Meda Mamaroroi Tiko
Ko ni sa sureti na lewe ni matabete mo ni mamaroroi vakavuku me rawa kina vei kemuni kei ira na nomuni vuvale mo ni taqeya rawa na leqa tubukoso ni bula oqo.
Kemuni na veitacini, eda sa kalougata dina me da mai soqoni vata tu vakaoqo vata kei iratou na Mataveiliutaki Taumada kei iratou na iApositolo Le Tinikarua. Oi kemuni yadua kece sara na lewe ni matabete ko ni tiko oqo, yabaki 12 se 112, sa rawa vei kemuni ena vuku ni noda iVakabula o i Jisu Karisito mo ni taukena na ituvatuva ni bula vaka silesitieli “kevaka eda sa muria na vunau kei na ivakavuvuli ni itukutuku vinaka.”1 Sa dua na ka totoka dina me da vakasamataka kau sa kila ni sa ka dina. O iko o vakatulewa ga ena nomu bula!
Ena kena sa tu vei keda na ka yaga oqo, me da qai vakasamataka mada na italanoa oqo. E dua na cauravou, gugumatua ka yaloqaqa, a laki curu ki na dua na univesiti vinaka sara. Ena gauna oya, e a bete tiko ena Matabete i Eroni. E a cecere sara na nona ituvatuva—e a gadreva me vuniwai. Sa saga o koya na veika qaqa—e a vinakata me tamata vutuniyau.
Sa vinakata talega me qito veicaqe, ka a laki veivosaki sara kei koya na dauveivakatavulici, ka yaco sara me laki qito ena timi. Sa rawa sara ga vua me sakitaka na nona kila vakaqito ena vuravura ni qito ena univesiti.
Oqori na veika e vakasamataka tu.
Ia e a lailai sara na nona vakasamataka na ka ena rawa ni laki vakacacana na nona sasaga cecere ka tawayaga—oya me kumuna vata tiko. E a vakawalena o koya na bibi ni vakavakarau vinaka, na kena gadrevi na tiko ena kena gauna kei na vuli e vakaivakarau, vata kei na kalasi ni kemisitiri ena koliji. E totolo mai ka veivakalolomataki na kena isau. E a yaco ena loma walega ni 90 na siga. Oqo na ka a yaco.
Ena siga sa raica kina na kena ituvaki ni 5 na fute 8 na iji, ka 170 na paodi na kena bibi ni sa vakarau veiqali sominiwai kei na kena isa vakaitamera mai na timi kaukauwa ka dua, sa kidava kina o koya ni sa qito cala tiko.
Me baleta ni sega ni dau iwiliwili vakalevu, sa vaka me kabulu mai na matana ni oti ga vakalailai na nona wiliwili.
Na ivakadei ni nona druka a yaco ena itinitini ni veitarogi ni kemisitiri. Au gadreva ga meu tukuna ni nona saumi taro ki na veitaro curumaki e sega mada ga ni yacova na ivakatagedegede ni kena veimama. E a lutu sara ga vakaca.
Ia a qai cakacaka vagumatua, ka laki kaulotu ka liaci koya rawa kina me raica na salatu dina ni inaki ni bula oqo, kei na kaukauwa ni vakavakarau sa yaco kina me valuta rawa kina na ituvaki ni gauna veilecayaki lekaleka oya. Ena gauna mada ga oqo, au se dau tatadracataka tu na kalasi ni kemisitiri oya.
Eda kalougata, ni sa vakaraitaka tu vei keda na Turaga na sala me da drotani kina mai na veika lialia vakaoya. E kaya o Koya:
“Dou vakatudaliga, ko i kemudou kece ga na lewe ni noqu lotu… . Dou vakadirorogo mai na vanua vakayawa; kei kemudou mai na veiyanuyanu ni wasawasa, dou vakarorogo kece mai.
“Dou vakarau, dou vakarautaki kemudou ki na veika ena yaco mai, raica sa voleka ni yaco mai na Turaga.”2
Na vunau me baleta na iKarua ni Lesumai ni Mesaia e vakarautaka e dua na ituvatuva cecere me da vakavakarau ka bula dodonu. Sa kila vinaka tu na Tamada Vakalomalagi ni kalougata sa yalataki tu e veivakayaloqaqataki vei ira na luvena me ra cakava na cakacaka ni ivalavala dodonu kei na itotogi sa yalataki tu e vakavurea e dua na yalo e cata sara na cakava na veika ca. Sai koya oqori na ivakatakila sa baleta tiko na iKarua ni Lesumai ni Noda Turaga.3
Na ivakatakila oqo era tukuna tiko na veiivakatakilakila kei na veika veivakurabuitaki e vuravura kei lomalagi. Era tukuna tiko na veigauna ca kei na veika lelevu kei na kena gauna era na yaco kina. Ia na kena e bibi duadua, oya ni sa tukuni tu vei keda na iyalayala lagilagi vakalou oqo:
“Ia sa lewai ira talega na nona tamata na Turaga, ka liutaki ira.”4
“Raica dou sa sota kaya na veika rarawa kece ga; ia mo dou muria na noqu ivakaro, … me tudei kina na lotu ka kakua ni rawai mai na nodra vere na soqosoqo kecega e ruku i lomalagi.”5
Ia, “kevaka dou sa vakarau vakavinaka tu, dou na sega sara ni rere.”6
Era sa liutaki tu ena iyalayala oqo o ira na lewe ni matabete me ra vakarautaki ira kina kei na nodra matavuvale ni na rairai mai na Turaga.7 E sega ni gadrevi meda nuiqawaqawataka na veika ena yaco tiko ena iKarua ni Lesumai. Meda bula voli ga ena vakavinavinaka ni da sa kila vakavinaka tiko na veika ena yaco mai. Meda vakavinavinakataka tiko ni da sa vakatulewataka tikoga na noda bula vakai keda yadua, ni da sa mai matataka tiko na Turaga ena veika sa nuitaki keda tiko kina.8 E rawarawa wale tu ga na kena icakacaka: Mo yalodina. Kakua ni ko lomaocaoca. Mo mamaroroi tiko.
Mo yalodina tiko. Me vaka ni da lewe ni matabete eda sa qai tauyavutaka kina e dua na itovo vakaturaga ka ivosavosa vinaka. Sai keda na tagane eda sa dau masu, eda dau vakatabuya na Siga ni Vakacecegu, ka kila tu na vosa ni Kalou. Eda dau sauma na noda ikatini, lolo, ka solia ena yalololoma na isolisoli ni lolo. Eda sa maroroya tiko na noda veiyalayalati ka solia na noda bula ki na kena taraicake na matanitu ni Kalou.
Kemuni na veitacini, me da mamaroroi tiko! Ni da vakayacora na veika oqo, “ia sa lewai ira talega na nona tamata na Turaga ka liutaki [keda].”9
Kakua Ni ko Lomaocaoca. Ni da sa tamata ni Kalou eda sa gole tani mai na iyau ki na veikatakataki cake ni “ka sa sega ni veikatakataki cake sa sega ni mai vua na Kalou.”10 Kevaka e vakayacori na veidinadinati se cakacaka se sasaga se veiqaravi ena veisiga ka sega ni vakaliuci kina na Kalou, e dodonu meda mamaroroi ka kauta laivi na noda lomaocaoca.11 Kevaka eda se dinau tu, meda sauma yani ka galala tani mai kina vakadua.
Kemuni na veitacini, meda mamaroroi tiko! Ia, “[eda] na sota kaya na veika rarawa kecega, ia meda muria na ivakaro ni [Turaga], … me tudei kina na lotu [kei na kena tamata].”12
Meda mamaroroi Tiko. O ira na marama vakawati era sa gadrevi sara vakabibi ena cakacaka oqo io era sa gadrevi ira na watidra era dau veiliutaki ena kena vakarautaki na matavuvale. Era gadreva tu o ira na gone na nodra itubutubu era tuberi ira ena ivakavuvuli donu oqo. Ena qai yaco mera cakava vakakina vei ira na luvedra ka na sega kina ni lala na nodra ilololo.
E dua na ivakavuvuli bibi ni kosipeli oya na vakavakarau ki na siga ni lauqa sa dau yaco mai. Na cakacaka, rawa ka, kei na mamaroroi sa tiki ni ivakarau dokai ni bula oqo. Nanuma tiko na vosa oqo nei Paula: “Ia kevaka e dua sa sega ni vakaraici ira na kai nona, ka vakalevu sara ko ira na nona lewe ni vale, sa cakitaka na vakabauta, ka sa uasivi cake e na ca, sa uasivi sobu ko koya sa sega ni lotu”.13
Eratou dabe tiko oqo na lewe tolu na bete levu vakatulewa e kovuti kina na Mataveiliutaki Taumada e na Lotu.
Eda rogoca mai vei Peresitedi James E. Faust, iKarua ni Daunivakasala na ka oqo: “Na tama kei na tina yadua era ivakatawa ni ilololo ni matavuvale. Mera dau vakatawana na ilololo na veika cava ga era gadreva na nodra matavuvale ka me maroroi ena vuku ni leqa tubukoso… [ka] na yaco me vukei keda na Kalou ena veigauna ni veivakatovolei.”14
Eda rogoca mai vei Peresitedi Thomas S. Monson, iMatai ni Daunivakasala, na ka oqo: “E a rawa ni vuqa tale na tamata mera a valuta rawa na veigauna dredre ni bula vakailavo kevaka me ra a maroroya na kakana ni dua na yabaki … ka sega na nodra dinau. Eda raica ena gauna oqo ni sa veisautaki tu na kena vakamuri na ivakasala oqo: era sa vakarautaka tu e dua na yabaki ni saumi dinau ka sega ni maroroi na kakana.”15
Eda rogoca mai vua na parofita ni Turaga o Peresitedi Gordon B. Hinckley, ni a kaya:
“Na vanua vinaka duadua me caka kina na mamaroroi ni kakana oya ena loma ni noda vuvale… .
“Eda rawa ni ga tekivutaka yani vakavuku. Eda na tekivu vakarautaka na kakana ni dua na macawa ka yacova sara na tolu na vula… . Au leqataka ni so era nanuma tiko ni na sega ni ra rawata rawa na mamaroroi vakaoqo ni kakana ni dua na gauna balavu, ka ra sega ni bau sasagataka mada ga.
“Tekivutaka vakalalai, … ka qai vakalevutaka tiko vakamalua ki na kena e vinakati.”16
Na vakavakarau vakayalo ena vakayavutaki tiko ena vakabauti Jisu Karisito, na talai rawarawa kei na bula mamaroroi. E sega ni gadrevi vei ira na lewenilotu mera qarava vakusakusa ena dua ga na gauna, ia mera tekivu rawa vakamalua.
Ko ni sa sureti na lewe ni matabete mo ni mamaroroi vakavuku me rawa kina vei kemuni kei ira na nomuni vuvale mo ni taqeya rawa na leqa tubukoso ni bula oqo. Yalovinaka mo ni raica me ra yadua na tikidua na All Is Safely Gathered In o ira ko ni raici ira tiko. Vakasalataki ira me ra vakavakarau ki na veidraki ca ni bula vakailavo sa dau tu mai liu.
O ira na iliuliu ni matabete, me ra vakaitavitaki ira na iSoqosoqo ni Veivukei ena kena cuqeni cake na vakavakarau ni matavuvale kei na cakacaka ni liga. Era gadreva tu o ira na marama ena Lotu na nomuni veitokoni ka ra na tokona mai na nomuni veiliutaki.
Vakayaloqaqataki ira na lewenilotu mera dau maroroya tikoga ki na ilololo ni vuvale na kakana yaga, na kena e laukana ena veisiga, na wai e savasava e rawa ni gunuvi. Mera maroroi ilavo, ke vica toka mada ga na dola ena veimacawa. Na ivakarau vuku vakaoqo ena laki rawa kina vei ira mera maroroya rawa kina na ilavo ni vica na vula. Ni toso tiko na gauna sa rawa mera vaqaqacotaka kina na sasaga vakavuku oqo me rawati rawa kina na kakana ni dua na gauna balavu ena kena vakuri tiko na kakana yaga me vakataka na raisi, bini, kei na kakana bulabula ka na vakabulai ira tiko ke sa mani sega dina na kakana me ra kania.17
Ni da vakayacora na noda vinaka taucoko, sa rawa meda nuidei tiko ni na “sega ni oti na saqa madrai droka, ena sega talega ni maca sobu na tavaya waiwai.”18 Eda na qai marautaka e dua na vuku, veitaqomaki, vakacegu ni vakasama e cecere kei na ituvaki vinaka ni bula. Eda na tu yani ka vakavakarau, ia ni da sa vakavakarau, eda “na sega ni rere.”19
Meu tinia, oqo na matavuvale nei Luca vata kei Patrizia Vaccarono. E ratou vakaitikotiko ena dua na taoni lailai volekati Roma mai Itali. E ratou se qai volavola walega mai oqo, ka ratou kaya:
“Keitou sa nanuma kina ni oti na veika e so keitou a sotava oya ni sa ka bibi me keitou maroroya na veika keitou na vakayagataka. E so na gauna keitou kania na mataqali kakana tale e so… .
“Na yalo ni vakacegu kei na gagadre meda yalodina ki na vunau e solia na Turaga kivua na parofita ni gauna oqo ena vukea meda vakila kina na Yalo Tabu, … meda kakua ni rere ka meda raica rawa na ivakatakilakila ni gauna ni iKarua ni Lesumai ni Turaga ni sa dua na veivakalougatataki, ka sega ni dua na ka me rerevaki kina. Eda na marautaka… . E solia vei keda na yalo vakauqeti meda yalodina ka vosota me yacova na ivakataotioti ka meda vakabulai ka rawata na bula tawamudu.”20
Me itini ni vakasama oqo, a vola vakaoqo o Baraca Vaccarono: “Au kerea mo ni vosota na noqu vosa Vakavalagi, au nuitaka ko ni na kila na veika au via tukuna tiko vei kemuni.” Baraca kei Sisita Vaccarono, keimami sa kila vakavinaka ni sa volai tu ena ivolanikalou: “Mo vakararavi vei Jiova ena vu ni yalomu, ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomu i lakolako ko koya.”21 Ena yaca i Jisu Karisito, emeni.