Elder Erich W. Kopischke
Ena Vitusagavulu

Kevaka e dua beka na ka sa vakadinadinataka rawa o Elder Erich Willi Kopischke, oya ni Turaga sa kila vakavinaka na veika sa uasivi me nona e dua na tamata.

E nanuma lesu o koya na gauna a rarawa kina vakalailai ni sa kacivi me laki kaulotu tudei ena nona vanua o Jamani. “Au a vinakata toka meu vulica e dua na vosa vou,” a kaya o koya. Ia sa laki yaco me taleitaka sara na nona vakavulici ira na kai nona. Kei na gauna sa kacivi kina me laki sekeriteri ena valenivolavola ni kaulotu me ciwa na vula, sa gadrevi kina me na vulica na vosa Vakavalagi.

Sa qai kidava rawa kina o Elder Kopischke ni nona ilesilesi sa tuvanaka oti tu vua na Turaga, baleta ni a vakarautaki kina o koya.

“Sa kila vakavinaka tu na Turaga na ilesilesi ni nomu bula—oya na noqu ivakadinadina bula cecere,” e kaya o koya. “e kila vinaka tu o Koya na veika ko na sotava.”

E a sucu o Elder Kopischke ena ika 20 ni Okotova ni 1956, e Elmshorn mai Germany, ka a susugi mai vei rau na itubutubu Yalododonu Edaidai oya o Helga Haupt Kopischke kei Kurt Kopischke.

E rawata o Elder Kopischke na nona koroi ni bisinisi. Ni oti na nona kaulotu e laki curu ena mataivalu ni bera ni tomana tale na nona vuli tara. Ena gauna oqo rau a qai sota kina kei koya me watina o Christiane Glück, ka a vuli nasi tiko. Rau a vakamau ena Valetabu e Bern Switzerland ena ika 19 ni Tiseba, 1978, ka vitu na luvedrau.

E cakacaka taumada ena kabani ni inisua ni bera ni l aki taura e dua na cakacaka ena Vakarau ni Vuli ena Lotu (CES) ena 1996, na vanua a laki taura kina na itutu ni dairekita ni iWasewase kei Iurope e Loma ena 2000.

Ena 2003 e a kacivi me peresitedi ni tabana ni kaulotu e Berlin, e dua na sotavi ni bula e rau taleitaka vakaveiwatini.

Ni bera ni kacivi me lewe ni iMatai ni Kuoramu ni Vitusagavulu, sa taura oti mai o Elder Kopischke na itutu ni daunivakasala ni bisopi, lewe ni matabose e cake ena iteki, peresitedi ni tikina, peresitedi ni iteki, peresitedi ni kaulotu, Vitusagavulu ni iWasewase, ka iKarua ni Daunivakasala ena iWasewase e Loma kei Iurope.