Elder Octaviano Tenorio
Ena Vitusagavulu

E kila tu o Elder Octaviano Tenorio Domínguez ni kena ciqomi na cakacakatabu vakalotu ni valetabu e veisautaka na bula ni tamata. A veisautaka na nona bula, ka sa raica talega o koya ni sa veisautaki kina na nodra bula e so tale’. “Mo ni curuma tikoga na valetabu,” e a nona vakamamasu .

E a sucu o koya ena ika 31 ni Okotova, 1942, kivei rau o Octaviano Tenorio kei Flora Domínguez de Tenorio mai Tilapan, Veracruz e Mexico, ka a lewena na Lotu ni oti na nodratou toki na nona matavuvale ki Rio Bravo ena vualiku kei Mexico.

Ni oti na nona taura na nona setivikiti vakadaunifika kei na bisinisi, a sotavi Rosa Elva Valenzuela González mai Mexico City, na vanua rau sa vakaitikotiko kina e nikua. Rau a vauci vata ena ika 4 ni Janueri, 1974, ena Valetabu e Mesa Arizona ka rau itubutubu ni lima na gone.

Ni se qai tekivu cakacaka, a sureti o Elder Tenorio me mai taura e dua na itutu vaka- manidia ni Valenivolavola ni Lotu ni Qaravi ni Tuva Kawa e Mexico. Me baleta ga ni sa cakacaka vinaka toka ena kabani ni tabaivola, a sega sara ni vakadeitaki koya rawa ena itutu vou oya. Ia ni mai sotava e vica na veivakauqeti e so, sa kila kina o koya ni sa ikoya oya na cakacaka me na taura.

“E a veisautaka sara ga na ituvatuva ni noqu bula,” a kaya. E kauti au ki na dua na bula e umani kina na tuva kawa ni matavuvale kei na cakacaka ni valetabu.

Ni sa oti e vitu na yabaki ena cakacaka oya, ka sa peresitedi ni iteki tiko kina, e a kacivi me isevu ni rekoda ena Valetabu e Mexico City ka dauveivauci talega. A biuta mai na valetabu me laki vakatulewa ena Tabana ni Kaulotu e Mexico Tuxtla Gutierrez. A laki liutaka talega na Tabana ni iVolatukutuku ni Lewenilotu, Qaravi ni iYaya, kei na Veiqaravi ni Welefea ena iwasewase, ena gauna oqori a mata tiko ni iwasewase levu ka yaco me laki dua na Vitusagavulu ni iWasewase.

E muri a laki rekoda tale o Elder Tenorio ena Valetabu e Mexico City ni sa mai cegu ena cakacaka o koya e a sosomitaki koya.

“Sa dua na tiki levu ni noqu bula na valetabu,” e kaya o koya, ka sa rarawataka tiko na gauna me sa na vakacegu kina mai na cakacaka, e dina ga ni taleitaka na madigi ni nona veiqaravi e umani tu ena nona veikacivi ki na iMatai ni Kuoramu ni Vitusagavulu. “Au sa vakabauta dina ni cakacakatabu vakalotu ena kauta mai na vakacegu dina.”