Tatou te Talanoa ia Keriso
O Le Aumaia o Keriso i Totonu o o Tatou Aiga
I ni tausaga ua mavae, ina ua uma ona ou faalogo o tauloto e se tamaitai talavou o le matou uarota le “O Le Keriso Soifua,”1 sa ou filifili foi o le a ou taulotoina. Sa ou alu ma se kopi laitiiti o le folafolaga pe a ou tamoe i vaveao. Ona sa na o au ma sa le tele foi ni mea na fai ma faalavelave, sa avea lea ma se avanoa lelei ou te mafaufau ai. Ina ua mavae ni nai masina o ou faia lava lenei mea, sa maoae lo’u tulaga faaletino—ma na ausia la’u sini o le taulotoina [o le folafolaga].
E ui lava ina lelei o’u lagona o le “faamaeaina,” ae na sili atu faamanuiaga o le lumanai. Sa oo ina ou mafaufau soo ia Iesu Keriso, Lona soifuaga, ma Lana misiona ma naunau ai ia ou avea atili e faapei o Ia. Sa faateleina lo’u onosai ma lo’u alofa i lo’u toalua ma le ma fanau. Sa ou mauaina le toafilemu sili atu ma le fiafia i mea uma sa ou faia. Ma sa ou lagona le olioli maoae i le tausia ma alofa ia i latou na siomiaina au. Ona, faapei lea o Liae, o le na ‘ai i le fua o le laau o le ola, na ou manao i lo’u aiga ia oo i le tulaga na ou oo i ai (tagai 1 Nifae 8:12).
Sa amata ona ou saili mo ni auala e mafai ai ona ou aoaoina atu le “O Le Keriso Soifua” i la maua fanau. Sa ou iloa na laiti i latou (o le ma ulumatua sa 11 tausaga) ae na fai sina umi tele o lenei folafolaga taua. Ae sa ia te au se naunautaiga, ma ina ua uma ona ou tatalo ma mafaufau soo i ai, na faaali mai e le Agaga le auala e mafai ai ona ou aoaoina lo’u aiga.
Ua leva ona ou faaputuputuina ni ata na otioti mai mekasini tuai a le Ekalesia. Sa ou alu atu i le pusa lea na teu ai ma amata ona toso mai i fafo ata ia na foliga mai e fetaui ma fuaitau eseese i le “O Le Keriso Soifua.” Mo se faataitaiga, mo “O Ia o le Ieova Silisili o le Feagaiga Tuai,” sa ou mauaina se ata o Keriso, o Ieova, o loo talanoa ma Mose. Mo le fuaitau na sosoo ai, “I Lalo o le taitaiga a Lona Tama,” sa ou mauaina se ata o le Tama Faalelagi ma Iesu Keriso o loo tutu faatasi. E lei leva, ae ou aoina mai le tele o ata ma faafetaui ma anotusi e fesootai i ai mai le “O Le Keriso Soifua.”
O Tesema sa foliga mai o se taimi lelei lava lea mo lo matou aiga e amata ai ona taulai atu i le “O Le Keriso Soifua.” Sa fiafia le ma fanau ma matuai auai i la maua taumafaiga. Sa matou faapipiiina ata na matou galulue ai i le matou umukuka. Sa ou matauina i le gasologa o le aso, e tauloto ai e tamaiti ia fuaitau pe a latou tau atu i ata. A taulotoina e tagata uma ia seti o ata e i luga o le puipui, ona matou tuuesea lea ae amata galulue i se seti fou.
O ata taitasi, matou te talanoaina ai le talalelei ma le soifuaga o Iesu Keriso. O a matou afiafi faaleaiga na faatumulia i tala ma lesona e uiga i le Faaola. Sa aoao mai e lo’u toalua nisi o aoaoga i le “O Le Keriso Soifua,” ma na aumaia ai ni malamalamaaga fou.
Na atili anoa a matou tatalo faaleaiga ona sa tuuina atu atili mafaufau o tamaiti ia te Ia lea e ona le suafa sa latou tatalo atu i ai. Sa faatumulia e le Agaga lo matou fale. Sa matou faapei o Nifae ina ua ia tusia, “Ua matou tautalatala ia Keriso, ua matou olioli ia Keriso, ua matou talai atu Keriso” (2 Nifae 25:26). Sa avea lo matou fale o se nofoaga o le filemu sili atu.
Na sasaa mai faamanuiaga, i auala ou te lei mafaufauina. Mo se faataitaiga, e ui lava sa ou taumafai e faafaigofie nisi o upu mo le ma tama laitiiti, o Iosefa, sa fa ona tausaga, ae sa manao lava e aoao le folafolaga atoa i le upu i le upu. Na avea lea ma se aafiaga ootia i se tasi vaiaso i le lotu. Na i ai i le faavaa o le polokalama o le lotu faamanatuga se ata o le Faaola i Ketesemane sa matou faaaogaina i la matou taulotoga. Na tusi i ai Iosefa i le ata ma faapea mai, “Vaai, Tina. ‘Na Ia tuuina atu Lona soifua e togiola ai agasala a tagata uma.’”
I se isi vaiaso sa faigata lo matou taimi i le lotu; sa sili atu le le nofo lelei o tamaiti nai lo le mea sa tatau ona i ai, aemaise lava i le taimi o le faamanatuga. O le po na sosoo ai sa matou talanoa ai i le afiafi faaleaiga e uiga i le faamanatuga. Sa matou talanoaina lona faamoemoega ma uiga e tatau ona matou faaalia a o tufaina atu le faamanatuga. Sa ou fesili atu i tamaiti po o a ni mea latou te mafaufau i ai i le taimi o le faamanatuga. Sa fai mai le ma tama e 10 tausaga, o Sharanne, sa mafaufau o ia i le olaga o Iesu Keriso ma upu mai le “O Le Keriso Soifua.” Sa lei toe manaomia nisi faamatalaga.
I se isi taimi, na faigata ai ona moe Iosefa. Sa le manao e alu e moe ma sa le fiafia. Sa ou fai atu ia te ia e tau mai ia te au ni vaega “O Le Keriso Soifua.” A o amata ona ia tauina mai, sa ou lagonaina le oo mai o le Agaga i totonu o le potu. Sa toafilemu o ia ma toe foi i ona lava tulaga fiafia, na masani ai. I se taimi mulimuli ane, i se isi po ina ua le manofonofo lelei o ia, sa ou toe faia foi [le mea na ou faia muamua]. O le taimi la lea na matuai ese lava lana tali mai: “Leai! ou te le fia manao e fiafia!” Na iloa e le ma tama tama laitiiti le mea e mafai ona fai i le manatuaina o Iesu Keriso. E moni lava, ua atili ai ona moni le Faaola ia i matou uma.
Na uma ona taulotoina e le matou aiga le “O Le Keriso Soifua” i le Eseta na sosoo ai. O se aafiaga aupito maoae lea i le fa-masina na matou mauaina. E tusa lava ua maea le galuega faatino, ou te iloa o aafiaga o mea na matou aoaoina e mafai ona tumau pea i tagata taitoatasi o le aiga mo o matou olaga atoa.
Ou te iloa o le Tama Faalelagi ma Iesu Keriso e moni. Ou te lagona le faafetai i le mauaina o se malamalamaaga sili atu i a Laua galuega ma lagona atili le loloto o lo Laua alofa. Ou te faafetai i le Atua mo le meaalofa e le mafaatusalia o Lona Alo paia, ma mo le aafiaga matagofie e aoao ai e uiga ia te Ia ma taumafai ai ia avea atili faapei o Ia.
Agavale: faamatalaga mai le Keriso ma le Faipule Talavou Mauoa,saunia e Heinrich Hofmann, faaaloaloga a le C. Harrison Conroy Co.; taumatau: ata na tusia e Michael T. Malm