O Le Meaalofa Sili Ona Taua
“E leai se meaalofa e sili atu nai lo le meaalofa o le faaolataga” (MFF 6:13).
Sa fesoasoani Sofia ia Mama e tapena lo latou fale. E asiasi mai faifeautalai i le aso. O i laua o ni malo faaaloalogia i le aiga o Sofia i Kolumipia. Na saunia e Mama se taumafataga faapitoa: o tamale, araisa, ma sana e lulu i ai le pepa faimeaai.
Sa aoaoina e faifeautalai le aiga o Sofia e uiga ia Iesu Keriso ma Lana Ekalesia. Na faatoa lua vaiaso ua tea, na papatisoina ai e Elder Kraig ma lana soa fou o Elder Jessen ia Sofia, o ona matua, ma ona tuagane matutua e toalua. O lea ua lagonaina e Sofia le eseesega i lo latou aiga. Ua tele lava ina talitalie, pepese, ma tatalo.
I le taimi o le taumafataga sa faalogologo ai Sofia i ona matua ma ona tuagane o latou talanoaina ma faifeautalai ni mau. Ina ua uma ona tapena ipu, sa faapea mai Elder Kraig, “O le a ou toe foi atu i lo’u aiga i le vaiaso fou.”
Sa lei iloa e Sofia o le a vave ona alu o ia. Sa tau tagi o ia. Sa tilotilo vave atu Sofia i ona tuagane. Sa tau fai melo tagi foi i laua.
Sa fogifogi isu foi Elder Kraig i ni nai taimi. “E i ai sa’u meaalofa mo oe,” sa ia fai atu ai ia Papa. Sa ia toina mai se afifi mai lana ato faafafa. “O mea nei mo oe ma ou atalii.”
Sa tatala e Papa le atigipusa ma to mai i fafo ni ofutino Lotu papae se ono. Sa le tautala o ia mo se taimi umi. “E le mafai ona matou taliaina se meaalofa matagofie naua,” sa ia fai atu mulimuli ane ai.
Sa faalogoina e Sofia le faanoanoa i le leo o Papa. Sa lei i ai ni ofutino papae mo Papa ma tama, ma sa iloa foi e Sofia na manao Papa e faaali le faaaloalo e ala i le ofuina o ni ofutino papae pe a latou o i le lotu.
“O le a ou le manaomia ni ofutino se tele pe a ou toe foi i lo’u aiga,” na fai mai ai Elder Kraig. “O le a e faia se mea lelei mo au e ala i lou faaaogaina.”
“Ae e leai sa’u meaalofa ma oe,” na fai atu ai Papa. Sa ia faasino atu i le Tusi a Mamona. “Ua uma ona e aumaia ia te i matou le meaalofa sili ona taua. Ua e aumai ia i matou le talalelei a Iesu Keriso.
O le aso na sosoo ai sa tonu ai ia Sofia e fai se meaalofa mo Elder Kraig. Ina ua uma ona la talanoa ma Mama, sa tonu loa o le a ia faia se tamai palanikete lalaga e ta’ua o le serape. Sa ia faanoi maia le masini suisui a lona tina e lalaga ai palanikete, filifili lanu o vulu, ma galue ai loa i aso uma pe a tuua le a’oga ma uma ana feau. A sese ona tamailima, ona ia toe talatalaina lea ma le faaeteete ia vulu ae toe amata.
Mulimuli ane ua maea le serape. Sa faamoemoe o ia o le a fiafia Elder Kraig i le lanu enaena vaivai ma lanu kulimi sa ia lalagaina faatasi. Sa ia afifiina le serape i se pepa enaena.
I le aso o le asiasiga mulimuli a Elder Kraig i lo latou aiga, sa tuuina atu ai loa e Sofia ia lana meaalofa.
“Faafetai lava, Sofia,” na fai mai ai Elder Kraig. Sa maligi ona loimata. “O le a ou le faagaloina lava oe po o lou aiga.”
“Ma o le a matou le faagaloina foi oe,” na fai atu ai Sofia.
Ata na tusia e Jim Madsen