karisito ka vakatakila na itukutuku Vakalesui mai… . Ia na cakacaka ni daukaulotu sa ivakaraitaki ni keda ituvaki kei na noda iyau vakayalo.

Oi keda taucoko sara eda sa mai ciqoma na matabete tabu eda sa taura na ilesilesi tabu ni nodra vakalougatataki na veimatanitu kei na matavuvale e vuravura ena kena vunautaki yani na kosipeli ka sureta na tamata kecega me ra ciqoma na cakacaka tabu ni veivakabulai mai na ligadra na vakailesilesi dodonu. E vuqa sara vei keda eda sa kaulotu oti, eso vei keda era sa kaulotu tiko ena gauna oqo, ka da sa kaulotu taucoko tiko edaidai ka na tomani tiko yani ena noda bula taucoko. Eda sa daukaulotu ena veisiga ena noda matavuvale, ena noda koronivuli, ena noda vanua ni cakacaka, kei na noda itikotiko raraba. Se cava ga na noda yabaki ni bula, veika eda sa sotava, se ituvaki ni bula, eda sa daukaulotu kece sara.

Na vunautaki ni kosipeli e sega ni dua na itavi qaravi e vagaunataki se caka ga me rawa. Kei na noda cakacaka vakadaukaulotu e sega ni baleta ga na gauna lekaleka ga ni veiqaravi vakadaukaulotu ena gauna ni itabagone se ena gauna ni qase. Ia, sai koya ga na vakaio ki na vunautaki ni kosipeli vakalesui mai i Jisu Karisito e umani tiko ena bubului kei na veiyalayalati ni matabete eda sa virikotori kina. Na cakacaka ni kaulotu sa ilesilesi vakamatabete, kei keda kece sara na lewe ni matabete eda sa italai vakadonui ni Turaga e vuravura ka da sa daukaulotu ni Turaga ena veigauna taucoko ena veivanua kecega—ka da na vaka tu oqo ena veigauna. E vakamatatataka sara vakalevu na noda ivakatakilakila vakalewe ni matabete ka kawa i Eparaama na noda qarava vinaka na noda ilesilesi ena kena vunautaki na kosipeli.

Na noqu ivunau ena bogi nikua e sa baleta kece sara na noda ilesilesi ni matabete ena kena vunautaki na kosipeli. Na noqu inaki vakatabakidua ena soqoni ni matabete oqo, o ya, meu vosa vakadodonu sara ga vei ira na cauravou ena Lotu era sa vakavakarau tiko ki na veikacivi ni kaulotu. Na ivakavuvuli au na vosa kina vei kemuni e rawarawa ka matata vakayalo, ka na rawa me da na tugana, vakadikeva, ka toroya cake. Au sa masuta na veitokani ni Yalo Tabu vei iko vata kei au ni da cakacakataka vata na ulutaga bibi oqo.

E Dua na Taro e Dautarogi Vakawasoma

Ena noqu dau soqoni vata kei ira na itabagone lewe ni Lotu e veiyasai vuravura, au dau sureti ira era vakarorogo me ra taro. E dua na taro au dau tarogi kina vakawasoma mai vei ira na cauravou o ya, “Na cava meu vakayacora meu vakarautaki au kina vakavinaka meu daukaulotu tudei?” Na taro yalodina vakaoqo e gadrevi me saumi sara ga vakadodonu.

Kemuni na taciqu gone, na ka bibi duadua ga e rawa ni ko ni cakava mo ni vakavakarau ki na veikacivi mo ni daukaulotu o ya mo ni sa daukaulotu tiko taumada ni bera ni ko ni kacivi. Yalovinaka ka raica ni noqu isau ni taro au vakamatatataka kina mo ni ka sega ni laki. Meu vakamacalataka mada na kena ibalebale.

E dau noda ivosavosa tu ena Lotu, na noda dau tukuna laki Lotu, na lako ki na valetabu, kei na laki kaulotu. Au kerea meu vosa doudou mada ena noqu kaya ni calata sara tu ga na maka na noda cavuta tiko na lako oqo.

Na kena dina e sega ni o koya na lako ki lotu; ia, na dina sai koya na sokalou kei na vakavoui ni veiyalayalati ni da Lotu tiko. Na kena dina o ya e sega ni lako ki se lakova na valetabu; ia, na kena dina sai koya na tiko ni yalotabu, veiyalayalati, kei na cakacaka tabu ni Vale ni Turaga e yaloda. Na kena dina e sega ni lako ena kaulotu; ia, na yaco me da daukaulotu ka veiqaravi tikoga ena noda bula taucoko ena yaloda taucoko, vakasama taucoko, kaukauwa kece, nanuma kei na igu kecega. E rawa vua e dua na cauravou me laki kaulotu ka sega ni yaco me daukaulotu, oqo e sega ni ka e vinakata na Turaga se ka e gadreva na Lotu.

Sa noqu vakanuinui vei kemuni yadua na cauravou o ya ni ko ni na sega walega ni laki kaulotu—ia ko ni na yaco mo ni daukaulotu ni se bera ni ko ni vakarautaka na nomuni pepa ni kaulotu, ni se bera sara ni ko ni ciqoma na veikacivi ni kaulotu, ni se bera sara ni ko ni tabaki mai vua na nomuni peresitedi ni iteki, ka vakakina ni se bera sara ni ko ni curuma na KNK (Koronivulu ni Kaulotu).

Na iVakavuvuli mo Tamata Yaco

E vakavulica vagumatua sara vei keda o Elder Dallin H. Oaks na bolebole me da yaco me dua na ka ka sega ni vakayacora wale tu ga na itavi namaki se vakayacora na cakacaka eso:

“E vakavulica o Paula na iApositolo ni nona ivakavuvuli kei ira na qasenivuli ni Turaga era sa soli mai me rawa ni da ‘tautauvata kei na ivakarau ni tamata dina era sa sinai sara kei Karisito.’ Na ituvatuva vakaoqo e gadreva e levu cake tale na ka mai na kila ka ga.

“E sega mada ga ni se rauti keda na veivakauqeti ni kosipeli; e dodonu me da matanataka ka vakasamataka me rawa ni da vakavoui mai kina. Ena kena vakatautauvatataki ki na vuli vakavuravura, ka vakavulica me da kila ka, ia na kosipeli i Jisu Karisito e bolei keda me da tamata yaco.” (The Challenge to Become, Elder Dallin H. Oaks, Ensign, Noveba 2000, t. 32).

Kemuni na veitacini, na bolebole mo ni tamata yaco e taurivaki vakadodonu ena vakavakarau ki na daukaulotu. E dina sara, na ituvatuva mo ni daukaulotu e sega ni gadrevi kina vua e dua na cauravou me daramaka e dua na sote vulavula kei na neketai ki koronivuli ena veisiga, se me vakamuria na idusidusi ni daukaulotu me baleta na gauna ni moce kei na yadra, e dina ga ni vuqa na itubutubu era tokona na vakasama o ya. Ia sa rawa mo vakalevutaka na nomu gagadre ni qarava na Kalou (V&V 4:3), ka sa rawa mo tekivu vakasama vakadaukaulotu, wilika na veika era dau wilika na daukaulotu, mo masu me vakataki ira na daukaulotu, ka vakila na ka era dau vakila na daukaulotu. Sa rawa mo levea na veitemaki vakavuravura e dau vakavuna me vakasuka na Yalo Tabu, mo nuidei ena nomu kila ka vakayacora na veivakauqeti vakayalo. Na vosa ena vosa, na vunau ena vunau, vakalailai eke ka vakalailai mai kea, sa rawa vakamalua cake mo yacova na daukaulotu o vinakata kei na daukaulotu e namaka na iVakabula.

Ena sega ni vakasauri se caka- mana na nomu veisau ki na dua na daukaulotu sa vakarau tu ka dautalairawarawa ena siga ko curuma yani kina na ilago ni Koronivuli ni Kaulotu. Mai na KNK ko na yaco mo tamata vata ga ka yaco vua na veika ka yaco vei iko ena veisiga kei na veivula kei na yabaki ni se bera sara na nomu ilesilesi ni kaulotu. Na dina sa ikoya, na nomu ituvaki ena veika o na vakarautaki kina mai na KNK sa ivakaraitaki vinaka duadua ni nomu sa yaco mo dua na daukaulotu.

Na nomu curuma na KNK, ko na vakanananu lesu ki vale, ka na vuqa sara na nomu ituvatuva ena veisiga sa na ka vou ka veibolei. Ia vua e dua na cauravou ka sa vakarautaki vinaka tiko yani me daukaulotu, mai na veisau lalai taumada ki na itavi kaukauwa kei na ivakarau ni bula ena sega ni levu, veivakaocai, se veivakasaurarataki. Sa yaco kina, me salavata na veika lavaki na sasagataki ni bula vakadaukaulotu ni se bera na laki kaulotu.

Kemuni na tama, ko ni kila tiko li na nomuni itavi ni vukei nomuni cauravou me kaulotu ni bera ni mai lesi kina? O iko kei watimu drau sa ka bibi sara ena nona vakarautaki koya me daukaulotu. Kemuni na iliuliu ni matabete kei na veimataisoqosoqo, ko ni kila tiko li na nomuni itavi ena nodrau vukei na itubutubu ka vukei o ira na cauravou me ra daukaulotu ni bera ni ra lesi kina? Sa vakalevutaki talega na nomuni itavi na itubutubu kei kemuni taucoko na lewe ni Lotu. Na tugani ena masumasu na ivakavuvuli mo tamata yaco ena sureta na veivakauqeti e kovuta na gagadre yadua ni luvemuni tagane se cauravou o qarava.

Na vakavakarau au vakamacalataka tiko e sega ni vakatabakidua tikoga ki na cakacaka ni kaulotu nomuni na cauravou yabaki 19 se 20 se 21. Kemuni na veitacini, oqo na nomuni vakavakarau ni cakacaka ni kaulotu ena bula taucoko. Ni da sa lewe ni matabete eda sa daukaulotu tudei. Kevaka mo na gugumatua ena cakacaka mo daukaulotu, o ya ni bera ni ko lesi kei na gauna o sa lesi kina, o koya gona ni qai yaco mai na siga mo sa vakacegui kina vakavinaka mai na itutu ni daukaulotu tudei, ko na laiva mai na nomu buturara ni cakacaka ka lesu ki na nomu matavuvale—ia ena sega ni cava na nomu cakacaka ni kaulotu. O koya e lewena na matabete sa daukaulotu tudei ena veigauna taucoko ena veivanua kece sara. Na daukaulotu sai koya e dua na lewe ni matabete ka sa kawa i Eparaama.

Na Kawa i Eparaama

O ira na laki taukena na veiyalayalati kei na yalayala taucoko e cakava na Kalou vei Eparaama era sa vakatokai me ra kawa i Eparaama (raica na Bible Dictionary, “Seed of Abraham,” t. 771). Na veivakalougatataki oqo ena rawati walega ena talairawarawa ki na lawa kei na cakacaka tabu ni kosipeli i Jisu Karisito. Kemuni na taciqu, na ituvatuva me dua na daukaulotu e semati vakadodonu ki na noda kilai keda vinaka ni da sa kawa i Eparaama.

E a dua na parofita cecere o Eparaama ka a gadreva dina na ivalavala dodonu ka a talairawarawa ki na vunau taucoko a solia vua na Kalou, ka okati kina na ivakaro me vakacabora me imadrali na luvena taleitaki o Aisake. Ena vuku ga ni nona tudei ka talairawarawa, sa vakatokai kina o Eparaama me tamadra na yalodina, ka a tauyavutaka na Tamada Vakalomalagi e dua na veiyalayalati kei na veivakalougatataki levu ka yalataka vei Eparaama kei na nona kawa:

“Ni ko sa cakava na ka oqo, ka sa sega ni bureitaka na luvemu, na luvemu e duabau ga:

“Au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi, kei na nuku mai matasawa; ia ena taukena na matamata ni koro ni nodra meca ko ira na nomu;

“Ena kalougata talega na veimatanitu kecega e vuravura ena nomu kawa; ni ko a vakarorogo ki domoqu” (iVakatekivu 22:16–18).

O koya gona, sa yalataki kina vei Eparaama e dua na kawa vakaitamera ka yaco na veimatanitu kece e vuravura me na vakalougatataki ena kawa oqo.

Era na vakalougatataki beka vakacava na veimatanitu e vuravura mai na kawa i Eparaama? Na isau ni taro bibi oqo e kunei ena iVola i Eparaama.

“Raica au na qisi iko [Eparaama] me dua na matanitu levu, ka vakalougatataki iko vakalevu sara; ia au na vakarogoya na yacamu ena veimatanitu; ia era na kalougata na nomu kawa ena vukumu; raica era na kauta yani na veivakalougatataki oqo kei na ilesilesi vakabete ki na veimatanitu.

“Ia au na vakalougatataki ira ena vuku ni yacamu; raica ko ira kecega sa vakabauta na ivakavuvuli oqo, era na vakatokai ena yacamu; io era na okati me nomu kawa ka ra na tacake ka vakacaucautaki iko, ni ko sa tamadra” (Eparaama 2:9–10).

Eda vulica ena veitikina oqo ni ko ira na kawa yalodina i Eparaama era na taukena na veivakalougatataki ni kosipeli i Jisu Karisito kei na lewa ni matabete. O koya gona, na iyatuvosa “kauta yani na veivakalougatataki oqo kei na ilesilesi vakabete ki na veimatanitu” sa tukuna tiko na ilesilesi ni kena vunautaki na kosipeli i Jisu Karisito ka sureti na tamata kecega me ra ciqoma ena dodonu ni lewa ni matabete na cakacaka tabu ni veivakabulai. Sa dina sara, ni ilesilesi cecere oqo era sa vakaitavi kina na kawa i Eparaama ena iotioti ni gauna oqo.

Era na yaco vakacava vei keda edaidai na yalayala kei na veivakalougatataki oqo? Ke da kawa dina se kawa vakabau, oi kemuni na turaga kei na cauravou o ni rogoca rawa na domoqu ena bogi nikua o ni itaukei dina ni iyalayala a vakayacora na Kalou vei Eparaama. Eda sa kawa i Eparaama. E dua vei ira na inaki bibi ni noda ciqoma na veivakalougatataki vakapeteriaki o ya me vukea na noda kilai keda vakavinaka sara ni da sa kawa i Eparaama ka raica rawa kina na ilesilesi sa noda.

Kemuni na veitacini, o iko vata kei au, edaidai ena veigauna taucoko, me daru vakalougatataki ira na tamata kecega ena veimatanitu kecega. O iko vata kei au edaidai kei na veigauna taucoko me daru vakadinadinataki Jisu Karisito ka vakatakila na itukutuku vakalesui mai. O iko vata kei au, edaidai kei na veigauna taucoko, me daru sureta na tamata kecega me ra ciqoma na cakacaka tabu ni veivakabulai. Na kena vunautaki na kosipeli e sega ni dua na cakacaka vagauna vakamatabete. E sega ni dua na itavi walega eda qarava vakalekaleka se dua na ilesilesi me vakacavari ga ni da sa lewe ni Lotu i Jisu Karisito ni Yalododonu Edaidai. Ia na cakacaka ni daukaulotu sa ivakatakilakila ni keda ituvaki ka iyau vakayalo. Eda a vakatikori taumada mai na bula taumada ka sucu mai vakatamata me vakayacori kina na veiyalayalati kei na yalayala e vakayacora na Kalou vei Eparaama. Eda sa mai tu oqo e vuravura edaidai me da vakarabailevutaka na matabete ka vunautaka na kosipeli. Sai keda sara ga oqori, sai koya na vuna eda sa mai tu kina eke—edaidai ka lako yani.

Ko na taleitaka beka na ivakatagi, qito, se dau ni mekeniki, ka dua na siga ko na laki cakacaka beka vakakila ka se kenadau vakacakacaka se na maqosa ni liga. Ena kedra bibi mada ga, era sega ni vakatakilakilataki keda dina na itavi kei na cakacaka saumi vakaoqo. Na imatai ka bibi duadua, eda sa kai lomalagi. Eda sa luve ni Kalou ka kawa i Eparaama.

“Ia ko ira sa gumatua ka yalodina ki na ilesilesi ruarua vakabete kau sa tukuna ka vakayacora vakavinaka na nodra itavi, ena vakasavasavataki ira na Yalo Tabu ka ra na vakavoui.

“A sa yaco me ra luve i Mosese ka luve i Eroni ka ra sa kawa i Eparaama; io era sa lewe ni lotu ka sa nodra na matanitu; io era sa tamata digitaki ni Kalou” (V&V 84:33–34).

Kemuni na taciqu lomani, sa soli vakalevu vei keda, ka sa gadrevi e vuqa na ka vei keda. Me yaco mo ni kilai vakavinaka na cauravou ni ko ni sa kawa i Eparaama ni ko ni sa daukaulotu ni se bera sara ni ko ni gole ki na ilesilesi. Ni ko ni sa lesu ki na nomuni itikotiko kei na matavuvale, mo ni daukaulotu tikoga oi kemuni ko ni sa lesu mai ena kaulotu. Ka da tucake oi keda kece sara me da tamata ni Kalou ka laki vakalougatataki ira na veimatanitu e vuravura ena ivakadinadina cecere kei na kaukauwa vakayalo e levu cake mai na kena e liu.

Au vakadinadinataka ni ko Jisu na Karisito, na noda iVakabula ka Dauveivueti. Kau sa vakadinadinataka ni da sa lewe ni matabete eda sa Nona vakailesilesi ena cakacaka lagilagi ni kena vunautaki na Nona kosipeli, edaidai kei na veigauna taucoko. Ena yaca tabu i Jisu Karisito, emeni.