Mga Ideya ALANG SA Family Home Evening

Kining mga sugyot sa pagtudlo mahimong gamiton sa klasehanan ingon man usab sa panimalay. Mahimo ninyong ipahaum kini nga mga ideya sa inyong pamilya o klase.

“Pagpalambo sa Inyong Pagtuon sa Doktrina ug mga Pakigsaad,” p. 10: Hisguti uban sa mas dagkong mga bata og lainlain nga mga paagi sa pag-adto sa Sunday School nga andam sa pagkat-on ug pag-apil. Dapita sila sa paghan-ay og usa ka piho nga tumong nga mahimong mas maayo nga pagkaandam alang sa Sunday School niining tuiga, o paghan-ay og usa ka tumong sa pamilya nga magkahiusa og trabaho. Tabangi ang gagmay nga mga bata nga mohan-ay og mga tumong nga mohaum sa ilang mga abilidad, sama sa pagdala sa ilang mga kasulatan sa klase, pag-anha sa saktong oras, pag-ampo alang sa magtutudlo, o pagpataas sa ilang mga kamot. Paghisgot og mga paagi nga makatabang kamo sa usag usa nga matuman ang inyong mga tumong.

“Usa ka Ehemplo sa mga Nanagtuo,” p. 36: Ipasulat sa mga miyembro sa pamilya ang mga paagi nga ilang nakita sa uban nga nahimong “usa ka ehemplo sa mga nanagtuo.” Ipakigbahin ang inyong mga lista, ug paghisgot og mga paagi nga ang matag miyembro sa pamilya mahimong maayo nga ehemplo. Paghan-ay og mga tumong nga pagabuhaton.

“Ang Pasundayag sa Talento,” p. H8: Basaha ang artikulo, ug ipasabut kon unsa ang talento nga nadiskubrehan ni Marie nga anaa kaniya. Aron pagtabang sa mga miyembro sa pamilya nga makadiskubre sa ilang natago nga mga talento, ipahulagway sa matag tawo ang usa ka talento sa tawo nga anaa sa iyang wala. Kon itugot sa panahon, mahimo ninyo nga ipadayon kini nga proseso sa pipila ka mga higayon. Tapusa pinaagi sa pagbasa sa Moroni 7:47 ug sa mubo nga gikahon nga kinutlo ni Elder L. Tom Perry.

“Ang Semana ni Ben,” p. H14: Basaha ang artikulo, nagtimaan sa kaisug nga gikinahanglan ni Ben sa diha nga naghangyo sa iyang apohan nga lalaki nga dili mamalit inig Dominggo. Paghisgot kon sa unsa nga paagi ang mga miyembro sa pamilya mahimo nga magmaisugon kon maningkamot diha sa paghupot sa mga sugo Dulaa ang pipila ka mga sitwasyon nga nagkinahanglan og kaisug sa pagpili sa matarung.