Usa ka Ehemplo sa mga Nanagtuo

Sa Kinatibuk-ang mga Kapangulohan sa Young Men ug Young Women

“Pagkinabuhi ingon nga panig-ingnan sa sinultihan ug sa paggawi, sa gugma, sa pagtoo, sa kaputli” (1 Timoteo 4:12).

Makahimo ba ang impluwensya sa usa ka matarung nga batan-ong lalaki o batan-ong babaye og kalainan sa kalibutan? Ang tubag mao ang oo!

Ang Manluluwas nga si Jesukristo misalig kaninyo uban sa Iyang ngalan, nga inyong nadawat sa bunyag. Misalig Siya kaninyo aron mopaila sa Simbahan ug sa inyong pamilya pinaagi sa mapasalamaton nga pagpuyo og usa ka maayo nga kinabuhi. Naghangyo Siya kaninyo nga mahimong “usa ka ehemplo sa mga nanagtuo,” usa ka tawo kinsa mopaduol sa uban ngadto Kaniya, mohimo og mga milagro, ug motabang Kaniya sa pagtukod sa gingharian sa Dios dinhi sa yuta.

Ang 2009 nga tema sa Mutual makita diha sa 1 Timoteo 4:12, diin ang Apostol Pablo naghatag ngadto sa iyang batan-ong higala nga si Timoteo. Unsa ang gitudlo ni Pablo kang Timoteo magamit usab ninyo karon tungod kay kamo, sama ni Timoteo, mga nanagtuo! “Kamo mga pinili nga mga espiritu nga miabut niining panahona” sa diha nga ang ebanghelyo ni Jesukristo napahiuli. Kabahin kamo sa usa ka henerasyon nga may padulngan uban ang “mga responsibilidad sa pagtukod sa gingharian sa Dios.”¹ Mahimo kamo nga makaimpluwensya sa tibuok kalibutan pinaagi sa gahum sa inyong hugot nga pagtuo ug sa inyong matarung nga ehemplo. Si Pablo nasayud niana diha ni Timoteo, ug kami nasayud niana diha kaninyo!

Si Presidente Thomas S. Monson mihatag og maayo kaayo nga tambag kon unsaon nato sa pagkahimo nga usa ka “ehemplo sa mga nanagtuo.” Siya miingon: “Himoa ang matag desisyon nga inyong mahunahuna nga makapasar niini nga pagsulay: Unsa ang epekto niini kanako? Unsa ang mahimo niini ngari kanako? Ug himoa ang inyong lagda sa pamatasan dili mopatigbabaw sa, ‘Unsa ang hunahunaon sa uban?’ kondili, ‘Unsa ang akong mahunahuna sa akong kaugalingon?’ Himoa nga maimpluwensya nianang hinay, ligdong nga tingog. Hinumdumi nga ang usa nga may awtoridad mipatong sa iyang mga kamot diha sa inyong ulo sa panahon sa inyong pagkumpirma ug miingon, ‘Dawata ang Espiritu Santo.’ Ablihi ang inyong mga kasingkasing, gani ang inyo gayud nga mga kalag, ngadto sa tunog nianang linain nga tingog diin nagpamatuod sa kamatuoran.”²

Ang mga nanagtuo adunay nagtubo nga personal nga pagpamatuod kang Jesukristo, nakaila sila sa mahinungdanon nga panalangin sa personal nga pagpamatuod, ug nagtinguha sila sa pagpakigbahin sa ilang kahibalo ngadto sa uban. Mahimo kamo nga makigbahin sa inyong pagpamatuod pinaagi sa inyong mga pulong ug sa inyong ehemplo.

Si Presidente Monson mitudlo usab: “Kon lig-on nga pagkatanom, ang inyong pagpamatuod … moimpluwensya sa tanan ninyong buhaton sa tibuok ninyo nga kinabuhi. Makatabang kini sa pagpiho kon unsaon ninyo sa paggahin sa inyong panahon ug kinsa ang inyong pilion nga ubanan. Makaapekto kini sa pamaagi sa inyong pagtagad sa inyong pamilya, sa unsa nga paagi kamo makigsabut sa uban. Magdala kini og gugma, kalinaw, ug hingpit nga kalipay nganha sa inyong kinabuhi.”³

Nagpuyo kamo sa usa ka kalibutan nga nakig-indig sa inyong panahon ug pagtagad. Nag-atubang kamo sa daghang mga pamugos ug hulhog sa daghang mga tingog. Usahay maglibug kamo mahitungod sa unsay buhaton ug unsa ang matarung. Matag semana kamo adunay kahigayunan sa pag-ambit sa sakrament ug mobag-o pag-usab sa inyong pakigsaad nga sa “kanunay mahinumdom [sa Manluluwas] ug maghupot sa iyang mga sugo” (D&P 20:77). Kon inyo kini nga buhaton, kamo nagpakita sa Langitnong Amahan sa inyong pagkamauyunon sa pagbaton diha sa inyong kaugalingon sa balaang ngalan sa Iyang Anak. Ang inyong mga pulong ug mga lihok nagpakita sa uban nga tinud-anay kamong naghupot sa inyong mga pakigsaad. Samtang kamo mobag-o sa inyong mga pakigsaad, ang Espiritu Santo mogiya kaninyo ug “magtug-an kaninyo sa tanang butang nga inyong buhaton” (2 Nephi 32:3).

Ang mga sumbanan sa Alang sa Kalig-on sa Kabatan-onan molig-on usab kaninyo ug motabang kaninyo nga magbarug nga dili matarug isip usa ka ehemplo. Samtang nagsunod kamo niini nga mga baruganan, makabaton kamo sa paggiya ug sa makanunayon nga panag-uban sa Espiritu Santo. Ang inyong mga hunahuna ug mga lihok mahimo nga lahi gikan sa kalibutan, ug ang inyong ehemplo makaimpluwensya sa uban. “Mobati kamo og ka maayo sa inyong kaugalingon ug mahimong usa ka positibo nga impluwensya diha sa mga kinabuhi sa uban.”⁴ Mahimo kamo nga malipayon, ug ang inyong mga higala ug pamilya madani diha kaninyo pinaagi sa kahayag ug kalipay nga inyong gidan-ag.

Mao nga mangutana kami kaninyo, “Ang usa ka batan-on nga lalaki o batan-on nga babaye nga naningkamot sa pagsunod sa ebanghelyo ug nahimo nga takus nga ehemplo sa mga nanagtuo makahimo ba og kalainan diha sa kalibutan?” Nasayud kami sa tibuok namo nga mga kasingkasing nga ang tubag mao ang usa ka malanog nga oo! Kami nagtuo nga samtang kamo mga putli sa inyong mga hunahuna, panagsultihanay, ug mga lihok, kamo makahimo og kalainan. Kami nagtuo diha kaninyo!

Mga paghulagway sa litrato pinaagi ni Craig Dimond, John Luke, ug Christina Smith