Ngadto sa Batan-ong mga Lalaki sa Aaronic Priesthood

Charles W. Dahlquist (tunga), presidente; Dean R. Burgess (wala), unang magtatambag; ug Michael A. Neider, ikaduhang magtatambag.

Si Pablo mipahinumdom ni Timoteo sa usa ka butang nga hilabihan ka mahinungdanon—mahinungdanon ngadto ni Timoteo ug sa matag naghupot sa Aaronic Priesthood: “Ayaw pasagdi ang hiyas nga anaa kanimo, nga gikahatag kanimo pinaagi sa pamulong nga profesiya, inubanan sa pagpandong kanimo sa mga kamot sa mga anciano” (1 Timothy 4:14). Si Pablo nagsulti kalabut sa kamahinungdanon sa priesthood.

Unsay gipasabut sa “dili pagpasagad” sa atong priesthood? Una, nagpasabut kini sa pagpuyo nga takus sa mga panalangin nga nagdagayday pinaagi sa priesthood. Atong gisiguro nga ang atong mga hunahuna, mga pulong, ug mga lihok lunsay. Kita nagpuyo sa ingon nga mahimong “usa ka ehemplo sa mga nanagtuo” sa tanan natong gibuhat: nag-ampo ug nagbasa sa mga kasulatan matag adlaw, nagtambong sa seminary, nagbayad sa ikapulo, ug, diin posible, nagtambong sa templo aron pagpahigayon og mga bunyag alang sa mga patay.

Ikaduha, nagpasabut kini sa pagpalambo sa priesthood—sa paggamit sa priesthood aron sa pagserbisyo ug sa pagpanalangin sa uban. Makahimo kita niini pinaagi sa pagtuman sa mga buluhaton sa priesthood; paghatag og personal ug korum nga serbisyo; o pagtabang ngadto sa usa ka tawo diha sa panimalay, sa eskwelahan, o trabaho kinsa nanginahanglan og usa ka mabination nga pulong, usa ka pahiyom, o usa ka pikpik sa buko-buko.

Ikatulo, nagpasabut kini sa pagkat-on mahitungod sa priesthood ug sa mga katungdanan niini. Basaha ug palandunga ang mga kasulatan mahitungod sa priesthood, ilabi na sa Alma 13 ug Doktrina ug mga Pakigsaad nga mga seksyon 13, 20, 84, 107, ug 121. Basaha ang mga pakigpulong nga gihatag diha sa sesyon sa priesthood sa labing bag-o nga kinatibuk-ang komperensya, ug dayon pangutan-a ang imong kaugalingon, “Sa unsa nga paagi magamit nako ang unsay akong nakat-unan aron sa pagtabang kanako sa pagpalambo sa priesthood?”

Nahigugma kami kaninyo. Kami adunay pagsalig kaninyo. Samtang kamo naningkamot sa pagpalambo sa inyong priesthood, kamo mahimo nga mas labaw pa nga maandam sa pagserbisyo sa Ginoo isip full-time nga misyonaryo, ug sama sa gisaad ni Pablo kang Timoteo, ang inyong pagserbisyo ug ang inyong ehemplo makapanalangin sa inyong kinabuhi ug niadtong naglibut kaninyo. Hinaut unta nga ang Dios mopanalangin kaninyo sa inyong mga paningkamot.