Mensahe sa Unang Kapangulohan
Atong Ipasaka ang Atong Tingog sa Pagpasidaan
Tungod kay ang Dios mabination, Siya mitawag og mga sulugoon aron sa pagpasidaan sa iyang mga katawhan sa kuyaw. Kana nga tawag sa pagpasidaan nahimong mas kusog ug mas importante tungod sa kamatuoran nga ang labing bililhon nga mga pasidaan mao ang mahitungod sa mga kuyaw nga wala pa mahunahuna sa mga katawhan nga mga tinuod. Hunahunaa si Jonas. Siya mipalayo sa una gikan sa tawag sa Ginoo sa pagpasidaan sa mga katawhan sa Ninive kinsa nabutaan sa kuyaw tungod sa sala. Siya nasayud nga ang dautang mga tawo ngadto sa tanang panahon misalikway sa mga propeta ug usahay mipatay kanila. Apan sa dihang si Jonas mipadayon uban ang hugot nga pagtuo, ang Dios mipanalangin kaniya og kahilwasan ug kalampusan.
Kita usab makakat-on gikan sa atong mga kasinatian isip mga ginikanan ug isip mga anak. Ngadto kanato kinsa mga ginikanan mibati sa kabalaka sa pagkamatikod sa kuyaw nga dili pa makita sa atong mga anak. Pipila ra ka mga pag-ampo ang mga kinasingkasing kaayo kay sa niadtong usa ka ginikanan nga nangayo nga makahibalo unsaon sa pagtandog sa usa ka bata nga mopalayo gikan sa kuyaw. Kadaghanan kanato mibati sa panalangin nga makadungog ug makasunod sa tingog sa pagpasidaan sa usa ka ginikanan.
Ako makahinumdom gihapon sa akong inahan nga hinay nga misulti ngari kanako usa ka Sabado sa hapon sa dihang, isip usa ka batang lalaki, ako nananghid kaniya nga mobuhat og usa ka butang nga akong gituhoan nga makatarunganon sa hingpit ug nga siya nasayud nga makuyaw. Ako sa gihapon nahingangha sa gahum nga gihatag kaniya, ako nagtuo nga gikan sa Dios, sa pagliso kanako sa diyutay kaayo nga mga pulong. Sa akong nahinumduman, mao kini: “Uy, ako nagtuo nimong makahimo niana. Apan ang pagpili anaa kanimo.” Ang pasidaan lamang mao ang gibug-aton nga iyang gibutang sa mga pulong nga makahimo ug pagpili. Gani kadto igo na alang kanako.
Ang iyang gahum sa pagpasidaan uban sa diyutay nga mga pulong nagagikan sa tulo ka mga butang nga ako nasayud kabahin niya. Una, ako nasayud nga siya nahigugma kanako. Ikaduha, ako nasayud nga siya miatubang og susama nga mga sitwasyon ug napanalanginan pinaagi sa paghimo og husto nga pagpili. Ug ikatulo, siya nagpahayag ngari kanako sa iyang siguradong pagpamatuod nga ang pagpili nga akong pagahimoon importante kaayo nga ang Dios mosulti kanako unsa ang buhaton kon ako mangutana Kaniya. Gugma, ehemplo, ug pagpamatuod: kadto mao ang importanteng mga butang nianang adlawa, ug sila nahimo sa kanunay bisan kanus-a ako napanalanginan sa pagpaminaw ug dayon sa pagsunod sa pasidaan sa usa ka suluguon sa Ginoo.
Ang atong abilidad sa pagtandog sa uban pinaagi sa atong tingog sa pagpasidaan mahinungdanon ngadto sa tanan kinsa mga disipulo sa pakigsaad ni Jesukrsito. Ania ang sugo nga gihatag ngadto sa kada miyembro sa Ang Simbahan ni Jesukristo sa mga Santos sa Ulahing mga Adlaw: “Tan-awa, Ako mipadala kaninyo sa pagpamatuod ug pagpasidaan sa mga katawhan, ug matag tawo kinsa napasidan-an magpasidaan sa iyang silingan” (D&C 88:81).
Atong Katungdanan sa Pagpasidaan
Ang katungdanan sa pagpasidaan sa atong mga silingan anaa kanatong tanan kinsa midawat sa pakigsaad sa pagbunyag. Kita kinahanglang makig-istorya ngadto sa dili miyembro nga mga higala ug mga paryente kabahin sa ebanghelyo. Ang atong katuyoan mao ang pagdapit kanila nga matudloan sa full-time nga mga misyonaryo, kinsa gitawag ug gi-set apart alang sa pagtudlo. Kon ang usa ka tawo mopili sa pagdawat sa atong pagdapit nga matudloan, usa ka “referral” nga may dakong kahimoan namugna, usa nga may dakong posibilidad nga mosulod sa mga tubig sa bunyag ug dayon magpabiling matinud-anon.
Isip usa ka miyembro sa Simbahan, kamo makapaabut nga ang full time o ang ward o branch nga mga misyonaryo mangayo og higayon sa pagtabang kaninyo sa paghimo og lista sa mga tawo kang kinsa kamo makahimo sa pagpakigpabahin sa ebanghelyo. Ang mga misyonaryo mahimong mosugyot nga kamo maghunahuna og inyong mga paryente, mga silingan ug mga kaila. Sila mahimong mohangyo kaninyo nga makigsabut og petsa diin kamo mosulay niini nga tawo o pamilya sa pag-andam nga matudloan sa mga misyonaryo. Ako aduna niana nga kasinatian. Tungod kami sa among pamilya midawat niana nga pagdapit gikan sa mga misyonaryo, ako napanalanginan sa pagpahigayon sa bunyag sa usa ka biyuda diha sa mga 80 ang pangidaron, gitudloan sa mga sister nga misyonaryo.
Sa dihang akong gipandong ang akong mga kamot sa iyang ulo aron sa pagkompirma kaniya isip miyembro sa Simbahan, ako mibati nga nadani sa pagsulti nga ang iyang pagpili nga magpabunyag mopanalangin sa mga henerasyon sa iyang pamilya, human ug nag-una kaniya. Bisan og human sa iyang kamatayon, ako nakahimo sa pag-adto sa templo uban sa iyang anak nga lalaki samtang siya gibugkos ngadto kaniya.
Kamo mahimong adunay ingon nga mga kasinatian uban sa mga tawo nga inyong gidapit sa pagpaminaw, ug dayon kamo masayud nga ang pipila ka tipik sa kinabuhi mahimong mga matam-is. Ang mga pulong sa Ginoo tinuod alang sa mga misyonaryo ug alang kanatong tanan: “Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (D&P 18:16).
Ang mga misyonaryo motabang ug moawhag kanato, apan kon ang ingon nga mga higayon diha sa bunyaganan ug sulod sa templo moabut og mas makadaghan mag-agad pag-ayo kon giunsa nato pagtan-aw ang atong katungdanan ug unsa ang atong gipili sa pagbuhat niini. Ang Ginoo dili mogamit sa pulong nga pasidaan kon walay kuyaw. Bisan pa niana dili daghang mga tawo nga atong nailhan ang mibati niini. Sila nakakakat-on sa dili pagpanumbaling sa nagdugang nga ebidensiya nga ang katilingban nagkagubot ug nga ang ilang mga kinabuhi ug pamilya kulang sa kalinaw nga sila sa makausa naghunahuna nga mahimo. Kana nga pag-uyon sa dili pagpanumbaling sa mga timailhan sa kuyaw makahimo niini nga sayon alang kaninyo sa paghunahuna: “Nganong kinahanglan nga makigsulti ako ni bisan kinsa kabahin sa ebanghelyo kinsa ingon og hamugaway? Unsa ang kuyaw nga anaa kanila o ngari kanako kon akong buhaton kini o wala ray isulti?”
Hinoon, ang kuyaw mahimong lisud makit-an, apan kini tinuod, para kanila ug para kanato. Sama pananglit, adunay higayon sa kalibutan nga umaabut, ang matag usa nga inyong nahimamat niini nga kinabuhi makahibalo unsa ang inyong nahibaloan karon. Sila masayud nga ang bugtong paagi nga makapuyo sa kahangturan uban sa atong mga pamilya ug diha sa presenya sa atong Langitnong Amahan ug sa Iyang Anak, si Jesukristo, mao ang pagpili sa pagsulod ngadto sa ganghaan pinaagi sa pagpabunyag sa mga kamot nga adunay katungod gikan sa Dios. Sila makahibalo nga ang bugtong paagi nga ang pamilya mahimong mag-uban sa kahangturan mao ang pagdawat ug paghupot og sagradong mga pakigsaad nga gitanyag diha sa mga templo sa Dios dinhi sa kalibutan. Sila makahibalo nga kamo nakahibalo. Ug sila makahinumdom kon kamo mitanyag ba kanila unsa ang gitanyag sa usa ka tawo diha kaninyo.
Sayon ra ang pagsulti. “Dili pa ang hustong panahon.” Apan adunay kuyaw sa paglangay-langay. Sa milabay nga mga tuig ako mitrabaho alang sa usa ka tawo sa California. Iya akong gipatrabaho, siya mabination kanako, siya ingon og taas og respeto kanako. Tingali ako lamang ang Santos sa Ulahing Adlaw nga iyang sukad nailhan og maayo. Ako wala masayud sa tanan nga mga rason nga akong nakita nga nagpaabut og mas maayong higayon nga makig-istorya kaniya kabahin sa ebanghelyo. Nahinumduman lamang nako ang akong gibati nga kaguol sa dihang akong nahibaloan, human siya miretiro ug ako mipuyo sa layo, nga siya ug ang iyang asawa namatay sa usa ka lawum sa kagabhiong pagmaneho padulong sa ilang balay sa Carmel, California. Gihigugma niya ang iyang asawa. Gihigugma niya ang iyang mga anak. Iyang gihigugma ang iyang mga ginikanan. Gihigugma niya ang iyang mga apo, ug iyang higugmaon ang ilang mga anak ug gusto nga makig-uban kanila sa kahangturan.
Karon, ako wala masayud unsaon ang tanang katawhan paghan-ay didto sa kalibutan sa espiritu. Apan ako nagtuo nga ako siyang ikahibalag, nga siya motan-aw sa akong mga mata, ug nga akong makita diha niini ang pangutana: “Hal, ikaw nasayud. Nganong wala ko nimo sultihi?”
Kon ako maghunahuna kaniya ug kon ako maghunahuna sa biyuda nga akong gibunyagan ug ang iyang pamilya nga karon mabugkos na ngadto kaniya ug ngadto sa usag usa, ako gustong mobuhat og mas maayo. Buot akong modugang sa akong gahum sa pagdapit sa katawhan nga matudloan. Uban niana nga tinguha ug uban sa hugot nga pagtuo nga ang Dios motabang kanato, kita makabuhat og mas maayo pa.
Ang Gugma Mao ang Labing Importante nga Butang
Ang gugma kanunay mao ang labing importante nga butang. Ang usa ka buhat sa pagkamabination panagsa ra nga mapaigo. Ang Dios mihulagway sa gugma nga kinahanglan atong bation, ug nga kadtong atong gidapit kinahanglan gayud moila diha kanato, uban sa mga pulong nga sama niini: “Ang gugma mapuangoron,” ug kini “mopailub sa tanang mga butang, motoo sa tanang mga butang, molaum sa tanang mga butang, moantus sa tanang mga butang” (1 Mga Taga-Corinto 13:4, 7).
Akong nakita unsa ang gipasabut sa “mapuangoron” ug “mopailub sa tanang mga butang”. Usa ka pamilya mibalhin og balay duol kanamo. Ang panimalay bag-o, mao nga usa ako sa mga mitrabaho nga Santos sa Ulahing mga Adlaw kinsa migahin og pipila ka mga gabii sa pagpanindot sa nataran. Akong nahinumduman ang katapusang gabii, nagbarug sunod sa bana niining pamilya sa dayon namong paghuman. Gisusi niya ang among trabaho ug misulti ngari kanamo nga nagtindog sa duol, “Kini ang ikatulong nataran nga kamong mga Mormon mitrabaho alang kanamo, ug sa akong hunahuna kini ang labing nindot.” Ug dayon sa hilum apan sa tino misulti kanako sa dakong katagbawan nga iyang nakuha gikan sa iyang pagkamiyembro sa iyang simbahan, usa ka pakigsultihanay nga kanunay namong gihimo sa mga tuig nga siya nagpuyo didto.
Sa tanan niana nga panahon, ang mga buhat sa pagkamabination nga gilugway ngadto kaniya ug sa iyang pamilya wala gayud mahunong, tungod kay ang mga silingan sa tinuod nahigugma kanila. Usa ka gabii ako mipauli nga nakakita og usa ka truck diha sa agianan sa ilang sakyanan. Ako gisultihan nga sila mobalhin ngadto sa laing estado. Ako miduol aron sa pagsusi kon makatabang ba ako kanila. Wala ako makaila sa tawo nga akong nakit-an nga nagkarga sa mga gamit pambalay ngadto sa truck. Hinay siya nga misulti kanako samtang ako miduol “Kumusta, Brother Eyring.” Wala ako dayon makaila kaniya tungod kay siya ang anak, karon mas edaran na, kinsa nakapuyo didto, naminyo ug mibalhin. Ug tungod sa gugma sa daghan alang kaniya, siya karon nabunyagan isip miyembro sa Simbahan. Wala ako masayud sa katapusan sa istorya tungod kay kini walay katapusan. Apan ako nasayud nga kini nagsugod uban sa gugma.
Ikaduha, kita kinahanglang mahimo nga mas maayo nga mga ehemplo sa mga butang kalabut sa unsay atong gidapit sa uban nga ilang buhaton. Sa nagkangitngit nga kalibutan, kini nga sugo sa Manluluwas mahimong mas mahinungdanon pa: “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).
Kadaghanan kanato mapainubsanon ra nga mohunahuna nga ang atong gamay nga kandila sa ehemplo tingali dili kaayo siga aron makit-an. Apan kamo ug ang inyong pamilya gibantayan labaw pa kay sa inyong maamgo. Pipila ka panahong milabay ako dihay higayon nga makatambong ug mamulong sa mga miting nga adunay duol sa 300 ka mga ministro ug mga lider sa lain nga simbahan. Ako nakig-istorya nga nag-inusara sa daghan kutob sa akong mahimo. Ako nangutana kanila ngano nga sila naminaw gayud sa akong mensahe, nga nag-asoy og balik sa mga sinugdanan sa Simbahan, nga nagsaysay kabahin sa Unang Panan-awon sa batan-ong Joseph Smith ug kabahin sa mga buhing propeta. Sa matag sitwasyon, sila mihatag og susama gayud nga tubag. Miasoy sila og istorya sa usa ka tawo o sa usa ka pamilya—miyembro sa Simbahan nga ilang nailhan. Sa kasagaran akong nadungog, “Sila mao ang labing maayo nga pamilya nga akong nailhan sukad.” Sa kasagaran sila misulti og pipila ka mga paningkamot sa komunidad o pagtubag sa katalagman diin ang mga miyembro sa Simbahan mitrabaho sa usa ka talagsaon nga paagi.
Ang mga tawo nga akong nahimamat niadto nga mga miting dili pa makaila sa kamatuoran diha sa doktrina, apan ilang nakita ang bunga niini diha sa mga kinabuhi sa mga miyembro, ug busa andam silang maminaw. Andam sila nga maminaw sa mga kamatuoran sa Pagpahiuli—nga ang mga pamilya mahimong mabugkos sa hangtud ug nga ang ebanghelyo makausab sa ato gayud nga mga kinaiyahan. Sila andam tungod sa inyong mga ehemplo.
Ang ikatulo nga butang nga kinahanglan gayud nga atong buhaton nga mas maayo mao ang pagdapit sa uban sa pagpamatuod. Ang gugma ug ehemplo moabli sa dalan, apan kita kinahanglan gihapon nga moabli sa atong mga ba-ba ug mopamatuod. Matabangan kita pinaagi sa usa ka yano nga katarungan: ang kamatuoran ug pagpili dili magbuwag. Adunay pipila ka mga pagpili nga ang tanang mga anak sa atong Langitnong Amahan kinahanglan gayud nga mohimo aron makasarang og usa ka pagpamatuod kalabut sa espirituhanong mga kamatuoran, ug sa dihang kita masayud og usa ka espirituhanong kamatuoran, kita kinahanglan gayud nga mopili kon ato bang ipahiuyon ang atong mga kinabuhi ngadto niini. Kon kita mopamatuod sa kamatuoran ngadto sa atong mga hinigugma o mga higala, kita kinahanglan gayud nga mopasabut ngadto kanila sa mga pagpili nga kinahanglan gayud nga ilang buhaton sa dihang sila masayud niana nga kamatuoran sa ilang mga kaugalingon. Adunay duha ka importante ka mga ehemplo: ang pagdapit og usa ka tawo sa pagbasa sa Basahon ni Mormon ug ang pagdapit og usa ka tawo nga mouyon nga tudloan sa mga misyonaryo.
Aron kita masayud nga ang Basahon ni Mormon tinuod, kinahanglan gayud nga kita mobasa niini ug mohimo sa pagpili nga makita diha sa Moroni: mag-ampo aron masayud kon kini tinuod (tan-awa sa Moroni 10:3–5). Kon kita nakahimo na niana, kita makapamatuod gikan sa atong personal nga kasinatian ngadto sa atong mga higala nga sila makahimo niana nga pagpili ug masayud sa sama nga kamatuoran. Kon sila masayud nga ang Basahon ni Mormon mao ang pulong sa Dios, sila moatubang og lain nga pagpili: kon modawat ba sa inyong pagdapit nga matudloan sa mga misyonaryo. Aron mahimo kana nga pagdapit nga may pagpamatuod, kamo kinhanglang masayud nga ang mga misyonaryo gitawag isip mga suluguon sa Dios.
Kamo makaangkon niana nga pagpamatuod pinaagi sa pagpili nga dapiton ang mga misyonaryo ngadto sa inyong panimalay aron sa pagtudlo sa inyong pamilya o mga higala. Ang mga misyonaryo mahinangop niana nga oportunidad. Kon kamo molingkod uban kanila samtang sila magtudlo, sama sa akong gihimo, kamo masayud nga sila gidasig uban sa gahum nga labaw sa ilang mga edad ug ilang edukasyon. Dayon, kon kamo modapit sa uban sa pagpili nga pagatudloan sa mga misyonaryo, kamo makapamatuod nga sila motudlo sa kamatuoran ug nga sila motanyag og mga kapilian nga mogiya ngadto sa kalipay.
Usa ka Kasigurohan
Tingali ang uban kanato maglisud sa pagtuo nga kita nahigugma og igo o nga ang atong mga kinabuhi igo nga maayo o nga ang atong gahum sa pagpamatuod igo alang sa atong mga pagdapit sa atong mga silingan nga pagadawaton. Apan ang Ginoo nasayud nga kita mahimong mobati niana nga paagi. Paminaw ngadto sa Iyang maawhagong mga pulong, diin Iyang gimando nga ibutang diha sa unahan sa Doktrina ug mga Pakigsaad, sa dihang Siya mihatag kanato sa atong katungdanan: “Ug ang tingog sa pagpasidaan modangat ngadto sa tanan nga mga katawhan, pinaagi sa mga ba-ba sa akong mga tinun-an, kinsa Ako mipili niining katapusan nga mga adlaw.” (D&P 1:4).
Ug dayon paminaw ngadto sa Iyang paghulagway sa mga kwalipikasyon niadto nga mga disipulo—diha kanato: “Ang mahuyang nga mga butang sa kalibutan moabut ug mopukan sa gamhanan ug mga malig-on” (D&C 1:19).
Ug sa wala madugay: “Nga ang kahingpitan sa akong ebanghelyo mahimo tingali ikapahayag pinaagi sa mahuyang ug yano ngadto sa mga lumulupyo sa kalibutan” (D&P 1:23).
Ug dayon pag-usab: “Ug sa ingon nga sila [mga] mapainubsanon sila mahimo nga malig-on, ug mapanalanginan sa kahitas-an” (D&C 1:28).
Kana nga kasigurohan gihatag ngadto sa unang mga misyonaryo sa Simbahan ug ngadto sa mga misyonaryo karong adlawa. Apan kini gihatag ngari kanatong tanan usab. Kinahanglan gayud kita magbaton sa hugot nga pagtuo nga kita makahigugma og igo ug nga ang ebanghelyo nakatandog sa atong mga kinabuhi igo nga ang atong pagdapit sa pagpili madungog ingon og gikan sa Magtutudlo kansang pagdapit mao kini.
Siya ang hingpit nga ehemplo kon unsa ang kinahanglan natong buhaton. Mibati kamo sa Iyang gugma ug sa Iyang pag-amuma bisan kamo wala mopatalinghug, sama niadtong inyong giduol uban sa ebanghelyo mahimong dili mopatalinghog. Balik-balik Siya nga nagdapit kaninyo nga magpatudlo pinaagi sa Iyang mga suluguon. Mahimong kamo wala makaila nga diha sa pagbisita sa mga home teacher ug mga visiting teacher o diha sa pagtawag ni bishop sa telepono, apan kadto mao ang Iyang mga pagdapit nga matabangan ug matudloan. Ug ang Dios kanunay naghimo nga klaro ang mga sangputanan ug dayon nagtugot kanato sa pagpili alang sa atong kaugalingon.
Unsa ang gitudlo sa suluguon sa Ginoo nga si Lehi sa iyang mga anak kanunay mao alang kanatong tanan: “Ug karon, akong anak nga mga lalaki, ako unta manghinaut nga kamo mosalig sa halangdon nga Tigpataliwala, ug mopatalinghug ngadto sa iyang mahinungdanon nga mga sugo; ug magmatinud-anon sa iyang mga pulong, ug mopili sa kinabuhi nga dayon, sumala sa kabubut-on sa Balaang Espiritu” (2 Nephi 2:28).
Ug dayon gikan kang Jacob kita midawat niining pag-awhag sa pagbuhat sa atong obligasyon sa pagpamatuod, ingon nga kita kinahanglanon gayud, nga ang pagpili nga matudloan pinaagi sa mga misyonaryo mao ang pagpili sa pagsulod sa agianan padulong sa kinabuhing dayon, ang labing nindot nga gasa sa tanang mga gasa sa Dios: “Busa lipaya ang inyong mga kasingkasing, ug hinumdumi nga kamo gawasnon sa paglihok alang sa inyong mga kaugalingon—sa pagpili sa agianan sa walay katapusan nga kamatayon o sa agianan sa kinabuhi nga dayon” (2 Nephi 10:23).
Ako magpamatuod nga pinaagi lamang sa pagdawat ug pagpuyo sa gipahiuli nga ebanghelyo ni Jesukristo moabut ang kalinaw nga gisaad sa Ginoo niini nga kinabuhi ug ang paglaum sa kinabuhing dayon sa umaabut nga kalibutan. Ako mopamatuod nga kita gihatagan sa pribilihiyo ug sa obligasyon sa pagtanyag sa kamatuoran ug sa mga pagpili nga mogiya ngadto niadto nga mga panalangin ngadto sa mga anak sa Langitnong Amahan, kinsa atong mga igsoong lalaki ug babaye. Si Jesus mao ang Kristo, Siya buhi, ug kini Iyang buhat.
Mga paghulagway sa litrato pinaagi ni David Stoker
Kon kamo modapit sa uban sa pagpili nga pagatudloan sa mga misyonaryo, kamo makapamatuod nga sila motudlo sa kamatuoran ug nga sila motanyag og mga kapilian nga mogiya ngadto sa kalipay.
Kinahanglan gayud kita magbaton sa hugot nga pagtuo nga kita makahigugma og igo ug nga ang ebanghelyo nakatandog sa atong mga kinabuhi igo nga ang atong pagdapit sa pagpili madungog ingon og gikan sa Magtutudlo kansang pagdapit mao kini.
Detalye gikan saSiya Nabanhaw, ni Del Parson