Na Kaukauwa Veivakamamautaki ni Sere

Elder Jay E. Jensen

Ena Vitusagavulu

E yaga sara vakalevu na sere ena bula vakayalo, ivakatakila, kei na saumaki.

Na matasere totoka oqo e solia na ivunau veivakauqeti. E ka dina oqo, “eso na ivunau cecere era vunautaki ena laga sere.”¹ Na noqu ivakadinadina kei na vuni saumaki ki na kosipeli vakalesuimai era a vakayarayarataki vakalevu ena lagati ni sere kei Saioni niu se gonetagane lailai. Au a tubu cake ena tauni lailai mai Mapleton, Utah, ka dau lako ki na soqoni ena vanua ka vakatokai edaidai me na “valenilotu makawa vulavula.” E se tikoga mai Mapleton na tinaqu yabaki 95. Niu sikovi koya, au dau draiva sivita na “valenilotu makawa vulavula,” ka levu na vakasama talei au vakanananutaka mai. Eso vei ira ka tu kina na kaukauwa me da saumaki kina, sai koya na sere keimami dau laga ena matabete, Matawilivola ni Sigatabu, kei na lotu ni sakaramede. Na ka au sotava e tautauvata kei Peresitedi Hinckley ni a se dikoni, ena nona a tiko ena dua na soqoni ni matabete kei tamana. Era lagata “Me Sa Dokai O Koya.”² Ni oti e dau tukuna, “E yaco mai vei au e dua na veivakadeitaki tudei ni ko Josefa Simici e a parofita dina ni Kalou.”³ Au vakabauta ni levu vei ira na noda Yalododonu era sotava oqo e veigauna. E yaga sara vakalevu na sere ena bula vakayalo, ivakatakila, kei na saumaki.

E Sureta Na Yalotabu Na Sere

Na sere era “yaga sara ena soqoni ni lotu. [Era] sureta na Yalo ni Turaga.”⁴ E dau totolo sara na nodra vakayacora oqo mai na veika tale eso. E tukuna ko Peresitedi J. Reuben Clark Jr., “Vakavo ga na masu eda voleka yani vua na Turaga ena sere mai na dua tale na ka.”⁵

Ena nodrau vakavulica tiko e dua na veiwatini qase ena nodrau vuvale mai Peru e rua na daukaulotu e rau a tarovi koso ni yaco mai na luvedrau tagane na veiwatini, watina kei tolu na luvedrau. E rau vakamacalataki rau na daukaulotu kei na ka e rau vakayacora tiko. E kilakasamitaki rau vakaca na daukaulotu na luvedrau tagane, ka qai yaco kina edua na gauna veilecayaki. E masu lo na itokani gone, “Tamada Vakalomalagi, na cava me keirau vakayacora?” E lako mai na veivakadeitaki me rau laga sere. E rau laga “Au Luve ni Kalou.”⁶ E tarai iratou na matavuvale e lewe lima oqo na Yalotabu. Eratou a lewe ni lotu taucoko na lewe vitu, ka sega ni rua walega e curuvou, e ratou a vakayarayarataki taumada ena dua na sere.

E dodonu me vakarautaka e dua na yalo ni sokalou, vakatakila, kei na ivakadinadina na sere ena soqoni ni Lotu kei na kalasi. E nodratou itavi na matabisopi se mataveiliutaki ni tabana me ratou digitaka se vakadonuya na sere, ena lotu ni sakaramede. E dodonu me ratou raica me ka tabu, ka vakaturaga na sere, qaqana kei na iyaya ni vakatagi, ka me vakatubura na yalo ni sokalou kei na vakatakila. Na sere e na ka tu ga ni vakatasuasua, ke dokai ga ena kena irogorogo. Ena vica na yabaki sa oti, e a noqu itavi na sere ena dua na soqoni, ka yaco me vakatasuasua e dua na sere lagati vakailawalawa. E a sega saraga ni taleitaki. Ka ni a vakayalia na yalo ni sokalou.

E Sureta na iVakatakila na Sere

Na sere “e bulia e dua na yalo ni vakarokoroko vakalotu.”⁷ Na vosa vakarokoroko vakalotu kei na vakatakila e rau vaka na drua ka rau taleitaka na nodrau veimaliwai. Ni ra dau sureti na Vitusagavulu kei na Matabisopi Vakatulewa kina dua na soqoni vata kei iratou na Mataveiliutaki Taumada kei iratou na LeTinikarua, e dau vakadreti veikeimami me keimami dau curu taudonu ka vakarorogo ena vakarokoroko kina sere ni bera na tekivu. Ena sureta na ivakatakila ka veivakarautaki kina soqoni na vakayacori ni ka oqo.

E vakavulica ko Peresitedi Packer ni na veisautaka na noda vakanananu ka vakavuna meda vakasamataka na qaqa ni sere, ka na vakatavulica veikeda na veika kecega ni matanitu na nona dau vakatagitaka vakamalua e dua na lewe ni lotu “na sere mai na ivola ni sere ni lotu ni bera na tekivu. Keda vakarogoci ira vinaka, era vakavulica tiko na kosipeli, ka ni ra ka dina, ka lesoni ni ivunau na sere ni Veivakalesuimai!”⁸

E Sureta Na Yalo Ni Saumaki Na Sere

Na sere ni Veivakalesuimai e kauta voli na yalo ni saumaki. Era yaco mai ena noda solibula. Na sere me vaka na “Me Sa Dokai O Koya,”⁹ “Dou Gole Mai,”¹⁰ “Ye Elders of Israel,”¹¹ “Keitou Vuabale,”¹² “Na iVakabula Kei Isireli,”¹³ kei na levu tale ka ra vakadeitaka mai na veidina lelevu ni Veivakalesuimai—me vaka na nodrau ilesilesi vakalou na Tamada kei na Luvena, na sala meda bula kina, na ivakatakila, ivola ni kalou edaidai, na vakasoqoni vata nei Isireli, na matabete tabu, kei na cakacaka tabu kei na veiyalayalati. O ira na sere dauveivakamamautaki vakaoqo era bucina e dua na draki ka sureta na Yalotabu, me ra tuberi keda meda saumaki.

Era na vakatikina ka lala na soqoni ni sakaramede ke sega na sere ni sokalou.¹⁴ Vei ira na veisere kece sai ira ka vakalou duadua sai ira era vakaraitaka na solibula kei na vakadavei ni dra nei Jisu Karisito kei na Nona Veisorovaki vakalou

Na noqu veivakanananu vakagone me baleta na nona kaukauwa ni veivakabulai na iVakabula era salavata mai kei na veisere ni sakaramede. Na iyatu vosa oqo e dina vei au: “Loloma i Jisu au tu kau qoroya ga, au kurabui nona dau karoni au.”¹⁵

E salavata kei na sere na noqu kila vakaivunau na Veisorovaki. Na qaqana oqo e vakaraitaka:

E lagilagi, wai talei, 
Na inaki tabu qo,
Loloma, dina talega
Duavata vakalou!16

Na Vakavulici Ni Sere Vei Ira Na Gone E Tekivu E Vale

Na laga sere kei na vakarorogo kina sere e kilikili e tekivutaki mai vale. E ratou taleva vakaoqo vei keda na Mataveiliutaki Taumada:

“E dodonu mera vakasinaita na nodra vuvale na Yalododonu Edaidai ena rogorogo ni sere kilikili.

“… Keitou nuitaka ni na tiko ena vanua laurai levu ena noda veivale na ivola ni sere vata kei na ivolanikalou kei na veivola ni lotu tale eso. E rawa ni kauta mai kina matavuvale e dua na yalo totoka ka veivakacegui na sere, ka rawa ni vakauqeta na loloma kei na duavata vei ira na lewe ni matavuvale.

“Vakavulici ira na gone mera taleitaka na sere. Lagati ira ena Sigatabu, ena lotu [vakamatavuvale], ena vuli ivolanikalou, ena gauna ni masu. Laga sere ni ko cakacaka tiko, ni ko qito tiko ka vakakina ni dou lako vata tiko. Laga serenilotu me ra ivakamoce me tara cake na vakabauta kei na ivakadinadina vei ira na nomudou lalai.”¹⁷

Me Vakaibalebale Vakalevu Cake Na Nomu Sokalou ena Sere

Na veilesoni bibi au sa vulica rawa ka tovolea meu vakayacora me baleta na sere sai koya:

Mo saga mo dau totolo kina soqoni, dabe vakanomodi, ka vakarorogo kina sere ni bera na tekivu, ka vakila na yalovakarokoroko kei na ivakatakila.
Biuta na soqoni ena yalovakarokoroko e vakalevu cake, ka vakatara na ivakatagi isogo ni soqoni me vakateteya yani na yalo mai na soqoni.
Laga sere. Au raica eso e tu na nodra ivolanisere ia era sega ni dau lagasere.
Digia na sere e salavata kei na soqoni kei na itukutuku.
Vakayagataka na sere me vakamacalataka se vakabibitaka na ivolanikalou kei na dina ni kosipeli ena lesoni kei na kalasi.
Vakarorogo vakawasoma kina sere ena noda vuvale, ka sureta na veivakayarayarataki ni Yalotabu.

Au masulaka ni da na biuta tani na sere e tawakilikili mai na noda bula ka vakamuria na nodratou ivakasala na Mataveiliutaki Taumada: “Kemuni na taciqu kei na ganequ, me da vakayagataka na sere meda sureta kina na Yalo ni Turaga kina noda veisoqoni, na noda vuvale, kei na noda bula vakaikeda. Meda cavuqaqataki ira ka tugani ira, wiligusutaka ka lagata, ka vakaivotavota ena nodra veivakamamautaki vakayalo. Kila deivaki tiko ni nodra sere na yalododonu e masu vua na Tamada Vakalomalagi, ‘ka na saumi ena veivakalougatataki ena [ulumu] uludra.’”¹⁸Au vakadinadinataka na veika dina oqo ena yaca i Jisu Karisito, emeni.