Pag-usab sa Akong mga Tumong
Krista Wren, Arizona, USA
Sa miting sa sakrament usa ka Dominggo, ako naminaw pag-ayo sa usa ka mamumulong nga naghisgut kabahin sa institute. Siya mipakigbahin sa mga pulong ni Elder L. Tom Perry sa Napulog Duha ka mga Apostoles, nag-ingon, “[Institute] mihimo nga mabungahon ang akong kinabuhi, ug ako nasayud nga kini makahimo og sama alang kaninyo. “Kini mobutang og taming sa pagpanalipod libut kaninyo nga kamo malayo sa mga pagtintal ug mga pagsulay sa kalibutan.”1 Diha niana ako nakaamgo nga ang pagkatinuod sa mga pulong ni Elder Perry nagpakita mismo diha sa akong kaugalingon. Unsa ako ka mapasalamaton alang sa mga panalangin nga miabut ngari kanako tungod kay ako nagtambong og institute.
Dili pa dugay sa una, ako nagsugod og klase sa institute diha sa mga pagtulun-an ni Isaias. Hangtud niining adlawa kini nagpabilin nga labing nakapausab sa kinabuhi nga klase nga sukad akong naapilan. Kadto nga semester nahimong usa ka samok nga panahon alang kanako; dili akong tanan nga mga tumong ug unahon nga mga butang nahisubay sa mga baruganan sa ebanghelyo. Hinoon, ako mitambong sa institute kanunay ug miapil sa daghang mga tinagsang mga paghisgot kabahin sa doktrina sa Simbahan uban sa magtutudlo sa institute. Sa nagdagan ang panahon, ang akong mga ideya nausab, ako sa hinayhinay ug sa mabinantayong paagi miusab sa akong mga tumong aron mohaum sa plano sa Ginoo alang kanako.
Kini dili hangtud nga ako nakadungog sa kutlo ni Elder Perry diha sa miting sa sakrament niana nga Dominggo nga ako nakaamgo sa hingpit kon giunsa niining bag-o nga mga tumong nahimong mga panalangin kanako. Ang akong tibuok kinabuhi nahimong mas makahuluganon sa dihang ako mitambong og institute. Ako mas makapamati sa Espiritu ug dili na kaayo mosunod sa mga pagtintal. Ang akong kinaiya ug akong panglantaw milambo tungod sa akong pagtambong.