“Vakani Ira na Noqu Sipi”
Era na dau ciqoma na tamata na noda veivakauqeti ena gauna era vakila kina ni da lomani ira dina, ka sega ni baleta ni da via qarava walega vakavinaka na noda itavi.
Ena dua na gauna a taroga kina vakatolu na iVakabula e dua na taro vei Pita:
“Saimoni na luvei Jona, ko sa lomani au se segai? Sa kaya vua ko koya, Io na Turaga; ko ni sa kila niu sa lomani kemuni. Sa kaya vua [ko Jisu] vakani ira na noqu sipi.”1
Baleta ni sa rui kauwaitaka vakalevu na veika e baleti ira na luvena na Tamada Vakalomalagi, sa solia kina na Turaga vei Pita na itavi bibi ni nodra vakani na sipi. E a vakadeitaka tale na kauwai oqori ena gauna oqo ena dua na ivakatakila ka a soli vei Josefa Simici:
“Ia sa vakaoqo na noqu vosa vei iko, raica na ka au sa tukuna vei iko, au sa tukuna talega vei iratou na Le Tinikarua: Dou tucake ka vauca na tolomudou; dou colata na nomudou kauveilatai ka muri au, dou vakani ira na noqu sipi.”2
Ni da vulica na ivolanikalou, eda raica ni dau qaravi ira na tamata na iVakabula me vaka na nodra dui gagadre yadua. E dua na kena ivakaraitaki vinaka na ka oqo a yaco ena Nona volekati Kapenaumi, sa lako mai ka cuva ki yavana ko Jairo e dua na turaga ni valenilotu, ka vakamasuta me lako ki na nona vale ka vakalougatataka na luvena goneyalewa, ka sa voleka ni mate. E a lako vata kei Jairo ko Jisu e dina ga ni ra a drigiti koya na lewevuqa ka dredre kina vua me lako vakatotolo.
Sa lako mai e dua na italai ka mai tukuna vei Jairo ni sa mate oti na luvena goneyalewa. E dina ni sa lomabibi tu, a tudei koto ga ena nona vakabauta na Turaga ko Jairo, io sa vakaceguya na yalona na tama ni gone o ya ko Koya, ena nona kaya:
“Kakua ni yalolailai: vakadinata ga, ena vakabulai ga ko koya.
“Ia ni sa curu ki vale ko koya, sa sega ni laiva e dua me curu kina, ko iratou ga ko Pita, kei Jemesa, kei Joni, kei na tama ni goneyalewa kei na tinana.
“A ra sa tagi kecega, ka tagicaka: a sa kaya ko koya, Kakua ni tagi; sa sega ni ciba ko koya, sa moce ga… .
“Ka taura na ligana, ka kaci, ka kaya, ko iko gone duri cake.
“A sa lesu tale mai na yalona, a sa duri cake sara: a sa kaya ko koya me soli vua e dua na kena.”3
Sa dau vakaraitaka ko Jisu na yalovosota kei na loloma vei ira kecega sa lako mai Vua ka vakasaqara na iwali ni nodra tauvimate vakayago, lomabibi, kei na tauvimate vakayalo, kei ira sa yalolailai ka vakacacani.
Me da muria na nona ivakaraitaki na iVakabula sa dodonu vei keda yadua me da veiraiyaki, ka dolele yani vei ira na sipi era sotava tu na veika vakaoqori, ka laveti ira cake, ka vakauqeti ira me ra tomana tikoga na ilakolako ki na bula tawamudu.
Na gagadre oqo, nikua, e tautauvata na kena levu se levu cake beka, mai na gauna a bula voli kina e vuravura na iVakabula. Ni da ivakatawa ni sipi me da kila tiko ni dodonu me da na susugi ira cake na sipi vakayadua ka kauti ira yani vei Karisito, ni sai koya oqori na inaki ni veika kece eda vakayacora ena Lotu oqo.
Na veiitavi qaravi kece, na soqoni se na parokaramu e dodonu me na vagolei ki na inaki vata oqo. Ni da kila tiko na nodra gagadre na tamata, sa rawa ni da vaqaqacotaki ira ka vukei ira me ra vakamalumalumutaka na veika era bolei kina, me ra na tudei kina ena sala ka na kauti ira lesu yani ki na nona iserau na Tamada Vakalomalagi, ka vukei ira me ra vosota me yacova na ivakataotioti.
Na kosipeli i Jisu Karisito e baleta na tamata ka sega ni baleta na parokaramu. Ena so na gauna, ena noda vakusakusa me da qarava vakavinaka na noda itavi ena Lotu, eda dau vakayagataka e levu sara na gauna ena veiparokaramu, ka sega ni nanumi ira na tamata, sa dau yaco kina me da vakawaletaka na veika dina era gadreva. Ni yaco na veika oqori sa na yali kina na inaki ni noda veikacivi, era sa na vakawaleni na tamata, ka da sa tarovi ira mai na nodra rawata na nodra icavacava vakalou, me ra rawata na bula tawamudu.
Ni vakarau meu yacova na ika 12 ni noqu yabaki ni bula, a sureti au ki na dua na veitalanoa na noqu bisopi ka vakavulica kina vei au na sala meu vakarautaki au kina meu ciqoma na Matabete i Eroni ka tabaki me dikoni. Ni sa cava na veivakatarogi, a taura mai e dua na ivolasui mai na nona desi ka bolei au meu vakalewena. Na pepa ni kaulotu. Au kurabui vakalevu niu se qai yabaki 11 ga. Ia sa raica rawa tu na bisopi ko ya na vunilagi kei na veivakalougatataki ena noqu, kevaka au na vakavakarau vakavinaka meu qarava vakavinaka na noqu kaulotu ni sa yaco mai na kena gauna.
E vakaraitaka ni kauwaitaki au dina. E tukuna vei au na veikalawa meu cavuta meu vakavakarau kina vakayago ka vakayalo talega meu laki qarava na Turaga. Ni oti na siga ko ya, sa dau vakatarogi au vakayarua e veiyabaki kevaka e lailai, me yacova niu sa yabaki 19, e vakayaloqaqataki au meu yalodina tikoga ena noqu vakavakarau.
E a maroroya tu ena dua na faile na noqu ivolasui ni kaulotu, ka dau cavuta ena veigauna kece keirau veivakatarogi kina. Ena nodrau veivuke na noqu itubutubu, kei na nona veivakauqeti e dua na bisopi dau vosota ka dauloloma, au a kaulotu kina. E a vukei au na kaulotu meu raica rawa na veivakalougatataki sa vakarautaka tu na Kalou me baleti ira era na vosota me yacova na ivakataotioti.
E sega ni dua na ka kevaka e gonelailai, itabagone, se qase cake—na tamata kece e gadreva me lomani. Eda sa vakasalataki tiko ena veiyabaki me da dau cakacaka vata kei ira na lewenilotu vou kei ira era luluqa tu vakalotu. Era na tikoga ena lotu na tamata ena nodra kila ni tiko e dua ka kauwaitaki ira tiko.
Ena iotioti ni nona veidusimaki na iVakabula vei iratou na Nona iApositolo, E kaya kina:
“E dua na vunau vou kau sa solia vei kemudou, mo dou veilomani me vaka kau sa lomani kemudou, mo dou veilomani talega vakakina.
“A ka oqo era na kila kina na tamata kecega ni dou sa noqu tisaipeli, kevaka dou sa veilomani.”4
Era na dau ciqoma na tamata na noda veivakauqeti ena gauna era vakila kina ni da lomani ira dina, ka sega ni baleta ni da via qarava walega vakavinaka na noda itavi. Ni da vakaraitaka na loloma dina vei ira na tamata, e rawa ni ra vakila na veivakauqeti ni Yalotabu ka ra na vakayavalati me ra muria na noda ivakavuvuli. E sega soti ni dau rawarawa me da lomani ira na tamata ena kedra ituvaki. E vakamacalataka na parofita o Momani na veika me da cakava kevaka e basika na veiboleble vakaoqo:
“Oi kemudou na wekaqu lomani, mo dou masuta na Tamada ena yalomudou taucoko me vakasinaiti kemudou ena loloma oqo; io na loloma sa solia vei ira era sa muria na Luvena ko Jisu Karisito ena yalodina, mo dou yaco kina mo dou luve ni Kalou; ia ni sa rairai mai ko Koya, eda na tautauvata kaya, ni da na raica na matana dina; ia me da rawata na inuinui oqo ka vakasavasavataki me vaka sa savasava ko Koya.”5
E a veiqaravi na Karisito sara ga vakataki Koya vei ira na tamata, e vueti ira era bikai, solia na inuinui vei ira era sa yalolailai ka vakasaqarai ira era sa lako sese. E vakaraitaka vei ira na tamata na levu ni Nona lomani ira ka kilai ira, kei na kedra vakamareqeti. E raica na kedra ituvaki vakalou kei na kedra yaga tawamudu. Ena gauna e kacivi ira kina na tamata me ra veivutuni, e cudruva na ivalavala ca ka sega ni cudruva na tamata e cakava na ivalavala ca.
Ena imatai ni nona ivola vei ira na kai Korinica, e vakabibitaka kina na iApositolo ko Paula na kena gadrevi me vakaraitaki na loloma dina oqo vei ira yadua na sipi ena nona qele ni sipi na Turaga:
“Ia kevaka kau sa vota na noqu ka kecega, meu vakani ira kina na dravudravua, ia kevaka kau sa solia na yagoqu meu vakamai, ka sa sega vei au na loloma, sa sega ni yaga vei au.
“Sa dau vosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma, sa sega ni viavia levu.
“Sa sega ni cakava na ka sa sega ni kilikili kaya, sa sega ni qara na ka me nona ga, sa sega ni cudrucudru sa sega ni dau lomaca;
“Sa sega ni rekitaka na ca, ia sa rekitaka na dina;
“Sa ubia na ka kecega sa vakabauta na ka kecega, sa vakanuinuitaka na ka kecega, sa vosota na ka kecega… .
“Ia oqo sa tu na vakabauta, na inuinui, na loloma, a ka tolutolu oqo; sa uasivi duadua vei iratou na loloma.”6
Ni da muria na nona ivakaraitaki kei na ivakavuvuli na iVakabula, e rawa ni da vukei ira na tamata me ra qarava vakavinaka na nodra itavi e vuravura oqo, ka lesu tale me laki bula vata kei na Tamada Vakalomalagi.
Au vakadinadinataka vei kemuni na veika oqo ena yaca i Jisu Karisito, emeni.