Mary N. Cook
iKarua ni Daunivakasala ena Mataveiliutaki Raraba ni Goneyalewa

Mo vakararavi vei Jiova ena vu ni yalomu“ (Vakaibalebale 3:5) sa dua na veidusimaki dina vei Mary Nielsen Cook, ikarua ni daunivakasala ena mataveiliutaki raraba ni Goneyalewa.

E a sucu mai Midvale e Utah, ena ika 8 ni June, 1951, ka sa vulica mai o Sister Cook me vakararavi vua na Turaga mai na nodrau ivakaraitaki na nona itubutubu, o Kenneth N. kei Fern S. Nielsen. Ni se gonelailai o Sister Cook sa dau tauvimate bibi tiko mai kina o tamana ena vuku ni dua na vakacala ka ena qara ni kelikeli. Ena dua na gauna, sa veiqaravi duadua sara tikoga o tinana me bula kina na matavuvale. Oya e dua na gauna ni veivakatovolei.

Ni sa goneyalewa a tatadrataka tu me na vakamau ka marama tina ia a sega tu ni mai vakamau ena vica vata na yabaki. “E so na gauna au sa dau vakasamataka tu ke sa na yaco dina na veika au tadra,” e kaya vakaoqori o Sister Cook. “Ia au sa dau saga meu vakabauta tiko ka raica matua tiko na veivakalougatataki sa yaco vei au.”

Ena gauna oqo a rawata kina na nona koroi kei na koroi ni vuku ni vakadikevi ni mate ni yago kei na rorogo vata kei na koroi ni EdS (Education Specialist) mai na Brigham Young Univesiti. E a qai laki cakacaka me qasenivuli ni vuli digitaki ka laki iliuliu veiqaravi ni koronivuli.

Ena ika 16 ni Julai, 1988, a vakamau ena Valetabu e Salt Lake vata kei Richard E. Cook, e muri a qai laki lewe ni iKarua ni Kuoramu ni Vitusagavulu. Ena gauna oya, e kaya kina o Sister Cook ni “sa mai vakalougatataki ena va na gone totoka ka laki budra e lewe walu na gone,” me vaka sa yali yani na imatai ni wati Elder Cook ena 1984. Sa mai 17 oqo na makubudrau.

Ena gauna rau a kaulotu tudei tiko kina o Elder kei Sister Cook mai Mongolia, a kacivi o turaga watina me laki vakatulewa ena tabana ni kaulotu vou Mongolia. Ni oti oya a tomani turaga watina ki Hong Kong, na vanua a laki veiqaravi kina ena Mataveiliutaki ni iWasewase e Asia. A veiqaravi talega o koya vaka- peresitedi ni iSoqosoqo ni Veivukei ka vakakina ena matabose raraba ni Goneyalewa.

Sa vakavinavinakataka vakalevu o Sister Cook na veika sa mai sotava rawa ka sa vakadinadinataka “ni veitalia ga na roka ni veivakatovolei eda sotava ena noda bula, kevaka me da vakararavi ga vua na Turaga, ena dusimaka o Koya na noda sala.”