Na Solibula e ka ni Marau ka Veivakalougatataki

Elder Won Yong Ko

Ena Vitusagavulu

Sa noqu masu ni da na yaco kece me da Yalododonu ka taleitaka na solibula ka digitaki me da taukena na veivakalougatataki talei ni Turaga.

Ni bula vinaka na taciqu kei na ganequ. E vakavulica o Parofita Josefa Simici ni “dua na lotu ka sega ni gadreva na solibula ni veika kece ena sega kina na kaukauwa me rawa ni vakavurea na vakabauta ka vinakati ena bula kei na veivakabulai” (Lectures on Faith [1985], 69). Kevaka me da vakalekalekataka na isitori ni ivolanikalou, e rawa ni da kaya ni o ya na isitori ni solibula.

E rawa me da kunea na ivakaraitaki totoka ena ivolanikalou me baleti ira ka ra solia na nodra bula me rawa ni ra taqomaka na nodra vakabauta kei na ivakadinadina. E dua na ivakaraitaki mai na italanoa kei Alama kei Amuleki ena nodrau raici ira tiko ena rarawa na kai Amonaia ena nodra viritaki ki na bukawaqa ka mate, ia era a maroroya tikoga na nodra vakabauta (raica Alama 14:7–13).

Eda nanumi Jisu Karisito talega ena Nona loloma levu me lako sobu mai na itikotiko nei Tamana ki na vuravura oqo ka solibula me vakabula na vuravura ena rarawa levu duadua ka se sega mada ni dua tale e vosota.

Ena iotioti ni itabagauna oqo ni kosipeli, e vuqa vei ira na painia era vakayalia na nodra bula ka vakayacora na solibula cecere duadua me ra taqomaka kina na nodra vakabauta.

Edaidai eda sa na sega ni kerei me da vakayacora e dua na solibula levu vakaoqo me vaka na solia na noda bula, ia e rawa ni da raica e vuqa na ivakaraitaki ni Yalododonu ka ra vakayacora e vuqa na solibula dredre sara me ra taqomaka ka vakabula tiko kina na nodra vakabauta kei na ivakadinadina. De dua beka e sa rui dredre sara me da vakayacora eso na solibula lalai ena noda bula e veisiga. Me vaka, e rawa ni kilai me solibula lailai na kena vakatabui na Sigatabu, me wiliki e veisiga na ivolanikalou, se saumi ni noda ikatini. Ia ko ira na veisolibula oqo e sega ni rawa ni vakayacori vakavo ga ke tu vei keda na vakasama kei na yalodei me caka kina na solibula e gadrevi me rawa ni maroroi kina na veivakaro o ya.

Ni da vakayacora na veisolibula lalai vakaoqo, eda na saumi ena vuqa na veivakalougatataki mai vua na Turaga. E a kaya o Penijamini na Tui, “A ka oqo ko ni sa dinau tu ga kina Vua ena gauna oqo ka tawamudu,” (Mosaia 2:24) ka, vakakina vei ira na nona tamata sara ga, e vakauqeti keda o Penijamini na Tui me rawa kina ni da rawata e vuqa na veivakalougatataki ena noda tomana tikoga me da muria na vosa ni Turaga.

Au nanuma ni a imatai sara ga ni veivakalougatataki e lako mai na solibula sai koya na marau e rawa ni da vakila ena noda solia na veika e gadrevi. De dua beka ni vakasama sara ga ni solibula vakaikoya e veivakalougatataki e yaco me veivakalougatataki. Ni yaco vei keda na vakasama vaka o ya ka vakila na marau, e sa rawa sara ga ni da sa ciqoma oti na veivakalougatataki.

E wale tikoga oqo, au a kunea na mataqali veivakalougatataki vakaoqo mai vei ira na Yalododonu e Korea era a vakaitavi ena marautaki ni ika 50 ni yabaki ni ivakananumi ni kena vakatabuya na Lotu na vanua ko Korea ena vunautaki ni kosipeli kei na ivakananumi ni ika 200 ni yabaki ni siganisucu i Josefa Simici. Au vinakata meu tukuna vakalekaleka vei kemuni na nodra solibula kei na marau kei na veivakalougatataki era a ciqoma.

Ena kena marautaki na kosipeli ka solia na inuinui kei na yaloqaqa vei ira na lewe i Korea era a vakararawataki vakalevu ena iValu e Korea (Korean War) era a tekivutaka kina na lewe ni Lotu na nodra vakavakarau ena dua na yabaki sa oti ki na soqo oqo. E vuqa vei ira na lewenilotu e Korea—na Lalai, cauravou, goneyalewa, cauravou kei na goneyalewa itabaqase, o ira na marama lewe ni iSoqosoqo ni Veivukei kei na so tale—era soqoni vata me ra vakatovotovo me baleta na soqo ni marau. Era vakarautaka e vuqa na meke ni nodra vanua me vaka na meke ni senikau, meke cowiri, meke iri, meke ni dauteitei, kei na meke dramu ka vakakina na karate, drama, danisi vaka-ballroom, ivakatagi, iyaloyalo vakamatakautaki (animation) kei na nodra vakatasuasua na matasere.

Era a vosavosa na tu veitikivi, me baleta ni sa rui rogolevu na nodra qiri dramu na cauravou, sa mani muduki kina na nodra vakatovotovo. E a dredre sara na vakatovotovo vakabalavu ena dua na gauna, ia era vakayacora ena marau. Au sega ni kunea e dua me bau vosakudrukudru me baleta na nodra sasaga kei na solibula ena nodra yadra ena 4 na kaloko ena mataka lailai ka vodo basi yani ki na vakatovotovo cokovata. Era vakila na marau levu kei na vakavinavinaka ena veivakalougatataki ni Turaga ena galala me ra vakaraitaka kina na nodra vakavinavinaka.

E vuqa talega vei ira na sa kaulotu oti mai vanua tani era sa lesu mai ki Korea vata kei ira na watidra kei ira na luvedra me ra mai tiko ena soqo ni marau oqo. Era a solibula sara mada ga ena nodra a mai kaulotu e Korea. Ena gauna oqo era a vakayacora tale e dua na solibula ni gauna kei na ilavo me ra kauta mai na nodra matavuvale ka mai vakaitavi ena soqo ni marau ena gauna ni vulaikatakata. Ia era a marau ka vakavinavinaka ena veisoqo ni marau kece sara era vakaitavi kina.

Me ra vakayaloqaqataki na Yalododonu mai Korea kei ira tale na so e a vakatala yani kina na Turaga na Nona parofita, o Peresitedi Gordon B. Hinckley ki Korea. O Peresitedi Hinckley sara mada ga e a vakayacora e dua na solibula levu me baleta na ilakolako oqo ena kena vakarautaki e 14 na siga me wavokiti vuravura ka tadu mai ki Korea me mai sota kei ira na Yalododonu ka sa dau lomani ira voli mai ena vuqa sara na veiyabaki ka mai vakaraitaka sara ga vakaikoya na nona loloma levu na Turaga. E sega sara ni dua e vakila ni oqo e dua na solibula. Ena vuku ni ka oqo, keimami a tagi ga ena levu ni marau kei na vakavinavinaka. Sai koya oqo na veivakalougatataki ka keimami dau veivosakitaka tiko, se sega li?

Kemuni na taciqu kei na ganequ, kakua ni rerevaka na solibula. Yalovinaka mo marautaka na reki kei na veivakalougatataki ni solibula oqo.

E dau vakavuqa me tu vakadua na gauna ni solibula kei na veivakalougatataki. Na solibula e rawa ni lako mai ena noda gauna ni vakavakarau, ia na veivakalougatataki ena sega ni lako mai ena noda gauna, ia ena nona gauna ga na Turaga. Ena vuku ni ka oqo, e vakacegui keda kina na Turaga ena nona kaya, “Ia, dou kakua ni oca ena cakacaka vinaka, raica dou sa tura tiko na yavu ni dua na cakacaka levu” (V&V 64:33).

E lako vakaidina mai vei keda na veivakalougatataki. Ni yalovinaka ka nanuma ni solibula sara ga vakaikoya e rawa ni ivakaraitaki ni dua na veivakalougatataki. O ya me da vakayacora na solibula ni veika lalai.

Ni da wilika tiko na iVola i Momani ka qilia na matada ena via moce me da nanuma tiko ni da muria tiko na ivakasala ni noda parofita ka ciqoma na marau e lako mai na ka oqori. E vuqa sara tu na dinau me da sauma; ia ni da sauma na noda ikatini, eda vakila na marau ni soli na galala me da solia kina e dua na ka ki vua na Turaga.

Ka na qai sovaraki mai vei keda na veivakalougatataki cecere sara. Ena tautauvata sara ga na noda kidacala kei na marau ena noda ciqoma e dua na iloloma sega ni namaki.

Me vaka a kaya o Peresitedi Spencer W. Kimball, “Me vaka ni da solia, eda raica kina ni solibula e kauta mai na veivakalougatataki ni lomalagi! [“Praise to the Man,” Hymns, naba 27.] Ka kena itinitini, eda vulica ni sega sara ga ni solibula” (“Becoming the Pure i n Heart,” Ensign, Maji 1985, 5). Sa noqu masu ni da na yaco kece me da Yalododonu ka taleitaka na solibula ka digitaki me da taukena na veivakalougatataki talei ni Turaga. Ena wanonovi keda tiko na Turaga me na kakua kina ni dredre na vosoti ni dua ga na solibula. Ena yaca i Jisu Karisito, emeni.