Elder Enrique R. Falabella
Ena Vitusagavulu

E vakabauta o Elder Enrique Rienzi Falabella Arellano ni sega tale ni dua na iyau e cecere cake me vakataka na nona ivakadinadina e dua me baleti Jisu Karisito kei na mana ni Veisorovaki ki na bula ni dua na tamata.

E a vulica mai ni se gone o Elder Falabella ni kena taukeni e dua na ivakadinadina ena tekivu mai na gagadre ni yalo me kila na ka dina kei na yalorawarawa me bulataka.

E a sucu o koya ena ika 9 ni Me, 1950, mai vei rau o Udine kei Leonor Falabella, ena gauna se qai yabaki 12 toka kina o Elder Falabella rau a tukituki kina na daukaulotu ena katuba ni nodratou vale mai Guatemala City, na vanua a sucu ka susugi cake mai kina. E a ulumatua vei iratou na tacina lewe va ka sa mate na tinadratou ena vica na yabaki yani e liu, ka sa siqema rawa mai kina o Elder Falabella ni dua na ka e rau kilai tani kina na daukalotu. E raica o koya na ka oqo ena nodrau ivakaraitaki ni loloma kei na kaukauwa vakalou e rau veivakavulici kina.

“Au sa via kila sara ga na veika e rau kila tu, ” a kaya o koya. E a vakavuna me veisau mai na gagadre ni yalona kei na talairawarawa me vakayacora na veika e rau tukuna vua na daukaulotu.

“Niu se cauravou au sa vulica rawa mai kina meu dau taleitaka na vosa ni iVakabula: ‘Kevaka e dua na tamata sa via cakava na loma i koya, ena kila se sa ka mai vua na Kalou nai vakavuvuli, se’u vosa vakai au ga’ (Joni 7:17). Kevaka eda na bulataka tiko na ivakavuvuli ni kosipeli, ena rawa ni tara na yaloda na Yalotabu, ka na yaco meda kila ni sa ka dina sara.”

Ni oti na nona veiqaravi ena Tabana ni Kaulotu e Central America, rau a vauci kei watina, o Blanca Lidia Sanchez, ena 21 ni June, 1975, ena Valetabu e Mesa Arizona. E a rawata o Elder Falabella na nona koroi ni vuku ni vakayagataki ni qele mai na Univesiti ni San Carlos mai Guatemala ka laki vulica na veika ni veivoli ena Univesiti ni Costa Rica. E a cakacaka taumada ena kabani ni wainimate kei na veiqaravi ni famasi ni bera ni mai kacivi me cakacaka tudei ena Lotu.

Ni ratou sa lelevu sara na luvedrau e lima, e a laki peresitedi ni kaulotu ena iteki o Elder Falabella, e a bisopi, mata ni iwasewase levu e kea, peresitedi ni iteki, ka lewe ni Vitusagavulu, ka Peresitedi ni iWasewase o Amerika e Loma me rua na yabaki. E a peresitedi tiko ni tabana ena Koronivuli ni Kaulotu mai Guatemala City ena gauna sa kacivi kina me lewe ni iMatai ni Kuoramu ni Vitusagavulu.