Dolavi Vou na Valecavu ni Oti e Levu Sara na kena Vakavoutaki

Me vaka ni a vakayacori kina na isevu ni koniferedi raraba ena 1867, sa tu oqo na Valecavu e Salt Lake me ivakatakilakila ni nodra yalodina ka vuku na painia. Ia, sa mai oti oqo e volekata na 140 na yabaki, ka se duri tu ga na Valecavu, ka se bera mada vakadua me dabe toka vakaoqo ena dua na yavu dei.

Ena soqoni ena yakavi ni Vakarauwai, ena ika 31 ni Maji, a vakatabuya tale kina o Peresitedi Gordon B. Hinckley na Valecavu e Salt Lake ni oti e rua na yabaki na kena a vakavoutaki tiko.

E so na idabedabe balavu, mai na kau na oki, era a biu vou ka veiyawaki vakavinaka me rawa ni ra dodoyava vakavinaka o ira na vulagi; na kena ikabakaba taumada ki na varada mai tautuba e sa biu mai loma me rawarawa kina vei ira na vulagi era curu mai, ka sa caka e rua tale na ikabakaba vou e loma; sa boro vou talega e dua na itaqa boro koula ki na paipo ni oqani; e a vakavinakataki ka boro na kena delavuvu; e a caka na veirumu ni veisau kei na dua na valenivola ni sere kei na vakatagi ka vou, me nodra na lewe ni matasere; e a vakavoutaki na buturara ni vosa me rawa ni vagalalataki kina me vakarautaki kina e dua na ituvatuva ni idabedabe se dua na buturara me baleta na soqo e so; ka ra veisautaki ki na dua na ivakatagedegede e vinaka cake na veigacagaca ni vakarautaki ni wai, iyaya, kei na livaliva.

E dina ga ni sa mai vakayacori na veivakatorocaketaki kei na veika tale eso ena Valecavu oqo, na veisau vovou bibi sai koya na kena era na sega ni raica rawa o ira na lewenivanua raraba.

E a vakavoutaki ka vakavinakataki cake na yavu kei na lalaga ni Valecavu me vakatorocaketaka kina na kaukauwa ni vale me na taqeya rawa kina na uneune.

Era a vakaukauwataki taucoko ena kaukaumea sitila na 44 na duru era tomataka cake tiko na delavuvu totoka ni Valecavu, ena kena vakacurumi mai na uluna e cake ka yacova na buturara. Era dregati talega ena simede na yavu ni duru yadua. Era a vakayagataki na kato sitila me ra semati kina na isa ki na duru, ka ra semati talega na isa balabalavu ni delavuvu ki na kedra duru, ka vakaukauwataki ena sitila.

Ia sa mai tu kaukauwa cake oqo na Valecavu ka kaukauwa cake sara mai na kena ituvaki ena dua na gauna lekaleka sa oti, me vakataki ira ga na kena lewe ni Lotu.

“Ena dua na gauna e lewe levu sara na Yalododonu Edaidai era a vakaitikotiko eke ena bucabuca oqo kei na veivanua voleka tale e so ka tauyavutaki kina na veitikotiko tale e so,” a kaya vakaoqo o Peresitedi Gordon B. Hinckley ena nona masu ni vakatabuya na Valecavu sa vakavoutaki. “Ena gauna oqo sa tubu na nomuni cakacaka ka tete yani ki vuravura me yacova ni sa levu cake tale na iwiliwili ni lewenilotu mai na taudaku ni vanua oqo mai na kedra iwiliwili o ira era tiko kina.”

Buli ka Tarai Cake na Valecavu

E a laki kere vakasala o Peresitedi Brigham Young vei Henry Grow me vukei koya ena kena vakavotukanataki na nona tadra me baleta na Valecavu. O koya e dua na curuvou ki na Lotu ka turaga ni Philadelphia mai Pennsylvania. E dau tara wavu o Brother Grow ka sa tu vua na kila me rawa ni cakava kina na itavi dredre vakaoqo.

Sa caka sara na kena peleni, ka tekivu na kena tara ena 1863.

Ena kena sa sega ni rawa me laurai na iyaya ni tara vale e dau vakayagataki tudei, era sa wakia vata na ivovo ni iyaya o ira na tamata cakacaka ka vakayagataka na iyaya era tu e kea me tara kina na Valecavu. Era a musu mai na kau mai na veitokaitua e kea, na vatu e so a laki kau mai na vanua a tara tiko kina na Valetabu e Salt Lake, era a veisautaki na misini makawa ni mataivalu kei na ivava kau ni bulumakau me ra vakayagataki me ivako kei na kena wasa, e a caka na drega mai na kuli ni manumanu saqa, ka caka na palasita mai na tadevo ni vanua oya ka waki vata na vutini manumanu yavai va me kaukauwa kina.

E dina ga ni lailai na iyaya e kunei rawa ena gauna oya, a tara na Valecavu ena vakabauta kei na vuku.

Ni sa yacova na ikava ni yabaki na kena tara, a vakayacori e dua na koniferedi ena Valecavu oqo. E a qai mani vakatabui na Valecavu ena Okotova ni 1875, ni sema oti na kena varada.

iTukutuku Bibi

Era a tokoni yadua kece sara o ira na Peresitedi ni Lotu ena soqoni dokai ena Valecavu vakavo ga o Josefa Simici kei Brigham Young.
E a tiko ena loma ni Valecavu e dua na tobu ni papitaiso me ra qaravi kina o ira na lewenilotu ena vanua o Salt Lake City me yacova mai na siga a vakavoutaki kina, ka sa mani vagalalataki.
Na kena idabedabe balavu paini taumada sa boro me rairai vaka na oki.
Na dago ni oqani caka mai na paini poderosa, sa boro me rairai vaka na maoqani.
Ni bera ni tara na Valecavu e Salt Lake, e a tara e dua na valecavu ka sa vakatokai tu oqo me “Valecavu Makawa” ena ceva i ra ni tutu ni vanua ni valetabu me ra soqoni yani kina o ira na Yalododonu.
Sa le tinikarua vei ira na Peresitedi kei Amerika era sa curuma oti na Valecavu.
Na voqa ni rorogo ena Valecavu e sega ni tautauvata kei na ituvaki ni valelevu tale e so. E tukuni tu ni kevaka e lutu e dua na pini ena itutu ni vunau ena mua e liu ni Valecavu sa rawa ni rogoci mai na yatu e muri.