Ang Semana ni Ben
“Ang Ginoo mipanalangin sa adlaw nga igpapahulay, ug mibalaan niini” (Mosiah 13:19).
Gipahimutang ni Ben ang iyang bukton sa maleta nga tupad kaniya diha sa truck. Si Mama ug Papa nagdrive kaniya ngadto sa balay ni Lolo. Si Ben mopuyo uban sa iyang apohan nga lalaki sulod sa usa ka semana. Walay igsoon nga lalaki, walay igsoon nga batang babaye—si Ben ra ug si Lolo.
Si Ben nakigsulti ni Lolo mahitungod sa ilang semana nga panag-uban. Si Lolo miingon nga semana kini ni Ben ug makabuhat sila sa tanan nga paborito nga mga butang ni Ben. Si Ben mitambo sa bintana. Nahinumdom ba siya sa pag-impaki sa tanang butang? Giimpaki niya ang iyang swerte nga kalo sa pangisda, iyang mga antipara, ug ang iyang paborito nga mga libro.
“Karon, hinumdumi,” si Mama miingon diha sa atubangan nga lingkuranan, “si Lolo dili miyembro sa atong simbahan. Maayo siya nga tawo ug usa ka maayo nga apohan nga lalaki. Apan pipila ka mga butang sa iyang balay ang maingon og lahi kanimo.”
“Sama sa unsa?” Si Ben nasayud nga ang iyang apohan dili mosimba. Apan wala siya maghunahuna kon sa unsa nga paagi kana mahimo nga lahi.
“Tingali imo siya nga pahinumduman nga dili ikaw moinom og bugnaw nga tsa,” miingon si Papa.
“OK,” miingon si Ben.
“Dili ikaw makahimo sa pagsimba sa Dominggo, apan mahimo ikaw nga mobalaan sa Igpapahulay nga adlaw sa lain nga mga paagi,” miingon si Mama.
“Ako kana nga buhaton,” miingon si Ben.
Sa diha nga miabut sila sa balay ni Lolo, si Lolo naghulat kanila diha sa balkon. Si Ben ang una nga migawas sa sakyanan. “Lolo!”
“Kumusta na akong paborito nga siyete anyos?” Si Lolo migakus og maayo ni Ben. “Andam ka na ba sa imo gayud nga espesyal nga semana? Ikaw makapili kon unsay buhaton sa atong panag-uban.”
“Mahimo ba nga mangisda kita?” Nangutana si Ben. “Akong gidala ang akong swerte nga kalo sa panagat.”
“Sigurado makahimo kita,” miingon si Lolo.
“Ug makaadto ba kita sa zoo?” Nangutana si Ben. “Akong gidala ang akong antipara.”
“Sigurado makahimo kita,” miingon si Lolo.
“Ug makadungan ba kita sa pagbasa?” Nangutana si Ben. “Akong gidala ang akong paborito nga mga libro.”
“Sigurado makahimo kita,” miingon si Lolo. “Ug akong gihunahuna nga nagkinahanglan kita nga mamalit aron makapili ikaw og dulaan sa tindahan.”
“Wow,” miingon si Ben. “Mahimo gayud kini nga makalingaw kaayo nga semana!”
Sa pagka Biyernes, si Lolo ug Ben namasol.
Sa pagka Sabado, si Lolo ug si Ben nangadto sa zoo.
Sa pagka sunod adlaw, si Lolo naghimo og mga maruya alang sa pamahaw. “Karon mao ang atong adlaw sa pagpamalit,” miingon si Lolo.
“Yippee!” Misinggit si Ben. “Unsa nga matang sa dulaan akong kinahanglan kuhaon?”
Dayon si Ben nahinumdom—Dominggo karon. Unsaon nako sa pagpasabut ni Lolo mahitungod sa dili pagpamalit og Dominggo?
Human sa pamahaw si Ben nag-ampo sulod sa iyang kwarto. Mihangyo siya sa Langitnong Amahan sa pagtabang kaniya sa pagpasabut ni Lolo mahitungod sa pagbalaan sa Igpapahulay nga adlaw.
Human sa pag-ampo si Ben milingkod sa iyang katre. Si Lolo mitawag ni Ben, “Tugoti una ako nga magsul-ob sa sapatos, ug mangadto na ta.”
Si Ben miginhawa og lawom ug mibarug. Iyang nakit-an si Lolo nga nagliston sa iyang sapatos.
“Lolo, daghang salamat sa pagdala kanako sa pagpamasol ug sa pag-adto sa zoo. Apan akong gihunahuna nga karon kinahanglan nga mopahulay kita.”
“Unsay buot nimo nga ipasabut?” Nangutana si Lolo. “Akong gisaad nga dad-on ko ikaw sa pagpamalit.”
“Nasayud ako, apan sa imong hunahana makaadto ba kita sa laing adlaw?”
“Ok ka ba? Nasakit ka ba?”
“Wala, Lolo,” miingon si Ben. “Dominggo karon. Sa akong balay dili kami mopalit kong Dominggo.”
Si Lolo wala motingog.
“Mahimo ba nga dinhi lang ta sa balay karon?” Mihangyo si Ben. “Mahimo kita nga manglakaw. Mahimo kita nga magbasa og mga libro.”
Si Lolo mipahiyum kang Ben. “Sigurado nga makahimo kita,” siya miingon. “Imo gayud kini nga semana, mao nga ikaw ang magpili.”
Gigakus og maayo ni Ben si Lolo. “Nasayud ako nga kini mahimong makalingaw nga semana,” miingon si Ben.
Mga paghulagway pinaagi ni Craig Stapley