Halina’t Pakinggan ang Tinig ng Isang Propeta

Pagpapakita ng Pagmamahal na nasa Puso Mo

Ni Pangulong Thomas S. Monson

Mula sa “The Doorway of Love,” Liahona, Okt. 1996, 4, 5, 6.

Mahilig sa tula si Pangulong Monson. Madalas siyang bumanggit ng mga tula sa kanyang mga mensahe, kabilang na ang tula sa ibaba na, “Sino’ng Tunay na Nagmahal?” Nakalimbag ito sa isang lumang textbook na nakatulong sa pagtuturo ng pagbasa sa mga bata.

Ang pagmamahal ay nagpapabago. Ang pagmamahal ay nagpapagaling ng kaluluwa. Ngunit ang pagmamahal ay hindi lumalago na gaya ng mga ligaw na damo o bumabagsak na gaya ng ulan.

Itinuro ni Jesus, “Isang bagong utos ang sa inyo’y ibinibigay ko, na kayo’y mangagibigan sa isa’t isa: na kung paanong iniibig ko kayo, ay mangagibigan naman kayo sa isa’t isa” (Juan 13:34).

Matututuhan ng mga batang musmos ang aral tungkol sa pagmamahal. Madali silang tumugon sa isang paboritong talata:

“Mahal kita, Inay,” ang sabi ng munting si John;

Pagdaka’y nagsumbrero’t gawai’y kinalimutan,

Lumabas sa hardin doo’y nagduyan,

Ina’y iniwang panggatong ay pasan.

“Mahal kita, Inay,” si Nell naman ang nagsalita;

“Pagmamahal ko’y di masambit ng dila;”

At siya’y nanudyo’t sumimangot buong umaga,

Ina niya’y nagalak nang lumabas at maglaro siya.

“Mahal kita, Inay,” ang sabi ni Fan;

“Hangga’t kaya ko kita’y tutulungan;

Kaysaya ko’t nagpauwi na ang paaralan!”

At kanyang pinatulog ang sanggol sa duyan.

Walis ay kinuha nang dahan-dahan,

At saka nagwalis, alikabok ay pinunasan;

Siya ay maghapong abala at masaya,

Tulad ng gagawin ng isang matulunging bata.

“Mahal kita, Inay,” muli nilang sinabi—

Bago natulog ang tatlong batang munti;

Paano sa palagay ninyo nahulaan ng ina

Kung sino’ng tunay na nagmahal sa kanya?¹

Ang hangaring magpasigla, kahandaang tumulong, at kabutihang-loob na magbigay ay nagmumula sa isang pusong puspos ng pagmamahal. Ang tunay na pagmamahal ay larawan ng pag-ibig ni Cristo.

Tala

1. Joy Allison, “Which Loved Best?” sa McGuffey’s Third Eclectic Reader (1879), 146–47.

Tatlong Kahulugan ng Pagmamahal

Ang pagmamahal ay may di kukulangin sa tatlong magkakaibang kahulugan: (1) Ito ay damdamin sa iyong puso. (2) Ito ay isang katagang masasambit mo. (3) Ito ay makikita sa kilos. Ang pinakamainam na paraan para maipakita ang pagmamahal na nadarama mo sa iyong puso ay sabihin sa iba na mahal mo sila at gawan din sila ng isang bagay na magpapasaya sa kanila.

Tingnan ang mga larawan sa ibaba. Ano ang magagawa ng bata sa bawat sitwasyon para magpakita ng pagmamahal sa isang tao? Kulayan ang apat na tagpo.

Mga paglalarawan ni Scott Jarrard