Sau Sauni e Taalo
E le lava le na o le auai mai.
O le pasiketipolo o se tasi lea o mea e sili ona taua i le olaga o Roger Enrique Velasquez Paredes, o le e faaigoa ia Koki aua e sili atu ona faigofie ona ta’u pe a lata ina uma le taimi ae o loo tulaga faigata le taaloga.
O Koki o se tasi o le Uarota a Vitoria, o le Siteki a Puno Peru Tutotonu, e taalo amata i le tulaga pito i luma o le au a Benzon Jazz o alii e i lalo ifo o le 17 tausaga, o se au i le taamilosaga a le lotoifale na lagolagoina e tagata o le Ekalesia i Puno, Peru. Sa lei faiaina lava le au a Koki ma sa oo atu ai i suega siamupini i taamilosaga e lua ua mavae ma na faalua foi ona tulaga lua ai.
O lona aafiaga mai le au sa aoaoina ai Koki e le gata i le tele o mea e uiga i le pasiketipolo ae faapena foi le tele o mea e uiga i le ola ai i le talalelei ma le faatauaina o le seminare.
“E leai lava se eseesega tele o le seminare ma le pasiketipolo,” sa ia fai mai ai, ona ata lea. “E tatau ona ou alapo mo mea ia e lua.”
O le uma ai o tala ula, o loo vaaia e Koki ni mea taua e talitutusa lava i le va o le taaloga e sili ona fiafia i ai ma le talalelei o loo ola ai: e tatau ona e faalogo i le faiaoga, faaaoga mea o loo ia aoaoina mai, ma aua le taofia le faia o mea ua e aoaoina.
Faalogo ma Usitai i Lou Faiaoga
Fai mai Koki e ese le lelei o lona faiaoga, ae o le a leai se aoga o le lelei o lou faiaoga pe afai e te le faalogo. E leai foi se eseesega ma le seminare.
“I le pasiketipolo ma le seminare, o loo i ai ni o’u faiaoga lelei,” o le tala lea a koki. “Ae afai ou te le faalogo, o le a ou le oo lava i se lelei.”
E taumafai le faiaoga e aoao se tagata taalo i mea o le a avea ai o ia ma se tagata taalo lelei atu, e pei o le togiina o le polo i le mama. “O loo faia foi e le faiaoga o le seminare lena lava mea e tasi,” na fai mai ai Koki. Faatasi ai ma isi mea, e taumafai le faiaoga [o le seminare] e fesoasoani i tamaiti ina ia manumalo i lo latou fili o le olaga. “Latou te taumafai e aoao i tatou e lafoai le lalolagi ma faamalosia i tatou ao tatou fetaiai ma faaosoosoga.”
Sa aoaoina e Koki e faapea afai e na o le auai, a le o toleniga pasiketipolo po o le seminare ma le lotu, e le lava lea e avea ai oe ma se tagata lelei atu. E tatau lava ona e faalogo i le faiaoga.
Ia Ola i Mea O Loo Aoaoina Atu
E taumafai lava Koki e faalogo pe a faamalamalama e le faiaoga se mea fou. Ae ua ia aoaoina afai e manao moni lava e malamalama i le mea o loo fai mai ai le faiaoga, e tatau la ona ia faatinoina lena aoaoga.
Fai mai Koki, o le faatinoina o se mea, po o le faaaogaina foi, o se vaega taua lea o le aoaoina. E mafai ona talanoa le faiaoga i le aso atoa e uiga i le lelei o le togiina o le polo i le mama ma faasino atu faafia, ae sei iloga lava e te faataitai ona fai le mea o loo fai mai ai, o le a le mafai ona e iloa e oe lava ia le faiga.
“O le auala lena na ou aoao ai e uiga i le tatalo,” o le tala lea a Koki. Sa aoaoina o ia o le tatalo e le aunoa faaletagata lava ia o le a valaaulia ai le fesoasoani a le Alii. “Ae ana ou le faataitaia lava ou te le iloaina le moni.”
O le faaaogaina o mataupu faavae e tuu atu ai i le Agaga Paia se avanoa e molimau mai ai ia i tatou e moni le mataupu faavae.
“Afai tatou te aoaoina se mea fou ae tatou te le faaaogaina, e pei lava tatou te le i aoaoina,” na fai mai ai Koki.
Faaaoga po o le Maumau
Sa faalogo Koki ao aoao mai lona faiaoga e uiga i le togiina o le polo i le mama, ma sa taumafai o ia e faaaoga le mea sa ia aoaoina. O lea, ina ia alualu i luma, e tatau ia Koki ona maelega i le faataitaiina.
O le maelega o lona uiga o le tuuto po o le tumau i le faaaogaina o mea ua e aoaoina e tusa lava pe fetaiai ma ni faigata.
“E tatau ona ou tuuto,” na fai mai ai Koki. “Afai ou te le toe toleni, o le a ‘elea o’u tomai.”
O se lesona lena sa ia aoaoina ina ua le mafai ona toe toleni mo se taimi ona sa afaina lona isu i se taaloga soona fai sa lei faatulagaina ma ni tama taaalo e matutua atu.
“Afai tatou te le toleni, e le gata ina muta lo tatou alualu i luma—ae o le a tatou le tumau ai foi,” o le tala mai lea a Koki. “E tutusa lava ma le faaleagaga. Afai tatou te uai atu ma faaaoga mea ua tatou aoaoina, e mafai ona tatou aoaoina ni mea se tele. A leai, o le a maumau mea ua tatou maua.”
Aua Le Fiu
Sa faia e tama taaalo o le au a Koki le mea sili e faalogo ai i le faiaoga ma faaaoga mea sa ia aoaoina atu ia i latou. Latou te faataitai mo le tele o itula e faatumauina ai mea ua latou aoaoina.
Ua latou aoaoina foi a mae’a na mea uma, e mafai—ma e faaita tagata—le le atoatoa. “Sa matou galulue malosi,” na fai mai ai Koki. “Sa faavaivailoto le toe faiaina foi i le suega siamupini.”
Ae ona e le faamaonia le maua o le atoatoa i se taimi vave, o le a faigata pe a latou fiu gofie e taumafai. O le taimi nei, ua vaaia e Koki le tele o taui, e aofia ai le faaleleia ma le alualu i luma, lea e maua mai i le taumafai.
Ua vaaia foi e Koki, o le o loo auauna atu o se faifeautalai a le uarota, ia taui o le maelega i fafo atu o le malae taalo. Sa fesoasoani o ia e faatulaga ni po o tifaga, tolauapiga, ma gaoioiga o taaloga ina ia mafai ai ona fiafia ni alii talavou se toalua o lana uarota sa le auai mai i le lotu mo se taimi. “O le taimi muamua, e tatau lava ona matou o e aumai i laua, a leai, e le o mai,” na ia fai mai ai. “O le taimi lenei, ua o mai lava i laua. E laitiiti se taimi na alu ai, ma ni asiasiga se tele, ae o lea ua o mai lava e le aunoa.”
O le va o le taalo pasiketipolo, alu i le seminare, ma le galue i le Ekalesia, ua aoao ai Koki i le uiga o le aoaoga a le Tupu o Peniamina ina ua fai mai, e tatau ona tatou filiga e “maua ai le taui” (Mosaea 4:27).
Ua ia aoaoina foi o taui e maua mai le faataitai i luga ma fafo atu o le malae, ua aoga ai taumafaiga uma.
Ata na pueina e Adam C. Olson