Mo Qarauna Me Savasava Tikoga Na Nomu Vakanananu

Peresitedi Gordon B. Hinckley

E sega ni yalani na nomuni kaukauwa. Kevaka mo ni na qarauna na nomuni bula, sa sinai tu ena veisiga ni mataka na veika ni bula kei na reki

Kemuni na goneyalewa lomani, sa dua na ka totoka na nomuni mai tiko rawa ena valenisoqo levu oqo. O ni sa mai dabe vata tiko oqo kei ira na dui tinamuni, bumuni, kei na nomuni qasenivuli. Ena taudaku ni Vale ni Koniferedi oqo e drau ka udolu na tamata ena veiyasai vuravura era sa soqoni vata talega tikoga vakakina. Era na vakarorogo tiko mai vei keda ena veimataqali vosa. Na noda veivosa oqo ena vakadewataki tiko ki na nodra dui vosa ni nodra vanua. Na madigi meu na vosa vei kemuni edai sa dua na ilesilesi marautaki vakaidina. Ia sa dua talega na gauna vinaka ka totoka sara. Au sa masuta kina na veidusimaki ni Yalo Tabu ena veika meu na cauraka yani.

E so talega era sa vakamacalataka sara vakamatata na ulutaga oqo ena soqoni oqo. Au sa mai tukuna walega kina. Ni sai koya oqo na vosa ni Turaga sa vakatakilai mai, ka sa toqai tiko ena wase 121 ni Vunau kei na Veiyalayalati. E vakatoka oqo:

“Mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete, me vaka na tegu sa lutu mai lagi.

“Ena sala voli vata ga kei iko na Yalo Tabu, ia na nomu ititoko sa ititoko ni yalododonu kei na dina sa tudei sara; raica na nomu lewa sa lewa e sega ni mudu, ia kevaka sa sega ni taurivaki vakatani sa na tudei tu ga me tawamudu” (tt. 45–46).

E tiko tale beka e dua na iyalayala e vinaka cake me vakataka na vosa ni vakatakila oqo mai vua na Turaga? Sai koya oqo na vosa ni Kalou, a vakatakilai vei Parofita Josefa Simici. E sa umani tu kina e dua na yalayala cecere kivei ira kece sara era na dau qarauna me savasava tikoga na nodra vakanananu.

Ia oqo oi kemuni na goneyalewa e se qai wadrovu cake tiko mai na nomuni bula. Oqo e sa gauna donu mo ni sa papitaiso oti kina. Se gone na nomuni bula ka se tu e matamuni na veisiga ni mataka ko ni tatadrataka voli tiko. Oi kemuni yadua ko ni luve ni Kalou. O ni sa ibulibuli Vakalou yadudua. Sai kemuni dina na luvena yalewa na Kalou sa Cecere Sara. E sega ni yalani na nomuni kaukauwa. Kevaka mo ni qarauna na nomuni bula, sa sinai tu ena veisiga ni mataka na veika ni bula kei na reki. E sega ni rawa mo ni vakamaumautaka na nomuni dui taledi se na nomuni gauna oqo. Sa vakaitamera dina na veimadigi cecere sa tu oqo e matamuni.

Ia meu na solia oqo vei kemuni e dua na ivakasala, kevaka ko ni vakamuria, ko ni na bula marau kina. Oqo e dua na parokaramu e va na kena ituvatuva. Sai koya oqo: (1) mo masu (2) vuli (3) sauma na nomu ikatini ka (4) tiko ena soqoni ni lotu.

Me baleta na imatai ni ituvatuva—oya na nomu masu ga o iko— sai iko e dua na luvena yalewa na Tamada Vakalomalagi. Sai Koya na nomu itubutubu vakalomalagi. Mo dau vosa Vua. Mo dau tekiduru ena veibogi kei na mataka ka cauraka Vua na vakavinavinaka ni yalomu. Mo dau tukuna na veivakalougatataki ko gadreva ka vinakata. Mo kakua ni guilecava ni a tauyavutaki na Lotu oqo mai na nona masu malumalumu o Josefa Simici na cauravou lailai ena dua na loma ni veikau nei tamana. Mai na veika totoka a yaco oya, ka da vakatoka me iMatai ni Raivotu, ka sa mai vakairabailevutaka kina na cakacaka oqo me yacova me sa tauyavutaki kina ena 160 na matanitu, ka sa sivia na 12 na milioni na kena lewenilotu. Sai koya sara ga oqo na matanataki ni raivotu nei Taniela me baleta e dua na vatu sa kavida mai na ulunivanua ka sega ni ta ena liga ka na roboti vuravura taucoko (raica Taniela 2:44–45).

E sega walega ni ko na masu vakataki iko, ia sa rawa mo vakauqeti rau na nomu itubutubu me vakayacori na masu vakamatavuvale kevaka e se bera ni rau vakayacora tiko. Na masu sa ikoya na ikawakawa eda na sema rawa kina vua na Tamada Vakalomalagi. E sega ni saumi. E gadrevi ga kina na vakabauta kei na cakacaka. E sega tale ni dua na ka e uasivi me vakataka na noda tekiduru ka masu ena yalomalumalumu. Ena tukuni kina ni sa lomani na Kalou, ni sai koya ga sa solia na veika vinaka kecega. Ena tukuna tiko ni da sa dokai keda tiko. E sega ni dua na kena isosomi. Sai koya oqo na noda veivosaki yadua kei koya na Kalou

Na ikarua ni ituvatuva ena noqu ivakamacala oqo oya na vuli. Na cava e oka tiko ena ono na matanivola rawarawa oqo? Na imatai na kena vulici na ivolanikalou. Ena rairai vica beka ga na tikina o na wilika ena Veiyalayalati Makawa, ia era sa umani tu kina na veilesoni cecere sara. Sa qara dina ni koula na Veiyalayalati Vou. E ra tiko kina na Kosipeli e va—Maciu, Marika, Luke, kei Joni—ka vakakina na nodra Cakacaka na iApositolo kei na veivola tale e so. Tovolea mo wilika mada ga e dua vei ira na Kosipeliivola beka nei Joni. Ni sa oti oya, mo wilika sara na iVola i Momani.

Ena rua na yabaki sa oti au a solia e dua na bolebole ki na lewe ni Lotu taucoko me ra wilika na iVola i Momani ni bera ni cava na yabaki oya. Sa dua na ka veivakurabuitaki na nodra rawata rawa e vuqa na bolebole oya. Kivei ira yadua era a vakayacora vakakina era a vakalougatataki ena nodra itavi oya. Ena nodra sa mai wilika tiko vakatitobu na ikuri ni ivakadinadina oqo ni noda Dauveivueti, era sa vakauqeti kina na lomadra ka tarai na yalodra. E so vei kemuni ni a se gone kina ka dredre mo ni wilka ena gauna oya, ia ko ni sa sega tale ni gone tiko ka sa rawa mo ni wilika ena gauna oqo.

Ena taudaku ni vuli vakalotu sa tiko e dua na bolebole ni vuli ka. Me sa vakayacori ga edai, ni ko se gone tiko, ka mo rawata kece sara vakavinaka na nomu vuli. Eda sa bula tiko oqo ena gauna ni veisisivi, ka na yaco me na ca vakalevu cake tikoga. Na vuli ka sai koya na idola ena tadolava na katuba ni veimadigi vivinaka.

Sa rawa mo vakavakarau ki na nomu vakamau, ka mo vakanuinui tiko kina, ia o sega ni vakadeitaka se na yaco dina mai. E dina ga ni ko na vakamau, ena yaga vakalevu vei iko na nomu vuli ka. Kakua ni ko bula wale tu ga, ka laiva me cadra ka dromu na veisiga yadua ka ko sega ni vakatorocaketaka kina na nomu bula. Ena vakalougatataki iko na Turaga ni ko cakacakataka na ka oqo. Ena vakatorocaketaki na nomu bula ka rabailevu na nomu kila, ni sa tadolavi na nomu vakasama ki na veika vovou o na sotava ka kila.

Na ituvatuva e tarava sai koya na kena saumi na ikatini. Sa ka lagilagi na yalayala ni Turaga kivei ira era sauma tiko na nodra ikatini. E kaya o Koya ena ivakatakila ena gauna oqo ni ra na “sega ni vakarusai” (raica V&V 64:23).

Na Nona iyalayala cecere oqo e toqai tu ena vosa nei Malakai. E kaya kina o koya: “E dua li na tamata me butakoci koya na Kalou? Ia dou a butakoci au. Ia dou sa kaya, Keitou a butakoci kemuni vakaevei? sa butakoca na sigana kei na madrali… .

“Dou kauta kece mai na sigana ki na lololo, me so kina na kakana e na noqu vale, ka vakatovolei au mada kina, sa kaya ko Jiova ni lewe vuqa, se’u na dolava se segai na katuba ni lomalagi, ka sovaraka vei kemudou na ka ni veivakalougatataki, me na sautu dina sara” (Malakai 3:8, 10).

Ia a tomana sara o Koya ena nona kaya e dua na ka taleitaki dina. Mo ni rogoca:

“Ia kau na vunauca na dauvakacaca e na vukumudou, me kakua ni vakacacana na vua ni nomudou qele; ena sega talega ni sewaruta na vua ni nomudou vaini e na were, sa kaya ko Jiova ni lewevuqa.

“A ra na vosa vakalougatataki kemudou na lewe ni veivanua kecega: ni dou na vanua ena daurekitaki” (Malakai 3:11–12).

Ni da sauma tiko na noda ikatini ena ilavo, sa ka bibi cake me da sauma tiko ena vakabauta. Au se bera mada vakadua ni sotava e dua na tamata e sauma tiko vakadodonu na nona ikatini me vosa kudrukudrutaka tiko. Ia, sa nuitaka tikoga o koya na Turaga, ka sega mada vakadua me biuti koya na Turaga.

Ena gauna au se cauravou lailai kina, e a dau kauti keitou taucoko o tamaqu ena ilakolako ki na vale nei Bisopi Duncan me baleta na veivakatarogi ni ikatini. E sega ni tiko e dua na nona valenivolavola o bisopi e valenilotu, ka sa laki vakayacora kina na nona veiqaravi vakalotu ena nona vale. Keitou dau laki dabe taucoko sara e loma ni rumu ni gade, ka keitou kacivi yadudua yani vua ki valenikana. Ena rairai 25 na sede, se 50 na sede, na neitou ikatini, ia sa ikatini dodonu. A qai vola na neitou dui risiti ka vola na kena levu ena ivolatukutuku ni tabanalevu. E a lailai sara beka na ilavo ka sau levu cake na kena volai mai na kena levu. Ia sa tauyavutaki kina e dua na ivakarau ka sa vakayacori tiko me yacova mai oqo. Ni dau saumi na ikatini era sa yaco mai kina na veivakalougatataki e sega ni wili rawa me vaka ga sa yalataka tu na Turaga.

Au a vakamau ena gauna ni Lauqa Vakailavo, na gauna e kunekune na yaloka ni dilio tu kina na ilavo, ia keitou a sauma ga na neitou ikatini ka sega ni leqa na keitou kakana se leqataka e dua na ka keitou gadreva.

Na ikava ni ituvatuva—oya mo ni tiko ena nomu soqoni ni lotu, na nomu soqoni ni sakaramede. E sega ni dua na ka me rawa ni sosomitaka na noda vakayagataka na sakaramede ni Vakayakavi ni Turaga. Sai koya oqo e dua na ilesilesi tabu, vakalou, ka totoka me da vakayagataka na madrai kei na wai me vakananumi kina na yago kei na dra ni iVakabula ni kawatamata.

E sega tale ni dua na cakacaka ena ivolatukutuku ni kawatamata me bibi cake me vakataka na solibula veisorovaki ni noda Dauveivueti vakalou. E sega ni dua na ka me rawa ni vakatautauvatataki rawa kina. Kevaka e sega na ka oqo sa qai tawayaga dina na bula. Sa yaco ga me tini botoilevu tu na ilakolako.

Ena vuku ni Veisorovaki sa yalataki vakaidina kina na bula tawamudu. Sa qai sega ni tini ga ena mate, ia sa vuki me dua na isema ni ilakolako ki na dua na bula dina e lagilagi cake sara.

Na veika kece oqo sa vakatakarakarataki tiko ena gauna eda vakayagataka kina na sakaramede. E lailai sobu na kedra bibi na vo ni soqoni ka bibi cake vakalevu na noda vakayagataka na ivakatakilakila ni nona solibula na noda iVakabula.

Kevaka mo ni vakayacora na ituvatuva e va oqo au sa yalataka vei kemuni ni na yaco me na vuavuai vinaka na nomuni bula, ka na cecere na nomuni reki, ka totoka ka veivakacegui na veika ko ni na dui rawata rawa ena kena sala kecega.

Kemuni na ganequ goneyalewa me na vakalougatataki kemuni na Turaga; me na sobuti kemuni tikoga na Nona veivakalougatataki ena kemuni ituvaki kece sara. Keimami lomani kemuni kece ka dau masulaki kemuni. Keimami lomani kemuni. Keimami sa masulaki kemuni. Me na marautaki kemuni ko lomalagi, sa noqu vakamamasu malumalumu, ena yaca tabu i Jisu Karisito, emeni.