Elder Michael J. Teh
Ena Vitusagavulu

Kivei Elder Michael John Teh, sa ka bibi talega na ilakolako me vakataka na kena icavacava—vakabibi na itosotoso ena bula oqo. E kaya o Elder Teh ni nona kacivi me daukaulotu tudei ena 1986 a veisautaka kina vakadua na nona itosotoso ni bula oqo baleta ni a vaqaqacotaka na nona ivakadinadina ni kosipeli.

“E a veisautaka vakadua na noqu bula na noqu kaulotu oya. Sa qai dua dina na veivakalougatataki totoka oya,” a kaya o koya. “Au a kila kina na Tamaqu mai Lomalagi kei na Luvena, o Jisu Karisito. Au a kila kina ni’u rawa ni masu vei Tamaqu mai Lomalagi ka vosa Vua. Oya e dua dina na ivurevure cecere ni vakacegu vei au”

E kaya o Elder Teh ni o ira era sotava na gaunisala veimedreyaki ena nodra bula era na gadreva kina e dua na nodra ivakadinadina, ka na vukei ira me ra muria donu tiko na salatu dodonu.

“Na Tamada Vakalomalagi ena vakatakila vei iko na ka dina ni ko vakasaqara ena masumasu na nomu ivakadinadina,” e kaya o koya. “Sa qai dua na ka kamikamica me da kila vakaidina vakai keda ka rawa me da vakadinadinataka ena yalonuidei na veika dina.”

E a sucu o Elder Teh maivei rau o Martin kei Norma Teh ena ika 25 ni June, 1965, e Davao City, Davao Del Sur, mai Filipaini. E ratou a toki ka laki vakaitikotiko na nona matavuvale e Manila ni se qai yabaki 12 kina, ia a lesu tale ki na nona vanua ni oti na nona veiqaravi mai na Tabana ni Kaulotu e Philippines Davao.

Ni oti na nona kaulotu a rawata o Elder Teh na nona koroi ni veiqaravi vakabisinisi mai na De La Salle Univesiti e Manila. Sa oti oqo e va na yabaki ena nona cakacaka tiko vaka rekoda ena Valetabu e Manila Philippines, ka a vakamau kina kei Grace May Weedon ena ika 16 ni Tiseba, 1989. E rau itubutubu ni lewe tolu na gone.

Sa vakavinavinakataka kina vakalevu o Elder Teh na veigauna kece sara ni nona veimaliwai vata kei ira na iliuliu ni Lotu. E a veiqaravi talega vaka bisopi, daunivakasala nei peresitedi ni iteki, lewe ni matabose e cake, ka daunivakasala nei peresitedi ni kaulotu. Ena gauna a kacivi kina me lewe ni iMatai ni Kuoramu ni Vitusagavulu, a taura tiko kina na itutu ni iKarua ni Daunivakasala ena Mataveiliutaki ena iWasewase o Filipaini.