Usa ka Pagdapit ngadto sa Batan-ong mga Babaye
Elaine S. Dalton (tunga), presidente; Mary N. Cook (wala), unang magtatambag; ug Ann M. Dibb, ikaduhang magtatambag.
Ang pagka “ehemplo sa mga nanagtuo” dili sayon. Mogahin kini og inadlaw nga paningkamot sa paghinumdom kon kinsa kita ug unsa ang gibuhat sa mga nanagtuo. Gusto namo nga dapiton kamo sa pagbuhat og tulo ka mga butang matag adlaw nga makahatag kaninyo og kalig-on ug makatabang kaninyo nga mahimong usa ka ehemplo sa inyong pamilya ug mga higala. Isip kapangulohan, naghimo kami niini nga mga butang—100 ka porsyento sa panahon. Uyon ba kamo nga mouban kanamo?
Una, pag-ampo matag adlaw.
Ikaduha, pagbasa sa Basahon ni Mormon matag adlaw sa dili moubos sa lima ka minutos.
Ikatulo, pahiyom matag adlaw.
Nagdapit kami kaninyo sa pagpahiyom tungod kay kamo ania sa yuta niining dili katuohan nga panahon sa diha nga ang ebanghelyo ni Jesukristo gipahiuli. Kamo gitudloan sa usa ka propeta sa Dios nga ang maayo nga mga tawo sa kalibutan makabig nganha kaninyo kutob nga kamo “makita isip usa ka talagsaon ug lahi—sa malipayon nga mga paagi.”1
Hunahunaa kon unsa ang mahitabo kon kaliboan sa batan-ong mga babaye nga sama sa inyong kaugalingon mobuhat niining tulo ka mga butang matag adlaw!
Daghan sa malungtaron nga mga kalampusan sa kinabuhi gitukod diha sa usa ka pundasyon sa makanunayong paghimo og gagmay nga mga butang sulod sa dugay nga panahon. Kining tulo ka mga butang gagmay ug yano, apan hinumdumi, “pinaagi sa gagmay og yano nga mga butang nga ang mga dagko nga mga butang ipahinabo” (Alma 37:6). Nasayud kami nga kamo makakaplag sa mga panalangin sa pagbuhat niining tulo ka mga butang kada adlaw. Ug kon makalimot kamo og usa ka adlaw, kamo makasugod pag-usab pagka sunod adlaw.
Kami mopamatuod nga kon kamo mag-ampo, magbasa sa Basahon ni Mormon, ug mopahiyom kada adlaw, kamo mapanalanginan tungod sa inyong mga paningkamot ug kamo mahimo nga ehemplo ngadto sa mga nanagtuo—ang usa ka batan-ong babaye kinsa makahimo sa paghimo og kalainan diha sa kalibutan.