Pagkakaplag sa Dios
Sa dihang ako hapit na mag-18, misakay ako og eroplano paingon sa usa ka gamay nga lungsod nga gitawag og Soldotna, Alaska, aron motrabaho alang sa ting-init. Kini mao ang akong unang kasinatian nga magpuyo layo gikan sa panimalay. Ang akong mga ginikanan nakigsabut alang kanako nga motrabaho ug mopuyo uban sa ilang mga maayong higala ang mga Wright, kinsa nanag-iya sa lokal nga tindahan sa mga pagkaon. Naglaum ako nga makakita og igong kwarta alang sa akong kolehiyo. Naglaum usab ako nga mopauli sa panimalay nga may tubag sa usa ka pangutana nga nagbalik-balik og sulod sa akong hunahuna. Aduna ba gayuy Dios?
Nagkinahanglan ako nga makakuha og tubag alang sa akong kaugalingon. Busa ako mihukom nga mag-ampo matag gabii ug mangutana sa Dios kon Siya tinuod ba. Sa lain nga paagi mibati ako nga kon adunay Dios, Siya motubag sa akong pag-ampo. Kon ako dili gayud makadawat og tubag, niana masayud ako nga Siya wala. Yano, naghunahuna ako.
Sa panimalay sa mga Wright, ako nakigbahin og lawak-higdaanan uban sa iyang anak nga babaye nga si Lisa. Siya mipauli gikan sa Brigham Young University alang sa ting-init ug mitrabaho sa tindahan sa mga pagkaon uban kanako. Midayeg ako kang Lisa gikan pa sa sinugdan. Maanyag siya, utokan, masaligon, ug madasigon kabahin sa kinabuhi. Niana nga ting-init kami nag-uban hapit matag oras sa kada adlaw.
Ganahan kaayo ako nga maminaw ni Lisa nga maghisgot kanako mahitungod sa kinabuhi sa kolehiyo. Ang iyang kinabuhi makita nga makalingaw ug hilabihan ka makikaugalingon. Si Lisa mihimo sa iyang kinabuhi nga han-ay ug balanse, uban sa hustong mga prayoridad diha sa tukma nga dapit.
Ang akong pagdayeg kang Lisa mitubo samtang ako naniid kaniya nga nagbasa sa mga kasulatan matag adlaw ug nag-ampo matag buntag ug gabii. Gusto akong mangutana kang Lisa giunsa niya pagbaton sa iyang hugot nga pagtuo sa Dios apan naulaw tungod sa akong kakulang og hugot nga pagtuo. Nakahinumdom ako nga naghigda sa katre, naghunahuna kon unsa ang gisulti ni Lisa ngadto sa Ginoo diha sa iyang mga pag-ampo.
Matag gabii, ako nagluhod kilid sa akong higdaanan ug naglitok og dinali-dali nga pag-ampo, nangutana sa Dios kon anaa ba Siya. Apan ako wala mobati og bisan unsa nga espesyal o espiritwal. Wala ako makadungog og usa ka tingog. Sama gihapon ang akong gibati human sa akong mga pag-ampo ingon sa akong gibati sa una pa. Kining matag gabii nga buluhaton nagpadayon sulod sa duha ka bulan. Nawad-an sa paglaum, akong nabati ang akong mga pagduda diha sa Dios nga nagtubo.
Usa ka gabii, sa dihang akong gibati ang kamingaw sa panimalay, mga luha milugmaw sa akong mga mata. Ako gusto gayud kaayo nga maduol sa akong pamilya, mga higala, ug sa sinati nga mga palibut. Naghigwaos nga makig-istorya ngadto sa usa ka tawo kinsa nakaila ug nahigugma kanako, ako miluhod sa pag-ampo. “Dios, ako sa tinuod nagkinahanglan gayud Kanimo karon,” ako misugod. Sunod sa pipila ka mga minuto, akong gipagawas ang akong tinuod nga mga pagbati ngadto sa akong Amahan sa Langit. Gisultihan ko Siya sa tanan. Nakigsulti ako Kaniya ingon og ako mituo nga Siya anaa diha.
Usa ka kainit miputos kanako. Misugod ako sa pagbati ingon og ang Langitnong Amahan mikanaog ug migakus kanako sa Iyang mga bukton. Wala na ako mag-inusara. Gugma ug kalinaw mihakop kanako. Ako nasayud nga adunay usa ka Dios.
Naghunahuna ako ngano nga ang pagdawat og tubag sa akong pag-ampo miabut og kapin sa duha ka bulan. AngJeremias 29:13 mihatag kanako sa tubag: “Ug kamo mangita kanako, ug makakaplag kanako, sa diha nga kamo mangita kanako uban ang inyong bug-os nga kasingkasing.”
Sa katapusan ako nakadawat sa tubag sa akong pag-ampo human sa tinuoray nga pagsusi sa kinahiladman sa akong kasingkasing. Nagbutang ako og hugot nga pagtuo diha sa pagkaanaa sa Dios. Naningkamot ako og maayo uban sa akong mga pag-ampo ug mga luha.
Nausab ang akong kinabuhi tungod niadtong usa ka gabii. Mialagad ako og misyon ug naminyo sa templo. Ang akong hugot nga pagtuo sa pagkaanaa sa Dios nagpadayon sa pagtubo.
Ako kanunay naghunahuna og balik niadtong ting-init sa Alaska. Kon wala pa ang ehemplo ni Lisa, ako dili tingali molahutay niadtong mga bulana sa pag-ampo. Tingali ako miundang na ug dili gayud makakaplag sa paghigugma sa akong Langitnong Amahan. Mapasalamaton gayud ako sa hangtud ni Lisa ug sa iyang ehemplo. Mitabang siya kanako sa pag-ila sa Dios ug sa pagbati sa Iyang gugma alang kanako.
Paghulagway pinaagi ni Julie Rogers