O Ira na Parofita—Painia kei Ira ena Gauna Oqo

Elder Earl C. Tingey

Ena Mataveiliutaki ni Vitusagavulu

O Peresitedi Brigham Young vata kei Peresitedi Gordon B. Hinckley e rau parofita ka liutaka na Lotu oqo ena veivakauqeti vakalou kei na ivakatakila.

Kemuni na taciqu kei na ganequ, niu mai tucake tu ena itutu ni vunau ni Valenilotu makawa ka sa vakavoutaki oqo, e luvuci sara vakalevu na yaloqu niu vakasamataka tu oqo na veika makawa. Niu nanuma lesu na veika sa sivi yani kau rai yani ki liu, au sa vakavinavinakataki ira kina na parofita kei na iapositolo, painia kei ira ena gauna oqo ena vuku ni nodra rai yawa taumada kei na kena ena gauna oqo me ra tara ka vakavoutaka rawa kina ki na siga nikua na vale totoka dina oqo.

Au gadreva meu tukuna mada eke e rua na turaga me baleta na nodrau rai yawa vakaoqo: Oya o Brigham Young kei na kena isosomi edaidai.

E a ikarua ni parofita ni Lotu i Jisu Karisito ni Yalododonu Edaidai o Brigham Young. E a liutaka na Lotu ena 33 na yabaki. E a tara o koya na Valenilotu levu oqo ka a vakatulewa ena gauna a vakatabui kina ena gauna ni koniferedi raraba ni Okotova 1875, ka sa sivi yani oqo e 131 vakacaca na yabaki.

E a vuqa sara na nona rawa ka lelevu, kau na tukuna ga eke e vica vei ira.

E a painia o koya, e kena ibalebale e dua na ka a tadolava se vakarautaka na salatu kivei ira na tamata era na muri mai. E dua a vola vakaoqo me baleti Brigham Young: “E a veiliutaki vei ira era a itovo vakatani ka tamata dravudravua, e a kautani mai vei ira na nodra iyau kece sara, ki na dua na vanua tawakilai. Era mani raica rawa kina o ira na itokani kei na dauvolaivola ni tamata duatani sara me vakataki ira na iliuliu ena itukutuku ni veigauna oqo, ni o koya duadua ga, ka sega ni tokoni koya e dua na veika vakapolitiki se vakailavo, ka tauyavutaka sara ga mai na sega ena vanua dravuisiga e dua na itikotiko vakatamata vakalawataki ka daucakacaka, ka sega vua na kaukauwa ia na kaukauwa ga ni matabete ka vakayalo ka veivakavulici mai kina. Mai na nona dauveivakamasuti ka veivakasalataki vakawasoma, e vakaduavatataki ira na nona tamata ka vakauqeti ira me ra qarava na ivakaro vakalou me tarai cake na matanitu ni Kalou e vuravura.”¹

Ena imatai ni gauna a butuka yani kina o Brigham Young na buca mai Great Salt Lake, a kaya kina o koya, “Sai koya oqo na vanua.”² E muri a qai kaya:

“Sa vakatakila vei au na Turaga, ni sai koya oqo na vanua meu na vakatikori ira kina na tamata, ni sai koya oqo na vanua era na bula vinaka kina; ena vakavinakataka o koya na draki ena vukudra na Yalododonu; ena vunauca o koya na batabata kei na qele sa matemate, ka yaco me na vuavuai vinaka na qele, … ka na keimami tara e dua na korolevu kei na dua na valetabu ena vanua oqo kivua na Kalou sa cecere sara.”³

Nikua, eda sa mai vakadinadinataka tu oqo na dina ni parofisai oya. Sa dina sara, sa mai yaco na vanua dravuisiga kei na buca o Rocky Mountains me dua na vanua vuavuai vinaka ka sautu ni dua na iyalayala kei na parofisai.

E a tara o koya na veivaletabu e so. A tauyavutaka o koya na Valetabu mai Salt Lake, ka taura e 40 na yabaki me qai vakacavari kina. A tauyavutaka talega o koya na Valetabu mai Manti kei na kena e Logan. A vakatabuya o koya na Valetabu mai St. George ni se vo toka e 4 1/2 na vula me qai mate kina.

E a dua vei ira na turaga ni vanua qaqa kei Amerika. Ena gauna sa mai mate kina o koya, sa tauyavutaki rawa kina e 400 na vanua tauyavu.

E a tauyavutaka na iLavo Vure ni Biu Vanua mera vukei kina o ira era vakaleqai tu, me ra vukei kina o ira era dravudravua era biu vanua mai Iurope.

E a tauyavutaka na veiunivesiti e so. Oya na Univesiti ni Deseret ka sa kilai tu edai me Univesiti ni Utah. Na Latter-day Saints’ College sa yacana tu oqo na LDS Business College. Ia, a tauyavutaka talega na Brigham Young Univesiti.

E lomana o koya na Lotu kei ira na lewena. E rogorogo talei na ka e tukuna o Brigham Young me baleta na Lotu:

“Sa veiliutaki tiko kina na Kalou. Sai koya oqo na waqa cecere kei Saioni. Mo vodo tikoga kina ka mo rokova, ka raica mo caka vinaka tiko ena kena Lotu ka mo kakua ni leqataka tale e dua na ka… .

“… E dusimaka tiko o koya na waqa oqo, ka na kauti keda bula yani ki na kena toba. Na ka ga meda cakava oya me da dui qarauna na noda bula ka raica me da caka dodonu tikoga. Me da vakayacora na noda itavi ena dodonu kei na yaloqaqa, na tamata yadua me na yalodina tiko ka tudei ena nona ilesilesi, ka na yaco me vorata rawa yani na waqa oqo na cagilaba kecega, ka kauti keda bula yani ki na toba ni marau dina vakasilesitieli.”⁴

E lomani ira na itabagone ena Lotu, ka kena ivakadinadina na veika a sotava o Heber J. Grant. Ni oti e ciwa na siga ena nona a sucu o Heber, a mate kina o tamana, o Jedediah M. Grant, na iKarua ni Daunivakasala nei Peresitedi Brigham Young. Ena 21 na yabaki e tarava, sa malele o Brigham Young ki na cauravou o Heber J. Grant.

A vola vakaoqo o Heber J. Grant:

“Sa vaka meu taukei dina ena vuvale nei Peresitedi Brigham Young me vaka ga niu tiko voli kei tinaqu mai neitou. Ena dua na vale … kevaka au sa via kana au sa rawa ni lako ga kina ka kerea meu kana me vaka ga e noqu vale dina … sa noqu bula mai niu se gone ka laki cauravou sara meu dau tekiduru ka masu vata kei na matavuvale ena nona vale mai Lion House.”⁵

E lomana na Parofita Josefa Simici. Ena ka oqo, a kaya kina:

“Na veika kece sara au sa rawata mai vua na Turaga, sa solia mai vei au o Josefa Simici.”⁶

“Au taleitaka na nona ivakavuvuli… . au vinakata sara ga meu vaka Aleluya, ena veigauna, ni’u nanuma niu sa kilai Josefa Simici ena gauna taucoko oqo.”⁷

Sa dua na ka na noqu lomani Brigham Young. Na kena isosomi ena gauna oqo oya o Peresitedi Gordon B. Hinckley, sa dua talega na parofita lomani ka dokai vakalou.

E dua tiko na droini totoka kei Peresitedi Hinckley ni rai vakayawa toka ki na veisiga sa bera mai, kei na vica na droini ni taratara ni vale e toka e liu vua. E toka mai dakuna e dua na droini kei Brigham Young, ka vakatoka me raica sobu toka yani o Peresitedi Young na tabai Peresitedi Hinckley.

Na itaba kei Brigham Young ka vakaraitaki toka ena droini oqo e lili dina tiko ena valenivolavola nei Peresitedi Hinckley, ka dau talanoataka vakalevu o koya. Ena dua na koniferedi raraba se qai oti toka ga oqo, a kaya kina o koya:

“Ni sa vakarau cava e dua na siga osooso ni cakacaka, au a digova cake e dua na kena itaba o Brigham Young e kabi toka ena noqu lalaga. Au a taroga, ‘Brother Brigham, na cava beka me da cakava?’ E vaka e matadredredre mai vakalailai o koya, ka vaka me kaya mai: ‘Ena noqu gauna, sa rauti au vinaka na noqu leqaleqa. Kakua ni tarogi au ena veika me caka. Oqo na nomu gauna ni ilesilesi. Taroga vua na Turaga, na cakacaka dina beka nei cei oqo.’”⁸

O irau na parofita cecere oqo, oya o Peresitedi Brigham Young kei Peresitedi Gordon B. Hinckley, e duavata na nodrau rai yawa vakaparofita ki na veika sa tu mai liu kei na nodrau vakabauta ena kena yaco vakaidina ena gauna oqo na veika sa vakatakilai mai oya.

E dua dina na painia ka mataisau o Peresitedi Hinckley, me vakataki Brigham Young ga. Sa lakovi vuravura taucoko, ka sotavi ira na tui, ranadi, kei na veiperesitedi. Sa vakatarogi oti mai vei ira na dauvolaitukutuku kei vuravura. Sa tomana tikoga na nona “kauta tani mai na vanua butobuto”⁹ na Lotu. Sa tara oti e sivia e 75 na valetabu ena loma ni 12 na yabaki sa oti. E a vakauqeti vakayalo vakakina me tara na Vale ni Koniferedi cecere.

Me vakataki Brigham Young, sa vakatetea talega vakakina o Peresitedi Hinckley na kosipeli ka rokova vakalevu na vuli ka. Sa yacova mai oqo na 13 na milioni na iwiliwili ni lewenilotu ena 176 na veivanua, iyalayala, kei na matanitu. Era sa kaulotu tiko e sivia e 53,000 na daukaulotu ena veiyasai vuravura taucoko. E sa vakadewataki tiko na koniferedi oqo ena 90 na mataqali vosa. E sa tomana tikoga na nona tokoni ira na veiunivesiti ni Lotu kei na vuli ni Lotu. E sivia e 26,000 na lewenilotu era sa qaravi oti mai na iLavo Vure ni Vuli.

Me vakataki Brigham Young, e dau lomani ira na itabagone o Peresitedi Hinckley kei ira kece sara na lewe ni Lotu. Era dau nanamaki na itabagone ena Lotu kivei Peresitedi Hinckley me ra vakasalataki vakaparofita mai vua.

E lomana o Peresitedi Hinckley na Parofita o Josefa Simici. Ena vica na yabaki sa oti, a kaya kina vakaoqo:

“Au qarava ga na Kalou mai lomalagi sai koya na Tamaqu Tawamudu. Au qarava ga na Turaga o Jisu Karisito sai koya na noqu iVakabula ka noqu Dauveivueti. Au sega ni qaravi Parofita Josefa Simici, ia au dokai koya ka lomana na daurairai cecere oqo ka vakalesuimai vua na cakamana ni kosipeli oqo. Au sa qase sara, kau sa kila deivaki tu ena ilakolako ni bula vakayago oqo ni bera ni yacova e vuqa na yabaki, au na mate yani, meu na laki tu e matai Koya ka a buli au ka sa noqu Turaga ka solia na kequ itukutuku ni bula oqo. Au sa nuitaka tiko meu na laki sotavi ka mokoti Parofita Josefa Simici ka vakavinavinaka vua ka vakaraitaka vua niu sa lomani koya dina.”¹⁰

Sa noqu ivakadinadina malumalumu oqo niu sa kila ni o Peresitedi Brigham Young vata kei Peresitedi Gordon B. Hinckley e rau parofita ka liutaka na Lotu oqo ena veivakauqeti vakalou kei na ivakatakila. Ena yaca i Jisu Karisito, emeni.