Pagpalambo sa Inyong Pagtuon sa Doktrina ug mga Pakigsaad
Kini nga tuig mohatag og maayo nga kahigayunan alang sa matag usa kanato sa pagdawat og dakong mga panalangin pinaagi sa pagtuon sa Doktrina ug mga Pakigsaad—usa ka kahibulongan nga basahon sa pagpadayag nga gisulat sa atong panahon ug alang sa atong panahon.
A. Roger Merrill (tunga), presidente; Daniel K Judd (sa wala), unang magtatambag; ug William D. Oswald, ikaduhang magtatambag.
Usahay gipasabut nga handbook sa Ginoo sa Pagpahiuli, ang Doktrina ug mga Pakigsaad naglangkob sa “malumo apan higpit nga tingog ni Ginoong Jesukristo, nagsulti pag-usab diha sa kahingpitan sa panahon.1
Daghang mga miyembro ang nakakaplag na og dakong paghigugma alang niini nga basahon. Usa ka sister ang miingon, “Ang piho nga mga pagpadayag ngadto sa mga tagsa-tagsa ka tawo diha sa Doktrina ug mga Pakigsaad makatabang. Mibati ako nga ako makasabut kanila.” Ang lain mikomentaryo, “Ang Doktrina ug mga Pakigsaad nagtabang kanako nga makasabut sa mga sitwasyon nga akong giatubang tungod kay kini dili na kaayo karaan.” Ang usa ka igsoong lalaki miingon, “Gusto ko sa Doktrina ug mga Pakigsaad tungod kay kini nagtabang kanako sa pagsabut sa priesthood.”
Kami mopamatuod nga ang Doktrina ug mga Pakigsaad mao sa tinuoray ang tingog sa Ginoo sa atong panahon ngadto sa matag anak sa Dios ug nga dako nga mga panalangin moabut ngadto niadtong kinsa magtuon niini. Kami usab motanyag og upat ka mga sugyot aron sa paghimo sa inyong pagtuon niini nga tuig nga usa ka magantihong kasinatian ug mosugyot og pipila ka mga paagi diin ang Sunday School makatabang.
Basaha ang Basahon gikan sa Sinugdanan hangtud sa Katapusan.
Ang Doktrina ug mga Pakigsaad ug ang Kasasysayan sa Simbahan nga Giya sa Pagtuon sa Sakop sa Klase nag-awhag sa mga miyembro sa “pagbasa sa Doktrina ug mga Pakigsaad gikan sa sinugdanan hangtud sa katapusan”2 sulod sa 2009, ingon man usab sa pagkompleto sa matag Dominggo nga basahon nga mga buluhaton, nga gihan-ay pinaagi sa hilisgutan.
Ang pagtuon niini nga paagi nagtabang kanato nga makasabut sa kinatibuk-ang kahulugan sa mga seksyon nga gitun-an ingon man ang mga seksyon mismo. Kini usab mag-andam kanato sa pag-apil sa usa ka mabungahong panaghisgutan sa Sunday School—diin, agig balus, mohatag og dugang nga pagtulun-an ug inspirasyon alang kanato nga magamit sa atong personal ug pamilya nga mga kinabuhi.
Sa inyong matag adlaw nga pagtuon sa kasulatan, mahimo nga mahibaloan ninyo nga makatabang ang paggahin og usa o duha ka adlaw matag semana sa pagtan-aw daan sa piho unsa ang pagahisgutan sa klase ug dayon magpadayon sa inyong pagbasa sa Doktrina ug mga Pakigsaad gikan sa sinugdanan hangtud sa katapusan.
Pagbasa nga adunay Pangutana sa Hunahuna.
Si Brother Renzo Molly Barrios Matias, sa Guatemala, nakakat-on sa gahum sa paggamit sa pagtuon sa kasalutan aron pagdawat og personal nga pagpadayag alang sa iyang kaugalingong kinabuhi.
“Pagkahuman sa Hurricane Mitch milabay sa Sentral Amerika niadtong 2001 ug mibiya sa tanang mga butang diha sa pagkaguba, ako dihay daghang mga pangutana,” siya miingon. “Nagpangita og mga tubag, ako miadto sa usa ka higala nga ako taas og respeto. Siya miingon, ‘Basa sa mga kasulatan. Makit-an nimo ang labing maayo nga tubag sa imong mga pangutana diha niini.’
“Kini nakapausab sa akong kinabuhi,” miingon si Brother Matias. “Pagkahuman og tuon sa mga kasulatan sulod sa taud-taud nga panahon, ako misugod sa pagkakita sa mga tubag sa akong mga pangutana, Nakahimo ako nga makakita nga ang akong kinabuhi adunay kahulugan. Kini mao dayon nga ako mihukom sa pag-alagad og full time nga misyon.”
Sa wala madugay si Elder Matias nag-alagad sa Honduras Tegucigalpa, nagtabang sa uban nga makakaplag og gahum sa pagtuon sa kasulatan.
Ang pagbasa uban ang piho nga mga pangutana diha sa hunahuna nagdapit sa Ginoo sa pagdasig ug paggiya kanato sa atong mga hagit ug mga kahigayunan. Mahimo kamong mosulat og mga pangutana nga sa mainampoon nga paagi iapil sa inyong pagtuon sa kasulatan. Samtang magdawat kamo og mga tubag, kamo mahimong mobati og kadasig sa pagpakigbahin niadtong mga panabut sa Sunday School. Ang mga miyembro sa klase malig-on samtang sila makadungog sa usag usa nga angay nagpaambit sa ilang pagsaksi kalabut sa giunsa sa Ginoo paggamit ang mga kasulatan sa paghatag og personal nga paggiya ug pagdasig.
Pagsiksik alang sa mga Kalabutan, mga Sumbanan, ug mga Tema
Si Elder David A. Bednar sa Korum sa Napulog Duha ka mga Apostoles nagsugyot nga sa tanan natong pagtuon sa kasulatan, kita mangita og mga kalabutan, mga sumbanan, ug mga tema.3
Ang ehemplo sa usa ka kalabutan diha sa Dokrina ug mga Pakigsaad mao ang dugtong sa atong pagkamasulundon ug sa gisaad nga mga panalangin. “Ako, ang Ginoo, mapugos sa pagtuman kon kamo mobuhat sa unsa nga Ako misulti, apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10). Ang atong pagtuon sa kasulatan mahimong mas makahuluganon samtang kita moila niini nga kalabutan ug mohukom sa pagbuhat unsa ang gimando sa Ginoo nga atong buhaton.
Usa ka sumbanan diha sa Doktrina ug mga Pakigsaad gitagik diha gayud sa matang sa libro mismo. Ingon nga ang pasiuna nagpakita, “Kining sagrado nga mga pagpadayag nadawat agi og tubag sa pag-ampo, sa panahon sa panginahanglan, ug gikan sa tinuod nga mga kahimtang sa kinabuhi nga naglakip sa tinuod nga mga tawo.”4 Ang mga pagpadayag personal ug nagtubag sa piho nga mga pangutana kabahin sa mga butang nga ang Langitnong Amahan nasayud nga mahimong “labing bililhon” (D&P 15:6; 16:6) ngadto sa matag tawo.5 Ang sumbanan sa pagpangita ug pagdawat og personal nga pagpadayag mao ang usa nga mahimo natong sundon sa atong kaugalingong mga kinabuhi.
Usa sa labing kasagaran nga mga tema sa tanang kasulatan mao ang “Pangita kanako nga makugihon ug kamo makakita kanako, pangayo, ug kamo makadawat; tuktuk, ug kini pagabuksan nganha kaninyo” (D&P 88:63). Ang mga tema nga sama niini nag-awhag kanato sa pagdawat og mas dako nga responsibilidad alang sa atong kaugalingong pagkat-on samtang kita nagbasa ug nagpalandong sa mga pulong sa Dios.
Samtang ang Doktrina ug mga Pakigsaad dili sa kanunay mabasa nga sama sa usa ka istorya, kini gihiusa sa pagtagik uban sa mga kalabutan, mga sumbanan, ug mga tema. Usa sa mga panalangin sa paghisgut og dungan sa kasulatan diha sa Sunday School mao nga kita mahimong mas makahibalo niini nga mga panabut samtang kita nakigbahin sa atong kaugalingon ug naminaw ngadto sa mga panabut sa uban.
Pagsiksik nga Malig-on ug Paglipay nga Maghiusa
Ang Ginoo nag-ingon nga kon ang mga miyembro sa Simbahan nagkat-on ug nagtudlo sa usag-usa pinaagi sa Espiritu, “ang duha makadawat og kaayohan ug maglipay nga maghiusa” (D&P 50:22). Ang makakagahum nga pagtudlo sa ebanghelyo ug dinasig nga pagkat-on mahitabo kon ang mga magtutudlo ug mga tinun-an makasabut nga ang tinuod nga magtutudlo sa bisan hain nga klase sa Simbahan mao ang Espiritu Santo ug nga ang pag-apil sa klase modapit sa Espiritu sa pagsaksi.
Sa Pebrero 2007 nga tibuok kalibutan nga pagbansay sa pagtudlo ug pagkat-on, si Elder Jeffrey R. Holland sa Korum sa Napulog Duha ka mga Apostoles midapit kanato sa pag-angkon og mas dako nga responsibilidad sa pagkat-on sa ebanghelyo. Mipakita dayon siya unsaon sa dinasig nga mga magtutudlo pagdapit sa mga miyembro sa klase nga mahimong aktibo kaysa mauyunon nga mga partisipante sa mga hilisgutan sa klase.
Si Elder Holland miingon, “Kon kita motabang sa tinun-an sa pag-angkon og responsibilidad alang sa pagkat-on, ug kon kita mopamatuod sa mga kamatuoran nga atong gitudlo, ang Dios momatuod diha sa atong mga kasingkasing ug ngadto sa mga kasingkasing sa atong mga estudyante sa mensahe sa ebanghelyo ni Jesukristo.”6
Samtang ang mga miyembro sa klase mainampoong nagtuon sulod sa semana ug dayon dungan nga nagbasa gikan sa mga kasulatan ug nakigbahin og mga panabut, ang Espiritu Santo mopamatuod ug modala “ngadto sa mga kasingkasing” (2 Nephi 33:1) sa matag miyembro sa klase sa piho unsa ang iyang kinahanglan nga mahibaloan ug buhaton (tan-awa sa 2 Nephi 32:3–5).
Usa ka Personal nga Pagdapit
Samtang kita magtuon ug magkat-on gikan sa Doktrina ug mga Pakigsaad niini nga tuig, ang atong hugot nga pagtuo sa Langitnong Amahan ug ni Jesukristo mahimong malig-on ug ang atong pagpamatuod kabahin ni Joseph Smith isip propeta sa Pagpahiuli motubo. Ang Ginoo moabli sa atong pagsabut, ug ang mga kasulatan mahimong mas importante nga bahin sa atong mga kinabuhi.7
Sa pagsugod niini nga tuig, kami modapit kaninyo sa pag-apil kanamo samtang kami malipayon nga “mosiksik niini nga mga sugo [diha sa Doktrina ug mga Pakigsaad], kay sila mga tinuod ug matinud-anon, ug ang mga panagna ug mga saad nga anaa niini ang tanan matuman” (D&P 1:37).
Ang makakagahum nga pagtudlo sa ebanghelyo ug dinasig nga pagkat-on mahitabo kon ang mga magtutudlo ug mga tinun-an makasabut nga ang tinuod nga magtutudlo sa bisan hain nga klase sa Simbahan mao ang Espiritu Santo ug nga ang pag-apil sa klase modapit sa Espiritu sa pagsaksi.
Mga paghulagway sa litrato pinaagi ni Craig Dimond
Doktrina ug mga Pakigsaad ug Kasaysayan sa Simbahan
Giya sa Pagtuon sa Sakop sa Klase