Ang Labing Magamit nga Piraso sa Kahibalo
Gikan sa pakigpulong sa debosyonal sa Unibersidad sa Brigham Young–Idaho nga gihatag niadtong Hunyo 8, 2004. Alang sa kompleto nga teksto sa pakigpulong sa Iningles, bisitaha ang www.byui.edu/Presentations/transcripts/devotionals/2004_06_08_christensen.htm.
Pipila sa inyo nga sinati sa Unibersidad sa Oxford mahimong makahibalo nga kini mao ang labing karaan nga unibersidad sa kalibutan. Ang bilding nga akong gipuy-an isip usa ka estudyante gitukod niadtong 1410—nindot nga tan-awon, dili komportable nga puy-an. Sa dihang ako miabut sa Oxford, ako nakaamgo nga kini mahimong lisud nga mahimong aktibo nga miyembro sa Simbahan. Ang Rhodes Scholarship Trust, nga naghatag kanako sa scholarship, adunay daghan kaayong mga kalihokan alang sa mga nagdawat niini nga scholarship.
Samtang ako nagtan-aw sa kadak-on nga ako buot nga maapil sa simbahan, ako nakaamgo nga ako wala masayud nga ang Basahon ni Mormon tinuod. Nabasa ko kini sa daghang higayon apan sa kasagaran isip usa ka buluhaton—gikan sa akong mga ginikanan o sa usa ka magtutudlo sa Unibersidad sa Brigham Young. Apan niining panahona ako nagkinahanglan gayud kaayo nga masayud kon ang Basahon ni Mormon tinuod. Busa ako mihukom nga ako mosaad nga kada gabii gikan sa alas 11:00 hangtud sa alas 12:00 nga magbasa sa Basahon ni Mormon aron sa pagkasayud kon kini tinuod ba.
Nagduda ako kon ako makaako ba sa paggahin niana ka daghan nga oras tungod kay ako anaa sa usa ka labing mapugsanon nga programa sa akademya, nagtuon og applied econometrics. Ganahan akong mosulay nga humanon ang programa sulod sa duha ka tuig, samtang ang kadaghanan sa mga tawo niini nga programa mahuman sulod sa tulo ka tuig. Ako wala masayud kon ako makahimo ba nga mogahin og usa ka oras matag adlaw pagbasa sa Basahon ni Mormon ug sa gihapon makab-ot ang akong tumong sa akademya.
Apan bisan pa niana ako kining gibuhat. Nagsugod ako alas 11:00 pinaagi sa pagluhod nga nag-ampo duol sa gamay nga pampainit diha sa bato nga bongbong, ug kinasingkasing ako nga mag-ampo. Mitug-an ako sa Dios nga ako nagkinahanglan kaayo nga masayud kon ang Basahon ni Mormon tinuod ba. Misulti ako Kaniya nga kon Siya mopadayag ngari kanako nga kini tinuod, ako niana magtinguha nga mohalad sa akong kinabuhi ngadto sa pagtukod sa Iyang gingharian. Misulti ako Kaniya nga kon kini dili tinuod, ako kinahanglan nga masayud og siguro usab tungod kay niana akong ipahinungod ang akong kinabuhi sa pagpangita unsa ang kamatuoran.
Gibasa nako ang unang pahina sa Basahon ni Mormon. Sa dihang ako miabut sa ubos sa pahina, ako mihunong. Naghunahuna ako kabahin sa unsay akong nabasa niadto nga pahina, ug ako nangutana sa akong kaugalingon, “Mahimo ba nga kini gisulat sa usa ka tigpataka og sulti kinsa naningkamot sa paglingla sa mga tawo, o kini ba gayud gisulat sa usa ka propeta sa Dios? Ug unsa ang kahulugan niini sa akong kinabuhi?” Dayon akong gibutang sa ubos ang basahon ug miluhod diha sa pag-ampo ug nangutana sa Dios pag-usab, “Palihug sultihi ako kon tinuod ba kini nga basahon.” Dayon ako milingkod sa lingkuranan, gipunit ang basahon, mipakli sa pahina, mibasa niini, mihunong sa ubos ug mibuhat sa sama nga butang. Gibuhat ko kini sulod sa usa ka oras matag gabii, gabii human sa sunod gabii, diha nianang bugnaw, tun-ugon nga kwarto sa Oxford.
Usa ka gabii, sa dihang ako miabut na sa mga kapitulo diha sa katapusan sa 2 Nephi, ako nag-ampo, milingkod sa akong lingkuranan, ug miabli sa basahon. Sa kalit dihay miabut niana nga kwarto nga usa ka nindot, init, mahigugmaong Espiritu nga mialirong kanako ug mituhop sa akong kalag, mitabon kanako og usa ka pagbati sa gugma nga wala nako damha nga akong bation. Misugod ako sa paghilak. Samtang ako nagtan-aw lahus sa akong mga luha diha sa mga pulong sa Basahon ni Mormon, ako nakakita sa kamatuoran niadtong mga pulong nga wala gayud nako damha nga akong masabtan kaniadto. Makita nako ang mga himaya sa kahangturan, ug makita nako unsa ang giandam sa Dios alang kanako isip usa sa Iyang mga anak nga lalaki. Kadto nga Espiritu nagpabilin kanako sa tibuok oras ug matag sunod nga gabii samtang ako nag-ampo ug nagbasa sa Basahon ni Mormon diha sa akong kwarto. Kadto nga sama nga Espiritu kanunay nga mobalik, ug kini nakapausab sa akong kasingkasing ug sa akong kinabuhi hangtud sa hangtud.
Akong gihinumduman ang kasamok nga akong nasinati, naghunahuna kon ako makahimo ba nga mogahin og usa ka oras kada adlaw gawas sa akong pagtuon og applied econometrics aron sa pagpakasayud kon ang Basahon ni Mormon tinuod ba. Akong gigamit ang applied econometrics tingali kausa sa usa ka tuig, apan akong gigamit ang akong kahibalo nga ang Basahon ni Mormon mao ang pulong sa Dios sa kadaghang higayon sa matag adlaw sa akong kinabuhi. Sa tanang edukasyon nga akong nahuman, kana mao ang nag-inusarang labing magamit nga piraso sa kahibalo nga akong naangkon sukad.
Alang niadtong kinsa nagpuyo pa sa mga pagpamatuod sa uban, nagdapit ako kaninyo sa paggahin og usa ka oras kada adlaw ug pangitaa sa inyong kaugalingon mismo kon ang Basahon ni Mormon tinuod ba, tungod kay kini makapausab sa inyong kasingkasing sama nga kini nakapausab sa ako. Dayon pipila ka adlaw kamo makaadto sa dapit diin kamo nagpuyo sa panahon nga ang Dios mipadayag niini ngadto kaninyo ug motudlo niini sa inyong mga anak ug kapikas ug moingon, “Kana sagrado nga dapit tungod kay dinha ako nakakat-on nga si Jesus mao si Kristo.”
Samtang ako naningkamot sa pagpalambo sa akong calling ug sa pagpakisayud ni Jesukristo, ako makapamatuod nga ako nasayud uban sa kasigurohan nga Siya mao ang Anak sa Dios, nga Siya buhi. Ako nasayud nga may kasigurohan nga Siya nasayud ug nahigugma sa matag usa kanato.
Nagdapit ako kaninyo sa paggahin og usa ka oras kada adlaw ug pangitaa sa inyong kaugalingon mismo kon ang Basahon ni Mormon tinuod ba, tungod kay kini makapausab sa inyong kasingkasing.
Usa sa labing mahinungdanong mga butang nga kamo mahimong makakat-on samtang kamo maninguha sa inyong edukasyon mao ang pagpakisayud sa inyong kaugalingon mismo nga ang Basahon ni Mormon pulong sa Dios.
Basahon ni Mormon gilitratohan ni John Luke; sa luyo pinaagi sa Lushpix/Unlisted Images Inc.
Ibabaw: sa Litrato pinaagi ni Frank Helmrich