Hugot nga Pagtuo sa Paglabang sa Suba
“Mipadala siya gikan sa itaas, gikuha niya ako, gihaw-as niya ako gikan sa daghang mga tubig. Giluwas niya ako gikan sa akong gamhanan nga kaaway” (Salmo 18:16–17).
Si Rafael Mateo ug ang iyang anak nga lalaki, si Whalincon (nailhan nga “Whally”), mihunong sa kangitngit sa usa ka unoson nga hapon ug mitan-aw sa naghasmag nga mga tubig sa ulan sa nagbul-og nga sapa. Si Rafael, ang unang magtatambag sa kapangulohan sa branch , ug si Whally, ang presidente sa elders quorum, namauli human sa usa ka Dominggo nga puno sa mga miting diha sa ilang chapel sa San José de Ocoa sa Dominican Republic.
Nabasa na sila gikan sa paglakaw diha sa kusog kaayo nga ulan ug sa paglabang sa gibaha nga Río Ocoa nga mihimo og usa ka makuyaw nga babag tali sa chapel ug sa ilang panimalay. Sa panahon sa ting-init, ang 6 ka kilometro (4 ka milya) nga lakaw paubos gikan sa chapel diha sa usa ka kilid sa walog dayon pasaka ngadto sa ilang balay sa tumoy sa pikas kilid sa kasagaran mokabat og usa ka oras. Apan kon ang sapa mobaha sa panahon sa ting-ulan, si Rafael ug ang iyang pamilya kinahanglang mokuha og tulo ka oras, 15 ka kilometro (9 ka milya) nga pagtipas aron sa pagpangita og dapit diin sila makalabang sa sapa nga may pipila ka bahin nga dili kuyaw.
Si Rafael nakahimo sa paglakaw sa dili maihap nga mga higayon kaniadto. Naglabang siya sa sapa kada adlaw sulod sa 12 ka tuig aron makaadto sa trabaho. Ingon nga gitawag duha ka bulan human sa iyang bunyag sa pag-alagad isip branch president, usa ka calling nga iyang gihuptan sulod sa unom ka tuig, nagdugang lamang sa gidaghanon sa mga biyahe. Human niana usa ka tawag isip presidente sa elders quorum. Dayon siya gitawag pag-usab ngadto sa kapangulohan sa branch.
Apan ang pamilyar sa suba wala mopakubos sa kakuyaw niini, ug ang kusog sa dagan sa tubig sa nagbaha nga mga suba mahimong sama ka ngilngig sa dako nga suba nga haw-asan niini. Sa dili pa dugay, usa ka nagbul-og nga suba mianod sa usa ka silingan, mipatay kaniya diha sa kusog nga hasmag sa tubig paingon ngadto sa pig-ot nga agianan niini.
Ang amahan ug ang anak nag-ukon-ukon diha sa kilid sa tubig; dayon si Rafael mitunob niini. Ang suba dili lapad, apan tungod kay kini naagian og daghang tubig, kini kahibulungang nakankan og lawom. Ang bugnaw, kusog nga dagan sa tubig mibitad sa iyang mga tuhod, dayon sa iyang hawak, ug sa wala madugay mituyok diha sa iyang dughan.
Si Rafael nakahibalo nga siya anaa sa kakuyaw. Ang tumbanan sa sapa dangogon ug gansangon, ug ang hilabihan ka kusog nga sulog naghulga sa pagtarung sa iyang panimbang. Latas sa tunga-tunga, gigamit niya ang tanan niyang kusog nga magpabiling magbarug, ug iyang nakita ang kaugalingon nga walay gahum sa paglihok padulong sa unahan o palikod.
Sa diha nga siya naghunahuna nga siya luya na kaayo sa pagpakigbisog sa baha, gibati niya nga adunay nagduot gikan sa luyo nga mitukmod kaniya ngadto sa pikas bahin sa sapa. Wala pa kini hangtud siya miabut sa pikas daplin nga siya nakaamgo nga ang iyang manluluwas dili si Whally, kinsa atua pa sa atbang.
Iyang gihatag ang dungog sa iyang pagkaluwas ngadto sa gahum sa sama nga Manluluwas kinsa mitabang kaniya sa paglungtad sa mahulgaong bitad sa uban nga mga pagsulay, sa pisikal ug sa espiritwal.
“Kinahanglan akong ilabay ang akong kaugalingon sa makadaghang higayon ngadto sa suba kutob sa akong dughan diha sa pagserbisyo sa Ginoo,” miingon si Brother Mateo. “Apan ako mibati og dakong utang ngadto sa Ginoo. Siya mihatag kanako dili lamang sa oportunidad nga makaalagad Kaniya apan sa paglahutay.”
Sama ni Hari David, si Brother Mateo nakahibalo nga ang Manluluwas “mihaw-as kanako, gikan sa daghang mga tubig. Giluwas niya ako gikan sa akong gamhanan nga kaaway” (Salmo 18:16–17).
Kana nga pagpamatuod mitabang kaniya ngadto sa mga pagsulay nga mas gamay, apan sama ra ka tinuod, sa paglabang sa suba niadtong unuson nga hapon uban ni Whally.
Bisan pa sa kadako sa gasto sa pag-adto, si Brother Mateo, ang iyang asawa, si Altagracia, ug tulo sa ilang mga anak nabugkos sa templo niadtong 2001. Sukad niadto sila nagsakripisyo sa pagtigum og igo aron sa pagbisita sa templo nga labing gamay kaduha sa matag tuig.
Ang buhat ug ang mga sakripisyo, sa pisikal o espiritwal, takus kini ngadto ni Brother Mateo.
“Dili kini lisud kon kamo nasayud unsa ang katuyoan niini,” siya miingon. “Kita nakig-away alang sa usa ka butang nga mas madungganon kaysa mga kalibutanong mga butang.”
Gihulagway ni Gregg Thorkelson; gilitratohan ni David Newman