Pagpauli sa Panimalay

Suzanne Goble, Utah, USA

Ako nagpuyo layo gikan sa panimalay sa unang higayon sa dihang nagbulag ang akong mga ginikanan. Kini mao pa lamang ang akong una nga bulan sa kolehiyo, ug samtang ang akong kinabuhi sa pamilya nausab, ako naningkamot sa pagsabut sa kahulugan sa pulong nga panimalay. Sa dihang ang akong mga ginikanan nagdiborsyo ug ang akong pamilya mibiya sa panimalay nga akong gipuy-an sulod sa 18 ka tuig, ako ilabi na nga naglibug. Nasayud ako nga ako dili walay panimalay, apan ako sa tinuod mibati niana.

Ako sa kanunay makadungog nga ang Simbahan gihulagway isip usa ka “dangpanan gikan sa unos” (D&P 115:6). Ang institute nahimong mao nga dangpanan alang kanako samtang ako nakiggubat niining bag-ong unos sa akong kinabuhi. Mipalista ako sa institute, ug samtang ako wala gayud nakahinumdom sa hustong mga pulong nga gisulti diha sa mga leksyon, ako dili gayud makalimot sa pagbati nga kalinaw ug kahupay nga miabut kanako samtang ako naminaw. Nagsugod ako sa pagdiskubre sa gugma sa akong Langitnong Amahan alang kanako, ug ako nahimong mas suod nga kaila sa labing maayong magtatambag nga sukad akong nakaplagan: Si Jesukristo.

Ako kinahanglan nga mobayad alang sa akong pagtungha sa kolehiyo, apan ako nakakat-on sa labing bililhon nga mga leksyon gikan sa mga klase sa institute, nga anaa alang kanako nga walay bayad. Nahibaloan na nako karon nga ang gipasabut sa panimalay dili sabton nga balay diin ikaw nagtubo apan usa ka dapit diin ang mga leksyon sa kinabuhi gitudlo ug ang gugma buhong. Tungod sa akong nakat-unan ug sa Espiritu nga akong nabati, ang institute nahimo nga usa ka bag-ong panimalay alang kanako. Kini nindot kaayo nga adunay usa ka dapit diin akong gibati nga gihigugma ug giabi-abi.