Mga Mensahe gikan sa Doktrina ug mga Pakigsaad
Pagsalig diha sa Atubangan sa Dios
Samtang kita mopalambo sa atong hugot nga pagtuo ug pagsalig, kita mas maduol ngadto sa atong Amahan sa Langit.
Ang istorya kabahin ni Propeta Joseph Smith nga nagpangita nga masayud hain nga simbahan magpasakop taliwala sa “panagbangga niini nga … nagkalain-lain nga pundok sa mga relihiyon” (Joseph Smith—Kasaysayan 1:11) maoy usa ka istorya sa pagdasig ug paglaum alang sa tanang matinud-anong nangita sa kamatuoran. Unsa nga kahupayan kaha kini ngadto ni Joseph—usa ka wala mailhi nga batang lalaki nga 14 nga adunay yano nga pangutana ug usa ka matinuoron nga tinguha—sa pagbasa sa mosunod nga mga bersikulo gikan sa Biblia: “Ug kon aduna man kaninyoy nakulangan ug kaalam, papangayoa siya sa Dios nga nagapanghatag ngadto sa tanang mga tawo sa madagayaon gayud ug sa walay pagpamoyboy, ug kini igahatag kaniya” (Santiago 1:5).
Kini nga bersikulo naghatag og dakong panabut ngadto sa matang sa relasyon nga ang matag usa kanato kinahanglan aduna ngadto sa atong Amahan sa Langit. Sa pagkatinuod, kini gayud nga bersikulo ang nagpahayag sa malumong mga kalooy ug mga kahilig sa atong mahigugmaong Amahan ngadto sa usa ka anak nga lalaki kinsa miduol Kaniya uban sa usa ka pangutana. Ang Amahan dili kasagarang motubag sa mga pag-ampo pinaagi sa mga panan-awon, sama sa Iyang gihimo didto sa Sagradong Kakahoyan, apan Siya mohatag og mga tubag nga magdala og dako nga kahupayan ug kalinaw. Kini mao ang Iyang saad ngari kanato—nga mohatag nga madagayaon ug sa walay pagpamoyboy, o kasuko.
Isip usa ka batang lalaki, ako adunay daghan nga mga kahigayunan sa pagbutang niini nga saad sa pagsulay. Ako mopamatuod nga kini nga saad tinuod. Bisan kon ako mawad-an og usa ka dulaan o usa ka sinsilyo o bisan unsa nga mahal nga butang nga tingali ingon og walay bili ngadto sa mga hamtong, ang Langitnong Amahan mitubag sa akong mga pag-ampo ug mihimo sa akong hunahuna nga malinawon. Tataw nakong nahinumduman ang pagsalig nga anaa kanako nga ang tubag moabut. Ingon niana ang hugot nga pagtuo sa batang lalaki. Ingon niana kaniadto ang hugot nga pagtuo sa batang Joseph Smith.
Ang ingon niana nga hugot nga pagtuo dili sukwahi sa mga kondisyon ubos diin ang mga pag-ampo gitubag, sama sa gilatid sa mosunod nga mga bersikulo: “Hinoon kinahanglan nga mangayo siya uban sa pagtoo, sa walay pagduha-duha” (Santiago 1:6).
Samtang ako nagtubo, akong nakita nga ang walay pagduha-duha nga hugot nga pagtuo nahimong nagkadugang ang kalisud sa pagbuhat. Ang kalibutan nagtanom og mga liso sa pagduha-duha ug mga pagdaut sa atong mga hunahuna ug mga kasingkasing. Busa, ang pahimangno sa Manluluwas nga kita “mangahimong sama sa mga gagmayng bata” (Mateo 18:3) alang kanako nahimo nga usa ka pagpangita sa tibuok kinabuhi. Akong nakita nga ang hugot nga pagtuo nga “ingon sa usa ka liso sa mustasa” (Mateo 17:20) anaa usahay duol sa akong pagkab-ot apan usahay layo sa akong pagkab-ot.
Unsaon nato nga makanunayon ang pagbuhat niining matang sa hugot nga pagtuo. Ang mosunod nga mga tambag naghatag og panabut niining matarung nga pagpangita: “Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw nga kahayag hangtud sa hingpit nga adlaw.” (D&P 50:24).
Kini mao ang proseso nga giagian ni Propeta Joseph Smith. Sama sa uban nga nag-una kaniya, gisulayan niya ang iyang kaugalingon pinaagi sa makanunayong paggamit sa hugot nga pagtuo ug sa matarung nga paggamit sa pagpili kanunay. Siya mipadayon diha sa Dios, nakadawat og mas daghang kahayag, ug kana nga kahayag nag-anam og kahayag ug labaw kahayag hangtud sa husto nga adlaw.
Usa ka hitabo diha sa kinabuhi sa Propeta adunay usa ka gamhanang impluwensya kanako isip usa ka batan-ong lalaki:
“Usa ka lawum nga oras sa kagabhion si Joseph naghigda ug nakatulog pag-ayo gikan sa ka kapoy. … Pagkataud-taud usa ka naglagot nga mangugubot mihasmag sa pag-abli sa pultahan ug … misikop kaniya ug mibira kaniya gikan sa balay sa dihang misyagit si Emma. …
“… Usa ka grupo ang nagpundok … aron sa paghimo og usa ka konseho. … Pagkahuman sa konseho, ang lider sa manggugubot mipahayag nga dili nila siya patyon apan siya huboan ug latuson ug paksion ang unod. … Giyabo nila ang nag-aso nga alkitran ngadto sa iyang nawong ug misulay sa pagduot niini ubos ngadto sa iyang tutunlan. …
“Human nila gibiyaan si Joseph, siya misulay sa pagbarug, apan natumba og balik gumikan sa kasakit ug kaluya. Siya nagmalampuson, hinoon, sa pagtangtang sa alkitran gikan sa iyang nawong aron siya libre nga makaginhawa. …
“Nagpangita og itabon sa iyang lawas, ang Propeta misulod sa balay, ug mipalabay sa gabii sa paglimpyo sa iyang lawas ug pagtambal sa iyang mga samad. …
“Sa pagkasunod buntag, ingon nga Igpapahulay, ang katawhan nagpundok sa kasagarang oras sa pagsimba. Uban kanila mikuyog ang pipila sa mga manggugubot. …
“Uban sa iyang unod nga nabun-og ug nauwatan, si Joseph miadto sa miting ug mibarug atubangan sa kongregasyon, miatubang sa mga nagdagmal kaniya sa miaging gabii nga malinawon ug madungganon. Siya misangyaw og usa ka gamhanan nga wali ug diha sa samang adlaw mibunyag og tulo ka tumutuo sa Simbahan.1
Dili ako makasugod sa paghunahuna sa kasakit ug sa kahasol nga gilahutay ni Propeta Joseph. Siya adunay igong mga pasangil nga dili mosangyaw sa pagkasunod buntag, apan kini ug sa uban nga mga kasinatian nga susama o mas grabe ang sangputanan wala makahimo kaniya sa pagsibug gikan sa iyang responsibilidad. Unsaon, unya, nga kita makahimo nga nahatagan og katarungan kon kita mosibug gikan sa atong katungdanan tungod sa usa ka gamay nga kalisud o kasamok?
Samtang kita mopalambo sa atong hugot nga pagtuo ug pasalig, kita mas maduol ngadto sa atong Amahan sa Langit.
“Unya ikaw motawag, ug ang Ginoo motubag; ikaw motu-aw ug siya magaingon, Ania man ako” (Isaias 58:9).
“Unya ang imong pagsalig mosamot pagkalig-on diha sa atubangan sa Dios; ug ang doktrina sa pagkapari motuhop diha sa imong kalag ingon sa mga yamog nga gikan sa langit.
“… Ug walay pagpugos nga paagi kini mokanap nganha kanimo hangtud sa kahangturan.” (D&P 121:45–46).
Kini usa ka kahigayunan alang kanako sa pagpamatuod nga si Joseph Smith usa ka propeta sa Dios. Tungod kay siya nangita og kaalam didto sa Sagradong Kakahoyan ug nagbansay og kakugi pagkahuman, atong gitagamtam ang kahingpitan sa ebanghelyo ni Jesukristo. Ang mosunod nga pasidungog ni Presidente John Taylor (1808–87), gisulat sa dihang siya usa ka miyembro sa Korum sa Napulog Duha ka mga Apostoles, larinong naghulagway unsa ang gihimo ni Propeta Joseph Smith alang kanatong tanan: “Si Propeta Joseph Smith ang Propeta ug Manalagna sa Ginoo, nakahimo og mas daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga sukad nakapuyo dinhi. … Siya nagpuyo nga bantugan, ug siya namatay nga halangdon diha sa mga mata sa Dios ug sa iyang mga katawhan; ug sama sa kasagaran nga pinili sa Ginoo sa karaan nga mga panahon, nakasilyo sa iyang misyon ug sa iyang mga buhat uban sa iyang kaugalingon nga dugo” (D&P 135:3).
Unta mahimo kita nga makanunayon nga mogamit sa atong pagpili sa maalamong paagi ug, sama ni Propeta Joseph Smith, magbansay og walay pagduha-duha nga hugot nga pagtuo nga walay pagsapayan sa atong mga kahimtang aron ang atong pagsalig mahimong “malig-on atubangan sa Dios.”
Ang pahimangno sa Manluluwas nga kita “mangahimong sama sa mga gagmayng bata” nahimo alang kanako nga usa ka tibuok kinabuhi nga pagpangita.
Tungod kay siya nangita og kaalam didto sa Sagradong Kakahoyan ug nagbansay og kakugi pagkahuman, atong gitagamtam ang kahingpitan sa ebanghelyo ni Jesukristo.
Ibabaw sa wala: Si Joseph Smith Nagsulat, ni Dale Kilbourn; sa tuo: Children of Light, ni Anne Marie Oborn, sa maayong kabubut-on sa Museum of Church History and Art; border © 2007 ni Cary Henrie
I Saw a Light, ni Jon McNaughton