Pakighigala
Uban sa Imong Tibuok nga Kasingkasing
Ang mga bata sa tibuok kalibutan nahigugma ug nagsimba ni Jesukristo—sama kaninyo! Niining bulana, atong himamaton si Ricardo Fortuna sa Santo Domingo, Dominican Republic.
Bisan unsa ang buhaton ni Ricardo Fortuna, iya kini nga gibuhat uban sa kadasig. Kining nag-edad og walo nga gikan sa Santo Domingo didto sa Dominican Republic nagdula og baseball uban sa kalagsik sa usa ka propesyonal. Miapil siya sa iyang higala ug sa iyang igsoon nga lalaki aron sa pagpalumba sa dulaan nga mga truck o mopahigayon og minaomao nga gubat tali sa mga dinosaur. Madasigon siya kon ang iyang inahan moagda kaniya ngadto sa kusina aron magluto og mga tostones (mga minantikaang saging).
Si Ricardo madasigon nga moapil panahon sa family home evening. Kinasingkasing siya nga mag-ampo uban sa iyang pamilya matag buntag ug gabii. Kanunay siya nga magbasa sa iyang mga kasulatan. Ug nangandoy siya nga makahimo sa pagtambong sa Primary labaw pa kay sa makausa sa semana! Bisan unsa ang buhaton ni Ricardo, iya kini nga buhaton sa kinasingkasing.
Adunay usa ka butang nga gibuhat ni Ricardo uban sa tibuok niyang kasingkasing—gihigugma niya ang Ginoo. Nasayud siya nga usa kini ka sugo tungod kay nabasa niya kini sa Biblia: “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” (Mateo 22:37).
“Nagpasabut kana nga inyo Siya nga higugmaon sa tanan ninyo nga mahimo,” miingon si Ricardo. Kana nga gugma gipakita ilabi na diha sa apartment sa iyang pamilya samtang nag-saulog sila sa Pasko. Matag gabii ang pamilya magbasa sa mga kasulatan mahitungod sa pagkatawo sa Manluluwas. Ang pipila misulti mahitungod sa nahitabo sa Balaan nga Yuta. Ang uban misulti mahitungod sa nahitabo sa America [New World].
Si Ricardo nag-ingon nga mahinungdanon ang paghinumdom ni Jesukristo sa Pasko tungod kay kana ang panahon nga ang mga tawo magsaulog sa Iyang pagkatawo. “Apan importante ang paghunahuna mahitungod ni Jesus sa matag adlaw ug sa pagsunod sa Iyang ehemplo,” siya miingon. “Kinahanglan nga mahinumdom kita nga Siya nagtudlo kanato mahitungod sa Langitnong Amahan ug unsaon sa pagsimba Kaniya ug nga Siya nagpadala kanato sa Espiritu Santo.”
Sulod sa atubangan nga pultahan sa apartment sa pamilya Fortuna nagbitay ang usa ka dakong pinintal sa Manluluwas. Bisag asa nga kwarto kamo moadto, inyo Siya nga makita. “Makapahinumdom kini kanato sa paghunahuna Kaniya,” miingon si Ricardo, “dili lamang panahon sa Pasko kondili sa tibuok tuig.”
Ang Paborito nga Kasulatan ni Ricardo
Si Ricardo ganahan sa Mga Artikulo sa Hugot nga Pagtuo, ilabi na ang numero singko, diin mahimo siya nga maka-recite muy rápidamente (sa labing dali). “Kami nagtuo nga ang usa ka tawo kinahanglan gayud nga pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini,” siya mikutlo. “Kana nagsulti kanato nga ang Ginoo nagtawag sa mga lider sa Iyang Simbahan ug nga kita magtudlo sa ebanghelyo uban sa pagtugot.”
Makalingaw nga Pagkaon
Mogahin kini og panahon aron sa paghimo sa iyang paborito nga pagkaon, tostones, apan si Ricardo naghunahuna niini nga takus sa matag minuto. Siya ug ang iyang inahan maampingon nga mopanit ug mohiwa sa mga plantain, nga ingon og saging nga tan-awon apan dili tam-is. Ila kini nga pritohon sa init nga mantika, pabugnawon kini, ug maampingon nga paugahon. Dayon moabut ang paborito nga bahin ni Ricardo. Ibutang niya ang matag hiniwa sa usa ka kahoy nga pigaanan ug pislaton kini. Dayon ang matag hiniwa pritohon pag-usab. Ganahan kaayo siya nga mokaon og tostones ilabi na uban sa soreso.
Maayo nga mga Ehemplo
Si Ricardo kasagaran makigdula sa iyang manghud nga igsoong lalaki, si Marcus, ug sa laing higala, si Manuel, usa ka Santos sa Ulahing mga Adlaw kinsa nagpuyo sa kasilinganan nga apartment. Nasayud siya nga ang tinuod nga mga higala modasig sa usag usa sa pagbuhat unsa ang matarung. “Tungod kay nagtan-aw sila kanako isip usa ka ehemplo, kinahanglan gayud nga ako mohimo og usa ka maayo nga ehemplo alang kanila,” siya miingon.
Si Ricardo suod usab ngadto sa iyang inahan ug amahan. “Gihigugma nako ang akong mama ug akong papa,” siya miingon. “Ila akong gitabangan, ug sila makigdula kanako. Ila akong gitudloan, ug sila magbasa uban kanako. Mag-ampo sila uban kanako matag buntag ug matag gabii.”
Iya usab nga gitan-aw si Presidente Thomas S. Monson isip usa ka ehemplo. “Nasayud ako nga siya usa ka propeta sa Dios ug nga nagsulti siya sa pulong sa Dios,” miingon si Ricardo. “Nasayud ako nga siya mag-ampo ug magbasa sa iyang mga kasulatan, mao nga ako kinahanglan usab.”
Ug si Ricardo miingon nga si Jesukristo mao ang labing maayo nga ehemplo. “Siya nagtudlo kanato sa pagbuhat unsa ang matarung, nga magmasulundon, sa pag-ampo sa husto nga paagi, ug mahimong may balaan nga pagtahud ug matinahuron.”
Mga litrato pinaagi ni Richard M. Romney, gawas kon gipahibalo
Map © Mountian High Maps
Si Ricardo miingon nga importante kini ang paghunahuna mahitungod ni Jesukristo sa matag adlaw. Uban sa iyang amahan, kanunay siya nga motan-aw sa pinital nga nagbitay sa ilang apartment, ug si Ricardo magbasa og mga kasulatan mahitungod sa kinabuhi sa Manluluwas.
Si Ricardo nagpuyo sa Dominican Republic, diin nag-ipon sa usa ka isla uban sa Haiti. Siya magluto og mga plantain ug sausage, malingaw sa baseball, ug magdula uban sa dulaan nga mga dinosaur ug truck.
Hain sa Kalibutan ang Santo Domingo, Dominican Republic?
kadagatan sa atlantiko
cuba
Haiti
dominican republic
Puerto Rico
Santo Domingo