Adunay Paglaumsa Haiti
Ang misyonaryo nga espiritu buhi ug naglihok niining Isla nga Nasud, ug ang nagtubo nga henerasyon determinado sa pagpabilin niana nga paagi.
Si Dieuveut Demosthène, 18, ug Robenson Marcel Laroque Jean, 19, ang labing suod nga mga higala. Ug tuyo nila nga magpabilin niana nga paagi. Sa kahangturan.
“Managsilingan kami, ug kauban kami nga magdula og basketball,” mipasabut si Robenson. “Mipasakop ako sa Simbahan sa dihang ako 16, ug sa wala madugay akong gisugyot ngadto ni Dieuveut nga kinahanglan mouban usab siya. Nag-ampo ako og maayo, ug nagpadayon ako. Karon tan-awa siya, usa ka lig-on nga miyembro sa Simbahan. Mapasigarbuhon ako kaniya.”
“Si Robenson midapit kanako sa daghang mga higayon,” miingon si Dieuveut, “ug sa wala madugay akong gidawat. Kanunay siya nga misulti uban sa maanindot kaayo nga mga pulong, ingon og nakasabut siya sa tanang butang. Mao nga ang iyang pagdapit dili makapabalaka, talagsaon kini. Wala madugay, misugod ako sa pagdawat og mga leksyon uban sa mga misyonaryo, ug mipasakop ako sa Simbahan sa diha nga ako 17.”
Ang Sulundon
Mao kana ang sulundon nga paagi nga ang misyonaryo nga buhat pagabuhaton—mga higala nga nakigbahin sa ebanghelyo ngadto sa mga higala ug naghatag og mga referral ngadto sa mga misyonaryo nga motudlo kanila. “Gikan kanako—usa ka two diha sa Simbahan—karon duha na kami, ug nagpadayon kami nga nag-uban sa sama nga trabaho,” miingon si Robenson. Isip resulta sa ilang mga paningkamot, usa sa magulang nga igsoong lalaki ni Dieuveut ug laing higala mipasakop usab sa Simbahan. Ang usa nahimong duha, ug ang duha nahimong upat.
Si Robenson ug si Dieuveut, gikan sa Centrale Ward, Port-au-Prince Haiti North Stake, naghulagway sa unsay nahitabo sa misyonaryo nga buhat sa Haiti sukad ang mga misyonaryo gikan sa ubang mga nasud gipabakwit niadtong 2005 tungod sa politikanhon nga kagubot. Ang Misyon sa Haiti Port-au-Prince kaugalingong nangita alang sa kalig-on ug nakakaplag niini. Karon mga taga-Haiti lamang ang nagserbisyo og mga misyon didto sa Haiti, ug ang mga batan-on gipaabut nga moserbisyo kon moabut na sila sa pangidaron. Bisan wala pa sila matawag og full-time nga mga misyon, miduol na sila sa mga silingan ug sa mga higala.
“Bisan asa nga inyong makita Ang Simbahan ni Jesukrito sa mga Santos sa Ulahing mga Adlaw sa Haiti, inyong masayran nga ang mga miyembro taga-Haiti,” miingon si Farah Jean-Baptiste, 18, usa usab ka batan-on nga babaye sa Centrale Ward. “Tinuod kini nga pagdasig alang sa mga batan-on nga makita nga kami ang may tulubagon alang sa kaugmaon sa Simbahan dinhi.”
“Ang batan-on nga mga lalaki ug batan-on nga mga babaye dinhi sa Simbahan gidasig sa pagsunod sa Manluluwas,” miingon ang 17 anyos nga higala ni Farah gikan sa sama nga ward, si Nathalie LaGuerre. “Nangandoy kami sa paglakaw sa Iyang dalan, aron sa pagtan-aw sa Iyang buhat nga mouswag. Ug busa mapuno kami uban sa hingpit nga kalipay kon kami makakita og taga-Haiti nga mga misyonaryo nga nagtrabaho sa Haiti. Sila mga madasigon ug malipayon, ug human sa ilang mga misyon nagsulti sila kanamo kon unsa ka maayo nga kasinatian ang ilang naangkon. Dayon magdapit sila kanamo sa pagbaton og sama nga kasinatian ug sa pagsugod karon pinaagi sa pagpakigbahin sa ebanghelyo uban sa among mga higala.”
Siya nag-ingon nga bisan tuod og ang batan-on nga mga babaye walay sama nga obligasyon sa priesthood sa pag-alagad og full-time nga misyon sama sa batan-ong mga lalaki, “amo usab nga nakita nga adunay daghang mga panalangin nga moabut niadtong kinsa moserbisyo. Makahimo kamo sa pagpanalangin sa uban, ug kini makahatag og kaayohan kaninyo. Nagpalig-on kini kaninyo alang sa mga hagit nga inyong atubangon sa kinabuhi, ug naghupot kini kaninyo diha sa ebanghelyo. Nagpakita kini nga kamo mga tinuod nga tinun-an ni Jesukristo, nga kamo mga saksi alang Kaniya, ug nga mosunod sa Iyang ehemplo.”
Ang Paglaum
“Adunay dakong paglaum alang sa gingharian sa Dios dinhi sa Haiti,” miingon si Presidente Gh. Ghammald Francillon sa Stake sa Port-au-Prince Haiti North. “Ang kabatan-onan tinuod nga nadasig sa pagserbisyo og mga misyon. Kabahin kini sa ilang natural nga pagtubo sa paglakip sa misyon diha sa ilang unang mga gimbuhaton, gani mag-una pa kay sa kolehiyo. Kon makakita kamo og mga misyonaryo diha sa karsada, mangutana lamang kamo, ug sultihan nila kamo nga ilang gibiyaan ang ilang mga pagtuon tungod kay gitawag sila ngadto sa trabaho sa Ginoo.”
Iyang namatikdan ang mga panalangin nga iyang gibati diha sa iyang kaugalingong panimalay tungod kay ang iyang asawa usa ka returned missonary. Siya miingon nga ang mas lig-on nga mga pamilya ug mas lig-on nga mga lider mao ang direkta nga mga resulta sa misyonaryo nga pagserbisyo. “Hunahunaa,” siya miingon, “sulod sa 15 ngadto sa 20 ka tuig, kon daghan kaayo nga mga taga-Haiti ang moserbisyo og mga misyon sa Haiti, ang matang sa Simbahan nga atong maangkon dinhi!” Siya miingon nga ang mga miyembro “mibati sa gugma ug suporta sa daghan kaayo, gikan sa propeta ug sa Kinatibuk-ang mga Kadagkoan ug gikan sa mga returned missionary nga gikan sa laing mga nasud kinsa miserbisyo dinhi sa nangagi. Apan sa pagkakaron 100 ka porsyento nga mga taga-Haiti, lakip ang presidente sa misyon, si Fouchard Pierre-Nau, usa ka returned missionary kinsa miserbisyo sa Haiti mga 10 ka tuig na ang milabay.”
Ang Umaabut
Ang pipila ka mga tawo naghunahuna nga ang Simbahan dinhi tingali adunay kasamok kon walay panabang gikan sa gawas. “Apan wala gayud ako mabalaka,” miingon ang usa ka misyonaryo nga karon nagserbisyo didto sa Misyon sa Haiti Port-au-Prince, si Elder J. Henry Michel. “Ang Simbahan dili gayud mapakyas. Kini ang Simbahan ni Jesukristo, ug busa dili kini mapakyas.”
Hinoon, miingon si Dieuveut, samtang ang mga tawo makaamgo sa kalipay nga gidala sa ebanghelyo, ang Simbahan sa Haiti magpadayon sa pagtubo. “Ako tinuod nga mapasalamaton ni Robenson tungod sa pagpakigbahin sa ebanghelyo ngari kanako,” siya miingon, “ug mao nga ako gusto nga makigbahin sa ebanghelyo ngadto sa uban. Sa miaging semana akong gipangutana ang akong kaugalingon, sa nangagi nasayud ba ako kon unsa ang hingpit nga kalipay? Tungod kay karon, bisan kon wala kanako ang tanang butang nga materyal nga akong gusto, kanunay nako nga bation ang kalinaw sa akong kaugalingon. Ako adunay dakong paglaum nga ako masuod ngadto sa akong Langitnong Amahan.”
“Nagsugod na ako sa pagpaninguha nga mahimong usa ka misyonaryo,” miingon si Robenson. “Matag adlaw ako nagdala sa akong backpack uban sa daghan nga mga kopya sa Basahon ni Mormon, aron lamang ipagpakigbahin sa uban. Daghan kanila nakahibalo nga ako usa ka miyembro sa Simbahan, ug matinguhaon ako nga makigbahin sa akong pagpamatuod. Ang pag-adto og usa ka full-time nga misyon mahimo nga usa ka mahinungdanon nga kahigayunan sa pag-alagad sa Dios pinaagi sa pagserbisyo sa Iyang mga anak. “Kini akong dako nga tinguha sa pag-adto.”
Si Dieuveut miingon nga kanunay siya nga makigsulti uban sa mga returned misyonaryo. “Sila misulti kanako giunsa sa Ginoo paghimo nga nakapanalangin sa mga tawo pinaagi sa mga misyonaryo, ug ako gusto nga makigbahin sa ingon nga mga panalangin. Sila misulti kanako kon giunsa nila sa pagpakabuhi diha sa natad sa misyon, kon unsa ka dako ang ilang pagkalingaw niini. Usab, human sa ilang mga misyon, sila mga takus, maayo nga mga ehemplo. Gusto nako nga mahisama niana.”
Unsa ang gidala sa umaabut? “Ang Langitnong Amahan adunay Iyang Plano alang sa Haiti,” miingon si Dieuveut. “Iyang gihatagan ang mga miyembro dinhi sa kahigayunan nga mahimong lig-on. Kini mao nga mga taga-Haiti nagtudlo sa mga taga-Haiti, ug kana makapanalangin kanamo.”
Si Robenson sa dili madugay makadawat sa iyang tawag sa misyon, ug naglaum siya nga anhi kini sa Haiti. Si Dieuveut dili kaayo maulahi ug naglaum usab sa pagserbisyo sa iyang yutang natawhan. Apan bisan kon tawagon sila ngadto sa Haiti o ngadto sa uban nga laing mga nasud, sila nasayud nga sila makahimo og daghan pa nga mga higala diha sa Simbahan ug nga ang ilang kaugalingon nga pakighigala magpadayon. Tungod kay kon kamo managhigala diha sa ebanghelyo, managhigala kamo sa kahangturan.
Ang paglaum naglambo alang sa mga kabatan-onan sa Santos sa Ulahing mga Adlaw sama nila ni Robenson Jean, Dieuveut Demosthène, Nathalie LaGuerre, ug Farah Jean-Baptiste, kinsa nagtuo nga ang ebanghelyo makapausab sa ilang mga kinabuhi ingon man usab sa ilang nasud. Gikan sa ibabaw sa bungtod sa Port-au-Prince diin ang yuta gipahinungod alang sa pagsangyaw sa ebanghelyo sa tibuok nasud, ang mga taga-Haiti nga Santos sa Ulahing mga Adlaw nakigbahin sa mga pahiyom ug nangandam alang sa umaabut.
Sa ibabaw: Ang presidente sa misyon ug ang iyang asawa nakighinabi uban sa mga elder nga nagserbisyo diha sa opisina sa misyon. Si Presidente Pierre-Nau nag-awhag sa Santos sa Ulahing mga Adlaw nga mga batan-on sa pagsugod karon sa pagpakigbahin sa ebanghelyo. “Kamo mga misyonaryo na,” siya miingon. Ibabaw: President Francillon sa Stake sa Port-au-Prince Haiti North nalingaw sa higayon uban sa iyang asawa ug mga anak. Siya miingon nga ang Simbahan nagpanalangin sa kabatan-onan sa daghang mga paagi.
Ang kabatan-onan sa Haiti naningkamot og apil sa Young Women nga mga klase ug sa mga korum sa priesthood. Dili lamang nga nahinumdom sila sa mga saad nga ilang gihimo sa diha nga gibunyagan sila, apan nagsunod sila sumala niadto nga mga saad sa matag adlaw.
Mga litrato pinaagi ni Richard M. Romney