Dali Paminaw sa Tingog sa usa ka Propeta
Pagkahimo nga Sama ni Jesukristo
Gikan sa usa ka pakigpulong sa Oktubre 2005 kinatibuk-ang komperensya.
Si Presidente Uchtdorf mipasabut kon unsa ang kahulugan sa pagpalambo og sama ni Kristo nga mga hiyas.
Si Jesukristo mitudlo sa Iyang mga Apostoles diha sa pagsugod sa Iyang mortal nga pangalagad, “[Dali,] sumunod kamo kanako, ug himoon ko kamong mga mangingisdag tawo” (Mateo 4:19). Kita nagkinahanglan sa “pagsunod Kaniya,” ug samtang kita mobuhat niini, ang Manluluwas mopanalangin kanato lapas sa atong kaugalingong kasarang aron mahimo nga unsay gusto Niya kanato nga mahimo.
Ang pagsunod ni Kristo mao ang pagkahimo nga labaw pa ka sama Kaniya. Kini mao ang pagkat-on gikan sa Iyang kinaiya. Ang Manluluwas nagdapit kanato sa pagkat-on sa Iyang ebanghelyo pinaagi sa pagsunod sa Iyang mga pagtulun-an. Ang karaan ug sa karon nga mga propeta naghulagway niini uban sa tulo ka mga pulong: “Paghupot sa mga sugo,”—walay kapin, walay kulang.
Ang mga kasulatan naghulagway og daghang Kristohanon nga mga kinaiya nga atong kinahanglan nga ipalambo sa panahon sa panaw sa atong mga kinabuhi. Naglakip kini og kahibalo ug pagkamapainubsanon, gugma nga putli ug paghigugma, pagkamasulundon ug pagkugi, hugot nga pagtuo ug paglaum. Kristohanon nga mga kinaiya mga gasa gikan sa Dios. Dili kini mapalambo kon wala ang Iyang panabang. Ang bugtong panabang nga gikinahanglan natong tanan gihatag kanato nga libre pinaagi sa Pag-ula ni Jesukristo.
Ang pagbaton og hugot nga pagtuo diha kang Jesukristo ug sa Iyang Pag-ula nagpasabut og hingpit nga pagsalig diha Kaniya—pagsalig sa Iyang walay kinutuban nga gahum, kaalam, ug gugma. Kon kita adunay hugot nga pagtuo diha ni Kristo, misalig kita sa Ginoo igo aron sa pagsunod sa Iyang mga sugo—bisan kon wala kita makasabut sa hingpit sa mga katarungan alang niini. Sa pagtinguha nga mahimong labaw pa ka sama sa Manluluwas, nagkinahanglan kita nga mag-agad, pinaagi sa agianan sa tinuod nga paghinulsol, diha sa mga kaayo ni Jesukristo ug sa mga panalangin sa Iyang Pag-ula.
Samtang nagpalambo kita og Kristohanon nga mga kinaiya diha sa atong kaugalingong mga kinabuhi, lakang sa matag lakang, sila “modala [kanato] ingon sa mga pako sa agila” (D&P 124:18). Ang hugot nga pagtuo ug paglaum modala kanato tabok sa mga kadagatan sa mga pagtintal, labaw sa mga bukid sa mga kalisdanan, ug modala kanato sa luwas nga paagi balik ngadto sa atong mahangturon nga panimalay ug padulngan.
Hingpit nga Gugma, ni Del Parson, dili mahimo nga pakopyahan