Elder Claudio D. Zivic
Ena Vitusagavulu

E vakabauta o Elder Claudio Daniel Zivic ni gauna eda saga tiko kina me da bula dodonu, eda sa nuitaka tiko na veidusimaki ni Kalou.

E a sucu o Elder Zivic ena ika 19 ni Tiseba, 1948, kivei rau na itubutubu Yalododonu Edaidai o Sergio Jorge Zivic kei Eleonora Zalewski Zivic mai Buenos Aires e Argentina. E se qai yabaki 15 ka sa daucici, ena 800 na mita ka toka o koya ena ikarua ni itutu ena nona tabayabaki ni nona vanua. Sa nona gagadre levu duadua me na laki vakaitavi e na Olympics, ka sa vakabauta tiko o nona dauniveivakatavulici, e dua a qito talega ena Olympic, ni na rawata o koya—kevaka walega me na kakua ni besetaka me qito ena Sigatabu.

“Sa noqu digidigi oya,” e kaya o Elder Zivic. “E muri au sa qai kila ni veisisivi oya e sega ni ka e vinakata na Turaga vei au.”

A sotava talega o Elder Zivic e dua na vakatulewa me digitaka kina na vuli cakacaka e tarava. Ena va na yabaki veitarataravi ena koronivuli torocake, sa gadrevi kina vua me taura e dua na veitarogi ni daunifika ena mua ni yabaki baleta ni a sega ni vinaka na nona rawa ka vakavuli ena loma ni yabaki.

“Au sega sara ni taleitaka na vuli daunifika,” a kaya. Ia ni sa mai vakasamataka ka masulaka na nona bula vakacakacaka, sa vakila dina e lomana ni dodonu me taura na daunifika. Ni sa nuitaka tiko mai na Turaga, a mai taura rawa kina na nona koroi ni daunifika mai na Univesiti ni Buenos Aires ka laki marautaka sara na nona cakacaka vaka-daunifika vakaivola vakamatanitu.

E a raica rawa o Elder Zivic na veidusimaki ni Turaga ena nona bula taucoko. “Kevaka me da na bula dodonu tiko, ena vakalougatataki keda o Koya,” e kaya vakaoqori o Elder Zivic. “Ena yaco kecega mai na veika kece.”

Ni veiqaravi oti mai na mataivalu, a laki vauci sara vei watina o Dina Noemí Alvarez, ena ika 9 ni Janueri, 1979, ena Valetabu e São Paulo Brazil.

Ni bera ni kacivi ki na iMatai ni Kuoramu ni Vitusagavulu, e a veiqaravi tu mai o Elder Zivic vaka- peresitedi ni kuoramu ni italatala qase, qasenivuli ni inisitute, bisopi, lewe ni matabose e cake ena iteki, daunivakasala vua na peresitedi ni iteki, daucakacaka vakalotu ni valetabu, mata ni iwasewase levu, peresitedi ni Tabana ni Kaulotu e Spain Bilbao, ka iKarua ni Daunivakasala ena Mataveiliutaki ni iWasewase o South America.