Vidio: iYaya ni Cakacaka ena Liga ni Kalou
E a vakaraitaki e dua na vidio ena gauna ni soqoni raraba ni iSoqosoqo ni Veivukei ka a vakaraitaki tiko kina o Peresitedi Gordon B. Hinckley ni talanoataka tiko na itukutuku makawa ni iSoqosooqo ni Veivukei. Ena vidio oqo e vakatakarakarataki kina na nodratou a laki bose ena dua na vale simede damudamu o Parofita Josefa Simici, Emma Smith, o Lucy Mack Smith, kei ira na isevu ni marama ni iSoqosoqo ni Veivukei.
Peresitedi Hinckley: Na tubu ni iSoqosoqo ni Veivukei mai na 18 na lewena ena gauna a tauyavutaki kina ena ika 17 ni Maji 1842 ena koro ni iyalayala levu o Nauvoo, ka sa sivia oqo e lima na milioni ni mai oti e 160 na yabaki, kei ira na lewenilotu ena itikotiko lelevu kei na lalai ena veiyasai vuravura, ni sa dua na italanoa qaqa e duatani ka talei.
Na veiusutu ka a tubu cake kina na iSoqosoqo ni Veivukei e a yaco ni se bera na kena tauyavutaki. Na veiusutu oqo e oka kina na nodra lewa e loma na marama me ra dodo liga yani ka vukea na kena tokoni na caka vinaka, vukei ira era vakaleqai, ka vakatorocaketaka na ituvaki ni nodra vakasama kei na taledi. Ena kena o ya a tuvanaki ira kina o Josefa Simici me dua na isoqosoqo.
Josefa Simici: Na “iSoqosoqo ni Marama oqo ena rawa ni vakayaloqaqataki ira na veitacini vakalotu ki na cakacaka vinaka ena kena kunei na nodra gagadre na dravudravua—vakasaqarai na gacagaca ni loloma, ka qarava na nodra gagadre—ka veivuke ena vakadodonutaki ni itovo savasava ka vaqaqacotaka na bula ni itikotiko raraba.”1
Peresitedi Hinckley: Mai na itekitekivu savasava o ya ka sa tubu cake kina ena noqu vakatoka me isoqosoqo vakaitamera ka gugumatua duadua ena kena mataqali e vuravura taucoko.
Ena isevu ni soqoni o ya, e a digitaki kina o Emma H. Smith me peresitedi, a kaya kina o koya ni “dodonu me ra dau kakavaki na lewe ni isoqosoqo yadua me ra caka vinaka.”2 O ya na kena yalo taumada, sai koya talega o ya na kena yalo ena gauna oqo. Sa dodonu me ivakavuvuli veidusimaki tikoga ki na veitabatamata kece sara sa tu e liu—o ya “me ra dau kakavaki na lewe ni isoqosoqo yadua me ra caka vinaka.”
Emma Smith: “Eda na vakayacora eso na ka cecere sara… . Eda na sotava na veika cecere sara kei na veikacivi ni veiqaravi.”3
Josefa Simici: “Na isoqosoqo oqo me na dusimaki ena ituvatuva sa tauyavutaka na Kalou—mai na nodra veivakasalataki o ira sa lesi me ra veiliutaki.”4
“Sa nodra itovo na marama me ra dau yalololoma—o koya gona ko ni sa umanaki tu oqo ena dua na veiqaravi mo ni matanataka kina na yalololoma sa vakatikora na Kalou e lomamuni. Kevaka mo ni na tudei ena ivakavuvuli oqo sa qai talei ka lagilagi!—kevaka mo ni na tudei ena nomuni dodonu, era na sega ni tarovi rawa na agilosi me ra mai nomuni itokani… . Sega ena ivalu, sega ena veiba, sega ena duidui, ia ena yalomalumalumu, loloma, savasava, oqo na veika ena vagumatuataki keda… .
“Ka na sovaraki mai na veivakalougatataki ni lomalagi… .
“Ni ko ni sa yaco ki vale me kakua na vosa veicavilaki, ia mo ni vakatara ga na lomavinaka, loloma cecere kei na lomasoli, me ulu ni nomuni cakacaka ki na veisiga ni mataka… .
“Ena nomuni sa tubu cake ena savasava kei na dodonu, ena nomuni sa qaqaco ena caka vinaka, me rabailevu na lomamuni me tetevi ira yani na tamata—e dodonu mo vosota vakadede ka vosota na nodra cala kei na malumalumu na kawatamata. Sa dua na ka talei na yalo ni tamata! …
“… Ia oqo au sa solia vei kemuni na idola ena yaca ni Kalou, ka na marau na iSoqosoqo oqo, ka na drodro sobu mai na vuku kei na kila ka mai na gauna oqo—oqo na itekitekivu ni veisiga vinaka cake ni iSoqosoqo oqo.”5
Peresitedi Hinckley: Na vosa vakaparofita o ya e sa duruvesi ni idusidusi ena loma ni dua na senijiuri veimama ni iSoqosoqo ni Veivukei ni Lotu i Jisu Karisito ni Yalododonu Edaidai.
Na tinai koya na parofita, o Lucy Mack Smith, ena nona vosa vei ira na marama lotu mai Nauvoo, e a kaya,
Lucy Mack Smith: “Me da dau veikauwaitaki, veirairaici, veivakacegui vakataki keda ka rawata na ivakasala me rawa ni da laki tiko vata mai lomalagi.”6
Peresitedi Hinckley: Na itukutuku ni isoqosoqo e vakaraitaka ni o ira na marama lewe ni Lotu era na sega ni waraka me ra na qai laki tiko vata mai lomalagi me ra qai kania kina na vuanikau kamikamica ni mataqali veiqaravi a vakamacalataka o koya.
Era sa sotava tiko na bula eso vakalomalagi e vuravura me vaka ena bula era veikaroni, veivakacegui, ka veivakasalataki. O cei beka ena rawa me raica na cakacaka mana ki na nodra bula e milioni na marama era sa vakavukui cake, ka rabailevu na nodra rai, sa maucokona na nodra bula, kei na nodra kila vakavinaka na veika ni Kalou e sa vakabulabulataki ena vuku ga ni lesoni sega ni wili rawa e vakavulici ka vulici vagumatua ena soqoni ni iSoqosoqo ni Veivukei?
O cei beka ena rawa me kila na levu ni reki sa dau yaco ki na nodra bula na marama oqo ni ra veimaliwai vakai ira, marau vata ena draki ni bula ena tabanalevu kei na tabana, veivakabulabulataki ni nodra bula ena veitokani e kamikamica ka dau karoni? O cei beka ena raitayaloyalotaka rawa me wilika na veiqaravi ni loloma vakaitamera e sa vakayacori, na kakana e sa vakarautaki ena teveli laladidi, na vakabauta e sa susugi cake ena gauna ni tauvimate, na mavoa e sa vakasavasavataki, na mosi e sa vakacegui mai na liga dauloloma kei na vosa malua ka veivakadeitaki, na veivakacegui e tikoga ena gauna ni mate kei na galili e kauta mai?
Ena nona vosa me baleta na iSoqosoqo ni Veivukei, a kaya kina vakaoqo o Peresitedi Joseph F. Smith ena dua na gauna: “Na isoqosoqo oqo e buli vakalou, e vakadonui vakalou, vakalawataki vakalou, e tabaki vakalou mai Vua me qaravi kina na nodra vakabulai na yalo ni marama kei na turaga. Ia sa sega kina ni dua na isoqosoqo me vakatautauvatataki rawa kina, … me na vakatawana rawa na itutu vata o ya kei na yavu ka rawata kina o koya… .
“… Mo vakaliuca [na iSoqosoqo ni Veivukei], mo vakabibitaka, mo vakacerecerea, na isoqosoqo e uasivi duadua ka titobu duadua e bula tiko e vuravura. Ko ni sa kacivi ena domo ni Parofita ni Kalou mo ni vakayacora, mo ni qaqa, mo ni cecere ka vinaka duadua, me savavuka ka yalodina ki na veika dodonu.”7
Me vakalougatataka na Kalou na iSoqosoqo ni Veivukei ni Lotu i Jisu Karisito ni Yalododonu Edaidai. Me tubu tikoga na yalo ni loloma ka me vakilai e vuravura ka a vakauqeti ira na lewe ni isoqosoqo ena loma ni dua veimama na senijiuri. Me veitarai bula na nodra cakacaka ni loloma ki na nodra bula e dua na iwiliwili vakaitamera ena vanua ga era kunea na kena ivakaraitaki. Na rarama kei na kila vakavinaka, na vuli kei na kila ka, kei na dina tawamudu me lomana na nodra bula na itabatamata marama e se bera mai, ena veimatanitu taucoko e vuravura, ena vuku ga ni dua na isoqosoqo a tauyavutaki vakalou. Me ra na raica e dua ka nodra ilesilesi cecere taucoko kei na veivakalougatataki me “talai kedatou na Kalou me vakayacori kina na cakacaka levu oqo” (Alama 26:3).