Julie B. Beck
Peresitedi Raraba ni iSoqosoqo ni Veivukei

Ena nona papitaiso ka vakakina e valetabu, a kaya kina o Julie Bangerter Beck ni tiki ni nona veiyalayalati sa “yalataka kina Vua na Turaga ni sa rawa me na vakayagataki koya ena Nona matanitu.” Na vanua kei na iwalewale me na vakayagataki koya kina e sega ni bibi vua. Taumada e a imatai ni daunivakasala ena mataveiliutaki raraba ni Goneyalewa, ka kaya kina, ena Lotu “na tamata yadua ena dau veisautaki na nona itavi. E sega ni bibi na vanua o veiqaravi kina. Oqo e cakacaka niTuraga, ka da sa cakacaka ena vukudra na luve ni Tamada Vakalomalagi.”

A sucu kivei William Grant Bangerter, ka sa lewe tudei tu oqo ni iMatai ni Kuoramu ni Vitusagavulu, kei Geraldine Hamblin Bangerter ena ika 29 ni Sepiteba, 1954, ka vuli mai Dixie College kei na Brigham Young Univesiti, ka rawata na nona koroi ni dikevi vakavuku ni matavuvale. A qai vakamau kei Ramon P. Beck ena ika 28 ni Tiseba, 1973, ena Valetabu e Salt Lake. E tolu na luvedrau ka walu na makubudrau.

E a veiqaravi o Sister Beck ena itutu ni peresitedi ni Goneyalewa kei na Lalai ena tabanalevu ka daunivakasala ena mataveiliutaki ni iSoqosoqo ni Veivukei ena iteki ni bera ni kacivi me laki veiqaravi ena veiqaravi raraba ena Lotu.

Ena nona saga me vakayagataki gauna vakadodonu, a vidavida vakatolu na iwasewase na veika bibi—“me caka” “me na caka,” kei na “ka talei me caka.” Ena iwasewase “me caka” sa biuta kina o koya na masu yadua, vulici ni ivolanikalou, curu ena valetabu, kei na matavuvale. “Au se bera mada ni raica e dua na yalewa me sega ni levu cake na ka me na vakayacora mai na kena e rawata rawa,” e kaya o koya, ia na veivakaliuci ena “tagutuva na yalo cala. Au kurabui niu rawa ni cakava e vuqa na ‘ka talei me caka’.”

Sa vakalougatataki koya na Turaga ena veivakasala me baleta na nona itavi me budra na gone e tiko vakayawa, oka kina me dauwiliwili vei ira na makubuna ena talevoni.

“Sa dua na ka na noqu dau taleitaka tu na iSoqosoqo ni Veivukei. Ena veiyabaki au se qai vakamau walega kina ka rau lesi tu kina vakayawa o irau na noqu itubutubu, era a ‘tinaqu’ o ira na lewe ni iSoqosoqo ni Veivukei. Me vaka niu dau veilakoyaki e veiyasai vuravura, sa dua na ka na noqu dau lomana ka qoroi ira dina na marama lewe ni Lotu. Oqo e dua na veivakalougatataki meu na vakatabakiduataka na noqu cakacaka ena veiqaravi ni iSoqsoqo ni Veivukei.”