Na Veivosoti

Peresitedi Gordon B. Hinckley

Ia na veivosoti ena loloma kei na vosota vakadede, ena cakamana sara ka sega ni rawati ena dua tale na sala.

Kemuni na taciqu kei na ganequ, au sa vakavinavinakataka na Tamaqu mai Lomalagi ni sa vakabalavutaka na noqu bula meu mai tiki tiko ni gauna veibolei oqo. Au vakavinavinakataki Koya ena ilesilesi ni veiqaravi. Sa sega tale ni dua na noqu gagadre ia meu vakayacora taucoko na veika au rawa ni cakava ena kena muataki ki liu na cakacaka ni Turaga, ena nodra qaravi na Nona tamata yalodina, ka veimaliwai vinaka kei ira na wekaqu.

Au se qai lako wavokita walega oqo na vuravura, ka sivia e 25,000 na maile, kau sikovi Alaska, Rusia, Korea, Taiwan, Hong Kong, Idia, Kenya, kei Nigeria na iotioti ni vanua keitou a vakatabuya kina e dua na valetabu vou. Keitou a qai laki vakatabuya kina na Valetabu e Newport Beach California. Au a se qai lesu oti ga mai Samoa ena dua tale na vakatabui ni valetabu, e dua tale na 10,000 na maile. Au sega ni taleitaka na veilakoyaki ia sa noqu gagadre meu lako yani vei ira na tamata meu tukuna vei ira na noqu vakavinavinaka kei na veivakayaloqaqataki, ka wasea na noqu ivakadinadina ni sa vakalou na cakacaka ni Turaga.

Au dau vakasamataka vakalevu e dua na serekali au a wilika ena dua na gauna makawa. E vakatoka oqo:

Meu tikoga ena vale e yasa ni sala

Era tasiri kina na veimataqali tamata—

O ira era vinaka kei ira era ca sara

O ya na kequ ivakatakarakara.

Au na sega ni dabe ena idabedabe ni veivakacacani

Se cavuta na ka vakatani

Meu tikoga ena vale e yasa ni sala

Ka nodra itokani na tamata.

(Sam Walter Foss, “The House by the Side of the Road,” ena James Dalton Morrison, ed., Masterpieces of Religious Verse [1948], 422)

Sai koya oqori na lomaqu.

Na yabaki ni bula e vakayacora e dua na ka vua na tamata. E vaka me vakila vakalevu cake kina o koya na kena gadrevi na loloma kei na caka vinaka kei na vosota vakadede. E dau diva ka masulaka me ra bula veimaliwai vinaka na tamata ka sega kina na veivaluvaluti kei na veicacati, na veiba se na veileti. E tubucake tiko na nona kila na ibalebale ni Veisorovaki Cecere ni Dauveivueti, ena taucoko ni Nona solibula, kei na vakavinavinaka vua na Luve ni Kalou o Koya ka a solia na Nona bula me da bula ga o keda.

Au gadreva meu vosa nikua me baleta na veivosoti. Au nanuma ni oqo na ivakarau vinaka duadua e vuravura, ka sa gadrevi vakaidina vakalevu. Sa vakaitamera na lomaqa kei na veivakacacani, na sega ni veivosoti kei na veicacati. Sa gadrevi vakalevu kina na kena veivutunitaki kei na veivosoti. Oqo na ivakavuvuli e vakamatatataki tiko ena ivolanikalou taucoko, ena ka makawa kei na ka vou.

Ena noda ivolanikalou kece sara e sega tale ni dua na italanoa totoka ni veivosoti me vakataka na italanoa nei koya na gone cidroi ka volai tiko ena ika 15 ni iwase ni vola i Luke. E dodonu me da dau wilika taucoko ka tugana.

“Ia ni sa vakaotia kece [na gone cidroi], sa qai tubu na dausiga levu ena vanua ko ya; a sa qai dravudravua sara ko koya.

“A sa laki tiko ena dua na lewenivanua ko ya; a sa talai koya ki na nona veiwere me vakani ira na vuaka.

“A sa garova na qana era daukania na vuaka, me mamau kina na ketena; a sa sega e dua sa vakani koya.

“Ia ni sa kilai yalona tale, sa kaya sa le vuqa na tamata nei tamaqu sa voli na nodra cakacaka, era sa mamau ena madrai ka vo tu yani, ia koi au kau sa mate ena viakana!

“Au na ia ka lako vei tamaqu, kau na kaya vua, Tamaqu au sa ivalavala ca ki lomalagi, vei kemuni talega,

“Kau sa sega kina ni yaga meu vakatokai tale me luvemuni: lesi au meu vakataka e dua na nomuni tamata sa voli na nona cakacaka.

“A sa ia, ka lako vei tamana. Ia ni sa yawa sara, sa raici koya ko tamana, a sa lomana, ka cici, ka mokota, ka reguca

“A sa kaya na luvena kivei koya, I Tamaqu, au sa ivalavala ca ki lomalagi, vei kemuni talega, kau sa sega kina ni yaga meu vakatokai me luvemuni” (Luke 15:14–21).

A sa qai vinakata o tamana me vakayacora e dua na kana magiti levu, ia ni sa cudruvaka na ka oqo e dua tale na luvena tagane, a qai kaya vua: “Ia sa dodonu ga me da reki, ka marau; ni sa mate na tacimu oqo, ka sa qai bula tale; sa yali ka sa qai kune tale” (t. 32).

Ni sa dau mai yaco na caka cala ka vakayacori kina na kena veivutuni, ka salamuria yani na veivosoti, ka sa yaco vakaidina vua e cakacala na nona sa kunei rawa o koya ka sa mate sa qai bula tale.

Sa qai dua na mataniciva talei na veivakalougatataki ni loloma vakalou kei na veivosoti.

Na iTuvatuva nei Marshall ni oti na iKarua ni iValu Levu, kei na kena lolomataki e milioni na dola, e a vakacokotaki rawa kina na vanua ko Iurope.

Mai Japani, ni oti toka na ivalu vata ga oqo, au a raica kina na iqaqi lelevu ni sitila, na ilavo e a tukuni vei au ni a lako mai Amerika, na meca taumada kei Japani. Sa qai vinaka cake sara na vuravura oqo me baleta ga na nona veivosoti e dua na matanitu dauloloma me baleta e dua na kena meca makawa.

Ena Vunau ena Ulunivanua e vakavulica kina na Turaga vakaoqo:

“Dou sa rogoca sa kainaki, me kena isau na mata na mata, ka me kena isau na bati na bati:

“Ia, koi au, kau sa kaya vei kemudou, Dou kakua ni veisausaumitaka na ca: ia kevaka e dua sa sabica na balumu imatau, golea talega vua na kena ikarua.

“Ia kevaka e dua sa via kauti iko vei ira na mataveilewai, ka me kauta tani na nomu icurucuru, laiva ga me kauta tani talega na nomu itutuvi.

“Ia kevaka e dua sa vakasaurarataki iko mo drau lako vata kaya e dua na maile, lako vata kaya na kena ikarua.

“Solia vua sa mai kerekere vei iko, ia kakua ni vuki tani vua sa via kerea mada e dua na nomu ka.

“Dou sa rogoca sa kainaki, Mo lomana na wekamu, ka cata na nomu meca.

“Ia koi au, kau sa kaya vei kemudou, Dou lomani ira na nomudou meca, vosa vinaka vei ira sa rukaki kemudou, caka vinaka vei ira sa vakalialiai kemudou, ka vakacacani kemudou” (Maciu 5:38–44).

E veilauti dina na vosa oqo.

O vakabauta dina ni rawa ni ko vakamuria na ivakaro o ya? Sa nona vosa sara ga na Turaga, kau nanuma ni sa baleti keda yadudua.

Era a kauta mai vei Jisu o ira na vunivola kei na Farisi e dua na yalewa a kune ni a dautagane me rawa ni ra veretaki Koya kina.

“Ia ni sa cuva sobu ko Jisu, ka vola na soso ena nona iqaqalo [ka vaka me sega ni rogoci ira].

“Ia ni ra sa tarogi koya tikoga, sa tu cake ko koya ka kaya vei ira, O koya vei kemudou sa sega ni valavala ca, me viriki koya mada e liu ena vatu.

“Sa qai cuva sobu tale ko koya, ka vola na soso.

“Ia ni ra sa rogoca, era sa lako yadua ki tuba, sa liu na qase ka muri kecega na tamata: ka tiko duadua ga ko Jisu, a sa tu na yalewa e matana.

“Ia ni sa tu cake ko Jisu, ka sega ni raica e dua, na yalewa duadua ga, sa kaya vua, Yalewa, sa evei ko ira oqori? Sa sega e dua sa lewai iko mo cudruvi ne?

“A sa kaya ko koya, Sa sega e dua, Turaga. A sa kaya vua ko Jisu, Au sa sega talega ni lewai iko mo cudruvi: mo lako, ka mo kakua ni valavala ca tale” (Joni 8:6–11).

E vakavulica vei keda na iVakabula me da biuti ira na lewe ciwasagavulu kaciwa ka vakasaqara na sipi sa qai yali, ka me yaco kina na veivosoti kei na veivakalesui tale.

E vakaraitaka o Aisea, “Dou vui kemudou, vakasavasavataki kemudou; kauta tani e mataqu na nomudou ivalavala ca; dou kua ni caka ca;

“Vulica na caka vinaka; segata na lewa dodonu, vukei koya sa vakasaurarataki, dou ia na lewa ena vukuna na luveniyali, kei na dautataro ena vukei ni yada.

“Dou mada mai, me tou veivosaki vata, sa kaya ko Jiova; kevaka sa vaka na ka kulakula na nomudou ivalavala ca, sa na vulavula me vaka na uca vulavula; ke sa damuvakula sa na vaka na vutika ni sipi” (Aisea 1:16–18).

Na loloma koula cecere ni iVakabula a vakaraitaki ena Nona sa voleka ni ciba ena rarawa ka a kaya mai, “I Tamaqu, kakua ni cudruvi ira; ni ra sa sega ni kila na ka era sa kitaka” (Luke 23:34).

Ena noda gauna oqo sa kaya mai na Turaga ena ivakatakila: “Raica au sa kaya vei kemudou; mo dou veivosoti vakai kemudou; ia ko koya sa sega ni vosota na wekana ena nona cala, ena cudruvi koya na Turaga; raica sa ivalavala ca vakalevu cake ko koya.

“Ia koi au na Turaga, au na vosoti ira ga kau sa lewa; ia koi kemudou sa kilikili mo dou vosota na tamata kecega” (V&V 64:9–10).

Sa solia mai na Turaga e dua na yalayala taleitaki. E kaya kina; “Raica ko koya sa veivutunitaka na nona ivalavala ca, ena vosoti; ia koi au na Turaga, au na sega ni nanuma tale na nona ivalavala ca” (V&V 58:42).

E vuqa na tamata ena gauna oqo era sega ni vinakata me ra veivosoti ka guilecava. Era tagi na gone ka rarawa na marama vakawati baleta ni ra kauta cake tikoga mai o ira na tama kei na turaga vakawati na cala lalai e sega na kena yaga. Ka sa vuqa vei ira na yalewa era dau vakalevutaka sara na veika lalai tawayaga e tukuni se vakayacori.

Ena dua na gauna lekaleka sa oti au a maroroya e dua na itukutuku mai na Deseret Morning News, ka a vola o Jay Evensen. Ena nona veivakadonui au cavuta eke e dua na tikina. A vola o koya:

“Ena vakacava beka na yalomu vua e dua na gone ka na viritaka mai e dua na taki 20 na paudi bibi ka vakabatabatataki tu mai na dua na motoka cawi ka bologa yani na iloilo e liu ni nomu motoka o draivataka tiko? Ena vakacava beka na yalomu ni sa oti e dua na veisele ono na auwa ni kena vakayagataki na peleti kaukamea kei na ka kaukauwa tale eso me vakataucokotaki kina na matamu, kei na nomu sa qai rogoca ni na vakayacori tikoga vei iko na veiqaravi ena veiyabaki ni bera ni ko qai vinaka mai—ka o sa kalougata ni ko sega ni mate se vakacacani vakadua na nomu mona?

“Ena qai vakacava beka na yalomu ni ko sa kila ni o iratou a vakamavoataki iko kei iratou na nona itokani eratou a taura taumada mai na taki o ya baleta ni ratou a butakoca e dua na kadi ni veivoli ka ratou a mani volivoli ga vakaveitalia me ka ga ni lasa? …

“Oqo na mataqali basulawa lolovira ka dau vakauqeti ira na daunipolitiki me ra vakayacora e dua na yalayala me ra totogitaki vakabibi na caka cala. Oqo na veika ka ra dauvakauqeti kina na daubulilawa me ra veisisivitaka na nodra bulia e liu e dua na lawa vakaturi me na vakalevutaki kina na itotogi ena kena vakayagataki e dua na toa vakabatabatataki me iyaragi ni basulawa.

“E tukuna na New York Times ni kaya o vunilawa ni matanitu ni oqo na mataqali basulawa era kaya na vakacacani kina ni itotogi e tau e sega ni kaukauwa sara. Na itotogi mate e sega mada ni ra se vakacegui kina, a kaya o koya.

“O koya gona na itinitini ni vakayacori e dua na ka e duatani kina. O koya e vakacacani, o Victoria Ruvolo, e dua na manidia vakacegu yabaki 44 ni dua na itini ni dausokumuni dinau e a kauwaitaka vakalevu cake me vakabulai koya a mokuti koya o ya o Ryan Cushing yabaki 19, ka sega ni yalona me sauma vua e dua na ka ca. E a vakatarogi ira na dauveibeitaki vakalawa me baleta na itukutuku ni bula i Cushing, a susugi cake vakacava, kei na veika tale eso. Oti sa qai mani veivosakitaka vua me rau veisolisoli. Ena rawa me bala ki valeniveivesu o Cushing me ono na vula ia ka sa rawa talega me tu vakawawa na kena itotogi me 5 na yabaki kevaka ena vakaio ki na ikarua ni ivakatagedegede ni veimoku.

“Kevaka me a tau na kena itotogi ena cala ni veimoku ena imatai ni ivakatagedegede—na veibeitaki vakalawa ena rauta vinaka na caka cala o ya—ena rawa me na bala kina ki valeniveivesu o koya me 25 na yabaki, ka qai suka tale mai ki na veimaliwai vakalewenivanua ni sa qase uabula ka sega na nona kila ka se inuinui vinaka.

“Ia oqo na veimama walega ni italanoa. Na kena vo, na veika a yaco ena siga ni veilewai, sai koya dina na tikina e vakasakiti.

“Me vaka e tukuni ena New York Post, e a lako yani vakarakorako ka vakamalua o Cushing ki na vanua e dabe tiko kina o Ruvolo ena luluvu a kaya ena nona kere veivosoti. “Ni vosoti au ena ka au cakava vei kemuni!

“A qai tucake o Ruvolo, ka rau veimokomoko kei koya e veivakamavoataki ka tuturu na wainimata. E a masiraka na ului Cushing ka vakatavitavia na dakauna ena nona sa mamakeukeu, ka ra a qai rogoca o ira era tu ekea, vakakina e dua na dauvolaitukutuku ni Times, ni a kaya o Ruvolo, ‘Kua ni leqa. Au vinakata ga mo cakava na nomu bula me vinaka sara!’ Na ka e rogovaki o ya o ira na dauveibeitaki qaqa, kei ira mada ga na dauvolaitukutuku, era a mamakeukeu” (“Forgiveness Has Power to Change Future,”Deseret Morning News, 21 ni Okos. 2005, t. AA3).

Oqori sa qai dua dina na italanoa taleitaki, baleta ni a yaco dina, ka a qai yaco sara ga ena vanua raravisa makawa o New York. Kevaka me dua e doka e dua na ka vua na marama oqo, a vosota na cauravou oqo ka a rawa beka ni vakamatei koya?

Au kila ni ka au tukuna tiko oqo e dua na ka vakamareqeti ka vakaloloma. Ena so beka na dau basulawa kaukauwa era sa bala ki valeniveivesu. Sa sega ni wili rawa na levu ni vakacaca, me vakataka na kena nakiti na laba kei na kucu, ka dodonu me totogitaki vakalevu. Ia e tiko eso e rawa ni ra vakabulai mai na laki vesu wale tu ga vakabalavu e valeniveivesu ena vuku ga ni dua na vakasama vagonegonea, ka lialia. Ia na veivosoti ena loloma kei na vosota vakadede, ena cakamana sara ka sega ni rawati ena dua tale na sala.

Na Veisorovaki cecere sa dua dina na cakacaka uasivi ni veivosoti. Na rabailevu ni Veisorovaki o ya eda na sega ni yacova me da kila vakavinaka sara. Au kila ga ni sa vakayacori, ka ni sa baleti iko kei au. Sa rui bibi na mosi ka titobu na yaluma, ka ni sega ni rawa me dua ena kila rawa me vaka na nona a soli Koya na iVakabula me ivoli ni ivalavala ca ni kawatamata.

Sa mai Vua ga na noda vosoti. Sa mai Vua ga sa yaco kina e dua na yalayala ni na soli vei ira na kawatamata kecega na veivakalougatataki ni veivakabulai ena tucaketale mai na mate. Sa mai Vua na Nona solibula bibi duadua sa soli kina vei keda na madigi, ena talairawarawa, na bula vakalou kei na bula tawamudu.

Me na vukei keda na Kalou me da dauloloma cake, meda matanataka na vosota vakadede, na veivosovosoti tiko, lomasoli vakalevu ena veitokoni, lomavinaka ka vakatataki ira era a caka cala ia era sa vuataka na vua ni veivutuni, guilecava na veicala makawa ka tagutuvi ira laivi. Ena ka oqo, sa noqu masu malumalumu, ena yaca tabu ni noda Dauveivueti na Turaga o Jisu Karisito, emeni.